Kindo Akparaka

Zereda adu Yisaraere yo ti gu regbo Soromo anaairiso Yekova. Ono Soromo arogo dungu adee rogo gu kura aringara, na agu adiako re anaairiso akpiahe. Soromo atona ka sa sinoko yeeye, na ki tona kaa iriso akpiahe a. Rago aima gberã ti Yekova. Ko aya fu Soromo wẽ: ‘Yisaraere nika guari kusayo rogo gamo ngbadimokporo na si akparaka ue. Mi afu kikii paparaha fu gamo amoyambu na gamo ngbadimokporo ki zogo kina wiri tooni paparaha gbua.’

Yekova amangi gako diaberã gbaiga ngba gu kura gene. Kura ga Soromo moyambu sa nga Yerobama aandu gako nunguro ho ko agbia gu nebi nangia Aiya ni gene. Aiya asipi rogo gako roko yo 12 na ki ya fu Yerobama wẽ: ‘Yekova nika dia gu kindo nga ga Yisaraere kusayo be ga Soromo ngbadimokporo na ki kparakaha ue. Mo di gu du bawe re bambiko mo adu ni bakindo kurii angbatunga bawe.’ Bakindo Soromo agi gipai re na ki idi ka imo Yerobama! Sidu, Yerobama aoro kusayo ku Ezipeta yo. Fuo bete regbo kusa, Soromo akpi na wiriko nga Rabama ada ni bakindo. Sidu, Yerobama abihe nga ka ko ga ku Yisaraere yo pai arengbanga ka mangako te.

Agu abaakumba nga ga Yisaraere aya fu Rabama wẽ: ‘Ka mo mangipai na aboro ngba wene gene, i ni kadu ni ruruyo foro.’ Ono agu abakurea Rabama naadu ni parangayo aya: ‘Si naida mo nimangi fuyo gbegberẽ! Ki sayo i naamanga kere nyanyaki asunge mbugo.’ Rabama apekefuo agu arugute nangia ga paranga abakureako. Ko anaamanga aboro ngba gbegberẽ gene na i ki asamungu kuti ko. I amoi Yerobama ni bakindo agu angbatunga naadu bawe, nga gu naada ni gu kindo nga ga Yisaraere. Gu kura angbatunga naadu ue re ada ni gu kindo nga ga Yuda, na i adu ni ruruyo fu Rabama. Agu angbatunga 12 naadu Yisaraere yo re aima kparaka.

Yerobama anaaidanga gako aboro ndu ka irisombori Yerusarema yo rogo ga Rabama kindo te. Mo ini tipagine? Yerobama aagunde nga i nika mbuko ki satiyo ka songoda Rabama. Sidu, ko ambakadi kpia wiri abagara ue ni dahabu na ki ya fu gako aboro wẽ: ‘Yerusarema ima turo ni kerehe. Oni ima rengba ka irisombori ane.’ Aboro atona ka iriso kpia wiri abagara ni dahabu na bangiriyo ki go ti Yekova berewe.