Abatungusi Wene Pangbanga

YEKOVA afu wene kpiapai furani ani pekafuo ho nga Wiriko Yesu Kristo. (1 Pet. 2:21) Ho boro ada ni ni pekefuo Yesu, ni natungusa wene pangbanga wa ga Mbori bamangisunge. Yesu ayugu gupai nga gupai re nafu ngbarago fu boro ho ko aya ni wẽ: ‘Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.’ (Mt. 11:28, 29) Agu aboro dunduko di gi yambahe re kugume, nagbia undo agbia ti ni!

² Ni du Yesu ni ga Mbori Bangbasia Bamangisunge, ko ayambu kura aboro i da ni apefuoko. (Mt. 9:9; Yo. 1:43) Ko araba yo na ki kedi yo i ndu ka manga kina gu bangisa sunge ko anaamangaha. (Mt. 10:1–11:1; 20:28; Rk. 4:43) Kusa, ko akedi aguyo berewe nga 70 i ndu ka takapande wene pangbanga nga ga ga Mbori Kindo. (Rk. 10:1, 8-11) Ho Yesu akedi agi abawiriki re ni, ko aya fuyo wẽ: “Gu ni nagia gaoni pai ni nagia gi pai a; gu ni nabasa paroni ni nabasa pa re a; gu ni nabasa pa re, ni nabasa pa gu ko nakedi re a.” (Rk. 10:16) Rogo gi gene re, Yesu ayugupa nyakapa gu sunge ko afuhe fu abawiriki. Si adu nga i narukuba Yesu gbiati gu Mbori nga Bahe Kisusi! Kina gu bangisapai re du areme a fu agu aboro dunduko nadia ga Yesu yambahe kugume nga: “Mo ki ye, ki nipeke re.” (Rk. 18:22; 2 Kor. 2:17) Agu aboro dunduko di gu yambahe re kugume Mbori fu gu sunge fuyo nga ga tungusa gu wene pangbanga nga ga Kindo na ka sa aboro ni abawiriki.​—Mt. 24:14; 28:19, 20.

³ Pa dia ani ga Yesu yambahe kugume ka pekako, nasarani ani gbia gu momu nga ga ‘ino’ Yekova Mbori na Yesu Kristo. (Yo. 17:3) Yekova ima yugo gako agene furani. Mbiko gako undo, ani ima saberã rani, ki vo vovo borose, na ki mbakadi asino rani si nindu kuti gako arugute. (Rom. 12:1, 2; Ef. 4:22-24; Koro. 3:9, 10) Padu ani na tambuahe ima sarani ani kpara gaani raka fu Yekova na ki yuguhe ni zio ani bapatiza. Ti regbo gaani bapatiza du ani ada ni ni ga Mbori siasia abamangisunge.

⁴ Si naida ani tingidi gupai dedede nga si naida ani mangisunge fu Mbori na gu bee du ni gigirihe gbiati ngbaduse. (Tam. 24:3, 4; Yes. 52:11; 2 Kor. 6:14–7:1) Vurube idapase kuti Yesu Kristo, ani ima gbia gigiri sangbakpotoseyo. (Eb. 10:19-23, 35, 36; Yugo. 7:9, 10, 14) Gu mokedi nangia Pauro azungodi aKristano nga i mangi apai dunduko sa ga Mbori taarimo zanga kotosa akurayo. Gu mokedi nangia Petero anyakasipa du ni wene kpiapai mbiko si rengbe ka gbe zanga idipase ku rogo rengo. (1 Kor. 10:31, 33; 1 Pet. 3:1) Wai du rengbe mo ka undo boro ni rẽ ka koda tiní na ani ni ga Mbori bamangisunge wene pangbanga?

VOVO ABATUNGUSIPAI

⁵ Ti gu regbo mo natona wisigo Baibiri na gu boro du na nyemu rengo, mo ngarasi ni ni pekepa agu apai ni awirikaha fu kura aboro. Ni rengbe ka pehe fu agumeni, abakureani, abadiasunge, gbiati kura aboro zanga mbakada tiní ambakada tipaha. Gere nga bambata diandue tipa ka yugopai fu vovo aboro i da ni apekefuo Yesu Kristo na ni abamangisunge wene pangbanga. (Mt. 9:9; Rk. 6:40) Wa gu vovo boro re nikaa sona rogo toro yo na ki inidi tiní na tungusapai angianga kuti asinoho ya, zanga kapa, ni nika pehe ape foro nga ni naida ka tungusapai.

GUPAI BAIBIRI AIDAHA

⁶ Mbata fu yamba mo boro oni kuru na ni kporo na kporo ti bambata regbo, si naida mo rugutiro na gupai nga ni ima ringbisa agu apai Baibiri aidaha. Gu boro nagasa rani ku gene tungusapai yo, ni nayugoho gbaiga nga ni na aDezire Yekova. Sidu, gure tie nayugoho nga ni naraka ringbisihe kuti ga Yekova arugute du tipa ruru mangapai na ni rengbe arengba kada ni gu batungusipai ataziongo bapatiza ya.

⁷ Wa mo nikaa wirikapai na boro na kini sakipai na ni riipa gu bangua arengo nga ga Baibiri, si nawira wa mo ima rugatiro na agu apai du tipa ni. Si rengbe kadu nga mo ima bi gupai nga ni naraka araka ringbisihe kuti agu apai ni awirikaha. Ono tie, gu kura apai kinaho nabipa gani raka rengbe abaakumba ka sakapai tipaha na ni kubara bangiro.

⁸ Barii gu rondo nga ga abaakumba nika manga mbakadapai na abaakumba ue (guni sa dagba gu rondo nangerakurii sunge tungusapai) tipa i saki agi apai re na mo gbiati bawiriki Ziazia Kekeapai. Rogo gu dungurati du na abaakumba gbua tooni, bakumba gbiati gu moundo abaakumba du na inohe ima rengba ka mangaha. Agu awirina i nasia yo tipa gipai re, si naida i mangihe ni ipo zanga keesa. Nirengo, ka si du nga bawiriki Ziazia Kekeapai sanahe ti regbo dunguratise nga ga dungurati, si ima rengba kadu taata fuyo i fura na mo gbiati gamo bawiriki Ziazia Kekeapai tingbafuo dunguratise. Si aidanga gu sakapai re bagunde ti bawiriki Ziazia Kekeapai te. Mbata fu i idihe fu bawiriki Ziazia Kekeapai ni da ni gu batungusipai ataziongo bapatiza ya, si naida i wisigi agi apai re singia:

1. (1) Ni ima idaha nga Baibiri nga Fugo Mbori gako toro adu kugiipa kehe.​—2 Tim. 3:16.

2. (2) Ni ima ino gu bangua ayugopai nga ga Ziazia Kekeapai na ki idi kutini mbiko wa boro nika sana ni, ni akaragapai ringbisihe kuti gupai Baibiri apehe angianga kuti gu yugopai nga ga ziree pambori watadu gani aberãpai ya.​—Mt. 7:21-23; 2 Tim. 2:15.

3. (3) Ni nagiasangba gu zinahe nga ga Baibiri nga ga kodatise na ga Yekova aboro ba adunguratise yo kangia gene kina beni tipa ka mangaha wo.​—Tam. 122:1; Eb. 10:24, 25.

4. (4) Ni ima rugatini na gupai Baibiri apehe tipa wasiwasi kodaba, kodihe na bäri, roga dungu adee, gbiati kodaba kumba na kumba watadu dee na dee na ni naraka ringbisihe kuti gu yugopai re. Kangia ni naraka kporo na dee watadu kumba angianga gumeni ya, si naida i rogotiyo ringbisihe kuti andiko.​—Mt. 19:9; 1 Kor. 6:9, 10; 1 Tim. 3:2, 12; Eb. 13:4.

5. (5) Ni namangapai kuti gu zahe nga ga Baibiri du tipa kpibuda na ni adianga kere angua kutii kpotoniyo te watadu kaa vu kere ahe wa bangi te.​—2 Kor. 7:1; Ef. 5:18; 1 Pet. 4:3, 4.

6. (6) Ni ima ino ndu gupai si aida ni ne gbegberẽ kpamiatise ti ni.​—1 Kor. 15:33.

7. (7) Ni ima mbu ziree pambori nga gu ni anidu rogoho mbata. Ni andunga berewe tipa gayo adunguratise na kaa koda tiní ku rogo gaha mangaapai a te.​—2 Kor. 6:14-18; Yugo. 18:4.

8. (8) Ni arimisongo ti ni ku rogo agu atagbagapai nga ga poritiki te.​—Yo. 6:15; 15:19; Yak. 1:27.

9. (9) Ni ima ida kuti gupai Yesaya 2:4 apehe tipa agu atagbagapai nga ga rikaaboro na kini raki ringbisihe kutini.

10. (10) Ni na nyemu kada ni Dezire Yekova.​—Tam. 110:3.

⁹ Ka si dunga abaakumba ainongo gu bipai nga ga bawiriki Ziazia Kekeapai riipa agi apai re te, i ima rengba ka sasana ni ni mangayo sunge na agu averesi du ane ni mburu gayo sakapai. Si ni nyanyakipa pai ni rugutini na ni nga agu aboro dunduko nagasa aDezire Yekova ku gene tungusapai yo i du wa ka i raki ringbisihe kuti gupai Ziazia Kekeapai aidaha beyo. Agu apai ni nika gumbaha nika undo abaakumba i rugutiyo singia ni ima ino gupai Baibiri aidaha be ni na singia ni ima du na gu bete inohe rẽ tipa ni tona tungusapai.

¹⁰ Si naida abaakumba pehe funi nibasa singia ni rẽ watadu ni arẽnga te. Dedede, si taata tipa i pehe funi ti digido gayo sakapai na ni. Kangia ni ima rẽ, si naida abaakumba tambua ni esuesu tipa da ni ni batungusipai. (Rom. 15:7) Si naida i ngarasi ni ni tona tungusapai ni ipo ka rengba du na ki tona ka fu fuõ gani sunge tungusapai ti digido diwi. Abaakumba rengbe ka sakarogoyo funi nga ho boro ada ni ni batungusipai ti bambata regbo ki fu gani bambata fuõ sunge nga ga tungusapai, i nika kusa ga Batungusipai Fuõ Sunge Rogo Dungurati funi na ki moihe ku rogo agu awaraga nga ga dungurati. Abaakumba narogoda agi atingidapai re be batungusipai tipa gupai nga riigbu naangera fuo agu apai nga ga pambori du tipa aDezire Yekova rogo zegino naabaha na tipa gupai nga batungusipai naamanga agu apai nga ga toro na kini gbia agu aundo nga ga toro. Kurii gure, abaakumba ima rengba ka tingida vovo abatungusipai na gupai nga, ai agu apai du tipa yo nibasasa i namangapai na ni ringbisihe kuti Agu Arugapai du Tipa Banda Agu apai du Tipa Boro (Global Data Protection Policy) nga ga aDezire Yekova du rogo jw.org.

¹¹ Pa inido ani tirani na gi vovo batungusipai re na kini bi agu apai ni amangaha na nyanyakipaha rengbe kadu na wene sangbanaha kurii ni. Si rengbe ka sa ni ni fu ripoti dedede na ni mangi bakere ome berewe tipa ka mangasunge fu Yekova.​—Frp. 2:4; Eb. 13:2.

¹² Bara sa kindi abaakumba naini gupai nga bawiriki Ziazia Kekeapai ima rẽ tipa ka tona tungusapai, gure a nga ni ima rẽ tipa i fu gu buku funi nga Mbakadatise ka Manga Gupai Yekova Akpinyemuhe. Fuo ni fu gani bambata ripoti, wiri guru tingidapai rengbe ka manga fu dungurati nga ni ima da ni gu batungusipai ataziongo bapatiza ya.

UNDO PARANGA ABORO

¹³ Rukutu agude a ima rengba ka da ni abatungusipa wene pangbanga. Yesu adi rukutu agude kugume na ki fu maku fuyo. (Mt. 19:13-15; 21:15, 16) Wa vura duhe nga avunguagude du na pagbia kurii awiriyo, kura aboro rogo dungurati ima rengba ka undo gu paranga aboro kpotoyo yo afõ yo tipa i tona mangasunge tungusapa Kindo. Kangia vungu gude nga mo, ka mo amaa wene kpiapai nga ga tungusapai fu awiro, si ima rengba ka ngarasa yo i du zaaza tipa ga Mbori sunge. Kangia gu gude nga wene kpiapai kpoto ru yo nafõ ru tipa u fura tipa gau idapase fu kura aboro, gini kura undo rengbe yo ka undo ru na ni?

¹⁴ Si adu ni wenepai fu avunguagude i bi boro sa dagba agu abaakumba du rogo gu Rondo Sunge Tungusapai du Rogo Dungurati ka sakapai na ni ka bihe singia gu gude re rẽ kada ni batungusipai. Barii gu rondo nga ga abaakumba nika manga mbakadapai abaakumba ue (guni sa dagba gu rondo nangerakurii sunge tungusapai) sakipai na gu gude re gbiati avunguru watadu gu boro nangerafuo ru. Kangia gu gude re na bete inohe nga ga rengo, na u ki yugu gu gopai nga u na nyemu ka tungusapai, gure nika yugo wene sonakumbatayo. Fuo wisigo agi apai re na gu kura apai du a fu sosono aboro, agu abaakumba ue re rengbe ka diaberã singia gu gude re rengbe kada ni gu batungusipai ataziongo bapatiza ya. (Rk. 6:45; Rom. 10:10) Ho abaakumba asakapai ni na tooni gude, ndupai ho tipa ka sasana ru riipa agu apai nga ga kuru aboro te.

¹⁵ Ti regbo gu dunguratise re, si naida abaakumba tambua gu gude re tipa gau sonakumbatayo na ki ngarasi ru u moi gu sasa nga ga zio bapatiza. Wa du he nga avunguagude ima manga bakere ome tipa ka rimiso rengo ku kpoto awiriyo yo, si naida i tambua yo atambua a. Tipa ka undo avunguagude i undo awiriyo ni bakerehe, si naida abaakumba yugu gu riipai fuyo nga “Tingidapai fu Avunguagude,” du ti kpewaraga 179-181.

KPARATISE NA ZIO BAPATIZA

¹⁶ Kangia mo ima ino Yekova na ki kpinyemuko ni manga mo agu apai ko aidaha bero na kini ndu tipa tungusapai, si naida mo nyakasi gamo pagume na ko. Rogo gini gene? Ni kpara mo gamo raka fuko na ki yuguhe ni zio mo bapatiza.​—Mt. 28:19, 20.

¹⁷ Kparatise nayugo gupai nga mo ima fu tiro tipa ka manga ga Mbori sunge. Kparatise fu Mbori nga mo fura fuko rogo kparakpee yo na ki kidohe nga mo naida ka mangasunge na gamo raka tipa gako sunge na kini ta ngba gako agene. Gure nayugo gupai nga mo nika ra nigorõ fu kina ko sa nyeanye kindi. (Pa Rug. 5:9) Gere nga gu kparakpee mo amangaha nisaro. Boro ho rengbe ka mangaha foro te.

¹⁸ Ono tie, si naida mo mangipai ni bakerehe ti gu gbua nga ka ya fu Yekova mo naida ka fu gamo raka fuko. Si naida mo yuguhe fu kura aboro nga mo ima kpara gamo raka fu Mbori. Mo nayugoho ni zio mo bapatiza rogo ime wa gu Yesu amangihe. (1 Pet. 2:21; 3:21) Kangia mo ima diaberã tipa ka mangasunge fu Yekova na mo naida ka zio bapatiza, ginipai rengbe mo ka mangaha? Si naida mo pehe fu barii gu rondo nga ga abaakumba. Ko nika manga mbakadapai tipa abaakumba ni bakiakia fura na mo ka bihe singia mo ima rẽ ringbisihe kuti gu ga Mbori arugute du tipa bapatiza. Ka mo aida ka ino kura apai, mo ngererii gu riipai nga “Tingidapai fu gu Batungusipai Ataziongo Bapatiza Ya” du ti kpewaraga 182-184 nga ga gi buku re, na “Asanahe fu Agu Aboro Naida ka Zio Bapatiza,” du ti kpewaraga 185-207.

TINGIDAPA SONAKUMBATAYO ROGO SUNGE TUNGUSAPAI YO

¹⁹ Tipa dungu agarã, tingidapa gu sonakumbatayo namanga rogo sunge tungusapai yo rogo zegino dunduko nafu bakere ngarasaro fu ga Yekova aboro. Naatona ti gu regbo Yesu ape gupai fu gako abawiriki nga i nika tungusa wene pangbanga rogo kpotosende dunduko, ndikidi aKristano aima du na nyemu ka ino wai du gipai re nika manga.​—Mt. 28:19, 20; Mk. 13:10; Amo. 1:8.

²⁰ Agu apekefuo Yesu naadu mbata aima du na ngbarago kaa giapa gu diabese naamanga rogo tungusapai. (Mk. 6:30) Gu kitabu nga Amokedi nape gupai furani nga bange aboro adu nga 120 ho ziazia toro azoro ni kurii yo ti rago Pendekote rogo gu garã nangia 33 F.B.K. Fuoho aturõngo te bangeyo ki dati 3,000 na berewe kuti 5,000. Tingidapai amangi nga “[Yekova] ki nifu agu aboro nanabata ku dagba yo yo na uru” na “bakere rimbasa aboromotumo ki ka kuti idapase.” (Amo. 1:15; 2:5-11, 41, 47; 4:4; 6:7) Nangba wai gu pangbanga sonakumbatayo re angarasi abawiriki! Nairiwo wai gu tingidapai re angarasi abawiriki i ndu kumbatayo na gu sunge Mbori afuhe fuyo, si ki vura du vurũ nga arungosiro adu ni nyanyakihe nga gu agbia-pambori aye na ni kurii yo!

²¹ Nibi gu waraga gu mokedi nangia Pauro akehe fu AKorosaio rogo 60-61 F.B.K., ko atingidipai yo nga wene pangbanga “nazuka zuzuhe ki nimoi pai a” rogo kpotosende dunduko na i ima ‘tungusapai rogo arago tii ngbangbaturũ yo dũ.’ (Koro. 1:5, 6, 23) Agu aKristano naadu mbata anaadegatuyo adega kuti Fugo Mbori, na ziazia toro aundo yo i tungusipai ni bakerehe mbata fu i gbarasi ga aYudo ringara rogo 70 F.B.K. Nangba wai gu ruru aKristano re adu na ngbarago ka gia tingidapai tipa gupai naamanga!

²² Wakina gure a, gu ga Yekova riigbu du ti gi gaani regbo re namanga ome ka keka agu atingidapai nga ga sunge namanga tipa ka digiso Matayo 24:14, nga gu naya: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” Wangia ani gu ga Mbori amoyambu kpara gayo raka fuko, sunge gu du ho si aida ani mangihe ni ipo. Si naida ani mangi ome ni basasa ka tungusapai sirisiri mbata fu digido rago da. Yekova nika manga ome tipa gi gako sunge re dati digidoho, na ka ani mangi gaani ome, ko idi aida na ani.​—Yeze. 3:18-21.

GAMO RIPOTI NGA GA SUNGE TUNGUSAPAI

²³ Ginipai nzunzu si aida mo pehe? Gu kpewaraga nga Tingidapa Sunge Tungusapai riigbu afuhe nayugo agu apai si aida mo kehe rogoho. Ono tie, agu aberãpai du re ima rengba ka undo ro.

²⁴ Gu bangirihe nga “Agu Ahe Mo Afuhe fu Aboro (Waraga, Vidio, Dede Fugo),” mo ke bange gu fu moho fu agu aboro angianga aDezire Yekova ya​—singia waraga, vidio watadu dede fugo. Tii “Yugo Vidio fu Aboro,” mo ke bange bara wai mo nayugu gaani avidio fu boro.

²⁵ Rogo gu nga “Karagatise fuo Boro,” mo ke bange bara wai mo nandu ka fura na agu aboro du na nyemupai ata kparanga gayo raka fu Mbori na ki zi bapatiza ya tipa agu apai nga ga Kindo. Karagatise fuo boro nga ndu fuo gu boro mo afura na ni, ka kepai funi, ka yamba ni rogo terefuni, keda kekepai funi rogo terefuni, watadu imeiri (e-mail), gbiati ndu na waraga fu boro. Agu aregbo dunduko mo awirikapai na boro, si naida mo gedihe nga karagatise fuo boro. Vungugude rengbe ka geda karagatise fuo boro bara sa rogo poso yo ka si du nga ni nangbembatayo rogo gu irisombori nga ga aborokporo ka si du nga agu agude ataziongo bapatiza ya kina pati ni.

²⁶ Wa vura duhe nga boro ima rengba ka wirika Baibiri na boro na aposo dũ, ti digido diwi, si gbua nga wirikipai na boro sa. Si naida abatungusipai fuku bange agu aboro ni bakiakia i nawirikipai nayo rogo gu diwi re. Gu wirikapai na aboro si aida mo tingidipaha nga gu mo nawirikihe na agu aboro angianga aDezire Yekova ya. Mo ima rengba ka geda wirikapai na aboro a ka si du nga bakumba sa dagba gu rondo nangerakuriipa sunge tungusapai sana ro nga mo wirikipai na gu boro naima zera rogo toro yo watadu gu boro zi bapatiza barambeda nga guni ata nyasanga gu buku nga Mo Raki Nyeanye Kindi na Ngbarago!

²⁷ Nyanyakipa pai du nga ani fu kina boro ndikidi “Asaa.” Gbe, si nga agu asaa ani adihe kuti tungusapai kporo na kporo, karagatise fuo boro, wisigopai na boro, watadu manga dezirepai kuti arugutehe watadu angianga kuti arugutehe ya na agu aboro ata danga ni aDezire Yekova ya. Kangia abatungusipai ue namangasunge sa, i ue dunduko rengbe ka geda asaa, ono kina boro sa dagbayo nika kepa karagatise fuo boro, watadu wisigopai na boro. Ka si du nga avunguagude sungu ue ka wirikapai na awiriyo ti regbo gu Irisombori Nga ga Aborokporo, i rengbe ka geda saa sa gbua vuru poso yo. Awirina nga akumba ima rengba ka geda gu regbo i nadihe kuti manga gu gumbapai du tipa aboro dũ. Gu boro nasaka rogo gu gumbapai re ku rogo gu kura fugo ima rengba ka geda gu regbo re a. Gu kura nyanyakipa asunge kinaho ani agedanga gu regbo ani nadihe kuti ngbaha ya, wa mbakadatise tipa tungusapai, ye tipa adunguratise nga ga tungusapai, manga kura asunge watadu manga gu kura apai.

²⁸ Abatungusipai ni basasa si aida i mangisunge na gu sangbakpotoyo yo Baibiri narabaha ho i adiaberã ni tipa gu regbo i namangihe kuti ngba manga dezirepai. Gu kura abatungusipai natungusapai rogo gu dagbarago du na dungu aboro rogoho, na aguyo kini mangihe rogo gu ba du aboro gbua tooni rogoho, na gu si aida i nduandu tuturũ tipaha. Adagbarago ni bakiakia; gu gene abatungusipai atungusapai ngbaha a ni bakiakia. Riigbu Bipasunge arũngo andiko kurii gu dungurati du rogo zegino dunduko nibipa wai si aida i ni fu asaa nga ga sunge tungusapai te, na boro ho i nasia ni nga ni du si aida ni mangi gu rugapai re a te.​—Mt. 6:1; 7:1; 1 Tim. 1:5.

²⁹ Si naida boro fu saa rogo gaani waraga tingidapa sunge tungusapai angianga aminiti ya. Kparakparapai sa fu kina gu batungusipai niima gbinza gbe, guni kaza nadingiso ni, guni nasungo rogo agu akporo nga ga aboro-wokote, watadu gbärĩgbärĩ-boro. Ngbatunga gu batungusipai re rengbe na fu aminiti 15. Ka ni vura tungusapai gbua tipa aminiti 15 rogo diwi, ni kehe na ni fuhe afu. Ni adunga ni gu batungusipai naima zera rogo toro yo te. Kina gu bangisapai re a du tipa gu batungusipai gbia tini na kpakarapai tipa bete regbo, si rengbe kadu nga gene beni ka ta rogo gu diwi re te watadu mbiko gu kere oro watadu kaza du tiní. Gi mbakadapai re fu kina agu aboro sa du na akpakarapai tiyo. Gu Rondo Nangerakuriipa Sunge Tungusapai nadiaberã singia batungusipai rẽ tipa gi mbakadapai re.

FUÕ GA BATUNGUSIPAI SUNGE ROGO DUNGURATI

³⁰ Gu fuõ sunge tungusapai mo amangaha na adiwi dunduko i nakehe ti gu waraga nga ga Batungusipai Fuõ Sunge Rogo Dungurati. Gu waraga re nga ga dungurati. Kangia mo naida ka ga ku rogo gu kura dungurati, mo pehe fu gamo abaakumba. Bakeapai nika manga mbakadapai tipa i kedi gamo fuõ sunge ku rogo gamo vovo dungurati. Rogo gi gene re, abaakumba nika du na rengba beyo tipa ka diaro kugume na ki undoro wenengai rogo toro yo. Kangia agu adiwi mo nika diaha kusayo ti gamo dungurati adanga ti biata te, mo ni kedi gamo ripoti kindi kina ku rogo gamo dungurati kporo yo.

NDU GUPAI ANI ATINGIDAPA GAANI SUNGE TUNGUSAPAI TI NI

³¹ Ya mo bangiro naago ago ti kura aregbo tipa ka fu gamo fuõ sunge tungusapai? Nirengo, ani dũ ni naida i tingidi rani na ni ti kura aregbo. Ono ka ani du na wene bipai tipa tingida fuõ gaani sunge tungusapai na ndu gupai nyakipa tingidaha ti ni, si nadu furani taata tipa ani tingidi ka fu gaani fuõ sunge tungusapai.

³² Kura aboro nasanahe nga: “Wa duhe nga Yekova ima ino gupai mi amangaha fuko ti ngba gako sunge, tipagine si aida mi tingidihe ti ni fu dungurati?” Nirengo, Yekova ima ino gupai ani amangaha, na ko ima ino singia ani namangasunge fuko na kpotorani yo dunduko watadu ani namangaha gbua tooni ani ki vura du na rengba tipa ka mangaha ni bakerehe vurũ. Ono tie, mo tingidi gupai nga, Yekova aima ke namba agu aˈuru Noa adihe ku kurungba yo, gbiati namba agu aˈuru aYisaraere adihe ku ngbakungbo yo. Yekova aima ke namba agu aboro naadu ni ruruyo fuko na aguyo nabasasangba ko. Ko aima kepa wai i asovura na diabese kuti ringara Kanana gbiati gu weneapai gu ruru abasapungbanga nangia ga Yisaraere yo amangihe. Nirengo, ko aima keka dungu futufutuapai tipa gu mangapai nangia ga gako amoyambu. Padu gako toro kugii kepa agu apai namangi, nayugoho furani ziazia nga ko naida ani keke fuõ gaani sunge wenengai na si kidu ni kina boro rengo.

³³ Agu apangbanga du ni kekehe rogo Baibiri nayugo na ni nga agu atingidapai na agu apai ga Yekova aboro akehe, si angia kina boro rengo. Nirengo, ka i aakekanga agu atingidapai re ngba wene gene ya, ka gene dunga berani ka giarogo agu apangbanga du rogo Baibiri ngba wene gene te. Mo kparianga bete agi akpiapai re: Bambata Pai 46:27; Gate 12:37; Abasapungbanga 7:7; 2 Abakindo 19:35; 2 Pekapai 14:9-13; Yoane 6:10; 21:11; Amokedi 2:41; 19:19.

³⁴ Wa vura duhe nga gaani ripoti na agu apai dunduko rogoho ani amangaha fu Yekova te, agu apai ani atingidaha na nyanyakipaha rogo ga Yekova riigbu yo. Rogo bambata sa kama agarã ho amokedi amangi tua ni nga ga tungusapai, i atingidipa “agu apai fu [Yesu] dunduko i amangi na agu apai i ayugu.” (Mk. 6:30) Ti gu kura aregbo, tingidapa fuõ sunge tungusapai naundo rani ani ini gu kura apapara tungusapai si aida ani gbeberã rani sa ni. Gu bange asaa re rengbe ka yugo na ni nga wa vura du sonakumbatayo rogo gu kura mangapai, gu kura abangiriba nabipa nge abatungusipai ima gito kusende. Si rengbe ka du nga si naida i ngarasi abatungusipai watadu pai kinaho si aida i mangipai tipaha. Agu ababiapai nangerakurii sunge nabi gu ripoti re na ki mangi ome gbe tipa ka mbakada gupai re watadu ka nyasariipa gupai na ká na sonakumbatayo rogo dungurati naabaha.

³⁵ Tingida fuõ sunge tungusapai naundo riigbu a si ini wari du bakere zingo ni nga ga abamangisunge ati yo. Gini abangiriaba du sonakumbatayo rogoho wenengai? Gini aba adunga sonakumbatayo rogoho ya? Gini awaraga si aidaha tipa ka undo aboro i wiriki rengo? Atingidapai naundo riigbu si ini gini waraga rengbe ka ngba ti aboro gene tungusapai yo rogo apapara zegino dunduko na ki mangi mbakadapai tipaha mbata fu regbo.

³⁶ Tipa dungu rani, tingidapai nafu ngarasaro furani. Ya mo ani naadunga na ngbarago ho ani agiapa gu sunge ni awirinarani amangaha ti ngba sunge tungusapai rogo zegino dunduko te? Gu tingidapai nafura tipa sonakumbatayo naundo rani ani ini wai ga Yekova riigbu akio kumbatayo. Apangbanga tungusapai nafu wasa furani na kini sarani ani du zaaza ka tungusapai na omerani dunduko. (Amo. 15:3) Si ni nyanyakipa pai ani fu gaani fuo sunge tungusapai, na gure nayugo gupai nga ani naberãpa agu awirinarani aberã du rogo zegino dunduko. Rogo gi umba gene re, ani nayugo na ni a nga ani nara nigorani fu gu mbakadapai ga Yekova riigbu amangaha.​—Rk. 16:10; Eb. 13:17.

MO MOI ASÁSÁ

³⁷ Ndupai ho ani ringbisi gaani fuõ sunge tungusapai na ga kura aboro te. (Gara. 5:26; 6:4) Agu apai du tipa aboro ni bakiakia. Ono tipa rani tigaani, ani rengbe ka gbia undo ni bakerehe ni maa ani gu sasa nika undo rani ani ini singia gaani sunge tungusapai nandu kumbatayo. Ka ani dati gi sasa re, ani nika du na gu ngbarago boro agbiaha ho ni namangi gupai ni ni aidaha.

³⁸ Si nirengo nga Yekova naipiso sunge dungura agu aboro ko nika bandayo ti regbo “bakere gberãngbi.” Ani naraka ti gu regbo gu sangbaanebi du rogo Yesaya yo adigiso tihe nga gu naya: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” (Yugo. 7:9, 14; Yes. 60:22) Nangba gu momu nga ga du ni abatungusi wene pangbanga rogo gi yangara arame re!​—Mt. 24:14.