Moize Asia ka Iriso Yekova

Ezipeta yo, rimo ga Yakobo aborokporo ada nga aYisaraere. Fuo kpiko aYakobo na Yosefa, gu kura Faro atona ka zogarago berewe. Ko adu na gunde nga aYisaraere nada na ome awere kisusi aEzipeto. Sidu, gi Faro re asa aYisaraere ni akanga. Ko amangi yo ngbaome i nimangi biriki gbiati sunge ati. Ono wa aEzipeto avura ka fu mbusa fuyo, aYisaraere aange kina kumbatayo. Mbiko wa rago aangbanga ti Faro na gupai re ya, ko azinahe nga i imi gu vovo awiri aYisaraere nga akumbagude dunduko. Ya mo mo rengbe ka berãpa gu gunde aYisaraere adu na ni ti gu regbo re?

Dee ni Yisaraere nangia Yokebede abatika bawene kumbagude. Tipa ka banda ko, ri amoiko rogo baga ki igi ko rogo nvuo pavuru gu di nga Nire. Dawiriko gu gude re nangia Miriama adu kinaho barambeda ka bi gupai nika manga.

Wiri Faro nga degude aye ka mbida ime di yo na ki gbia gu baga re. Ri agbia fogo gude vuruhe yo naakpara, na rungo gu gude re ki zi ri. Miriama asanahe nga: ‘Mi ndu ka gbata gu dee rengbe ka ngerafuo gu gude re foro?’ Ho wiri Faro aidihe ni, Miriama andu ki ye na nari nga Yokebede. Wiri Faro ki ya furi: ‘Mo di gi gude re, mo ngerefuo ko fere, mi nika tumo ro.’

Ho gu gude re asono ni, Yokebede aye na ko fu wiri Faro, ri ki yambu rimoko nga Moize na ki sonosi ko ni wiiri. Moize asono ni wiri bakindo na ahe dunduko ki du beko. Ono bangiri Moize aagonga ti Yekova te. Ko aima inoho nga ko nzunzu nga Yisaraere, angianga Ezipeto ya. Na ko ki sia ka mangasunge fu Yekova.

Ho garã Moize adu ni nga 40, ko adiberã tipa ka undo gako aboro. Ho Moize abi gupai ni nga boro Ezipeta nata Yisaraere, ko anari boro Ezipeta nyanyaki ko ki kpi. Moize aigi kangba gu boro re ku rogo ngume. Ho Faro ainihe ni, ko aˈasadi ka imo Moize. Ono Moize aoro ku rogo gu ringara nga Midiana. Yekova aima ngerafuo ko yo.