Ani Naida ga Yekova Riigbu

ONI aginga gupai ngba kura boro nga, “Mi naida kuti Mbori ono angianga kuti mbakadimbakadi pambori ya”? Agu aboro nadu mbata ni zaaza andu ku kanisa yo nayugo ngbatunga bipai teketeke wa kina gure, ono nga aguyo rago nagbere tiyo mbiko gupai nga gayo pambori akpa ti digiso gayo azingo nga ga toro. Wa rago avura gbera tiyo be ariigbu nga ga apambori nabaha, dunguyo nanyakasa gupai kindi nga i naida ka iriso Mbori. Ono tie, i idi gupai nga, si ni wenepai gbe ka iriso ko ngba gu gene nga gu ngba bangiriyo susi gupai nga i irisi ko ni koda yo tiyo kuti kanisa watadu gu kura riigbu.

Ginipai Baibiri agumbaha? Mbori naida aKristano kodi tiyo kuti riigbu?

Bambata aKristano Agbia Undo be Padu Yo Nimbakadimbakadiyo

Rago Pendekote rogo 33 ti Gaani Regbo, Yekova auka gako ziazia toro, angianga kurii bete aidipase nga aguyo nadu nikparakakparaka yo ya, ono kurii badona akumba na adee nga aguyo nadungura tiyo “kina ku rogo gu ba sa,” rogo gu vurubambu nadu ku ariyo Yerusarema yo. (Amokedi 2:1) Ti gu regbo re, i asigira gu dungurati nga ga aKristano, nga gu nada ni gu riigbu nadu rogo dungu aringara. Gere aduni ndikidi maku tipa gu bambata abawiriki re. Tipagine? Pai sa angia, i afu nyanyakipa sunge fuyo—nga ka tungusa gu wene pangbanga nga ga ga Mbori Kindo si da ni yangaraha ‘rogo zegino dunduko.’ (Matayo 24:14) Rogo dungurati, vovo aidipase arengbe ka wirika wai ka ndu kumbatayo na gayo sunge tungusapai be agu akurayo aidipase nadu na inohe.

Ni kina ipo, gu pangbanga nga ga Kindo agbandaka tururũ kugii agu angapa nangia ga Yerusarema. Bangbanda 62 na 64 ti Gaani Regbo, gu mokedi nangia Petero ake gako bambata waraga fu agu aKristano nadu “ni gbandakagbandaka yo ku Pondo yo, na Garatia yo, na Kapadokia yo, na Asia yo, [n]a Bitunia yo,” nga agu arago dunduko nadu rogo gu Turkey du areme. (1 Petero 1:1) Aidipase aduho a Paresitina yo, Rebanona yo, Suria yo, Kupurio yo, ringara aGiriki yo, Kurete yo, na Itaria yo. Ti gu regbo Pauro akepai fu aKorosaio rogo 60-61 ti Gaani Regbo, i aima tungusa wene pangbanga “rogo arago tii ngbangbaturũ yo dũ.”—AKorosaio 1:23.

Gu ue undo naye be kodatise kuti riigbu angia gu ngarasahe nga gu aKristano arengbe ka fuhe dagba tiyo. Ni koda yo tiyo na dungurati, aKristano arengbe ka gia agu agumbapai nga gu naye be toro, kini wisigi Ziazia Kekeapai sa, kini peke agu apai dagba tiyo namangiyo nga gu nanyakasa idapase, na ki kodi tiyo kuti agu akurayo nga aidipase rogo kparakpee. (1 AKorindo, kapita 14) Na nyanyaki akumba ki rengbe ka ‘banda ga Mbori rimbasa avusende.’—1 Petero 5:2.

Ni agu aboro du rogo dungurati, aKristano atona ka ino akurayo na kini kpinyemu tiyo dagba tiyo. Kuba gupai nga i nibipa gayo kodatise na dungurati wa rõrõi tindiro, bambata aKristano aasonosa tiyo dagba tiyo na kini nyakasi tiyo dagba tiyo.—Amokedi 2:42; 14:27; 1 AKorindo 14:26; AKorosaio 4:15, 16.

Gu kura ndupai nga gu si aida gu dungurati, watadu gu riigbu tini nga gu du rogo zegino dunduko angia ka zugasi kpamiatise. AKristano awiriki wai ka “gúmba pai sa.” (1 AKorindo 1:10) Gere aduna nyanyakipaha. Agu aboro nadu rogo dungurati, pa gayo wirikapai gbiati agu ariko nga gu i asono rogo adu nibakiakia. I anafura rogo afugo nibakiakia, na si ziazia nga i aduna asinoyo nibakiakia. (Amokedi 2:1-11) Ti kura aregbo, ndikidi kparakapai aniduho rogo gayo aberãpai. Ono tie, i anaundo aKristano tipa i nyasi ngbatunga agu akparakapai re rogo dungurati.—Amokedi 15:1, 2; AFiripoio 4:2, 3.

Gu nyanyaki asanahe nga gu agu abaakumba nga ga dagbarago yo arengbanga ka karagapai tipaha ya, i anakedaha fu gu ngbatunga nyanyaki ababiapai nga aguyo nanaata ata, wa Pauro. I anakeda agu apai nanaakura tipa nyanyakipa yugopai fu gu bangua riigbu bipasunge nga gu i amoihe Yerusarema yo. Ni bambataha, kina ga Yesu Kristo amokedi nadu rogo riigbu bipasunge, ono i akiisihe kusa si kodi agu abaakumba kurogo nga ga gu dungurati nadu Yerusarema yo. Adungurati nibasasa aidipa gu tandu nga gu Mbori afuhe fu riigbu bipasunge gbiati agu aboro nanarukubaha tipa ka mbakada sunge, ka sia akumba kurogo agu aba nga ga sunge, na ka diaberã tipa agu apai nabipa yugopai. Ho riigbu bipasunge afu karagapai ni sa kura sakapai, adungurati adi gu diaberã re kugume na “rago ki ngba [angba] ti yo mbiko gu pa wasa [ngarasahe, NW ] re.”—Amokedi 15:1, 2, 28, 30, 31.

Ii, Yekova amangisunge na riigbu rogo bambata kama agarã. Ono ginipai tipa areme tigaha?

Ani Naida Riigbu Areme

Wa kina agu akurayo nadu rogo bambata kama agarã, aDezire Yekova nabi gu sunge areme na nyanyakipaha nga ga tungusa wene pangbanga nga ga Kindo. Gene sa nga gu i amanga gi sunge re rogo nga ka kparaka aBaibiri gbiati agu abuku naundo aboro tipa wisigo Baibiri, nga gu naida riigbu duho.

Agu abuku nga ga aKristano du wa ka i mbakadihe na rubangirise, ki wetekehe tipa si du niruruhe, ki gbingbidaha, na fuo gure, kini kedihe kurogo adungurati. Tipa aKristano tigayo nibasasa, i du wa ka i futiyo tipa ka ndu na agu abuku re fu agu aboro naida ka gedaha. Rogo gi gene re, gu pangbanga nga ga Kindo ima da fuo dungu amirioni aboro. Abatungusi wene pangbanga na’asada tiyo ka manga gayo sunge tungusapai rogo gu gene nga gu duni mbakadimbakadihe, ki ini gupai nga anga papara rago ho i ata tungusapai rogo gbe kini basapa gu kuraha te. Agi apai re dunduko naida riigbu duho.

Wa duhe nga “Mbori akpara[ka] nga aboro te,” i du wa ka i safugo Baibiri na fugo agu abuku nga gu nasakarogo Baibiri yo. (Amokedi 10:34) Gi magazini re ho wa du rago re rogo afugo 132, na bakureaha, nga Oni Zingi Rameyo!, rogo afugo 83. Gure naida wene mbakadimbakadi abadona nga ga abasafugo rogo zegino dunduko.

Agu aboro du rogo dungurati nangarasa tiyo ho du yo ni pati adunguratise gbiati pati kikindigi adunguratise nga ga aKristano. Yo ngaha re, i nagia agu agumbapai nga ga Baibiri nga gu nafõngbaduyo yo, kini wisigi Kekeapai sa, kini tingidi agu apai namangi nga gu nanyakasa akurayo, na kini koditiyo na akurayo rogo kparakpee yo. Wa kina agu akurayo nadu rogo bambata kama agarã, i nagbia ngbarago ho agu ababiapai nata ata nga aguyo duna nyemuse aye ni ka bi yo tipa ka nyakasa gayo idapase. Sidu, aKristano areme nga ‘rimbasa avusende sa, na babanda avusende a sa.’—Yoane 10:16.

Rengo ngaha, aDezire Yekova ni rengberengbe aboro te, a wa kina gu agu akurayo nadu mbata aadunga ni rengberengbe aboro ya. Si ki vura du wo, i namangasunge kina sa rogo kpamiatise. Ni sangbanaha, i namanga gu sunge nga ga tungusapa Kindo auru kpotosende dunduko.—Amokedi 15:36-40; AEfeso 4:13.

[Gu kpiahe du ti kpewaraga 31]

AKristano areme nga ‘rimbasa avusende sa, na babanda avusende a sa’