Gu Tingida Pakpio Yesu Naye Re Nika Sa Rani Ani Yugu Tambuahe

1. Gini kparakpara mamu nika du ti regbo Tingida Pakpio Yesu?

¹ Gu Tingida Pakpio Yesu nika du rogo Zerekpe 14 nika fu kparakpara mamu furani tipa ani sonosi gaani tambuahe na ki yuguhe tipa ga Yekova wene sino. Gu pangbanga du rogo Ruka 17:11-18 nayugo wai Yekova na Yesu abi tambuahe. Si nafu kina gberarago nga, dagba agu aboro ngbataka naadu bawe Yesu ahusi yó, boro sa gbua nayugu tambuahe. Kumbatayo, gu gamunihe nga ga motumo tumorii nika dia akaza dunduko kusayo na ki ye na nyenye unga ku auru kpotosende! Zanga kapa, ti gu regbo re, ani nikaa fu tambuahe afu fu Yekova na aˈuru dunduko tipa agu amaku re. Ono wai rengbe ani ka yugo tambuahe vuru agu aposo naye re?

2. Wai rengbe ani ka sonosa tambuahe tipa motumo tumorii?

² Oni Sonosi Tambuahe: Boro nasonosa tambuahe berãni yo. Tipa ka undo rani ani sonosi tambuahe tipa motumo tumorii, i ima maa ringbisapai tipa kparakpara geda Ziazia Kekeapai nga ga Tingida Pakpio Yesu rogo badungu aba, wa gu nga rogo gu wiri buku nga Wisigo Ziazia Kekeapai Na Aˈuru Dunduko. Oni rengbe arengba ka manga gu geda Ziazia Kekeapai re sa wa aborokporo. Wa ani nikaa berãkuriihe na kini fura tipa gupai Yekova na Yesu namangihe furani, gaani tambuahe tipa motumo tumorii nikaa kio akio kina kumbatayo. Gipai re nika sa gaani sino mangaapai a si du niwenehe.​—2 Kor. 5:14, 15; 1 Yo. 4:11.

3. Rogo gini agene rengbe ani ka yugo gaani tambuahe tipa motumo tumorii ti regbo Tingida Pakpio Yesu?

³ Oni Yugu Tambuahe: Boro nayugo tambuahe rogo mangapai yo. (Koro. 3:15) Gu boro ngbataka nadu na tambuahe re amangi ome tipa ka gbia Yesu ka tambua ko. Na ko aima peka pa wai Yesu ahusi ko fu kura aboro na ngbarago. (Rk. 6:45) Ya mo gu tambuahe du ani na ni tipa motumo tumorii afõngbaduraniyo ani mangi tua zaaza tipa ka yamba aboro tipa Tingida Pakpio Yesu? Tungusapai ni moundo abazakigene watadu kiiso gaani sunge tungusapai ti regbo Tingida Pakpio Yesu nga kura wene gene rengbe ani ka yugo gaani tambuahe rogoho. Ka ani du na ndikidi tambuahe tipa motumo tumorii rogo gu nyemu nika ngia ga Tingida Pakpio Yesu, ani nika dia aboro kugume na ki karagapai kuti gayo asanahe.

4. Wai rengbe ani ka manga gi Tingida Pakpio Yesu re zanga bira tirani kumbatayo?

⁴ Ya mo yangara Tingida Pakpio Yesu du ani nika mangaha re? (1 Kor. 11:26) Ani ainongo te. Ono gupai ani nainihe nga fuo si susi, gure nga gu kparakpara mamu re ima susa a. Ya mo oni amangasunge na gi mamu re? Gaani afugo tambuahe na gu makiapai nga ga kpotorani yo yengo na ngbarago fu Yekova, nga Bafu motumo tumorii.​—Tam. 19:14.