Ginipai Baibiri Apehe Tipa Raka Kina Sa Zanga Rogatise?

Gu karagapai nga ga Baibiri

Baibiri naya gupai Mbori aidaha be aboro nga i “ne pa bari.” (1 ATesaroniko 4:3) A wa i namangisunge na ni rogo Baibiri yo, gu fugo nga “pa bari” nakoda bari, koda kumba ba na kurani, gbiati kodaba dagba gu kumba na gu dee ata manganga rogatise ya.

• Tipagine du he ti ni ni nyanyakipa pai fu Mbori singia arogotise rogotiyo nzunzu watadu i amanganga ha wo te?

• Na ginipai tigaha du tipa raka kina sa mbata fu rogatise ka asada ka bihe singia oni ima rẽ nzunzu?

• Waigu rengbe arogotise ka sa gayo rogatise sidu ni nyanyakihe?

Tipagine du he ti ni ni nyanyakipa pai fu Mbori singia arogotise rogotiyo nzunzu watadu i amanganga ha wo te?

• Gu mbakadapai nga ga rogatise naye be Mbori. Ko asigiraha ho ko akpamia bambata arogotise ni i ni raki kina sa. (Bambata Pai 2:22-24) Gako bipai aadunga nga kumba na dee ni raki kina sa zanga i du ni arogotise te.

• Mbori ini gupai du ni wenehe tipa aboro. Ko ambakadi rogatise sidu ni nyenye kodatise dagba kumba na dee nga gu rengbe ka fu undo na bandahe fu aborokporo dunduko. Mo wisigingo gi taata kpiapai re. Kina wai agu arugapai naye be abambakadiahe nayugo wai fu boro ni narengbe ka dungura apapara he ka vodaha si kidu wenengai, ga Mbori arugapai nayugo wai furani rengbe ani ka sonosa gu nyanyakipa gume du dagba aborokporo nga gu du na diabese. Ga Mbori arugute ti aregbo dũ nafu undo fu agu aboro napekafuo ho.—Yesaya 48:17, 18.

  

• Kodaba zanga manga rogatise ima rengba ka ye na kere gbegberẽ asangbanaha. Ni kpiapai, sangbanaha ima rengba kadu nga gu du na vuse i asonga gimaha aso ya, agu akaza boro adiaha rogo kodaba, gbiati kere afuda berãse yo.a

• Mbori afu gu rengba fu kumba na dee nga i vungu agude vurube kodaba. Gu bipai du Mbori na ni nga ko nabi raka ni ziaziaha, na gu rengba fuko ho fu aboro nga i ima rengba ka vunga agude nga bawene gamahe. Mbori naida ani yugu irisa fu gu gamahe re ni yugo ani irisa kuti gu gako mbakadapai du tipa rogatise.—AEbere 13:4.

Na ginipai tigaha du tipa raka kina sa mbata fu rogatise ka asada ka bihe singia oni ima rẽ nzunzu?

Tipa kadu na gu rogatise du na diabese, anga gupai du na nyanyakipaha nga aboro raki kina sa mbata fu i rogotiyo te. Kuba gure, pagume nasona ho aboro ue dunduko afutiyo ni ka mangasunge kina sa tipa ka diabe akpakarapai.b Rogatise nanyakasa futise.—Matayo 19:6.

Waigu rengbe arogotise ka sa gayo rogatise sidu ni nyanyakihe?

Rengberengbe rogatise ho du ti ni zanga na akpakarapai te. Wa vura duhe wo, arogotise ima rengba ka sa gayo rogatise si du ni nyanyakihe ni mangayo pai kuti agu arugute nga ga Baibiri. Bete akpiapai gere:

• Mo peresipa gu zingo nga ga gamo badiarogatise mbatayo fu gamo.—1 AKorindo 7:3-5; AFiripoio 2:3, 4.

• Oni sonosi nyemuse na irisa dagbaroni.—AEfeso 5:25, 33.

• Mo wiriki wai kadu na maapai kurii afugo ro.—Asanza 12:18.

• Mo du na zerangbaduse na kidu regerege ka mbupai.—AKorosaio 3:13, 14.