Raba Aoko Abamoirago

AGI akumba re rogo kerepai. Si naida i kuru ni ipo, ka si adunga wo ya i nakpi kindi. Abamoirago nga ga aYisaraere yo du, na gu dee naundo yo re rimori nga Raba. Raba aaraka pavuru gu ngapa nga ga gu bakporo nangia Yereo. Ani bingo gupai du agi akumba ti ni re rogo kerepai.

AYisaraere aima mbeda ka si gu baime nga Yaradene tipa ka rimo ku ringara Kanana yo. Ono mbata fu i si, Yosua akedi abamoirago ue. Ko aya fuyo: ‘Oni ndu ka bi gu ringara re na gu bakporo nga Yereo.’

Ho agu abamoirago re adani Yereo yo, i arimi kutii gu bambu nga ga Raba. Ono boro andu ki gumba payo fu bakindo Yereo ki ya: ‘AYisaraere ue ye ni gi yuru re ka maarago.’ Ho bakindo agi gipai ni re, ko ki kedi akumba kua Raba yo, i ki zinahe furi ki ya: ‘Agu akumba du dimoyo, mo kusiyo ku zegi no!’ Ono Raba aima oka agu abamoirago re rii gari bambu yo. Ri ki ya fuyo: ‘Akumba niima ye kono du mi ni, ono mi ainongo wari i niye ni te. I niima guari ka ga ho rago naabiso ni, mbata fu kiso yo ngbadimo bakporo. Ka oni oro, oni gbiayo agbia!’ Agu akumba re ki guari nibasa ka dofuo agu abamoirago re.

Fuo ndu agu akumba re, Raba ki oro ni ipo kurii bambu yo. Ri ki ya fu agu abamoirago re: ‘Mi ima ino ya Yekova nika fu gi ringara re afu furoni. Ani aima giapa wai ko augusi gu ime nga Zamba Baime ho oni akuru ni Ezipeta yo, na wai oni aimi bakindo Siona na bakindo Ogo. Sidu tie, wa mi nayugu weneringise furoni, oni kido re nga oni nika yugo weneringise ayugo fere a. Oni batasi re na buba na nina, na akawire na aunvurami na atamere.’

I akido Raba nga i nika manga wenepai amanga furi, ono i aya furi ri duwa ka ri mangipai sa. I aya furi: ‘Mo di gi zamba gire re ki kpiraha ti gamo bangiri bambu, ki dungura agumero dunduko kutii gamo bambu fuoro. Ho ani ka ye ni berewe ku Yereo no, gu bambu ani ka bi gi zamba gire re ti bangirihe, ani aimongo boro rogoho te.’ Ho agu abamoirago re akaragatiyo ni fuo Yosua, i agumba agu apai fuko dunduko namangi.