Ruta na Naomi

Ti regbo gu kere gomoro naati kurii ringara Yisaraere, boro Yisaraere rimori angia Naomi aga ku rogo gu ringara nga Moaba na kumbari gbiati awiiri ue nga akumba. Kusa, kumbaku Naomi akpi. Awiiri amangi rogatise na Ruta gbiati Orupa nangia aboro Moaba. Si ni parungo tie nga, fuo bete regbo kusa, awiri Naomi nga akumba akpiki.

Ho Naomi agi gupai ni nga gu kere gomoro naati kurii ringara Yisaraere ima nyasa, ri adiberã ka karaga tiri ku rogo gari ringara. ARuta na Orupa aga sa na ri, ono ho i adu ni gene, Naomi aya fuyo: ‘Oni adu ni wene adia awire na kidu ni wene adia gude fere. Mi nakpinyemu oni rogo akumba aroga berewe. Oni ga ku rogo gaoni ringara nga Moaba.’ Agu adee re aya: ‘Ani ima kpinyemuro! Ani aidanga ka mbu ro te.’ Naomi aka kindi kuti sosoda yoi karaga tiyo. Ni yangaraha, Orupa akaraga tiri, ono Ruta aakaraganga tiri te. Naomi aya furi wẽ: ‘Orupa nakaraga tiri fuo gari aboro na gari ambori. Mo ga na ri, ki karaga tiro ku rogo gamo ringara.’ Ono Ruta aya: ‘Mi ambunga ro te. Gamo aboro angia gimi aboro ga Mbori kingia gi Mbori.’ Mo nabihe nga Naomi adu wai ti gu regbo Ruta ape gupai re?

ARuta na Naomi ada Yisaraere yo ti tonatona regbo ke ahe. Rogo kura uru sa, Ruta andu ka dungura futu ahe rogo gu ati nangia ga gu kumba rimoko angia Boaza, nangia wiri Raba. Ko agi gupai nga Ruta angia boro Moaba nga gu ri naadu ni ruru ri fu Naomi. Ko aya fu gako amangisunge wẽ i nimbu bete zende ahe ambu fu Ruta ati yo ri nidungura ha.

Rogo gu nyemu re, Naomi asana Ruta nga: ‘Ga da ati mo ni mangisunge areme rogoyo?’ Ruta ki ya: ‘Gu ati nga ga Boaza.’ Naomi ki ya furi: ‘Boaza nga boro sa dagba agume kumbami. Mo nindu kumbatayo kindi kaa mangasunge rogo gako ati na gu kura paranga adee. Pai ho nika manga ro yo te.’

Ruta aamangasunge kindi rogo gu ati nga ga Boaza da kinaho regbo ke ahe adigi ni. Boaza abi gupai nga Ruta nga nyanyaki namangisunge na ri nga wene sino dee. Ti agu aregbo re, si adunga ka kumba kpi ka awirini adunga ti ni nga akumba ya, agumeni ima rengba ka dia dekurugbo ni. Sidu, Boaza adi Ruta. I avungugude rimoko angia Obede, nga gu ko naada kusa ni tita Bakindo Davide. Anakurea Naomi adu na ngbarago. I aya: ‘Bambatapai nga, Yekova afu Ruta foro nga gu ri duni wene dee foro, na awere mo na kumbagude bero. I tambua rimo Yekova.’