Gupai Moize Aoro Ti Ni

MO BINGO Moize wa ko aora kusayo Ezipeta yo. Ya mo mo bi agu akumba nado ko na abaso re? Mo ini gupai i aida ka imoko ti ni? Ani bingo gupai namangi.

Moize asono kua Faro yo, bakindo Ezipeta. Ko ada ni kere iratatamana na ni bakere boro. Moize aima ino gupai nga ndikidi boro Ezipeta nangia ko te, ono avunguko angia aYisaraere nangia akanga.

Rogo kura uru sa, ho garã Moize adu ni 40, ko andu ka bi gupai naadu tipa gako aboro. Ko abi gupai nga aEzipeto aamangayo gbegberẽ. Ko abi boro Ezipeta a ní nita kanga nangia Yisaraere. Moize ki ngereke patiko kirikiri. Ho ko abi gupai ni nga kura boro ho te, ko anarĩ gu Ezipeto re, ko ki kpi. Moize ki igi kangbako ku rogo ngume.

Rogo gu uru nangbe tifuoho, Moize andu berewe ka bi gako aboro. Ko abihe nga ko rengbe arengba ka undo yo tipa ka i adunga ni akanga berewe ya. Ono ko abi akumba ue nangia aYisaraere i nita kpata. Ko ki ya fu guko naamanga kurako gbegberẽ: ‘Mo nata kuaro were tipagine?’

Gu kumba re ki ya fuko: ‘Da nisa ro ni bazogo na ni basapungbanga furani? Mo naida ka imo re a wa mo aimi boro Ezipeta gba?’

Moize atona ka gunde nyanyaki bambiko ko aini gupai nga aboro ima ino nga ko aimi boro Ezipeta. Zavura Faro, ko aima giaha a, na ko ki kedi akumba i ndu ka imo Moize. Si nga ndu gupai Moize aoro ti ni Ezipeta yo.

Ho Moize akuru ni Ezipeta yo, ko andu tuturũ ku rogo gu ringara nga Midiana. Yo ngaha re, ko agbia kumba nangia Yetero, na ki di wiriko sa ni diako rimori angia Sipora. Moize ada ni babanda akandoro, kini banda ga Yetero akandoro. Ko araki Midiana yo tipa agarã 40, gure nga daho garãko adani 80. Rogo kura uru sa, ho Moize aariga ga Yetero akandoro ni nvuoyo, baiiriwopai amangi nga gu naˈaria ga Moize raka naabaha. Mo banga kpewaraga ani bingo gupai namangi.