Yekova Afu Gako Andiko

FUO adiwi wa ue fuo kura aYisaraere Ezipeta yo, aYisaraere aye ki da ti gu bagangara nga Sinai, du kura rimoho nga Orebe. Gere nga kina gu ba Yekova afura fu Moize rogoho rogo we yo. AYisaraere azi bataya rogo gi ba re na ki sungu yo tipa bete regbo.

Moize adakpa kurii bagangara yo aboro kini sungudi ko sende yo. Ho Moize adu ni rii bagangara yo, Yekova aya fuko Ko naida aYisaraere nigisangbako na i du ni gako kparakpara aboro. Ho Moize azoro ni, ko apeke agu apai fu aYisaraere Yekova apehe. Na aboro dunduko ki ya wẽ i nikaa giasangba Yekova agia, bambiko i naida kadu ni gako kparakpara aboro.

Yekova amangi iiriwopai fuo gure. Ko asa ngime si kuru rii gu bagangara yo re, na gumba kini sumbu na bakere woroho gbe. Ko afura a fu aboro ki ya: ‘Mi nga Yekova gaoni Mbori nakusi roni Ezipeta yo.’ Fuo gure, ko aruguyo ki ya: ‘Ka oni irisingo kura mbori ya kina re sa.’

Mbori afu kura arugute, watadu andiko, ribua fuo gure. Aboro aima gunde ni kerehe. I ki ya fu Moize: ‘Kina ro nifura furani bambiko ani nagunde agunde nga, ka Mbori afura furani ani kpiki akpiko.’

Kusa, Yekova aya fu Moize: ‘Mo ye fuore kurii bagangara no. Mi afu kpakakpaka ambia foro ue nga gu mi nake gu gimi andiko ti ni mi aida gimi aboro niirisihe.’ Moize aguari ki ndu kurii bagangara yo berewe. Ko adu yo tipa arame 40.

Mbori adu na badungu arugute beko fu gako aboro. Moize akekehe ti mbia. Mbori afu gu kpakakpaka ambia naadu ue a fu Moize. Mbori ake agu andiko naadu 10 ti gu kpakakpaka ambia re. I nayambaha nga Agu Andiko Naadu Bawe. I naayambaha ayamba a nga Agu Arugute Naadu Bawe.

Agu Andiko Naadu Bawe nga nyanyakipa andiko. Ono kinawo a nyakipa kura andiko Mbori afuhe fu aYisaraere. Ndiko sa dagba agi andiko re nga: ‘Mo kpinyemu Yekova nga gamo Mbori na ngbaduroyo dũ, na berãro dũ, na mbisimoro dũ na omero dũ.’ Gu kuraha nga: ‘Mo nikpinyemu kuaro wa mo akpinyemu tiro.’ Wiri Mbori nga Yesu Kristo aya wẽ gure nga agu andiko kiipaha gbe dagba agu andiko dunduko Yekova afuhe fu aYisaraere. Ani nika wirikapai awirika kusa tipa Wiri Mbori na gako ayugopai.