Gu Tooni Ngua Naagbi

MOIZE aye ki da pati gu bagangara nga Orebe tipa ka gbata nvuo tipa gako akandoro. Ko ki bi tooni ngua si nigbi, ono ka si aritanga ya!

Moize ki ya fu tiko: ‘Nairiwo gipai re. Si naida mi ndu andu mbembedi kupati ni yo tipa ka bihe wenengai.’ Ho ko ambedi ni kupati ni yo, fugo ki poi rogo we yo ki ya: ‘Ka mo mbedinga kono ya. Mo uru rakata nduro yo, bambiko gu rago ru mo rogoho re, ziazia sende du.’ Mbori du naafura rogo gako maraika yo, sidu, Moize ki dadi kpakpuko.

Mbori ki ya berewe fuko: ‘Mi ima bi gu mbugo nga ga gimi aboro du Ezipeta yo nirengo. Mi nika batasa yo awere, na mo nga gu boro mi nika keda ní ní ndu ka kusa yo Ezipeta yo.’ Yekova adiberã ka kusa gako aboro ka ga na yo ku rogo gu bawene ringara nangia Kanana.

Ono Moize ki ya: ‘Gini boro nga mi? Gini gene du bere ka manga gipai re? Ono na ka mi ndu aYisaraere ki ya fere, “Da kedi ro?” Mi aya fuyo wai?’

Mbori ki karagaha ki ya fuko: ‘Gere nga gupai mo nika gumbaha fu awiri aYisaraere, “YEKOVA nga ga Abarayama Mbori, nga ga Yisaka Mbori na ga Yakobo Mbori kedi re fuo roni.” ’ Yekova agbia gupai kuti gu fugoko re nga: ‘Gere nga rimore nyeanye kindi.’

Moize ki karagaha ki ya: ‘Na ka mi ya fuyo mo kedi re ka i aidanga kuti sangbare ya?’

Mbori ki sanako ki ya: ‘Gine nga gu du bero re?’

Moize ki ya: ‘Ngbondo.’

Mbori ki ya: ‘Mo baha ku sande.’ Ho Moize aba gako ngbondo ni ku sande, si asa tihe ni woo. Yekova ki ya fuko ko zadi gu woo re ti soru. Ko ki zadi ru u ki sa tiru ni ngbondo berewe. Yekova ki yugu kura iiriwopai berewe fu Moize. Ko aya fu Moize: ‘Mo moi bero ku rogo gamo roko yo ti ngbaduro.’ Moize ki mangihe wo, na ho ko akusi beko ni yo, si kidu dunduko na gu kere kaza nga ngbataka! Yekova ki ya ko rimisi beko berewe koyo. Ko ki rimisihe beko ki ngba kubaha. Fuo gure, Yekova afu tandu fu Moize ko mangi kura biata iiriwopai. Yekova ki ya fu Moize ni yangaraha: ‘Ho mo nika manga gi iiriwoapai ni re, aYisaraere nika ida aida kuti gupai nga mi kedi ro.’

Fuo gure, Moize ki ga ku kporo yo ki ya fu Yetero: ‘Mi nazungadi ro mo za gene fere mi ndu ku Ezipeta yo fuo agumere ka ino gupai du tipa yo yo.’ Yetero ki ya fuko: ‘Mo ndu zezeredi.’ Moize ki tona nduge ku Ezipeta yo.