Aboro Gibona Amangipai ni Tatamana

DUNGU agu abaakporo naadu Kanana yo ambakadi tihe tipa ka sovura kuti aYisaraere. I aberẽhe nga i nika dia adia be aYisaraere. Ono aboro gu bakporo naadu mbembedi rimoho angia Gibona aaberãnga ha nga i nika dia beyo te. I aima ino gupai nga Mbori du naaundo aYisaraere, na ka i aidanga ka sovura kuti Mbori ya. Mo ini gupai aboro Gibona amangihe?

I amangi tiyo aYisaraere biyo wa agu aboro naye rogo batuturũ rago. Akumba dagbayo avodi kpatakpata aroko na kpatakpata arakata. I avodi kpatakpata asuari kurii gayo adongi, na ki di kuru ugu kpakuto. I ki ndu koyo du Yosua ni ki ya: ‘Ani naye rogo batuturũ ringara, bambiko ani agi pa gaoni bakere Mbori nga Yekova. Ani aima giapa agu apai dunduko ko amangihe furoni Ezipeta yo. Gaani abarumbatayo aya furani ani di kpakuto tipa nunguro ki ye kono du oni ni ki ya furoni: “Ani nga gaoni amoyambu. Oni kido rani nga oni asonga vura kuti rani te.” Oni bingo kina wai aroko nasipi tirani be gbanga nduge na wai gaani kpakuto naraki ki ugu.’

Yosua na kura abarumbatayo ki idi kuti sangba aGibono. I ki kidoyo nga i asonga vura kuti yo te. Ono fuo arame biata, i aini gupai nga aGibono aaraka kina mbembedi ho.

Yosua ki sana yo ki ya: ‘Tipagine oni aya furani ti ni oni aye rogo tuturũ ringara?’

AGibono ki karagaha fuko ki ya: ‘Ani amangihe wo mbiko gupai nga ani agi gupai nga gaoni Mbori nga Yekova ima kidohe nga ko nika fu ringara Kanana afu furoni naabaha dunduko. Ani kini gunde agunde nga oni nika imo rani.’ Ono aYisaraere aima kakuti gayo kidohe, ka i aimongo aGibono ya. Ono i asayo ni kina gayo amoyambu.

Bakindo Yerusarema azingi ni kerehe mbiko gupai nga aGibono amangi zereda na aYisaraere. Ko ki ya fu kura abakindo biama: ‘Oni ye ka undo re ani asovura kuti Gibona.’ Na agu abakindo re aima kodatiyo na bakindo Yerusarema ka ndu ka sovura kuti Gibona. Ya mo patatamana du aGibono amangihe nga ka manga zereda na aYisaraere, nga gupai nasa gupai nga agi abakindo re ye ka sovura kuti yo? Ani ka inoho aino.