WAI KA DIABE SOGOTE

2 | Ka Mo Karaganga Gbegberẽpai Kuba Gbegberẽpai Ya

Gupai Baibiri Ayugoho:

“Ka oni karaga nga gbegberẽpai fu boro ku ba gbegberẽpai wa sa ya. . . . Oni dú zezeredi na aboro dũ, kina ro tigamo ka si du wa ka mo mangi he. Ka oni mangi nga boro ti pai fu roni ya, . . . bambiko si ni keke he ya: ‘“Pa ira bape nga gimi; mi akaragapai,” gbia nipoi wo.’”—AROMO 12:17-19.

Gupai gi Veresi re Ayugoho:

Wa vura duhe nga ani ima rengba ka zinga ka boro mangi rani na gbegberẽpai, Yekova aidanga ani mangi fu gu boro gbegberẽ mangi rani na gbegberẽpai te. Kuba gure, ko naida ani du na zerangbaduse bambiko ko kidohe nga barambeda ko nika mbakada irairaapai dunduko.—Atambuahe 37:7, 10.

Gupai Rengbe Mo ka Mangaha:

Ho kpakpa boro akaraga gbegberẽpai ni kuba gbegberẽpai, si nasa sogote si naandu kina kumbatayo kindi. Sidu tie, ka boro mangi ro na gbegberẽpai watadu ka imisa ro, ka mo mangingo fu ni gbegberẽ ya. Mo asadi ka karagapai zezeredi na ngba wene gene. Ti kura aregbo, si ima rengba ka du ni wenepai ka ani mbu pa gupai na mangi zanga berãha. (Asanza 19:11) Rengo ngaha nga, ti kura regbo, ani ima rengba ka sia ka mangapai kuti gu kpakarapai re. Ni kpiapai, ka si du nga mo du ina mangi ro na gbegberẽpai, mo ima rengbe ka pehe fu aporisi watadu fu agu aboro du na pagbia.

Sogote nga gbarasatise

Ginipai rengbe ka manga ka si du nga kura wene gene ho berewe tipa ka mbakada gu kpakarapai re rogo zereda yo te? Watadu, mo ima manga ai gupai rengbe mo ka mangaha tipa ka mbakada gupai re ngba zezeredi gene? Ka mo karaganga gbegberẽpai kuba gbegberẽpai ya. Si ima rengba ka gbarasa apai kina kumbatayo. Ono ka mo ká ka karaga gbegberẽpai kuba gbegberẽpai, mo ima rengba ka undo ka sa sogote ka si ndunga kumbatayo ya. Mo wiriki wai ka kido kuti ga Mbori agene tipa ka mbakada gu kpakarapai re. Ka mo kido kuti ko ‘ko amánga pai’ amanga foro tipa ha.’—Atambuahe 37:3-5.

Gu Pangbanga Namangi Amanga—ADRIÁN

Ko Adibe gu Berãpai Nga ga Karaga Gbegberẽpai Kuba Gbegberẽpai

Wa Adrián adu ni wiri paranga, ko ahi be sogote na zuu na ko anaaida ka manga gbegberẽ fu ai gu boro naanimangi fuko gbegberẽ. Ko aya: “Dedede mi anidu dagba agu aboro nanaata kpata na bundu, na bara dunguhe mi ani nye bangiri gene na kure ti kpotore si ki nye koyo tooni mi kpi.”

Adrián atona ka wirika Baibiri ho garãko adu ni 16. Ko ape kura pai nga: “Wa ko amanga sona kumbatayo, ko abi gupai nga si aida ko mangi ariapai rogo asinoko yo.” Si aida ko mbu sogote na gbegberẽ mangaapai. Ko aima gbia undo ti agu apai ko awirikihe rogo ARomo 2:17-19 du tipa zanga karaga gbegberẽpai kuba gbegberẽpai. Ko aya: “Mi aye ka ida kuti gupai nga Yekova nika mangapai amanga tipa iraira mangaapai. Yeye, mi adibe gi gbegberẽ gene raka.”

Rogo kura nyemu sa, badona nga ga agu aparanga nanaata kpata na Adrián azubo ko. Baira yo atangbako nga: “Ani ta ko!” Adrián aya: “Bakere nyemu takpata aima zio re.” Ono kuba gupai nga ka takpata, ko ape wiri guru kparakpee fu Yekova na ki guari rogo gu ba re.

Adrián andu kumbatayo ki ya: “Rogo gu uru nangbe tifuo gure mi agbia bairayo nisako. Ho mi abiko ni mi adu na zinga na mi aida ka takpata ono mi amangi kparakpee berewe ku kpotoreyo na ki sana Yekova ko undo re mi zatire. Kina ngbare nazere nga, gu bairayo re aye fuo re na ki ya: ‘Mo mbupai fere ti gupai namangi gba. Gu rengo du ho nga, mi naida ka da wa mo. Mi naida ka wirika Baibiri.’ Si adu nipa ngbarago ka ino gupai nga mi aima du na rengba ka zatire ti gi zinga! Mi na ngbarago nga mbiko gipai re, ani atona ka wirika Baibiri kina sa.”