Oni Mangi Dezirepai Sirisiri Tipa ga Mbori Kindo

1. Ginihe ani ka tona wisigoho ti regbo gaani Wisigo Ziazia Kekeapai Nga ga Dungurati ti tonatona poso nga ga Marungu 14?

¹ Rogo gu poso nga ga Marungu 14 2011, ani nika tona wisigo gu buku nga “‘Bearing Thorough Witness’ About God’s Kingdom” ti regbo gaani Wisigo Ziazia Kekeapai Nga ga Dungurati. Gi buku re nafura tipa agu apangbanga du rogo gu kitabu nga Amokedi ngba wene gene. Gu boro nagedaha rago nika ngbaangba tiní ka bi wai apai amanga nikina boro ipo. Gi buku re asakanga pai tipa averesi nibasasa te, ono si nayugo kina agu apai rengbe ani ka wirikaha ti agu apangbanga du rogo Amokedi, na kini undo rani ani bi wai rengbe ani ka mangasunge nani.​—Rom. 15:4.

2. Oni sakingo bete agu apai du rogo gu buku nga Bearing Witness?

² Agu Apai Du Rogoho: Gu tonatona afugo du ti kpewaraga 2 nga wene waraga wasa Riigbu Bipasunge nakedi he tipa ka yugo wai i aida ani gbia undo be gi buku re. Tona ti ue kapita, kekepai gu du bariihe nayugo gu memeapai gu kapita re afura tipaha, na gu veresi du bariihe nayugopa gu papara Amokedi gu kapita re asakapai tipaha. Dungu akapita na asanduki pangbanga rogoho nga gu napepa agu apangbanga du tipa aboro, arago, na agu apai namangi tipa yó. Gu bakiki rago mbuyo ho pangbaha re, si tipa ka undo rani ani keke rukutu apai ti ni. Gu buku re na futufutu asura rogoho nayugopa agu arago du paha rogo Ziazia Kekeapai na si naundo rani ani bi gu nyanyaki apangbanga du rogoho na kini berẽkuriihe rirani yo, na gaha yangara kpewaraga nasakapai tipa agu apai agu asura re afura tipaha nibasasa. Ti bambata kpotoho ku vuruhe yo gbiati gu yangaraha, gbakigbaki kpiaarago gudu yo naundo rani ani pekefuo gu sonakumbatayo agu airisimbori nadu rogo bambata sa kama agarã amangihe wa i tona ka gbataka wene pangbanga ku “digida sende yo.”​—Amo. 1:8.

3. Wisigo ani gi kitabu nga Amokedi re nika undo rani ani gbia akaragapai sa gini ngbatunga nyanyakipa asanahe?

³ Akaragapai Sa Nyanyakipa Asanahe: Wisigo ani gu kitabu nga Amokedi re nika undo rani ani rugutirani wenengai na gu nyanyakipa asanahe du tipa gu sunge tungusapai nga ga aKristano. Nikpiapai, gini ngbatunga sunge na pangbanga i aino ndikidi apefuo Yesu Kristo ti ni? Da narugapa gi sunge tungusapai i amangaha rogo zegino dunduko re na wai du ní amangaha? Gini ngbatunga amomu rungosiro gbiati sogote aye nani fu ga Mbori abamangisunge? Gini ngbatunga sunge ziazia toro amangaha nibipa gaani sunge tungusapai?

4. Wai rengbe ani ka gbia undo wenengai ti wisigo ani gi buku re?

⁴ Tipa ka gbia undo wenengai ti gi buku re, ani ima wisigoho mbata fu regbo, na ki mbakaditirani tipa ka karagapai ti regbo wisigoho rogo adungurati. Oni du pati adunguratise dunduko, na kini berẽkuriipa wai rengbe oni ka manga agu apai oni nawirikihe ho oni atungusapai ni. Wisigo gi bawene buku re fõnga ngbaduraniyo afõ ani mangi dezirepai sirisiri tipa ga Mbori Kindo!​—Amo. 28:23.