Asada Nga ga Idapase

Abarayama ayugupai fu wiriko ko kpinyemu Yekova na kini kido kuti ga Yekova akidohe dunduko. Ho garã Yisaka adu ni wa 25, Yekova asana Abarayama ko mangi gupai niima kpakara boro mangihe. Ginipai du naadu?

Mbori aya fu Abarayama: ‘Ako, mo di bangisa wiro na ki fuko ni motumo rii gu gangara nga Moriya.’ Abarayama ainongo ndu gupai Yekova aaida ko mangipai ti ni wa gure te. Ono wa si avura du wo, ko airisi sangba Yekova.

Fuo girorago kina boro wiso, Abarayama adi Yisaka na amoyambu ue fuoko na i ki ndu ku Moriya yo. Fuo ndu yo tipa arame biata, i aabi gu gangara re kindi tuturũ. Abarayama aya fu gako amoyambu i pidi ko, ko na Yisaka ki ndu ka fu motumo. Abarayama afu nyake fu Yisaka ko tindihe, na Abarayama ki zadi sape tigako. Yisaka ki asana bako nga: ‘Wari du gu nya ni ani ka furu ni motumo?’ Abarayama akaragapai nga: ‘Wire, Yekova nika furu afu.’

Ho i ada ni rii gangara yo, i ambakadi bamotumo. Fuani, Abarayama ki vo be Yisaka na nduko na ki moiko rii bamotumo.

Abarayama adi sape. Ti gure regbo re, ga Yekova maraika ayambuhe ngbangbaturũ yo nga: ‘Abarayama! Ka mo mangingo gu gude re gbegberẽ ya! Awere mi inihe nga mo na idapase kuti Mbori mbiko mo naida ka fu wiro ni motumo.’ Fuani, Abarayama abi kandoro gbanga ru atapa tihe kuti nvuo. Ko ki zaki Yisaka ni ipo na ki fu gu kandoro re ni motumo kubako.

Naatona ti gu regbo re, Yekova ayambu Abarayama nga bakureako. Mo ini tipagine? Abarayama anaamanga agu apai dunduko Yekova anaaida ko mangihe, zavura ho ko ainongo ndu gupai ni Yekova aya fuko ti ni ko mangihe ya.

Yekova akido Abarayama berewe nga: ‘Mi nika fu maku foro, na mi nika ngeesa awiro, watadu atita ro.’ Gipai re aayugo gupai nga Yekova nika fu maku fu wene aboro dunduko vurube ga Abarayama aborokporo.