Raba Aigi Abamoirago

Ho ga aYisaraere abamoirago andu ni ku Yereo yo, i asungu kua gu dee rimori angia Raba. Bakindo Yereo agihe na ki kedi asekere kua Raba yo. Ri aigi agu abamoirago naadu ue re rii bambu yo na ki ya fu agu asekere re i ndu ti gu kura gene. Ri aya fu abamoirago wẽ: ‘Mi nika undo roni bambiko Yekova gu du na oni na oni nika dia gi ringara re adia. Ako, oni kido re nga oni nika batasa gimi aborokporo.’

Abamoirago aya fu Raba: ‘Ani kido ro nga kerepai amanganga gamo aborokporo te.’ I aya: ‘Mo vo zamba gire ti bangiri bambu, tipa ka batasa gamo aborokporo.’

Raba azogo agi abamoirago re ti bangiri bambu ti gire. I andu kurii abaagangara yo na ki gbu yo tipa arame biata mbata fu i karagatiyo koyo du Yosua ni. Fuani, aYisaraere asi gu di nga Yaradene ka mbakadatiyo tipa ka zio ringara. Yereo nga gu bambata gbata i azihe. Yekova aya fuyo, aˈuru dunduko si aida i ke pati gu gbata re bara sa tipa arame sita. Rogo saba uru, i ake pati gu gbata re bara saba. Fuo gure, aboromotumo avudi gayo ambanya, na asekere ki tangbayo kuari gbe. Ndugu gu gbata re ki kuadi ku sande! Ono ga Raba bambu naadu ti vuro ndugu ka si agburuwanga ya. Raba na gari aborokporo abati mbiko ri akido kuti Yekova.