Ruta Na Naomi

ROGO Ziazia Kekeapai yo, kitabu kinaho du rimoho nga Ruta. Si na gu pangbanga rogoho nga gu du tipa agu aborokporo naraki ti gu regbo awiri aYisaraere adu na abasapungbanga beyo. Ruta angia paranga dee rogo gu ringara nga Moaba; ri aadunga dagba gu ngbatunga nga ga ga Mbori aboro nangia aYisaraere te. Ono ho Ruta awirikipai ni tipa Yekova Mbori, ri atona ka kpinyemuko gbe. Naomi nangia gu sosono dee naundo Ruta ri ini Yekova.

Naomi angia boro Yisaraere. Ri na kumbari gbiati awiri ue aga ku ringara Moaba yo ti gu regbo gomoro adu Yisaraere yo gbe. Rogo kura uru sa, kumbaku Naomi akpi. Kusa, awiri Naomi arogo adegude Moaba ue rimoyo angia Ruta na Orupa. Fuo agarã 10, awiri Naomi ue dunduko akpiki. Nairiwo gu gberarago Naomi na agu adegude re adu na ni! Ginipai Naomi arengbe ka mangaha awere?

Rogo kura uru sa, Naomi adiberã tipa ka ndu gbanga nduge ku kpuyo yo, yo gari aborokporo adu ni. ARuta na Orupa aaida ka sungo sa na ri, sidu, i aguari ka ndu wa sa nari. Ono tingbafuo nduyo tooni gene, Naomi asa tiri fuo agu adegude re ki ya: ‘Oni karaga tironi ku kpuroniyo ka sungo na anaroni.’

Naomi ki nyoro pangba agu adegude re ni yangara sene. I ki tona ka kpara bambiko i aima kpinyemu Naomi gbe. I ki ya: ‘Oó! Ani andu na mo sa koyo du gamo aboro ni.’ Ono Naomi ki karagapai ki ya: ‘Oni karagatironi awire. Si angba furoni ka oni du kpuroniyo.’ Si du Orupa akaraga tiri ti ni ku kpuyo yo. Ono Ruta aakaraganga tiri te.

Naomi ki aria tiri fuori ki ya: ‘Orupa ima ga. Mo ndu fuori tipa oni ga ku kpuroniyo.’ Ono Ruta ki karagaha furi ki ya: ‘Ka mo asadingo ka sa re mi mbu ro ya! Mo mbu re ani ndu na mo. Yo mo ka ndu kuhoni mi andu a kina koyo, yo mo ka raka ni mi araka kina yo a. Gamo aboro angia gimi aboro, na gamo Mbori angia gimi Mbori. Yo mo ka kpi ni mi akpi kina yo, na gu ba re i ka kpisida re rogoho.’ Ho Ruta apeke agi apai re ni, Naomi ambu pe gupai furi nga ri karaga tiri ku kpuyo yo.

Ni yangaraha, agi adee ue re ki da Yisaraere yo. Yo i asungu ni tipa ka raka. Fuo gure nibasa, Ruta ki tona mangasunge ati yo, bambiko si angia regbo keahe. Kumba rimoko angia Boaza aidihe furi tipa ri ndu ka keahe rogo gako aati. Ya mo mo ini da nangia na Boaza? Ri angia gu Raba naadu Yereo yo.

Rogo kura uru sa, Boaza aya fu Ruta wẽ: ‘Mi ima gia agu apai dunduko du tipa ro na gu weneringise yugu mo ho fu Naomi. Mi ima ino wai mo ambu bamo na namo na ga ringara na wai ye mo ka raka dagba agu aboro mo ainongo yo mbata ya. Yekova ngbanga angba na mo!’

Ruta ki karagapai ki ya: ‘Nangba sinoro koyo du mi ni. Mo ima sare mi du wenengai na gu wene gene mo nafura ngbaha fere.’ Ruta aima ngba ti Boaza gbe, na si aaimanga gbe te i ki rogotiyo. Nairiwo wai rago angba ti Naomi na gipai re! Ono Naomi adu na ngbarago berewe gbe ho Ruta na Boaza avungu bambata wiriyo ni nga Obede. Kusa, Obede aye ka da ni tita Davide, nga guko ani ka wirika dungu apai tipa ko kusa.