Gu Iˈiriwopai Namangi Zamba Baime Yo

Nibasa fuo gia Faro gupai nga aYisaraere ima mbu Ezipeta, ko aˈaria berãko nga ko ni ru wai ka mbu yo i ndu. Ko azinahe fu gako abasovura nga: ‘Oni mbakadi gaoni angbagida vura dunduko, na ki ye ani do fuoyo! Si naaidanga ani mbuyo i ndu te.’ Ko na gako aboro atona ka do fuo aYisaraere.

Yekova angbembatayo fu gako aboro, ni mangako sunge na dubo uru na we yuru. Ko andu nayo ku Zamba Baime yo, na ko ki ya fuyo i dua bataya yo.

Fuani, aYisaraere abi aEzipeto i nido fuo yo. I ki bi tiyo nga aEzipeto ima kengeda yo ku pavuru baime. I ki kpari kuari fu Moize nga: ‘Ani nika kpi! Ka mo ambu rani kina Ezipeta yo.’ Ono Moize aya: ‘Ka oni gunde nga ya. Oni sungu zaa ka bi wai Yekova nika batasa roni.’ Moize aima kido nzunzu kuti Yekova, nga wo te?

Yekova aya fu aYisaraere i guari. Rogo gu yuru re, Yekova adi gu dubo re ki moihe dagba aEzipeto na aYisaraere. Bara koyo aEzipeto adu ni, bitimo ki du koyo. Ono koyo aYisaraere adu ni, imarago ki du yo.

Yekova aya fu Moize ko tai beko kurii baime. Yekova ki ye na nyanyaki wege si ya rogo gu yuru re sasasa. Gu baime re akparaka ku rogoho yo ue, gene ki kuru beberehe. Amirioni aYisaraere andu rii ugu sende bebere gango ime kubani na kubani.

Ga Faro abanzengere apefuo yo rogo gu ugu sende naadu dagba gu ime re. Fuani Yekova ki tona ka vundo agu abanzengere re. Ndu gayo angbagida vura atona ka mofa. Agu abanzengere re atona ka tangbayo nga: ‘Ani oro! Yekova nasovura tipa yo.’

Yekova ki ya fu Moize: ‘Mo tai bero kurii baime.’ Nibasa, gu gango ime re ki kisi kurii ga aEzipeto abanzengere. Faro na gako aboro dunduko ki kpi kusayo. Boro ho nabati dagbayo te.

Ku mbiti baime yo, bakere rimbasa aboro ki du yo naatambua Yekova na bia nga: “Mi abí bia fu Yekova, bambiko ko nadi be pai ni taasitaasi rimoko; ko nabafu afarasi na abandurira ku baime yo.” Ho aboro aabibia ni, adee kini dogbere tigayo na akundi. Aboro dunduko naadu na ngbarago mbiko i ada nzunzu na ranirii.