Mbori Akidopa Paradizo

GI SURA re nga sura paradizo nga gu Mbori apekepaha fu gako nebi nangia Yesaya. Yesaya araki fuo kpi Yona.

Gu fugo nga paradizo si wa ka i ya “ati.” Ya mo gipai re natingidanga ro na pa kura ba ani aima sakapai tipaha rogo gi kitabu re? Si nangera wakina gu bawene ati Yekova Mbori amoi Adamu rogoho na Eva. Ono ya mo regbo ho kpotosende dunduko nika da ni paradizo?

Yekova aya fu Yesaya wẽ ko kepai tipa gu vovo paradizo naye fu ga Mbori aboro. Ko akehe ki ya: ‘Awaru na awiri akandoro araka sa rogo ­pazereda. Awiri abagara na awiri abahu arika sa, na rukutu agude nikaa riga ra. Fogogude angimbaro ti ngba yaro kere woo ka gu woo re adenga ru ya.’

Dungu aboro rengbe ka ya: ‘Ka agi apai re mangingo te. Fudifudiapai aima digo nidu auru kpotosende, na si agonga te.’ Ono mo berẽnga kurii gipai re: Gini ngbatunga kporo Mbori afuhe fu aAdamu na Eva?

Mbori amoi aAdamu na Eva paradizo yo. Mbori ado yo rogo gu bawene kpuyo re mbiko kina gupai nga i abasasangbako. Na si du a i agbinza ti ni ki kpiki. Ono Mbori nakidohe nga, ko nika fu agu ahe afu aAdamu na Eva azangaha fu agu aboro nakpinyemuko.

Rogo gu vovo paradizo naye re, he ho nika manga kuraha gbegberẽ te. Zereda nika du rogo arago dũ. Aboro dunduko nika du na kpotoyo ni wenehe na kidu na ngbarago. Apai nika du a wa Mbori aidi si du ti tonatonaha. Ono ani ka ino kura apai kusa tipa wai Mbori nika manga gipai re.