Asanahe be Agedihe

Wa duhe nga Yekova aidanga na irisokpiahe te, tipagine ko aambusanga Arona ti ni ho ko amangi kpia wiri bagara ni ya?

Ho Arona amangi kpia wiri bagara ni wa duhe ni kekehe rogo Gate kapita 32, ko akuo ga Mbori ndiko nga gu du tipa irisokpiahe. (Gate 20:3-5) Nisangbana gipai re, “Yekova adu na bakere zinga kuti Arona ki mbedi ka gbarasa ko agbarasa; [Moize] ki kpari tipa Arona a ni kina gu rago re a.” (Pa Rug. 9:19, 20) Ya mo ga gu ruru kumba nangia Moize zungodihe re adu na “bakere tandu” ti ni nibipa gupai Arona amangihe? (Yak. 5:16) Ii. Si nawira wa Yekova ahe fu mbusa fu Arona mbiko gu kpee Moize amangihe re na mbiko kura nduapai ue.

Si nawiraha nga bambata ndupai adu nga pa gu ruruapai Arona amangihe kusayo. Ho i akedi Moize ni fuo Faro tipa ko kusi awiri aYisaraere Ezipeta yo, Yekova asia Arona tipa ko gasi Moize, na tipa ko naafura kuba Moize. (Gate 4:10-16) Agi akumba ue re aima iriso fugo Mbori na ki dogodi fuo gu kere Bakindo nangia ga Ezipeta ko re bara dunguhe. Ho Arona aduni kindi Ezipeta yo, ko anaamangapai niruruhe, na ko akpatagara kuti mangasunge fu Yekova.—Gate 4:21.

Ani makianga gupai a nasa Arona ko mangi kpia wiri bagara. Moize adu rii Bagangara Sinai yo tipa arame 40. Ho “aboro abi he ni ya Mose aima aima gbe, ka ko azorã nga ri bagangara yo ni ipo ya,” i ki zomia Arona tipa ko mangi kpiahe fuyó. Arona amangipai kuti sangbayo ki mangi kpia wiri bagara fuyó rogo dahabu. (Gate 32:1-6) Wa si avura duwo, ga Arona mangapai tifuoho ayugu gupai nga ko aaidanga nzunzu ka manga gu kpiahe re te. Si nawira gupai nga ko amangihe mbiko i azomia ko azomia. Gupai nasa rani ani idi kuti gipai re nga, ho Moize asakipai ni tipa irisokpiahe, awiri Revi dunduko kodihe na Arona angbe na kina Yekova. Agu akumba akutu biata nangia abarikaka gupai re dunduko i aimiyo.—Gate 32:25-29.

Tifuo gure, Moize ki gumba gupai fu aboro nga: “Oni aingi pai ni bakere he.” (Gate 32:30) Anga kina Arona sa namangi ingapai te. Ko gbiati kura aboro agbia undo be ga Yekova bakere inapai.

Tingbafuo gipai nga ga manga kpia wiri bagara re, Yekova aya i moi Arona nigbiamotumo. Ko aya fu Moize wee: “Mo ki ukadi Arona ni kparakpara ziazia aroko, mo ki mbedi ko ni nzeme, ki kpara ko, ya ko nimangi pare rogo pa ga boromotumo sunge.” (Gate 40:12, 13) Zanga kapa, Yekova aima mbupai fu Arona ti gako ingapai. Arona aduni ruruko kpotoko yo tipa ziazia irisombori angianga irisokpiahe ya.