Gu Ngua Naagbi

Moize araki Midiana yo tipa agarã wa 40. Ko adi dee yo na ki batika agude. Rogo gu kura uru sa baraho ko angera ni fuo gako akandoro mbembedi na Bagangara Sinai, ko abi iˈiriwopai. Yegbende ngua aagbi! Ho Moize andu ni mbembedi tipa ka bihe, ko agi fugo bebere gu ngua re yo naaya: ‘Moize! Ka mo mbedinga ko no ya. Mo uru gamo raka kusayo mbiko mo ru rogo ziazia ba.’ Yekova du naafura fuko vurube maraika.

Gunde azi Moize, ko ki dadi kpakpu ko. Gu fugo re aya: ‘Mi ima bi wai gimi aboro arungo nga aYisaraere. Mi nika batasa yo be aEzipeto na ki ye na yo ku rogo wene ringara. Mo nika ngbembatayo fu gimi aboro ka kusayo Ezipeta yo.’ Mo abingo ho nga iriwo gupai re aima zio Moize te?

Moize asanahe nga: ‘Ginipai mi nika pehe ho aboro ka sana re ni nga da kedi re?’ Mbori ki ya: ‘Mo ya fuyo Yekova nga ga Abarayama Mbori, ga Yisaka Mbori, na ga Yakobo Mbori kedi re kono du oni ni.’ Fuani Moize ki ya: ‘Na ka agu aboro re adeganga tuyo fere ya?’ Yekova afu gu gopai naayugo na ni nga ko nika undo ko aundo. Ko aya fu Moize ko ba gako ngbondo kusande. Gu ngbondo re ki satihe ni wo! Ho Moize azadi gu wo re ni ti sa ru, u ki sa tiru berewe ni ngbondo. Yekova ki ya: ‘Ho mo nika manga gi iˈiriwopai re ni, si nika yugoho nga mi du kedi ro.’

Moize ki ya: ‘Mi ainongo fugo wenengai te.’ Yekova akido ko nga: ‘Mi nika gumba gupai foro si aida mo pehe, na mi nika keda wirinamo nga Arona ko undo ro.’ Fuo ino Moize gupai nga Yekova na ko, ko adi diako na awiriko ki ndu ku Ezipeta yo.