Pangbanga 23
Ga Faro Amusumo
FUO agarã ue, Yosefa adu kindi kina bambukiso yo. Ga Faro bafuinga aatingidanga pako te. Fuoho, rogo kura yuru sa, Faro arari amusumo ue nga gu naadu ni iiriwoho, ko kini bakibangiriko abaka na pa rogoyo. Mo biko wa ko ara? Fuo giro rago, ko ayambu gako tatamanatatamana akumba ki gumba gako amusumo fuyo. Ka i arengbanga ka gumba sangbaha fuko ya.
Ti gu regbo re tie, ga Faro bafuinga kini tingidi pa Yosefa. Ko ki ya fu Faro: ‘Ho mi adu ni bambukiso yo, kumba adu kina yo narengbe ka gumba sangba amusumo.’ Faro ki kedi aboro nibasa i ndu ka kusa Yosefa bambukiso yo ko ye ka gumba sangba gako amusumo.
Faro ki gumba gako amusumo fu Yosefa, niya: ‘Mi nibi bawene kikindigi anaabagara saba. Fuoho, mi ki bi ngorokonyangorokonya anaabagara ni saarasaara ra saba. Gu ngorokonyangorokonya anaabagara re ki riti gu kikindigi anaabagara.
‘Rogo gimi ue musumo, mi nibi nganu nizara saba ti katakpaha sa, ni wene kikindigihe. Mi ki ru ki bi zarazara nganu ni warawaraha ni rukutuhe na ni uguhe. Gu warawara nganu re ki riti gu wene kikindigi nganu nidu saba.’
Yosefa ki ya fu Faro: ‘Ako bakindo, agu amusumo du ue re rogoyo kina sa gbua. Gu kikindigi anaabagara nidu saba na gu kikindigi nganu nidu saba, si nga agarã saba. Na gu ngorokonyangorokonya anaabagara nidu saba na gu warawara nganu nidu saba, si nga kura agarã saba. Agarã nika du saba nga gu nika du na bakere riahe rogoho Ezipeta no. Fuoho, agarã kidu saba nga gu nika du na bakere zingo riahe rogoho.’
Yosefa ki ya berewe fu Faro: ‘Mo sia iratatamana sa ki moi ní ní ningere kuriipa dungura riahe ka igoho rogo gu wene agarã nika du saba, ka aboro akobanga be gomoro rogo gu gbegberẽ agarã nika ye saba nga gu riahe nikaa idanga ati yo rogoho ya.’
Gupai re aima ngba ti Faro. Ko ki sia Yosefa ko ningere kuriipa dungura riahe, na kini igihe. Yosefa ada ni gu ue boro pani akii rogo ringara Ezipeta naabaha. Kina Faro sa pako akii kisusi ko.
Fuo agarã muambe, bakere zingo riahe naima tona, Yosefa angere ki bi akumba 10 i niye. Mo ini ada nangia yo? Agu aunvurako nabagi ko! Bayo nangia Yakobo akediyo ku Ezipeta yo i ndu ka ngbe riahe bambiko riahe aima mbeda ka nyasa Kanana yo. Yosefa aima ino aunvurako, ono ka i ainongo ko ya. Mo ini gupai i aainongo ko ti ni ya? I aainongo ko te mbiko gupai nga ko aima sona, na ko avo tiko na kura ngbatunga aroko kia.
Yosefa atingidi gupai nga ho ko adu ni ni gude, ko arari musumo ki bi awiribako i niye kaa tumuso fuko. Mo natingida gu pangbanga re? Yosefa abi gupai nga Mbori du nakedi ko ku Ezipeta yo, na ko akedi ko na wene nduhe. Mo naberãha nga ginipai Yosefa amangihe ti gu regbo re? Ani bingoho.
Bambata Pai 41:1-57; 42:1-8; 50:20.