Abasovura Kuti Mbori Adunga Na Diabese Te!

“I asó vura [aso] kuti ro; ono i adía nga be ro te.”—YEREMAYA 1:19.

1. Gini sunge i afuhe fu Yeremaya, na gako sunge adu kumbatayo tipa bagizo regbo wai?

YEKOVA afu sunge fu gu paranga nangia Yeremaya ya ko duni nebi fu arikaaboro. (Yeremaya 1:5) Gere adu ti regbo gu zogarago nangia ga gu wene Bakindo aYuda nangia Yosiya. Ga Yeremaya sunge ni nebi andu kumbatayo rogo gu vunduvundu regbo nadu mbata fu Babera zi Yerusarema na mbata fu zio yo ga Mbori aboro ki meresi yo kurogo kungba ringara.—Yeremaya 1:1-3.

2. Waigu Yekova anyakasi Yeremaya, na pa sovura kuti gu nebi re ayugu ginipai?

² Gu tingidapa sapangbanga si aidi Yeremaya takipandehe adu nirengo nga si aye aye na rungosi. Sidu tie, Mbori anyakasi ko tipa gupai nadu kumbatayo. (Yeremaya 1:8-10) Ni kpiapai, gu toro nga ga gu nebi re aduni nyakasinyakasihe be agu afugo nga: “I asó vura [aso] kuti ro; ono i adía nga be ro te, bambiko mi du na mo, ka batasa ro, wo poi Yekova.” (Yeremaya 1:19) Sovura kuti Yeremaya arengbe ka du nga sovura kuti Mbori. Areme, Yekova na badona amoyambu beko du wa nebi nga aguyo du gayo sunge wa kina ga Yeremaya. Wa kina ko, i natakapande ga Mbori fugo sangbanebi zanga gunde. Sidu gi tingidapai re na ome tini tipa wenepai watadu tipa gbegberepai kurii aboro nibasasa na kurii aringara a, nibipa wai i akaragapai kuti ni. A wa kina gu nadu ti ga Yeremaya regbo, aboro gudu ho nasovura kuti Mbori ni sogote yo gako amoyambu gbiati gayo asunge nga gu fu Mbori he.

Ga Yekova Amoyambu Nizubozuboyo

3. Tipagine ga Yekova amoyambu nidu tini nizubozuboyo?

³ Ga Yekova aboro nidu nizubozuboyo natona ti tonatona 20 kama agarã. Rogo dungu aringara, agu aboro duna gbigbita berã agbata gupai nga ka ka na pa takapande gu pangbanga nga ga ga Mbori Kindo—ii—ka rugusaha. Gu boro ninaasosoda yo i mangi gipai re, ni nga Bakere Vurarani, nga Bakitingbanga, du “wa bahu nata ki nipoi, nigbata boro ka rita ni.” (1 Petero 5:8) Fuo “gu ringbisiringbisi regbo nga ga rikaaboro” nyasi rogo 1914, Mbori amoi Wiriko ni gu vovo Bakindo nga ga kpotosende, ki fu gu ndika fuko nga: ‘Mo ndu kini zógo rago dagba avuraro!’ (Ruka 21:24, NW ; Atambuahe 110:2) Nimanga ko sunge na gako ome, Kristo aba Satana kusayo ngbangbaturũ yo na ki dingiso ko ku pati kpotosende. Ni ino ko gupai nga gako regbo ni guruhe, Bakitingbanga naba gako zinga kurii mbedimbedi aKristano na kurii abakureayo. (Yugoti 12:9, 17) Gine ningia sangbana agu azubohe agi abasovura kuti Mbori re naamangaha berewe na berewe?

4. Gini a’asada ga Yekova aboro asusi rogo ti regbo Bambata Vura nga ga Zegino, ono ginipai namangi rogo 1919 na 1922?

⁴ Ga Yekova mbedimbedi amoyambu agbiatiyo na dungu a’asada nga ga idapase ti regbo Bambata Vura nga ga Zegino. I asawia yo na ki kitingbaanga yo, ndurumo aboro zuu ado yo, na i kini taki yo. A wa Yesu aima gumbaha kumbatayo, i ada ni agu aboro ‘rika aboro asógoyo asoga dunduko.’ (Matayo 24:9) Baraho aboro agunde ni be vura, asogo ga Mbori Kindo amangisunge na gu birĩ nga gu i amangisunge nani kuti Yesu Kristo. Ni ziree, i agbarasirimo ga Yekova aboro ya abangarasi aboro tipa samungu kuti irangbii nga yo, na i ki zubo kina boro meme ga Mbori riigbu nga gu ani abihe abi. Rogo Merekoko rogo 1918, irangbii afu asiahe tipa i zi gu bangerekuriisunge nga ga Watch Tower Society ko, nangia J. F. Rutherford, na gako bambembedi abadiasunge saba. I agbarasingbanga agi akumba muambe re na nyanyaki sarangbanga yo ku bambukiso yo, na i ki kedi yo kurogo gu bambukiso nga ga irangbii nga gu nadu Atlanta, Georgia, United States of America yo. Kusa fuo adiwi ribua, i akusiyo. Rogo Merekoko rogo 1919, gu bapengbanga nga ga gia ngbanga kango berewe nga ga gu rago re asaringbanga nga i asaranga ngbanga agu aboro i ayambu yo ku ngbanga yo re niruru sarangbanga te, sidu i ki aria gu sarangbanga re. I akedi gu ngbanga re kumbatayo kurogo kura bapengbanga tipa giaha berewe nivovoho, ono kusa, irangbii abasapa gu kitangbaangase re, sidu i ki kusi gu Wirina nangia Rutherford na gako abadiasunge zanga pai du kuriyo. I atona ka manga gayo sunge berewe, sidu gu kikindigi adunguratise nga gu i amangihe Cedar Point, Ohio yo, rogo 1919 na 1922 afu vovo ome berewe kurii sunge tungusapa Kindo.

5. Waigu aDezire Yekova amangi rogo ga Nazi zogarago Germany yo?

⁵ Rogo 1930, agu azogarago nazoga aboro ngbaome akuru, sidu Germany, Italy [Roma], na Japan ki kpamiatiyo tipa kusa Kodikodi aome. Ti tonatona gu bawe agarã re, i atona kere rungosi ga Mbori aboro, gbe rogo gu zogarago nangia ga Nazi Germany yo. I aka na pa gaani sunge. I aweteke akporo, na i ki zi agu aboro naaraka rogo. I aba dungu akutu aboro kurogo gu bambukiso nga ga zizi aboro ti regbo vura mbiko i aka pa mbu gayo idapase. Gupai i aida ka da tini rogo gayo vura kuti Mbori na kuti gako aboro rogo gu ngbii nga ga gu zogarago nga ga bangisa boro re angia ka nyasa aDezire Yekova kusayo kpäkäyä.a Ho aDezire andu ni ku ngbanga yo Germany yo tipa ka sanahe tipa gayo arengo, ga Reich Basunge Tipa Ruru Sarangbanga ambakadi bagbanga berãpai tipa ka bi gupai nga ka i dunga na diabese ya. Si ayaa: “Si aidanga abapengbanga zanga duna diabese tipa kina agu apai gbua nawira si niruruhe kuti andika te; ono i du wa ka i gbata agene na ki bi agene tipa ka manga gayo nyanyakipa asunge, ka kpakarakpakaraapai nga ga ndika vura du vurũ.” Gere ayugu gupai nga ruru sarangbanga adunga te. Aboro zogarago nga ga Nazi yo akongo kuti gupai nga ga aDezire Yekova asunge nga vura kuti aboro, watadu nikerehe, na si ‘nagbarasapa sona gu zogarago nga ga gu ringara re, nga ngbatunga gu zogarago du aboro na rengo beyo tipa ka gbia undo be gaha aũkumuko.’

6. Gini a’asadatise i amangihe tipa ka rugusa gaani sunge ti regbo Ue Vura nga ga Zegino na fuoho?

⁶ Ti regbo Ue Vura nga ga Zegino, i amoi zahe tipa gu sunge nga ga ga Mbori aboro Australia yo, Canada yo, na rogo gu kura aringara nga gu aNgirisi aazogaha—Afrika yo, Asia yo, na rogo agu akisanga nga ga Karibia na ga gu baime nga Pasifiki. United States yo, agu avura rani nadu na ome kurii aboro gbiati agu aboro naaruganga tiyo na pai ya ‘asangi irairapai ni ndika.’ (Atambuahe 94:20) Ono i anyasi agu apai nadu tipa demasa fu beere [darapo] bapengbanga yo gbiati agu andika nga ga agu abadona aboro naaka na pa tanga ti akporo na tungusapai, sidu gu wene adiaberã nga gu i amangihe United States yo amoi nyanyaki mburupai tipa songoda gu ranirii nga ga irisombori. Mbiko gu undo naye be Yekova, agu a’asadatise nga ga avurarani adunga na diabese te. Ho vura aambeda ni ka nyasa Putu yo, i adi azahe kusayo rii gaani sunge. I akusi gu dungu akutu aDezire nga aguyo nadu rogo abataya nga ga zizi aboro ti regbo vura, ono vura anyasanga kindi te. Ngbutuko fuo Ue Vura nga ga Zegino, Zezere Vura [nga gu kere sogote nadu dagba Amerika na Soviet Union] atona. Agu aringara nga ga Putu yo ku Uroyo atona kere rungosi kuti ga Yekova aboro. Irangbii amangipai tipa ka vundo gaani asunge nga ga manga dezirepai na ka rugusaha, ka kiso gene tipa ka i kparakanga agu awaraga nasakarogo Baibiri yo ya, na ka zahe ti manga ani gaani kikindigi adunguratise gbayaga. I amoi dungu aboro ku bambukiso yo watadu ki kedi aguyo kurogo agu abataya nga gu zizi aboro amanga nyanyaki asunge rogo.

Ndu Kumbatayo Na Sunge Tungusapai!

7. Ginipai namangi aDezire Yekova Poland yo, Russia yo, na rogo kura aringara rogo agu agarã susi bambeda?

⁷ Wa dungu bawe agarã aasusa, sunge tungusapa Kindo atona ka gbaragatihe kumbatayo. Wa Poland avura du kindi tii gu zogarago kina irangbii abanda aũkumuko, si afu asiahe tipa i mangi kikindigi adunguratise nga ga uru sa rogo 1982. I amangi gu kikindigi adunguratise nga ga dungu aringara yo rogo 1985. Kikindigi adunguratise nga ga dungu aringara aye tingbafuo gure rogo 1989, nga gu dungu akutu aboro aye Russia yo na Ukraine yo ku pati ni. Rogo gu garã nangiaha re, gu ringara nga Hungary na Poland aidipa ga aDezire Yekova sunge kuti ndika. Rogo gu riikito nangia ga 1989, i agburuwa gu Ngapa nga ga Berlin. Bete adiwi kusa, i ki idi pa gaani sunge kuti ndika East Germany yo, na ngbutuko fuo gure, i ki mangi bakere dunguratise nga ga dungu aringara Berlin yo. Ti tonatona gu yangara bawe agarã nga ga 20 kama agarã, i amangi a’asadatise tipa ka fura na agu awirina nadu Russia yo. I agbia bete kikindigipa aboro Moscow yo, sidu rogo 1991, i ki ke pa ga aDezire Yekova sunge kuti ndika. Na tona ti gu regbo re, sunge asono kumbatayo ni iiriwoho Russia yo na rogo agu aringara du rogo nga gu nadu mbata ni papara Soviet Union.

8. Ginipai namangi ga Yekova aboro rogo agu agarã 45 nga gu naye fuo digo Ue Vura nga ga Zegino?

⁸ Baraho rungosi aanyasa ni rogo bete arago, si akio rogo kura arago. Rogo agu agarã 45 nga gu naye tingbafuo nyasa ue vura nga ga zegino, dungu aringara aka gupai nga ka ida pa ke ga aDezire Yekova sunge kuti ndika. Kurii gure, i aza rani, watadu i aza pa manga ani gaani sunge rogo aringara 23 Afrika yo, 9 Asia yo, 8 Putu yo, 3 Latin America yo, na 4 rogo kura aringara nga ga kisanga.

9. Ginipai ga Yekova amoyambu asusi rogo Malawi yo?

⁹ ADezire Yekova agbia kere rungosi Malawi yo natona rogo 1967. Akuarani aidipase rogo gu ringara re aarengbanga ka ngbe akadisi nga ga birĩ zogarago te mbikopa gayo kparatise nga ga ndikidi aKristano. (Yoane 17:16) Fuo gu dunguratise nga ga ga Malawi Rondo Zogarago rogo 1972, i atona ka manga kere arungosi berewe ni vovoho. I ado awirinarani kusayo rogo akpuyo na ki ka pa mangasunge marã fuyo. Dungu akutu aboro aoro kusayo rogo gu ringara re tipa ka ne gupai nga ka i iminga yo ya. Ono ya mo abasovura kuti Mbori na kuti gako aboro aduna diabese? Wa gu sa te! Mbiko pa aria apai tihe, bakere bange abatungusipa Kindo 43,767 afu gayo ripoti Malawi yo rogo 1999, na aboro susi 120,000 ki du pati gu kikindigi adunguratise nga gu i amangihe yo. I ima dua vovo be basunge rogo gu bagbata nga ga gu ringara re.

I Nagbata Ndupai

10. Wa kina gupai nadu tipa Daniere, ginipai abasogote ga Mbori aboro amangihe ti gi gaani aregbo re?

¹⁰ Abasamungu kuti ndikidi pambori, abarumbatayo rogo pambori, na gu kura aboro arengbanga ka hi gu gaani pangbanga nga gu naye rogo Fugo Mbori yo te. Mbiko gu rungosi nga gu naye be agu abepambori nga ga Ngbiiakristano, abarungosi rani nagbata gu gene i niya tini si niruruhe kuti ndika tipa ka ruga pa gayo sovura kuti rani. Gini abirĩ i naamangasunge nani ti kura aregbo? Wenepai, ginipai abatabura amangihe tipa ka zubo gu nebi nangia Daniere? Rogo Daniere 6:4, 5, ani nageda gupai yo nga: “Bakere agbia ki nigbata pai kuti Daniere na abanyaki rogo pa ngbi; ono i abi nga pai kuti ko na gbegberẽpai a te, bambiko ko adu ngangarã, ka i abi nga irairapai kuti ko na gbegberẽpai a ya. Si du agi akumba re ki ye ki ya, ‘Ani abí nga pai kuti Daniere te kina gu ka ani gbata pai rogo pa rugute yo nga ga gako Mbori.’ ” Areme, abarungosi rani nagbata ndupai a. I natakangbayo tipa “kere be pambori” na i kini asadi ka kongosa gi gbegbere fugo re kuti aDezire Yekova. Ni irasi yo gumba gupai du tipa rani, ni gbarasarimo rani, na ni gumba yo ziree tipa rani, i nazubo gaani irisombori gbiati pa wai ani amangapai ringbisihe kuti agu andika nga ga Mbori.

11. Gini akitangbaangase bete abasogote aDezire Yekova agumbaha?

¹¹ Rogo kura aringara, aboro pambori gbiati aboro birĩ zogarago naka ka ida gupai nga ani namanga ‘ngbatunga gu pambori du ziazia zanga biriko barangba gaani Mbori.’ (Yakoba 1:27, NW ) Wa vura duhe nga ani namanga gaani asunge nga ga aKristano rogo aringara 234, abasogorani nagumba gupai nga ani rogo gu “pambori ini aboro paha” te. Ngbutuko mbata fu gu bakere dunguratise nga ga dungu aringara nga gu nadu rogo 1998, waraga pangbanga Athens yo ake fugo barumbatayo rogo gu pambori nga ga Orthodox niyaa “[aDezire Yekova] ni gu ‘pambori ini aboro paha’ te,” wa gu ndika nga ga gu Bapengbanga nga ga Putu Tipa agu Arengo nga ga Aboro avura gumba gupai du kia ti gure vurũ. Bete auru fuo gure kina rogo gu bangisa bagbata re, i ake fugo bafura kuba kanisa kurogo kura waraga pangbanga sa ko nigumba gupai nga: “[ADezire Yekova] arengbanga ka duni ‘gu dungurati nga ga aKristano’ te, mbiko pai ho i amangaha du sa na gu idapase nga ga aKristano nga gu du rogo gu borose nga ga Yesu Kristo te.” Gere ni iiriwopai, mbiko kura badona ho nga ga pambori nga gu nanyakasa pa pefuo Yesu susi gu aDezire Yekova amangaha te!

12. Rogo so gaani vura nga ga toro, ginipai du ani wa ka ani mangihe?

¹² Ani nagbata gupai nga ka rukugii wene pangbanga na ki sigiraha kuti gene ndika. (AFiripoio 1:7) Kurii gure, ani ambunga pa gaani nyanyaki mangapai ringbisihe kuti ga Mbori andika nga ga rurupai te, watadu ka rungburasihe a te. (Tito 2:10, 12) Wa kina Yeremaya, ani ‘nasíkpa tirani; kini gumba agu apai dunduko nga gu rugu Yekova rani nani,’ zanga mbugene fu asovura kuti Mbori i bagunde tirani. (Yeremaya 1:17, 18) Ga Yekova Ziazia Fugo ima yugu gu ruru gene fu rani ziazia nga gu ani ka ndu ngbaha. Ani aidanga wa gu sa ka kido kuti gu “be borose” nga gu duni rurungburaha te, watadu ka gbata “gu bagbuko du nzereme Ezipeta yo” a te, nga gu nayugopa gi zegino re. (2 Pekapai 32:8; Yesaya 30:3; 31:1-3) Rogo so gu vura nga ga toro, ani du wa ka ani aakido kuti Yekova na ngbaduraniyo dunduko, ki mbu ko ko rugu ndurani, na ka ani akidonga kuti gaani rugatinapai ya. (Asanza 3:5-7) Zanga ga Yekova songodahe na bandahe, gaani asunge adu dunduko “gbua.”—Atambuahe 127:1.

I Arungosiyo, Ono ka I Ambunga Gayo Idapase Ya

13. Tipagine rengbe ani ka gumba gupai tini nga ga Satana zubo Yesu aima ti ku ime yo?

¹³ Babakere kpiapai tipa pa zanga mbu futise fu Yekova angia Yesu, nga guko i akitingbaanga ko ya ko nangarasa aboro tipa i samungu kuti irangbii na kini gbarasipa gu mbakadapai nga gu i aima sigiraha. Fuo wisigo ko gu ngbanga nga ga Yesu, Pirato aida ka kusa ko. Ono rimbasa aboro, nga aguyo abarumbatayo rogo pambori yo asosodi yo, akpari ki ya i kenge Yesu kuti ngua, wa ko avura duni boro wenesa vurũ. Kuba ko, i asanahe tipa i kusi Baraba—nangia gu kumba i akisiko ku bambukiso yo tipa ngarasa aboro i samungu kuti irangbii na tipa imo aboro! Pirato ki asadi berewe ka za agi abarungosi aboro nadunga na weneberã re ya, ono niyangaraha, ko aidi na gu takangbaa nangia ga dungu aboro. (Ruka 23:2, 5, 14, 18-25) Wa Yesu avura kpi ti ngbunduru ngua, gu ga Satana kere zubohe nga gu ko amangihe kuti boro wenesa nga Wiri Mbori re ati ku ime yo nabaha, mbiko Yekova azingisi Yesu bekpio na ki tumba pako kina boro ku kumbabe Ko yo. Na mbiko gu Yesu i ataasi pako re, ko auka ziazia toro rogo gu uru nangia ga Pendekote rogo 33 ti Gaani Regbo, ni mangaha wo, ko kini sigira gu dungurati nga ga aKristano—nga ‘vovo fufu boro.’—2 AKorindo 5:17; Amokedi 2:1-4.

14. Sangbanaha angia gine ho agu aboro pambori nangia ga aYuda yo azubo apefuo Yesu ni?

¹⁴ Ngbutuko fuo gure, agu aboro pambori re agundesi amokedi, ono agu apefuo Kristo re aambunga gumba agu apai i abihe na ki gihe te. Ga Yesu abawiriki akparikpee niyaa: “Gbia [Yekova, NW ], mo bí gayo serãhe, ki idi fu gamo amoyambu i ta peka ga pai apeka zukazuka gbe.” (Amokedi 4:29) Yekova akaragapai sa gayo sarawatise ni hiiso ko yo na ziazia toro na ki nyakasi yo i ndu kumbatayo na gayo tungusapai zanga gunde. Ni kina ipo, i arugu amokedi berewe ya ka i tungusinga pai ya, ono Petero na kura amokedi akaragapai ki ya: “Ani gi nga sangba Mbori agia susi ga aboro.” (Amokedi 5:29) Serekpo yo, zio yo, na taka yo aarengbanga ka zeresa kpotoyo yo ti kiiso gayo sunge Kindo te.

15. Da nangia Gamariere, na gini rugute ko afuhe fu agu aboro pambori nangia abasogote apefuo Yesu?

¹⁵ Waigu agbia pambori akaragapai sani? ‘Ngbaduyo aimi aima i ki berẽ kina pa imo amokedi.’ Ono tie, bayugu Ndika nangia Farusi, rimoko angia Gamariere, aduho, na aboro dunduko ko aduna kiki ko bangiriyo. Ni kusa ko amokedi kusayo rogo gu bambu nga ga aYuda Abororondo tipa regbo ngbutuko, ko arugu agu abarungosi aboro nga ga pambori yo re ki ya: “Aboro aYisaraere, oni bánda tironi ti gu pai oni nikamanga ti agi aboro re. . . . Ya mi fu roni, oni zógo beroni ti agi aboro re, ki he yo; bambiko singia gi yugopai re ga aboro du na gi pai mangi re, fuo adu nga ti ni te; ono si ngia ga Mbori du, oni ba nga yo te; si ka du wa oni naso vura aso na kina Mbori!”—Amokedi 5:33-39.

Ũvura Ho nga gu Mbakadi Yo Ho Kuti Rani Nika Duna Diabese Te

16. Rogo gaoni fugo nitironi, waigu rengbe oni ka gumbapa gu mokido nga gu Yekova afuhe fu gako aboro?

¹⁶ Ga Gamariere rugute aduni wenehe, na ani nidu na tambuahe ho kura aboro afura ni tipa gupai du kubararani yo. Ani ini gupai a nga ranirii ka irisombori adu nisongodisongodihe be agu adiaberã nga ga agu abasapungbanga duna weneberã. Rengo ngaha, gaani mangapai ringbisihe kuti Fugo Mbori nasa gberarago ti agu abarumbatayo rogo pambori nga ga Ngbiiakristano yo gbiati gu kura abarumbatayo nga ga Bakere Babera yo, nga ngbii zire pambori rogo zegino dunduko. (Yugoti 18:1-3) Ka i vura kaa sovura kuti rani gbiati agu aboro ninaamaapai riyo, ani na gi kidohe re: “Gu ũvura i ka mbakada ha kuti ro si adía nga be ro wa sa te, gu mirã aboro dunduko nikazinga kuti ro rago sarangbanga mo akíta ngbanga ha akita. Gere nga gu pai nikadu tipa agu amoyambu nga ga Yekova yo, na gayo rurupai nga gu du mbiko re, mi nga Yekova poi wo.”—Yesaya 54:17.

17. Wa abasogote rani avura nisovura kuti rani, tipagine du ani tini na wingbaduse?

¹⁷ Avurarani nasovura kuti rani zanga nduhe, ono kpotoraniyo azeranga te. (Atambuahe 109:1-3) Ani ambunga gene wa gu sa fu agu aboro nasoga gaani pangbanga nga ga Baibiri tipa i gundesi rani ani mbu gaani idapase te. Wa ani avura kaa maabangirani tipa gupai nga gaani vura nga ga toro nika nyaka kisusi, ani ima ino sangbanaha. Wa kina Yeremaya, ani abi pa digo agu afugo sangbanebi nga: “I asó vura kuti ro; ono i adia nga be ro te, bambiko mi du na mo, ka batasa ro, wo poi Yekova.” (Yeremaya 1:19) Ii, ani ini gupai nga abasovura kuti Mbori adunga na diabese te!

[Gu rukutu kekeapai du bandu kpewaraga yo]

Waigu Rengbe Oni ka Karagapai?

• Tipagine ga Yekova amoyambu nidu tini nizubozuboyo?

• Rogo gini agene abasogote rani naasovura kuti ga Yekova aboro?

• Tipagine rengbe ani ka rugatirani tini na gupai nga abasovura kuti Mbori adunga na diabese te?

[Gu kpiaahe du ti kpewaraga 24-29]

Yekova akido Yeremaya ya Ko adu adu na ko

Agu aboro nabati rogo gu bataya nga ga zizi aboro ti regbo vura

Ndurumo aboro namanga zuu kuti aDezire Yekova

J. F. Rutherford na gako abadiasunge

Rogo gupai nadu tipa Yesu, abasovura kuti Mbori adunga na diabese te