Pa Si Zamba Baime

MO BINGO gupai namanga re! Moize du taĩ gako ngbondo rii Zamba Baime. Agu aboro du na ko re nga aYisaraere. Ono agu aboro baime nafu kuriyo re nga Faro na gako rimbasa aborovura. Ani bingo wai gipai re amangi.

A wa ani awirikihe kusayo, Faro aya fu aYisaraere wẽ i guari Ezipeta yo fuo ye Mbori na agberãngbi 10 kurii aEzipeto. Akumba wa 600,000 nakuru Ezipeta yo, gbiakuti adee na agude. Ono kura badungu aboro Ezipeta adu kinaho naidi kuti Yekova, i ki guari fuo aYisaraere. I dunduko adi gayo akandoro na ameme gbiati abagara na yo.

Mbata fu aYisaraere guari Ezipeta yo, i asana aEzipeto i fu aroko fuyo na agu ahe i ambakadihe rogo dahabu na feda. AEzipeto aima du na bakere gunde mbiko gu yangara gberãngbi Yekova aye na ni kuriyo. Sidu, i afu agu ahe dunduko fu aYisaraere i asanayo tipaha.

Fuo wiri bete arame, aYisaraere ada pati Zamba Baime. I aongodi. Ti gu regbo re, Faro na gako akumba atona ka bira tiyo mbiko gupai nga i aidihe fu aYisaraere i kuru Ezipeta yo. I aya: ‘Ani ima mbu gaani akanga i ga nirengo!’

Sidu, Faro aˈaria berãko berewe. Ko adi gako ngbagidavura ni ipo na ki di gako aborovura. Ko atona ka dofuo aYisaraere na siakasiaka angbagidavura 600, gbiati gu kura angbagidavura nga ga Ezipeta ra.

Ho aYisaraere abi Faro ni na gako abasovura i niye fuoyo, i atona ka gunde ni kerehe. Gene aadunga beyo wa ka i oro te. Zamba Baime adu kubani, aEzipeto kini ye bani. Ono Yekova amoi ndurõo bangbanda gako aboro na aEzipeto. AEzipeto aarengbanga ka bi aYisaraere tipa ka ndu ka zubo yo te.

Yekova ki ru ki ya fu Moize ko taĩ gako ngbondo rii Zamba Baime. Ho ko amangihe ni wo, bawege atona ka ya. Zamba Baime ki kparaka, i me kidu kubani na kubani wa abaagangara.

AYisaraere ki tona nduge bebere Zamba Baime rii ugu sende. Si aima dia badungu asaa tipa gu badungu amirioni aboro re na gayo anya si ku mbitiyo. Ni yangaraha, aEzipeto atona ka bi aYisaraere berewe. I abi gayo akanga i niga nirengo! AEzipeto ki oro ku Zamba Baime yo fuoyo.

Ho i adani bebere Zamba Baime, Mbori asa andu gayo angbagida si tona ka titiwa. I atona ka gunde gbegberẽ, sidu, i ki tona ka kpara niya: ‘Yekova nasovura kuti rani tipa aYisaraere. Ani oro kusayo!’ Ono gene aadunga berewe te.

Gure nga gu regbo Yekova aya fu Moize ko taĩ gako ngbondo rii Zamba Baime, a wa mo abihe rogo sura re. Ho Moize ataĩ gako ngbondo ni, agu agangara ime narundu atona ka karagatihe si ki furii aEzipeto na gayo angbagida dunduko. Rimbasa aborovura dunduko napefuo aYisaraere ku rogo Zamba Baime. Na guni ho sa nabati te!

Rago aima ngba ti ga Mbori aboro nirengo wa i abati! Akumba abi bia tambuahe fu Yekova niya: ‘Yekova ima diabepai ni taasitaasi rimoko. Ko bafu afarasi na abandurira ku baime yo.’ Dawiri Moize nangia Miriama ki di gari gaza ku beri na adee dunduko ki ye fuori na gayo agaza. I kini dogbere ni bakere ngbarago, kini bi kina gu bangisa bia akumba aabihe nga: ‘Yekova ima diabepai ni taasitaasi rimoko. Ko bafu afarasi na abandurira ku baime yo.’