Yosua na Aboro Gibona

Gu pangbanga nga ga Yereo agbandaka ku rogo gu kura arago naadu pati Kanana. Gayo abakindo adiberã tipa ka dunguratiyo ka ye ka sovura kuti aYisaraere. Ono aboro Gibona tigayo aye tigayo na gu kura bipai kia. I avodi sipisipi aroko, ki ndu fuo Yosua ki ya: ‘Ani naye kina boro tuturũ. Ani ima giapa Yekova na agu apai ko namangihe furoni Ezipeta yo na Moaba yo. Oni kidohe nga oni azubongo rani te, ani ki da ni gaoni amoyambu.’

Yosua aima ida kuti gupai i apehe na ko ki ya ko azubongo yo te. Fuo arame biata kusa, ko aye ka inoho nga i ayengo rogo tuturũ rago te. I aaraka kina ringara Kanana ho. Yosua ki sana aboro Gibona nga: ‘Tipagine oni ape ziree ti ni furani?’ I ki ya: ‘Ani agunde angude! Ani ima inoho ya gaoni Mbori nga Yekova nga Mbori vura. Ako, ka oni imingo rani ya.’ Yosua akakuti gako kidohe ki mbuyo i raki.

Fuoho aturongo te, abakindo aKanano bisue na gayo asekere aserekpo aboro Gibona na vura. Yosua na gako asekere andu yuru sasasa tipa ka batasa yo. Vura ki tona rogo gu kura girorago wiso. AKanono ki tona ka otoka bau. Agu aba dunduko i aora rogoho, Yekova abafu bakikindigi morogumba kuriyo. Fuani, Yosua ki sana Yekova ko rugusi uru ka si tinga ya. Tipagine ko asana Yekova ti ni ko mangi gupai re baraho uru aarunga ni mbata ya? Mbiko Yosua adu na kido kuti Yekova. Uru aatinga ni gu uru re te daho aYisaraere adi ni be abakindo aKanano na gayo asekere dunduko.