Wai I Abatasi Fogo Moize

MO BINGO gu fogo gude nakpara re na ki kakuti wiribe gu degude re. Moize du. Mo ini gu boro nga gu bawene degude re? Wiri Faro du.

Na Moize aigi ko daho ko adani na adiwi biata, bambiko ri aaidanga aEzipeto imiko te. Ono ri aima ino gupai nga boro rengbe arengba ka bi Moize rogo gu ba ri aigi ko rogoho, sidu, gere nga gupai ri amangihe tipa ka bandako.

Ri adi baga ki dikoho tipa ka ime rimingo ku rogoho ya. Ri amoi Moize ku rogoho ki dihe ki moihe ku rogo gu badumo naadu pangba gu baime nga Nire. Ri aya fu dawiri Moize nangia Miriama wẽ ri du mbembedi ho tipa ka bi gupai nika manga.

Fuo regbo tooni, wiri Faro aye ku Nire yo ka mbida ime. Ri ki tuka bangiiri ki bi baga rogo badumo. Ri ki yambu gari degude sa ki ya: ‘Mo ndu ka ye na gu baga du yore fere.’ Ho wiri Faro azaki gu baga ni re, ri abi bawene gude rogoho. Moize aakpara, na rungoko ki mangi ri amanga gbe. Ri aaidanga i imiko te.

Miriama ki ye. Mo bingo ri rogo gu sura re. Miriama asana wiri Faro ki ya: ‘Mi ndu ka yamba gu boro foro nika mbu tiko dagba dere aYisaraere yo?’

Wiri Faro ki ya furi: ‘Mo ndu.’

Miriama ki oro ni ipo fuo nari ki gumba gipai re furi. Ho na Moize ayeni fuo wiri Faro, wiri Faro aya furi wẽ: ‘Mo di gi gude re ki mbu tiko fere, mi atumo ro atumo.’

Sidu, na Moize ambu ti kina boro wiiri. Ho Moize asono ni, ri andu na ko fu wiri Faro, ko kidu ni wiiri. Gure nga gupai namangi nga gu nasa gupai nga Moize sono kua Faro yo.