WIRIKAPAI 8
Abarayama na Sara Agisangba Mbori
Gu bagbata nga Ura aaturongo ti Babera te, nga gu ba aboro anaairiso dungu kungbo ambori rogoho kisusi Yekova. Ono kumba adu Ura yo naairiso kina Yekova sa. Rimoko angia Abarayama.
Yekova aya fu Abarayama: ‘Mo mbu kpuro na agumero, na ki ndu ku rogo gu ringara mi nika yugoho foro.’ Fuani, Mbori akido ko nga: ‘Ngbatunga ro nika nge ni bakerehe, na mi nika manga weneapai fu dungu aboro auru kpotosende mbiko ro.’
Abarayama ainongo wari Yekova aakeda ko kuhoni te, ono ko akido kuti Yekova. Sidu, Abarayama na diako nangia Sara, bako nangia Tera na wiri unvura bako nangia Roto arogo gayo ahe na ki tona gu gbanga nunguro re.
Garã Abarayama angia 75 ho ko na gako aborokporo ada ni rogo gu ringara Yekova aaida ko bihe. Rimo gu ringara re angia Kanana. Ho ko ada ni yo Mbori afura na ko na ki kido ko nga: ‘Gi ringara mo abihe pati ro kirikiri re, mi nika fuhe fu awiro.’ Abarayama na Sara aima gbinza na ka agude adunga beyo ya. Wai du ka Yekova arengbe ka sa gi kidohe re si da ti rengo?
“Mbiko idapase Abarayama agi sangba Mbori . . . ko [ki] ndu ku rogo gu ba ko ka dia ha ni gako; ko ki guari ka ndu, ka ko aina nga ho ko andu ku ho ni ya.”—AEbere 11:8