Gu Vovo Burosua Si Adia Ani Kparakaha!
1. Ginihe ani ka kparakaha rogo Ngbangba, na ndu kusa gu burosua re nga gine?
1 Ti regbo gu gaani bakere dunguratise riihe angia “Oni Ningere Angera Kindi!” rogo gu garã nangia 2009, i kusi vovo burosua gaha bangua kekepai aya, The Bible—What Is Its Message? Rogo Ngbangba, adungurati rogo zagino dunduko nika kparaka gi burosua re tipa bambata regbo. Gini undo aboro nika gbiaha be gi burosua re rogo gaani dagbarago? Badungu aboro na kina wiri bete inohe beyo gbua tipa Ziazia Kekeapai, gbe aguyo du rogo agu apambori angianga ga aKristano ya. Sidu tie, gi burosua re nasakapai ti kpewaraga biata nga, i kusihe tipa si yugu “gu memeapai du rogo Ziazia Kekeapai.”
2. Wai rengbe ani ka kparaka gi burosua re?
2 Wai Ka Kparakaha: Ani rengbe ka pepai wa gere: “Ani naida ka ino gu bipai du mo nani tipa gupai gi veresi re agumbaha. [Oni gedi 2 Timoteo 3:16.] Badungu agu aboro ani afura naayó ima ida kuti gipai re; ono agu akurayó naberã gupai nga Ziazia Kekeapai nga kungbo wene buku gbua. Ginipai mo aberãha tigamo tipa Ziazia Kekeapai? [Oni Mbu ní tipa ní karagapai.] Ka ani vura du kina boro rogo gini ngbatunga pambori vurũ, wene ndupai kinaho si aida ani wisigi Ziazia Kekeapai awisigo ti ni nisarani. [Oni gedi gu tonatona genewaraga du barii 3 kpewaraga.] Wa oni kaa geda gu bawene gurusigurusi apai du rogo gu burosua re tipa Ziazia Kekeapai, oni nika bi gupai abi yo nika ngbati roni nga, Ziazia Kekeapai na bangisa riipai sa rogoho gbiati bangisa pangbanga a sa.”
3. Gini kura berãpai rengbe ani ka mangasunge nani, gbe ho du ani ni rogo gu dagbarago du agu aboro rogoho adunga ni aKristano ya?
3 Gu kura berãpai du re tipa ka mangasunge nani ho ani atungusapai ni rogo gu ba du dungu aboro rogoho nga aguyo du rogo agu apambori angianga ga aKristano ya: “Ani naida ka ino gu bipai du mo nani tipa gupai gumba yó ho rogo gi veresi re (watadu rogo gi ziazia buku re.) [Oni gedi Atambuahe 37:11.] Oni nabihe nga ka gi sangbaanebi re digisi tihe nzunzu, gi zegino re du wai? [Oni Mbu ní tipa ní karagapai.] Gere nga kpia gu maabangirise na wasa rengbe ngbatunga aboro dunduko na gayó aidapase ka gbiaha be Ziazia Kekeapai.” Oni gedi gu genewaraga du barii 3 kpewaraga, na ki fu gu burosua re funi.
4. Wai rengbe ani ka mangasunge na gi burosua re tipa ka tona wisigo Ziazia Kekeapai na boro?
4 Oni Tona Wisigopai na Aboro: Ho ani ka karagatirani ni fuo gu irakporo re, si naida ani tingidi ní naapa gupai ani asakipai tipaha na ki wisigi genewaraga sa watadu ue rogo gu riipa ani asakipai tipaha nimanga ani sunge na agu asanahe du ti digido gu kpewaraga ani asakapai tipaha re. Na kangia ani naida ka gumbapa gu buku funi nga Bible Teach ti kina gu regbo re nibasa, ani gedi gu kekepai du ti kpoto gu burosua re na ki fu gu buku re funi na ki sana ní nga gini kapita ngba tiní dagba agi akapita re, na ki asadi ka geda genewaraga sa watadu ue rogo gu kapita re nani wa sa. Ani dunduko, ani tungusinga pai atungusa rogo Ngbangba tipa ka kparaka gi burosua re!