Awetekapai Tipa Waraga Dunguratise Nga ga Gaani Raka na Sunge
NGBANGBA 2-8
AŨKUMUKO ROGO FUGO MBORI YO | GATE 39-40
“Moize Apekefuo Arugapai Sirisiri”
(Gate 39:32)
Ya Mo Yekova Ini Roni?
Ono tipa Moize tigako, ko angia “bayee boro ni rengo, ki susi agu aboro nadu ri kpotosende dunduko.” (Geda 12:3) Ko ayugupa gako du ni bayee boro na ni boro umbasitise nika ko nyanyaki kuti ga Yekova rugapai. (Gate 7:6; 40:16) Pai ho rogo Ziazia Kekeapai nayugo gupai nga Moize anaatikango na Yekova riipa agu agene Yekova anaamanga apai ngbaha te, ko aazinganga a ho Yekova anaafu arugute fuko tipa ko mangipai kutini te. Ni kpiapai, Yekova afu arugute tipa wai si aaida ko dua banye. Agi arugute re akodi gu rangi gire na bange agu agire si aida aYisaraere mangisunge nani tipa ka manga gu bambu roko naadu tipa gu banye re. (Gate 26:1-6) Kangia babiapai gu duho nangerakurii gu sunge oni amangaha na kini fu arugute furoni na agu afutufutuhe dunduko tipa gu sunge re, rago rengbe arengba ka gberã tironi. Ono tie, Yekova nga gu bangerekurii sunge du ni rengberengbe ko, ko nafu sunge fu aboro dunduko na kidu na kido kuti gako amoyambu. Ho ko afu arugute ni na futufutu he dunduko, wene ndupai kinaho ko amangaha ti ni wo. Oni kparia gupai nga, Moize aazinganga na Yekova watadu ka berãha nga Yekova naumbasi pako, si du fuko dendekere arugute ti ni fuko wa gure te. Ko aaberãnga ha nga Yekova aadia gako ranirii beko a te. Kuba gure, Moize amangi ome ka bi gupai nga agu aboro naamangasunge re, i mangi he ‘kina wai’ Mbori aruguhe. (Gate 39:32) Nairiwo gu umbasitise re! Moize aini gupai nga ga Yekova sunge du ngaha na Yekova aamangasunge na ko tipa ka digiso gu sunge re.
(Gate 39:43)
(Gate 40:1, 2)
(Gate 40:16)
Oni Niruru Roni Rogo Apai Dunduko?
AEbere 3:5 naya: “Mose adu ni irarengo . . . moyambu” watadu niruru ko. Gine nasa gu nebi nangia Mose ko du niruru ko? Rogo sunge mbakada bamburokoo nga ga irisombori na ki darĩ he kuari, “[Mose] amangi he kuti agu apai dunduko Yekova arugu ko na ni.” (Gate 40:16) Wa du ani ni airisi Yekova, ani nayugo gaani ruru sino rogo mangasunge fuko ni giasangba. Si nakoda gupai nirengo nga ani kakuti Yekova niruru rani baraho du ani ni rogo kere asada. Ono tie, anga padu ani na diabese rogo mangapai kuti kikindigi aˈasada ni gu yangarapai nayugo padu ani niruru rani te. Yesu aya: “Gu boro du niruru ni rogo gupai du ni toonihe, ni niruru ni a rogo gupai du ni bakerehe, na gu boro adunga niruru ni rogo gupai du ni toonihe ya, anga ni a niruru ni rogo gupai du ni bakerehe te.” (Ruka 16:10, NW) Si naida ani nye kindi ni kina ruru rani zavura rogo agu apai nawira wa si ni rukutuhe vurũ.
Gbata gu Nyanyakipa Ahe Nga ga Toro
(Gate 39:34)
it-2-E kpe. 884 genewa. 3
Gu Kpoto du wa ga Agbodi
Wai AYisaraere Anaagbiaha. Ka si du nga gu kpoto gumba yo paha rogo Ziazia Kekeapai yo aabipa kura ngbatunga kparakpara anya naadu na kpotora wa ga agbodi, sidu, gu sanahe rengbe ka kura nga wai gu si arengbe kadu taata fu aYisaraere i gbia gu kpoto naadu wa ga agbodi. Dedede, agu anya du na kpotora wa ga agbodi re i nagumba para nga ami naraka gbe rogo agu aba nga Arctic na Antarctic, ngbatunga agi anya re nakpinyemu kaa raka gbe rogo agu aba du ni fofoihe. Areme, bete agi anya re naraka kindi rogo papara gu Baime nga Mediterena, na rogo gu kura aime du ni uruuru he. Rogo gu dungu kama agarã susi, aboro ima imo badungu agi anya re na si ki sa gupai nga bangera umba, na si nangera wa ti agu aregbo i aakeka Ziazia Kekeapai ti ni agi anya re aima du ni badungura rogo gu baime nga Mediterena na Zamba Baime yo. Bara rogo gu garã nangia 1832 ga Calmet Dictionary of the Holy Bible naadu rogo pa-Ngirisi yo, (kpe. 139) agumba gupai nga: “Agu anya du na kpotora wa ga agbodi re, ami gudu rogo gu badungu akisanga nga ga Zamba Baime, rogo gu ugu rago nga ga Sinai rimi ku rogo baime.”—Mo bi The Tabernacle’s Typical Teaching, nga ga A. J. Pollock, London, kpe. 47.
(Gate 40:34)
w15-E 7/15 kpe. 21 genewa. 1
Ya Mo si Naida Aboro bi gu Sunge Abi mo Amangaha?
Ho i anyasi sunge dua banye ni, bakamikami dubo, “ki dadi ri bamburoko dungurati, ga Yekova taarimo ki hiisi banye.” (Gate. 40:34) Gipai re aayugo gupai ziazia nga Yekova aima ida na gu sunge re! Mo naberãha nga aBesarere na Oriaba adu wai ti gu regbo re? Wa vura duhe nga rimoyo aadunga ni keke kekehe ti agu ahe i ambakadihe te, i aima du na ngbarago ni inoyo gupai nga ga Mbori maku aima du kurii agu ahe dunduko i ambakadihe. (Snz. 10:22) Nirengo, i aima du na bakere ngbarago rogo agu agarã nangbefuo ho, ho i aabi agu ahe ni i ambakadihe i ni mangisunge na ni kindi ti ngba ga Yekova sunge. Ho aBasarere na Oriaba nika zinga ni be kpio rogo vovo zegino, zanga kapa, i nika duadu na ngbarago ka ino gupai nga i amangisunge na banye tipa ndikidi irisombori tipa agarã 500!
Geda Ziazia Kekeapai
(Gate 39:1-21)
NGBANGBA 9-15
AŨKUMUKO ROGO FUGO MBORI YO | PA AMOTUMO 1-3
“Ndu Gupai I Anaafu Amotumo Ti Ni”
(Pa Amotumo 1:3)
(Pa Amotumo 2:1)
(Pa Amotumo 2:12)
it-2-E kpe. 525
Amotumo
Zozo amotumo. I anaafu zozo amotumo dunduko fu Mbori, anga paparaha ho irisimbori anaambuhe tipa ti ni te. (Oni ringbisihe na Abasa 11:30, 31, 39, 40.) Gipai re anaayugo pa sana Yekova ko idi pa gu motumo ingapai i anaafuhe wa sa na ni. Yesu Kristo afu tiko dunduko ni “zozo motumo.”
it-2-E kpe. 528 genewa. 4
Amotumo
Amotumo nga ga riahe. I anaafu amotumo nga ga riahe wa sa na amotumo zereda, zozo amotumo, na amotumo ingapai, na berewe a i anaafuhe ni makawa; ti kura aregbo nisaha. (Gate 29:40-42; Pa Mot 23:10-13, 15-18; Geda 15:8, 9, 22-24; 28:9, 10, 20, 26-28; kapi. 29) I anaafuhe tipa ka yugo tambuahe tipa ga Mbori weneringise rogo fu amaku na zugö ahe wenengai. Dedede, i anaafuhe wa sa na nzeme gbiati wene fuõngua. Amotumo nga ga riahe ani rengbe kadu nga fufurũ ngungo, ayaaya kpokuta zanga na agbooro ti ni watadu zozo kpokuta puta yo ho riburibu, na gu kpokuta i amangaha na nzeme rii kpasakpasa saani. I anaamaa bete gu motumo nga ga riahe rii gu bamotumo nga ga zozo motumo, na aboromotumo ki ni ri gu kuraha, nibipa amotumo zereda irisimbori naanari he. (Pa Mot 6:14-23; 7:11-13; Geda 18:8-11) Motumo ho dagba agu amotumo nga ga riahe naanidu na agbooro rogoho watadu “nzeme anyege” (si nawira wa i aafura tipa ime vurumo watadu ime zuzu angua) nga gu naima rengba ka saha si fukö te.—Pa Mot 2:1-16.
(Pa Amotumo 3:1)
it-2-E kpe. 526 genewa. 1
Amotumo
Amotumo zereda. Agu amotumo zereda Yekova anaida na ni aayugo pa manga zereda na ko. Gu irisimbori naafuhe, anaarihe na gani aborokporo (rogo vurukporo banye; ringbisihe kuti gaha asino, i adua abasura vuru gu remu dada rago naadadi vurukporo banye kirikiri; yekaru yo, i aima mbakada ba yo tipa ririahe). Gu boromotumo naazo gu motumo re anaagbia paparaha, na gu boromotumo naamangasunge ni gu uru re banye yo kini gbia kuraha. Ni sangbanaha, Yekova kini gbia gu wene guzuguzu fuõ zozo nzeme naagundo ku ariyo. Kure, nga gu narukuba unga, si i afuhe fu Mbori ni gako. Rogo gi gene re, si adu wa, aboromotumo, airisimbori, na Yekova adu kina sa pati riahe, nga gu naayugo gu pagume nga ga zereda. Gu boro nanaarihe ni kidu ni birikobiriko ni (ia gu biriko i nagumbapaha rogo Andiko yo) watadu naaniri gu posio i abandaha si kisusi gu regbo i aringbisipaha (rogo gu ba duni fofoihe si aima rengba ka tona kaa zirã) si ani idi i kpara ni kusayo ti gani aboro ki imi ni. Ni aima birikosi gu riahe re, mbiko padu ni ni bibiriko ni watadu mbiko pa ri ni guhe naadu ni gbegberẽhe bangiri Yekova Mbori, na rogo gi gene re ni kini yugu zanga irisa kuti ziazia ahe.—Pa Mot 7:16-21; 19:5-8.
Gbata gu Nyanyakipa Ahe Nga ga Toro
(Pa Amotumo 2:13)
(Yezekere 43:24)
Memeapai Rogo gu Buku Nga Pa Amotumo
2:13—Tipagine si aida ti ni i naaba tikpo ‘ti amotumo dunduko’? I anabanga tikpo ti agi amotumo re tipa si hi te. Aboro namangasunge na tikpo rogo zegino dunduko tipa si banda he ka si ziringa ya. Si nawira i anafuhe na amotumo mbiko si narukuba guhe agberanga ya na afunga ya.
(Pa Amotumo 3:17)
it-1-E kpe. 813
Nzeme
Ndu gupai i afu gu ndiko re ti ni. Tii gu mozunga nga ga aNdiko, kure gbiati nzeme adu ni kparakparaha fu kina Yekova sa. Kure na unga rogoho, kina Yekova sa rengbe ka fuhe; sidu, si fu kinako sa. (Pa Mot 17:11, 14) I anaabi nzeme ni gu papara posio nya nangba angba gbe kisusi. Pa fu nzeme nya ni motumo anaayugo gupai nga gu boro re ima ino gu rengo nga gu papara nya ngbaangba kisusi, si fu Yekova, nga guko nafu ahe kpaima, na si anaayugo gu nyemupai du gu irisimbori re na ni kafu gu he ngba kisusi fu Mbori. Mbiko wa si anaayugo pa ga aYisaraere ranigose kafu guhe ngbaangba kisusi fu Yekova, i agumba gupai tipaha nga i naazoho rii bamotumo ni “riahe” na ni “ni guzuguzu fuõhe” fuko. (Pa Mot 3:11, 16) Sidu, ri nzeme angia kua gu ndiko naadu tipa guhe naadu ni kparakparaha na ni ziaziaha fu Mbori, na si angia rimo ku rogo gu rengo du Yekova na ni. Ri nzeme anaaye na sarangbanga kina kuti kpio. Ono tie, nzeme aadunga wa kure te, i aima rengba ka mangasunge na nzeme tipa gu kura apai, gbe, nzeme gu nya naanikpi ni sa ru watadu guru nyarinde ani imi ru.—Pa Mot 7:23-25.
Memeapai Rogo gu Buku Nga Pa Amotumo
3:17. Wa duhe nga i anabi nzeme nibawene papara pasio kisusi, si ziazia nga, pa za yo he ti rihe anyakasi gupai fu aYisaraere nga, si naida i fu bawene papara pasio fu Yekova. (Bambata Pai 45:18) Gipai re natingida rani na gupai nga, si naida ani fuku kina agu ahe fu Yekova ngbaki kisusi.—Asanza 3:9, 10; AKorosaio 3:23, 24.
Geda Ziazia Kekeapai
(Pa Amotumo 1:1-17)
NGBANGBA 16-22
AŨKUMUKO ROGO FUGO MBORI YO | PA AMOTUMO 4-5
“Mo fu Guhe Fu Yekova Ngba Kisusi”
(Pa Amotumo 5:5, 6)
it-2-E kpe. 527 genewa. 9
Amotumo
Amotumo nga ga tindika. Agu amotumo nga ga tindika aningia agu amotumo i anaafuhe a tipa ingapai, tipa ai ngbatunga tindika naakoda ingapai. Si anidu tipa kparakpara aingapai nga gu boro anaagbiaha, na si adu tooni kia ti kura amotumo nga ga ingahe mbiko si anaakaraga rengo kubaha. Singia rengo tipa Yekova watadu rengo tipa gako ziazia rikaaboro i agbarasipaha. Gu motumo nga ga tindika adu tipa ka sa ngbarago ti Yekova tipa gu rengo i agbarasipaha, watadu ka karaga gu kura arengo nga ga mozunga fu gu boro ingapai sa gani berã na ka bata be gu mbusa du tipa gani ingapai.—Oni ringbisihe na Yes 53:10.
(Pa Amotumo 5:7)
w09-E 6/1 kpe. 26 genewa. 3
Ko Ima Inopa Gaani Azangarengba
Ndiko afura tipa wai Yekova na ini agu apai du tipa rani ki ya: “Ka ni aréngbanga na fu wiri kandoro ya, ni ki ye na ambipo ue fu Yekova ni gani motumo tindika tipa gu ingapai mangi ni, watadu paranga agbungu ue.” (Veresi 7) Gu fugo nga “ka ni aréngbanga . . . ya” i ima rengba ka saha a nga “ka beni arengbanga . . . ya.” Ka si du nga Yisaraere anidu ni rungorungo ni ka ani arengbanga ka ngbe kandoro ya, Mbori anidu na ngbarago ka dia gu he ni anirengbe ka fuhe—ambipo ue watadu agbungu ue.
(Pa Amotumo 5:11)
w09-E 6/1 kpe. 26 genewa. 4
Ko Ima Inopa Gaani Azangarengba
Na ka si du nga boro aarengbanga ka ngbe azire ue te? Ndiko agumba gupai nga “ni ki ye na fufurũ ngungo wa aritere biata na bebere he [akopo mwambe watadu ribua] tipa motumo ingapai ni gani gamunihe mbedisatise tipa gu ingapai mangi ni.” (Veresi 11) Tipa agu aboro naadu ni rungorungo yo gbe, Yekova afu gu kparakpara momu fuyo nga i fu motumo tipa ingapai zanga kure. Yisaraere yo, rungo aakanga na boro tipa gu maku nga ga mozunga watadu gu momu nga ga du na zereda na Mbori te.
Gbata gu Nyanyakipa Ahe Nga ga Toro
(Pa Amotumo 5:1)
Oni Wirikipai be ga Yekova Ruru Amoyambu
Weneringise ima rengba ka undo ro mo sovura kuti gupai nabipa du mo niruru ro. Ni kpiapai, mo ima rengba ka ino gupai nga wirina mangi kere ingapai. Mo ima rengba kadu niruru ro funi, gbe ka si du nga mbembedi bakureamo du watadu gumero. Ono ka si du nga mo õko gu ingapai re, gure nga mo niruru fu Yekova te. Rengo ngaha nga, si naida mo peresipa du niruru ro fu Yekova. Wakina Natana, mo du na weneringise ono ki mangi gupai du ni ruruhe. Mo ngarasi gu bakureamo watadu gumero re tipa nigbata undo be abaakumba. Ka si du nga ni andunga vuru wiri bete aregbo yo te, padu mo niruru ro fu Mbori nika saro mo ndu ka pehe fu abaakumba. Ka mo mangihe wo, gure nga mo niruru ro fu Yekova na kidu na wenesino koyo du bakureamo ni watadu gumero, bambiko abaakumba nika asada ka ruga ni ni zera.—Oni gedi Pa Amotumo 5:1; AGaratio 6:1.
(Pa Amotumo 5:15, 16)
it-1-E kpe. 1130 genewa. 2
Du Ziazia
Anya na Rukuruku Ahe. Bambata wiri bagara ni bara, wiri kandoro ni bara, na wiri meme ni bara ani du ni ziazia he fu Yekova na si anaaidanga i tumo ra te. Si anaaida i tumo na ami ni motumo, na kura apaparaha adu tipa aboromotumo. (Geda 18:17-19) Amakawa na sa-dagba-bawe adu ni ziazia ha, kina wai amotumo adu dunduko na agu agamahe naadu tipa ga Mbori kparakpara ba. (Gate 28:38) Agu ahe dunduko naadu ni ziazia ha fu Yekova, si anaaidanga i mangisunge na ni gbua te watadu ka mangasunge na ni ngba gu gene nika birikosi he te. Kpiapai sa nga gu ndiko naadu tipa sa-dagba-bawe. Ka boro akpara he ni sa-dagba-bawe, ani ya nga ni kpara nganu, na fuoho ni watadu boro dagba gani aborokporo ki dihe zanga ni inihe ka mangasunge na ni kporo, wa gu nga ka manga riahe na ni, gu boro re anidu na pai kurii ni mbiko ni ima kua ga Mbori andiko du tipa ziazia ahe. Ndiko anaaida gupai nga ni karaga guhe re kubaha na 20 rii kama, kurigure ni ki fu kandoro ni motumo. Sidu, ni anaakaraga bakere irisa tipa gu ziazia ahe nga ga Yekova.—Pa Mot 5:14-16.
Geda Ziazia Kekeapai
(Pa Amotumo 4:27–5:4)
NGBANGBA 23-29
AŨKUMUKO ROGO FUGO MBORI YO | PA AMOTUMO 6-7
“Gamahe Tipa Yugo Tambuahe”
(Pa Motumo 7:11, 12)
Agu Apai Rengbe Ani ka Wirikaha Rogo gu Buku Nga ga Pa Amotumo
Ue wirikapai: Ani namangasunge fu Yekova mbiko gupai nga ani na tambuahe fuko. Ani nika wirikapai tipa gipai re wa ani nikaa sakapai tipa agu amotumo zereda aYisaraere anaamangaha. Rogo gu buku nga ga Pa Amotumo, ani nawirika gupai nga Yisaraere anifu motumo zereda “tipa tambuahe.” (Pa Mot. 7:11-13, 16-18) Ni anaafunga gu motumo re mbiko gupai nga si anaaida ni fuhe te, ono ni anaafuhe mbiko gupai nga ni du nanaaida ka fuhe. Sidu, boro anaafu gi gamahe re na ngbaduniyo dunduko mbiko gupai nga ni ima kpinyemu gani Mbori nga Yekova. Gu boro nanaafu gu motumo re, gani aborokporo, gbiati gbiamotumo anari pasio gu nya i anaafu ru ni motumo re. Ono gu kura apapara nya kinaho i anaafu he sa fu kina Yekova. Gini apapara ru du?
(Pa Amotumo 7:13-15)
Agu Amotumo Nafu Ngbarago Fu Mbori
Gu kura gamahe kina ngbadu aboro yo anafõyo i nifuhe angia motumo zereda, nga gu ringbisi yo paha rogo Pa Amotumo kapita 3. I rengbe ka sa gu fugo re a nga “motumo gu gamahe nga ga zereda.” Rogo pa-Ebere, gu fugo nga “zereda” nayugopa kura apai susi gu gbua nga ka du zanga vura watadu zanga fudifudipai. “Baibiri yo, si nayugopa agi apai re, na kini yugu gu sino pagume du dagba boro na Mbori, na pa zugo ahe, padu pusiapusia, na pa ngbarago,” wogu gu buku nga Studies in the Mosaic Institutions agumbaha. Were, i anaafunga amotumo zereda tipa ka duna zereda dagbase na Mbori, si ki du wa i namangaha ka zeresa ngbaduko te, ono i anaafuhe ka yugo tambuahe watadu ka manga pumbo agu amaku nga ga zereda nga gu naadu dagba Mbori na agu aboro nanagbia ngbarago be pa ida ko na gayo apai. Aboromotumo na gu boro nanagama motumo anari gu motumo re fuo fu yo kure na nzeme fu Yekova. (Pa Amotumo 3:17; 7:16-21; 19:5-8) Rogo bawene gene na rogo gu gene narukuba kurapai, gu boro nanaafu motumo, aboromotumo, na Yekova Mbori anaakoda tiyo ku pati riahe, si kini yugu gu pagume nga ga pazereda naadu dagba yo.
(Pa Amotumo 7:20)
Agu Amotumo Nafu Ngbarago Fu Mbori
Ginipai tipa gu boro nanaafu gu motumo re? Ndika ayugu gupai nga gu boro naye koyo du Yekova ni, ni du wa ka ni du gigirii zanga biriko. Gu boro naanidu ni birikosibirikosi ni mbiko kurapai, si aniidi ni fu motumo ingapai watadu motumo tindika mbata tipa ka mbakada gani padu gigirii bangiri Yekova wa ka ko idi na gani zozo motumo watadu motumo zereda. (Pa Amotumo 5:1-6, 15, 17) Sidu tie, ya mo ani nabi padu gigirii dedede barabangiri Yekova na nyanyakipaha? Ka ani akpinyemu Mbori idi na gaani iriso, ani du wa ka ani amangapai niipo ka mbakada gu kuo ga Mbori andika dunduko ka ani mangihe. Si naida ani mangipai niipo ka dia gu mbakadapai kugume Mbori namangihe tipa si undo rani—nga agu ‘abaakumba nga ga dungurati yo’ na Yesu Kristo “nga motumo gaani ingaapi.”—Yakoba 5:14; 1 Yoane 2:1, 2.
Gbata gu Nyanyakipa Ahe Nga ga Toro
(Pa Amotumo 6:13)
it-1-E kpe. 833 genewa. 1
We
Na Ngbanya na banye gbiati yekaru. I anaamangasunge amanga na we ti regbo gu irisombori i anaamangaha banye yo na fuoho, kusa yekaru yo. Rogo awiso ni basasa na anyemu, gbiamotumo anaazo guzuguzu fuõngua ri bamotumo nga ga guzuguzu fuõngua. (Gate 30:7, 8) Mbori aru ndiko nga gu we du ri bamotumo ni kĩ akĩ kindi. (Pa Mot 6:12, 13) Ringbisihe kuti gu sino nga ga aYudo, i nabihe nga gu we re Mbori du naasaha ngba iiriwo gene si ni kĩ, wa vura duhe nga badungu aboro idi kuti gipai re, Ziazia Kekeapai asongodanga ha te. Ringbisihe kuti gu bambata rugute Yekova afuhe fu Moize, si adu nga awiri Arona “nikanirogo we ku auru bamotumo ki moi nyake ti we nzunzu” mbata fu i moi motumo ri bamotumo. (Pa Mot 1:7, 8) Ti ngbafuo i moi agu aboro motumo nangia ngbatunga Arona, na ti ngbafuo gu motumo i afuhe tigu regbo i aamaa yo, gu regbo re du we aye yo du Yekova ni rogo gu dubo nadu barii banye, na ki riti gu motumo dunduko nadu ri bamotumo. Nibipa gipai re, gu we re aye ngba iiriwo gene, angianga si akĩ ti gu nyake nadu ri bamotumo ya, ono si “ki riti zozo motumo na nzeme ri bamotumo.” Sidu tie, si nangera wa, gu we naakĩ akĩ kindi ri bamotumo adu ni sangbana gu we naye be Mbori gbiati gu we naima du ri bamotumo. (Pa Mot 8:14–9:24) Wakina gure a, we aye ngba iiriwo gene be Yekova ki riti amotumo tingbafuo Soromo nyasi kparakpee ti gu regbo i aakpara yekaru.—2Peka 7:1; mo bi Abasa 6:21; 1Aba 18:21-39; 1 Peka 21:26 tipa kura akpiapai nga gu Yekova amangisunge na we ngba iiriwo gene ho ko aadia amotumo ni be gako amoyambu.
(Pa Mot 6:25)
si-E kpe. 27 genewa. 15
Namba 3 Kitabu nga ga Ziazia kekeapai— Pa Amotumo
(3) Motumo ingapai adu tipa gu ingapai boro anaaidanga aida ka mangaha ya, watadu gu ingapai boro anaamangaha zanga ni ini aino ka mangaha. Ngbatunga gu nya i anaafu ru aaru riipa gini ngbatunga boro i anaafu ru tipa ni—wa gu nga boromotumo, aboro dunduko, barii tunga, watadu kungbo boro. Gi motumo re aadunga wa gu motumo aboro anaaida ka fuhe nitiyo gbiati motumo zereda te, gi motumo re adu ni ndiko nga boro du wa ka ni fuhe.—4:1-35; 6:24-30.
Geda Ziazia Kekeapai
(Pa Amotumo 6:1-18)
NGBANGBA 30–BANDURU 6
AŨKUMUKO ROGO FUGO MBORI YO | PA AMOTUMO 8-9
“Gu Gopai Nayugo ga Yekova Amaku”
(Pa Amotumo 8:6-9)
(Pa Amotumo 8:12)
it-1-E kpe. 1207
Maa Aboromotumo
Moize azundu Arona na awiri Arona nangia Nadaba, Abiu, Erazara, gbiati Itamara (watadu, ko aru ndiko fuyo i zundu tiyo) rogo kurungbu tara nadu vurukporo banye na ki ukadi Arona na kikiipa roko nangia ga gbiamotumo. (Geda 3:2, 3) Gu bawene kikiipa roko i aukadi Arona na ni aayugopa agu asino na gu tindiro naabipa gako sunge. Fuoho, Moize akpara banye, na agu ahe dunduko naadu yo, bamotumo nga ga zozo motumo, na kurungbu gbiati agu ahe dunduko i aamangasunge na ni nibipa agi ahe re. Gipai re asa yo i du ziazia, ni kparakpara yo tipa kina ga Mbori sunge nga gu i aaye ka maa yo ti ni. Ni yangaraha, Moize akpara Arona niuka ko nzeme kuriko yo.—Pa Mot 8:6-12; Gate 30:22-33; Tam 133:2.
(Pa Amotumo 9:1-5)
it-1-E kpe. 1208 genewa. 8
Maa Aboromotumo
Ti muambe uru, i afu aũsunge fuyo tipa i tona mangasunge ni aboromotumo (zanga Moize undo yo) ni bambata regbo, i nimangisunge dada ingaapai tipa awiri aYisaraere, gbe, angianga tipa kina giriso yo sa ti gu ingaapai i avunguyo na ni ya ono mbiko gu ingapai i amangihe naadu na ngbaya na gu kpia wiri bagara naadu rogo dahabu yo, nga gu naasa Yekova ko du na gberãrago. (Pa Mot 9:1-7; Gate 32:1-10) Ti digido gi bambata sunge nangia ga gi vovo aboromotumo i amoi yo re, Yekova ayugu gupai nga ko ima ida na yo i nimangisunge ni aboromotumo ni keda ko we ngba iiriwo gene, zanga kapa, rogo gu dubo nadu barii banye, si ki riti gu yangara amotumo nanye ri bamotumo.—Pa Mot 9:23, 24.
(Pa Amotumo 9:23, 24)
Agu Apai Rengbe Ani ka Wirikaha Rogo gu Buku Nga ga Pa Amotumo
Biama wirikapai: Yekova nafu maku kurii papara gu gako riigbu du auru kpotosende. Oni makianga gupai namangi rogo gu garã nangia 1512 Mbata fu Batikayo Kristo ho i amoi banye ni rii Bagangara Sinai yo. (Gate 40:17) Moize nanungusi gu mbakadapai naadu tipa maa aArona na awiriko ni aboromotumo. Rimbasa aYisaraere adunguratiyo ka bi aboromotumo i nifu gayo bambata amotumo nga ga anya. (Pa Mot. 9:1-5) Waigu Yekova ayugu gupai nga ko ima ida na gu vovo aboromotumo re? Wa aArona na Moize aafu maku fu aboro, Yekova akedi we ngbangbaturũ yo si ki zo gu motumo naadu rii ba motumo dunduko.—Oni gedi Pa Amotumo 9:23, 24.
Gbata gu Nyanyakipa Ahe Nga ga Toro
(Pa Amotumo 8:6)
Ndu Gupai si Aida Ani du ti ni Ziazia
Pa ya Yekova fu ga aYisaraere aboromotumo i girisi tiyo, na rogoyo ti ni fu gako aboro areme. Agu aboro ani awisigo Ziazia Kekeapai na yo nabi wai abi du gaani aba-irisombori ni gigirihe na wai ani avoda tirani ni gigiri rani. Ono tie, gu girisotise nangia ga aboromotumo naundo rani ani bi gupai nga, gu boro naida ka ye kurii ga Yekova bagangara nga ga irisombori du ni tumbatumbaha, ni duwa ka ni du “na ziazia kpotoni yo.” (Oni gedi Atambuahe 24:3, 4; Yes. 2:2, 3.) Si naida ani mangisunge fu Mbori na gigiri berãrani gbiati ngbadurani yo kodihe na bororani a. Gere naida na gupai nga ani niwisigi tirani ti aregbo dunduko, mbiko si rengbe ka undo rani ani mangi bakere ariapai tipa kadu ni ziazia rani. (2 Kor. 13:5) Ni kpiapai, gu Kristano saha ni sino ni kaa bi agu ahe nazingisa nyemu kodaba, si naida ni sana tiní nga, ‘Ya mo mi ni ziazia re?’ Fuani, ni gbata undo ka diabe gu gbegberẽ mangapai re.—Yak. 5:14.
(Pa Amotumo 8:14-17)
it-2-E kpe. 437 genewa. 3
Moize
Mbori amoi Moize ni azarõ nga ga gu mokido nga ga aNdiko nadu dagba ko na aYisaraere, nga gu kiki bangiriba kura boro aagbianga ha barabangiri Mbori ya kparakusayo ti kina Yesu Kristo, nga gu azarõ nga ga vovo mozunga. Moize amigidi gu kitabu nga ga andiko na kure agu anya i afu ra ni motumo, ko aarukuba ga Yekova “riigbu,” na aboro (zanga kapa agu abaakumba i asia yo i niru kuba aboro) kidu kuba gu “riigbu” nga ga aboro. Ko agedi gu kitabu nga ga mokido fu aboro, i ki ya, “Agu apai dunduko gumba Yekova ha ani amanga ha amanga, ani agia sangbako agia.” (Gate 24:3-8; Eb 9:19) Wa Moize angia azarõ, ko adu na momu kaa ngerakurii sunge mbakada banye na pa mbakada gaha aũsunge, agu ambakadapai Mbori afuhe fuko, na pa maa aboromotumo, pa kpara banye gbiati kpara Arona nangia gbiamotumo niuka ko kparakpara nzeme kuriko. Fuoho, ko naangerakurii gu bambata asunge nagia ga gu vovo aboromotumo i amoi yo.—Gate kapi. 25-29; Pa Mot kapi. 8, 9.
Geda Ziazia Kekeapai
(Pa Amotumo 8:31–9:7)