Angapa Yereo Atiwi

GINE nasa agi angapa re si tiwi? Si nangera wa ka i ya vura du mangi rogo gu rago re. Ono anga vura ngaha mangi te. Gure nga gu kura iiriwopai Yekova namangihe! Ani bingo wai gupai re amangi.

Yekova aya fu Yosua: ‘Mo gbiati gamo abasovura, oni ke pati gu bakporo nga Yereo. Oni ke pati ni bara sa na aˈuru dunduko tipa arame sita. Oni di sanduki mokido na oni. Aboromotumo saba si aida i ngbembatayo fu sanduki mokido na i kini vudi mbanya.

‘Rogo gu saba uru, oni ki ke pati bakporo bara saba. Fuoho, oni ki vudi mbanya ni gbangaha gbe, na aboro dunduko ki ta ngbayo ni bakere tatangbaa. Agu angapa nga ga Yereo nika tiwa kusande!’

Yosua na aboro dunduko ki mangi gupai Yekova agumbaha. Wa i aake pati bakporo, i dunduko aongo kii. Boro ho nafura te. Kina woro mbanya sa naapaa gbiati woro nduyo. Si nawira gupai nga agu avurayo naadu Yereo yo aima du na gunde. Mo nabi gu zamba gire du ti bangiri bambu ariyo re? Ga da bangiri bambu du? Ga Raba du. Ri aima manga gupai agu abamoirago naadu ue apehe furi. Gari aboro adu dimoyo na ri dũ kini bi gupai naamanga.

Ni yangaraha, rogo saba uru, fuo keyo pati bakporo bara saba, i avudi mbanya, abasovura ki ta ngbayo, na angapa ki tona ka tiwa. Yosua ki ya: ‘Oni imi agu aboro du bakporo yo dũ na ki zo bakporo kusayo. Oni zokodi ahe dunduko. Oni batasi kina feda, dahabu, tara, gbiati marã, oni ki ndu na ni ku rogo gu baigoahe du tii ga Yekova bamburoko yo.’

Yosua ki ya fu agu abamoirago naadu ue re wẽ: ‘Oni ndu kutii gu bambu yo nga ga Raba, ki kusi ri yo na gari aborokporo.’ Raba na gari aborokporo aima bata, a wa abamoirago akido ri na ni.