WAI KA DIABE SOGOTE

3 | Mo Kusi Sogote Kusayo Berãro Yo

Gupai Baibiri Ayugoho:

“Ono oni sá tironi asa ni mbakada berãroni berewe, oni kpária pa gu he nga ga Mbori nyemu he du ni wene he, nzunzu, ni ziazia ha.”—AROMO 12:2.

Gupai gu Veresi re Ayugoho:

Agu apai ani aberãha na nyanyakipaha fu Mbori. (Yeremaya 17:10) Si naida ani mangipai amanga susi gu nga ne gumba gupai du ni gbegberẽhe na mangaha. Sogote naenga berãrani yo na ngbadurani yo. Sidu tie, si naida ani mbu berãpa gupai nga ga sogote berã rani yo niipo. Ka ani mangihe wo, ani ima rengba ka ‘sá tirani’ na ki mbu sogote.

Gupai Rengbe Mo ka Mangaha:

Mo berẽ nyanyaki kurii wai mo abi gu kura aboro—gbe agu aboro du ngbatunga yo kia watadu du rogo gu kura ringara. Mo sananga tiro nga: ‘Gimi bipai nga gine tipa yo? Ya mo gimi bipai tipa yo naru rii gupai mi nainihe tipa yo? Watadu si naru riipa kparakaro?’ Mo ne geda agu pangbanga du rogo internet gbiati bi agu avidio watadu aũngbarago du na sogote na zuu rogoho.

Fugo Mbori ima rengba ka undo rani ani kusi sogote ngbaduraniyo na berãraniyo

Si taata furani tipa ani wisigi tirani na ki bihe nga sogote gu du rogo rani yo te. Ono Fugo Mbori ima rengba ka undo rani ani ini “agu aberã nga ga ngbaduse na gaha nyemuhe.” (AEbere 4:12) Sidu, mo naandu kindi kumbatayo kaa wisigo Baibiri. Mo ringbisi gaha ayugopai na gamo aberãpai, na mo ki asadi tiro nyanyaki kaa berã ngba gu gene nasa ngbarago ti Mbori. Fugo Mbori ima rengba ka undo rani ani di be gu sogote naima zio tihe “nyanyaki” ku berãrani yo na ku ngbadurani yo.—2 AKorindo 10:4, 5.

Gu Pangbanga Namangi Amanga—STEPHEN

Ko AˈAria gu Gene Ko Aaberã Ngbaha

Stephen na gako aborokporo agbia sogote be pusi aboro. Ni sangbanaha, ko arimi gu riigbu nga ga agu aboro naasovura tipa ga aboro rengo. Tifuo bete regbo, ko arimisi tiko ku rogo manga gi gbegberẽ apai re ni tiko. Stephen aya: “Ti kura regbo, mi na abakureami aabi avidio naayugo wai gu bi aboro nangia akanga arungo Amerika yo. Mbiko gu zinga ani adu nani tipa gu gbegberẽpai re, ani atona ka ta gu paranga pusi aboro naadu kina ba vidio ho. Fuo gure, ani andu ku rogo gu kura akporo tipa ka gbata pusi aboro ka ta yo.”

Ga Stephen bipai ariatihe ho ko atona ka wirika Baibiri ni na aDezire Yekova. Ko aya: “Mbiko gu bakere sogote nga ga angbatunga naadu rogo re yo, mi abi apai dagba aDezire Yekova nazeresi kina ngbare. Ni kpiapai, ho kura Dezire Yekova anaamerã ni, ko animbu awiriko fu gu aborokporo nangia bi aboro. Na agu aborokporo nangia pusi aboro anadia gu paranga aboro nga bi aboro ku kpuyo yo ho ba anaadunga ni beyo tipa ka sungo rogoho ya.” Stephen abi gupai nga, aDezire Yekova wakina agu aborokporo du na nyemuse, na gipai re aundo ko tipa ko rugutiko na gupai nga, i aadigiso gu ga Yesu kidohe naadu nga apefuoko nika yugo nyemuse.—Yoane 13:35.

Ginipai nasa Stephen ko mbu gako gbegberẽ sino nga ga soga kura aboro? Gu veresi du rogo ARomo 12:2 naundo ko. Ko aya: “Mi atona ka bi gupai nga si naida mi aria gimi berãpai. Si aidi mi mangi ariapai rogo gimi berã na ki rugutire na gupai nga, du ni boro zereda nga gu gene raka ngba kisusi.” Stephen ima raka awere na ngbarago tipa agarã 40 wa ko akusi gi sino nga ga sogote re rogoko yo.