Oni Wiriki Gayo Idapase
1. Gini buku ani nika tona wirikaha ti regbo Gu Wisigo Ziazia Kekeapai Nga ga Dungurati tona rogo Tanvuo 19?
1 Rogo gu poso nika tona rogo Tanvuo 19, 2015, ani nika tona wirika gu buku nga Oni Wiriki Gayo Idapase rogo Gu Wisigo Ziazia Kekeapai Nga ga Dungurati. Gi buku re nafura tipa gu idapase nga ga agu akumba na ade du payo rogo Ziazia Kekeapai du bangeyo nga 14. I ake gi buku re rogo gu gene nga si undo rani ani naabi gi ruru aboro re abi berã rani yo, wa ndikidi aboro nga agu yo nagbiatiyo na dungu akpakarapai wa i aairiso Yekova. Gi buku re nika undo rani a ani wirikipai ti agu apangbanga du yo nga gu rengbe ka undo rani areme.—Eb. 6:12.
2. Oni sakingo bete agu apai du rogo gu buku nga Oni Wiriki Gayo Idapase.
2 Agu Apai si Afura Tipaha: Gi buku re naundo rani ani ini gu regbo na arago agu aboro re araki rogoho. Kurigure, akapita nga ga gi buku re dunduko du na gu papara kekepai rogoho nga, “Asanahe Tipa Berãkuriihe . . . ,” nga gu nika undo rani ani berẽkurii agu apangbanga du rogo yo na ki mangipai kuti agu apai ani nawirikihe. Gi buku re na agu asura rogoho naundo rani ani bi agu apangbanga du yo wa gupai namanga kina awere.
3. Ginipai rengbe ani ka mangaha ka gbia undo ti wirika gi buku re?
3 Wai Rengbe Ani ka Gbia Undo Behe: Gu buku re tona na gu waraga naye be Riigbu Bipasunge, nga gu nangarasa rani na agu afugo nga: “Oni berẽkurii agu apai naamanga; kini bihe wa oni adu kina yo. Oni asadi ka maa tironi ku rogo agu apai agu aboro du payo rogo Ziazia Kekeapai adu rogoho, na ki bi agu apai i abihe. Oni berẽkuriipa wai i amangipai sa agu apai i adu rogoho na wai oni abihe nga ka oni amangipai wa ka si adu nga oni du.” Maatise ku rogopai yo nga maa kpia kungbopai ku berãseyo te, ono si nga ka bi wai pai amangi berãseyo na kini bi agu aboro a du gu pangbanga re tipa yo. Tipa ka manga gipai re, si naida regbo na berãkuriipai. (Nem. 8:8) Ka si du nga ani tona wirikapai bebere kapita yo, si naida gu wirina nanungusaha di asekonde wa 30 kuti 60 tipa ka fugö agu apai ani awirikihe rogo gu poso nasusi. Ka si du nga oni ata danga ti gu papara kekepai nga “Asanahe Tipa Berãkuriihe . . . ” te, ni rengbe ka sanahe sa watadu ue nga ga fugöpai ti digidoho.
4. Tipagine si aida ani wiriki gu buku ti ni nga Oni Wiriki Gayo Idapase?
4 Ani naraka rogo gu zegino naasada tihe naˈuru dũ ka zeresa gaani idapase rogo dungu agene. Gi buku re nga gamunihe be Yekova tipa ka undo rani ani nyakasi gaani idapase. (Yak. 1:17) Ani gbianga undo agbia ti gi buku re ni ye ani kupati Gu Wisigo Ziazia Kekeapai Nga ga Dungurati dedede na kini fu akaragapai wa ani kaa wirikaha wa sa na akuarani!