Gbegberẽ Bakindo Azogo Ezipeta

AGI akumba rundu re nazio aboro kuti sunge i mangihe ngbaome. Mo bingo gu kumba nanarã bamangisunge na ngua re! Agu akumba namangasunge re nga agu aboro naenge ti Yakobo, nga aYisaraere. Agu akumba nazio yo kuti sunge re nga aEzipeto. AYisaraere aima da ni akanga fu aEzipeto. Gupai re awiri pa manga wai?

Ga Yakobo aborokporo naadu ni badungu yo aima raka Ezipeta yo tipa badungu agarã rogo zereda. Yosefa nangia gu bakere boro nangbe tifuo Faro nangia bakindo aima ngerafuoyo wenengai. Ono Yosefa akpi. Gu Faro naadu ti ragoko ki kpi a. Vovo Faro ki tona ka zoga Ezipeta nga guko naaidanga na aYisaraere ya.

Gi gbegberẽ Faro re asa aYisaraere ni akanga. Ko amoi agu akumba kuriyo nangia kere gbegberẽ aboro. I asa aYisaraere i nimangisunge nyanyaki tipa ka dudua kikindigi agbata fu Faro. Ono aYisaraere aange kina ku mbatayo kindi. Fuo bete regbo kusa, aEzipeto atona ka gunde nga aYisaraere nika ngeange kisusi yo na i kidu na bakere ome gbe.

Mo ini gupai Faro amangihe? Ko afura fu agu anasamba nangia ga agu anaagude nangia ga aYisaraere yo ki ya: ‘Oni imi agu agude nga akumbagude dunduko i nikaa vungayo.’ Ono agu adee re angia wene aboro, na ka i aimongo fogo agude ya.

Si ki tadu were, Faro kini zinahe fu gako aboro dunduko ki ya: ‘Oni di gu fogo agude nga akumbagude nga awiri aYisaraere ki imira. Oni mbu kina agu agude nga adegude sa.’ Anga kere gbegberẽpai nangia gipai re te? Ani bingo wai i abatasi fogo kumbagude sa.