Oni Songodi Gu Yugopai Nga Ga Mbori Nyanyakii
“Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, ko arúga gamo apai foro nzunzu.”—ASANZA 3:5, 6.
1. Waigu du ani nikusikusi rani gbayaga fu gu inohe nga ga aboro susi gu nidu mbata?
AWERE rogo zegino dunduko, bange agu awaraga pangbanga nakura na auru dunduko nga gu i akparakaha nga 9,000. Na agarã dunduko, i nakusa vovo abuku wa 200,000 kina United States yo nisaha. Kuti kura wisigopai sa, rogo Marungu rogo 1998, agu Atingidapai nadu rogo Internet adu wa akpewaraga amirioni 275. I nagumba gupai nga gi bangehe re nasona na adiwi nibasasa nga akpewaraga amirioni 20. Susi gu nidu mbata, aboro na gene beyo ka ino apangbanga tipa apai dunduko. Wa vura du gipai re na gaha weneapai tini, ngbatunga du apangbanga ni bakerehe wa gure ima ye na kura kpakarakpakaraapai.
2. Gini fudifudiapai rengbe ka kura ni sangbana duna gene tipa gbia dungu apangbanga?
2 Kura aboro kinaho nyemu gia apangbanga naima ziobaha tiyo, nga agu aboro nagedapai wa rago naagira tipa ka mbiisa gu nyemu vovo apangbanga nga gu du yo nani, baraho i ambupa berã kura nyanyakipa apai ni. Gu kura aboro nagbia bete tingidapai tipa kura kpakarakpakara inohe, fuo gure, i kini bi tiyo ni abangbasia gu kpakarakpakara inohe re. Ni maa yo mburu gayo adiaberã rii kina bete inohe gbua, i rengbe ka manga gu nyanyakipa adiaberã nga gu rengbe ka imisa yo watadu ka imisa gu kura aboro. Na dedede, kerepai gu duho ti kusa boro tini fu gu tingidapai nga ga ziree watadu fu iraira tingidapai. Ndikidi gene ho dedede nga gu rengbe boro ka kido kuti ni tipa ka ino kangia gu ndurumo atingidapai re niruruhe na ki daada te.
3. Gini azahe du Baibiri yo tipa pefuo gu tatamana nga ga aboro?
3 Dedede, sino aboro ningia duna bakere nyemu ino apai. Bakuru kusayo rogo agu auru nangia ga Bakindo Soromo, i aima ino gu kerepai du ti gbarasa regbo kisusi rogo gbata kungbo apangbanga watadu gbegbere apangbanga. Ko ayaa: “Mo bánda tiro. . . . Pa manga dungu akitabu digidaha ti ni te, bakere wirikapai nga mbusatise fu boro boro.” (Batungusipai 12:12) Fuo dungu kama agarã kusa, gu mokedi nangia Pauro akepai fu Timoteo ya: “Mo bánda gu he i afu foro, ki guari pati gu kungba fura bau na kangu i aya ti ni ni zire, inahe; si du agu yo ata ida ha niingi ti gene idapase.” (1 Timoteo 6:20, 21) II, si naida aKristano ne gupai areme nga ka kusa tiyo zanga nduhe ku barabangiri kere aberã.
4. Gene sa nga gine nga gu rengbe ani ka yugo gaani kido rogo kuti Yekova na kuti gako ayugopai?
4 Si ni wenepai a fu ga Yekova aboro i duna irisa tipa agu afugo nga ga Asanza 3:5, 6, nga gu nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” Kido kuti Yekova nakoda gupai nga ka ka agu aberã dunduko duna tagbagapai dagbaha na Fugo Mbori, singia si naenga ti kina boro gaani berãpai watadu ti gu berãpai nga ga kura aboro. Tipa ka banda pa du ani wenengai rogo toroyo, si na nyanyakipaha ani raba gaani ome berãpai tipa wa ka ani rengbe ka ino gbegbere tingidapai na ki nehe. (AEbere 5:14) Ani sakinga pai tipa bete mburu ngbatunga agu apangbanga re.
Gu Zegino Ome Satana Nafu Riihe
5. Gene sa nga gu nafu gbegbere aberã nga gine, na da du kugiihe?
5 Zegino nga mburu zugosi gbegbere aberã. (1 AKorindo 3:19) Yesu Kristo akparikpee fu Mbori tipa gako abawiriki ya: “Mi akpara nga foro mo rogo yo aroga zegino te, ono mo ka aka kuti yo ti gbegberẽ ko.” (Yoane 17:15) Gu ga Yesu sanahe nga Yekova banda gako abawiriki be gu “gbegberẽ ko” aidipa gu ome du Satana nani rogo zegino. Padu ani ni aKristano abandanga rani ni kina ipo be gu gbegbere apai duna ome kurii gi zegino te re. Yoane akepai ki ya: “Ani ini ya ani nga ga Mbori rani, zegino dunduko du ni zogozogo ho be gbegberẽ ko.” (1 Yoane 5:19) Gbe nga ti digido gi papara yangara auru re, ani du wa ka ani moibangirani nga Satana na gako adaimona nika hiiso zegino na gbegbere apangbanga.
6. Waigu rengbe agu ambaro du rogo zegino ka sa boro ka ni berẽnga pa gbegberepai berewe ya?
6 Ani du wa ka ani moibangirani a nga bete agi apangbanga re rengbe ka wira agu apai kaa imisanga boro ya. (2 AKorindo 11:14) Ni kpiapai, oni berẽnga pa ga gi zegino re ambaro, na gu gaha apai i ayugoho rogo terevizioni, asinima, monzigo, gbiati kekekeke awaraga. Dungu aboro idi gupai nga rogo dungu apai, ngbatunga gu kura ambaro gu duho nasonosa bibiriko mangaapai, wa gu nga wasiwasi kodaba, zuu, na inga mangasunge na kere angua. Ti gu bambata regbo i abi gu wasiwasi mbaro nga gu i aabingaha mbata ya, si rengbe ka iriwo ti agu aboro nabihe. Ono bihe dedede rengbe ka sa boro ka ni berẽnga pa gberaha berewe ya. Si aidanga wa gu sa ani bi gu mbaro nazugasi gbegbere berã wa guhe kaa imisanga boro ya te.—Atambuahe 119:37.
7. Gini ngbatunga tatamana nga ga aboro rengbe ka dia gaani kido kuti Baibiri kusayo?
7 Ani berẽnga pa gu kurapai berewe rengbe ka du nga mburu gbegbere pangbanga—nga gu badungu aberã kura aboro birĩ-inohe gbiati wene abawirikipai akusaha nga aguyo natikö kuti pa du Baibiri ni gu buku rengbe aboro ka kido kuti ni. (Oni ringbisingaha na Yakoba 3:15.) I nakusa ngbatunga agu aberãpai re dedede rogo nyanyakipa amagazini na agu abuku ngbaa ti aboro gbe, na si rengbe ka sa boro ka ni dunga na kido kuti Baibiri ya. Gu kura aboro na ngbarago tipa rungburasi gu tandu du Fugo Mbori nani ni gu gayo aberã adunga na digidoho tini ya. Kina ngbatunga gu kerepai re naduho rogo agu auru nangia ga amokedi, a wa duhe niyuguyuguhe ziazia rogo afugo gu mokedi nangia Pauro: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.”—AKorosaio 2:8.
Avura nga ga Rengo
8, 9. Waigu samungu kuti ndikidi pambori ayugotihe areme?
8 Abasamungu kuti ndikidi pambori rengbe a ka ye na kura kerepai kuti rani rogo toroyo. Gu mokedi nangia Pauro agumba gupai nga pa samungu kuti ndikidi pambori nika tona kina boro dagba agu aboro nayaa i nga aKristano. (Amokedi 20:29, 30; 2 ATesaroniko 2:3) Ni digiso afugo ko, fuo kpio amokedi, bakere samungu kuti ndikidi pambori andu sa pa sona Ngbiiakristano. Areme, bakere samungu ho kuti ndikidi pambori nga gu namanga dagba ga Mbori aboro te. Si ki vura du wo, bete aboro kinaho nibasasa nga aguyo naima mbu rani, na gu kurayo dagbayo yo ima nyakasa tiyo kaa gbarasa rimo aDezire Yekova ni gbandaka yo aziree gbiati iraira atingidapai tipa yo. Bete agiyo re namangasunge sa na gu kura mbakadimbakadi abadona tipa kaa sovura kuti ndikidi irisombori. Rogo mangaha wo, i nangbe na kina boro bambata basamungu kuti ndikidi pambori, nga Satana.
9 Bete abasamungu kuti ndikidi pambori namangasunge na dungu ngbatunga aũfugo dagbase, kodihe na Internet, tipa ka gbandaka zire pangbanga tipa aDezire Yekova. Ni sangbanaha, ho agu aboro nakpinyemu rengo amanga wisigopai ni tipa gaani aida, i rengbe ka rigido ti gu zire apangbanga abasamungu kuti ndikidi pambori agbandakaha. Gu kura aDezire akusi tiyo zanga inoho fu gi kere apangbanga re. Kurii gure, asamungu kuti ndikidi pambori nagumba apangbanga ti kura aregbo rogo agu ambakadapai nga ga terevizioni watadu rogo agu ambakadapai nga ga radio. Gini gene tatamana rengbe ani ka pefuoho rogo gipai re?
10. Wene karagapai nga gine kuti gu gbaraga zire apangbanga nga ga abasamungu kuti ndikidi pambori?
10 Gu mokedi nangia Yoane arugu aKristano ya ka i dinga asamungu kuti ndikidi pambori ku kpuyo yo ya. Ko akepai ya: “Ka boro ye koyo du oni ni ka ni aye nga na gi yugopai re ya, ka oni adía nga ni ku gume ku tii gaoni bambu ya, ka oni apaa nga a kuti ni ya. Bambiko gu ni ka poi kuti ni ni du adu na ni ti gani gbegberẽapai.” (2 Yoane 10, 11) Ne kodatise dunduko na agi avurarani re nika banda rani ti gayo gbegbere aberã. Kusa ani tirani sa agu ayugopai nga ga asamungu kuti ndikidi pambori rogo gu gene nga ga gu vovo aũfugo dagbase du areme nikerehe a wa kina gu rengbe ani ka dia yo kurogo gaani akporo. Si aidanga ani mbu bakere nyemu inopai wa gu sa si zomia rani kurogo ngbatunga gu kere gene te re!—Asanza 22:3.
Rogo Dungurati
11, 12. (a) Mburu gbegbere aberã angia gine rogo gu dungurati nadu rogo bambata kama agarã? (b) Waigu bete aKristano akpa ti songoda agu ayugopai nga ga Mbori nyanyakii?
11 Ani wisiginga pa gu kurapai nga gu rengbe ka du nga mburu kere aberã. Wa vura duhe nga gu Kristano naima kpara tini aidanga ka yugo ziree te, ni rengbe ka sonosa gu sino nga ga fura zanga berãpai mbata. (Asanza 12:18) Mbiko gu sinorani nga ga zangarengba, ani dunduko rengbe ka manga ingapai na mirãrani ti kura aregbo. (Asanza 10:19; Yakoba 3:8) Wa gopai ayugoho, ti regbo gu mokedi nangia Pauro, bete aboro adu kinaho rogo dungurati nga aguyo nazanga banda mirãyo na i kini rimisi tiyo kurogo nyanyaki akango tipa afugo. (1 Timoteo 2:8) Gu kurayo aduho a nanaberã kisusi tipa kina gayo aberã na i ki ndu ki da ti gupai nga ka basapa gu pagbia nangia ga Pauro. (2 AKorindo 10:10-12) Sangbana ngbatunga gu toro re angia agu atagbagapai kaa dunga ya.
12 Ti kura aregbo, gi zanga giatise re aningaria ki da ni “kere akango tipa gu rukutu apai anyakanga paha ya,” si kini gbarasipa gu zereda nga ga dungurati. (1 Timoteo 6:5, NW; AGaratio 5:15) Pauro akepai tipa agu aboro gi kango anaye beyo re, niyaa: ‘Si ngia boro yugu kura yugopai akia, aida nga pa ziazia apai, nga kina ga gaani Gbia Yesu Kristo apai, na gu yugopai du ku sangba sinombori yo ya; ni naenda, ni aina nga pai wa sa te, ono ni nakaza mbiko asanahe na sakapai tipa afugo. Agi apai re kpihe nakura be he, na kpata, na gberãngba yo, na gbegberẽ berã.’—1 Timoteo 6:3, 4.
13. Sino dungu agu aKristano nadu rogo bambata kama agarã angia gine?
13 Si ni pa ngbarago nga, ti agu aregbo nangia ga amokedi, badungu aKristano aduni ruruyo, na ki nye kuti maaberãyo fuo gu sunge nga ga takapande gu wene pangbanga nga ga ga Mbori Kindo. I aamanga gu sunge nyanyakii nga “ka ndu ka bi awirinyaure na adekurugbo rogo gayo rungo,” na kini banda tiyo zanga ‘biriko be zegino,’ zanga gbarasa gayo regbo na kungbo akango tipa afugo. (Yakoba 1:27) Zavura rogo gu dungurati nga ga aKristano, i ane “gbegberẽ kpamiatise” tipa banda gayo padu wenengai rogo toroyo.—1 AKorindo 15:33; 2 Timoteo 2:20, 21.
14. Ka ani adunga na rubangirise ya, waigu rengbe peka agu apai dagbarani daada ka sa tihe ni nyanyaki kango?
14 Kina wo a, agu apai ringbisiyo paha rogo genewaraga 11, si wo teketeke areme tipa agu adungurati nga ga aDezire Yekova te. Si ki vura du, si ni wenepai fu rani ani ini gupai nga ngbatunga gu kungbo akango re rengbe arengba ka kura. Rengo ngaha, si gu daada tipa kaa sakapai tipa gu tangaratangaraapai nga ga Baibiri watadu kaa bakabangirise tipa gu kura apai nga gu du tipa gu vovo zegino i akidohe tipaha, nga gu i ata yugonga ha kindi ya. Pai ho a duni irairaha ti peka apai tipa gu gaani apai du tipa tirani te, wa ngbatunga gu nga vodatise na mbakadarii watadu pa sia gu mbaro boro aidaha. Ono tie, ka ani anyakasa kina pa gaani aberã na ngbadurani ki imi ho gu kura aboro aidanga gaani pai ni yaa, digidoho rengbe ka du nga kparakapai rogo dungurati tipa rukutu apai. Gupai ni tona wa gu tooni fugo kaa imisanga boro ya ki rengbe ka da ni gupai nirengo naimisa boro.
Banda Gaani Nyanyakipa He
15. Gu “yugopai nga ga adaimona” rengbe ka imisa rani da kuti gini bakioho rogo toroyo, na gini rugute fu yo ho rogo Kekeapai yo?
15 Gu mokedi nga Pauro nazahe niyaa: “Ono Toro nagumba ha zukazuka ya rogo kusa rago agu yo nikati ku sa yo ti idapase, niidi pa agu atoro nga airanangahe, na gu yugopai nga ga adaimona.” (1 Timoteo 4:1) Ii, gbegbere aberã nga ndikidi kerepai. Si du Pauro azungadi badiangbako tini nangia Timoteo ya: “Ako Timoteo, mo bánda gu he i afu foro, ki guari pati gu kungba fura bau na kangu i aya ti ni ni zire, inahe; si du agu yo ata ida ha niingi ti gene idapase.”—1 Timoteo 6:20, 21.
16, 17. Gini he fu Mbori he fu rani, na waigu si aida ani bandaha?
16 Waigu rengbe ani areme ka gbia undo be gi zahe nga ga nyemuse re? I afu nyanyakipa he fu Timoteo—nga gu nyanyakipa he si aidi ko ngerefuoho na kini bandaha. Ginihe nangiaha? Pauro nasakarogoyo: “Mo ká kuti kpia gu wene apai, mo agi ngbare, ni idapase na nyemuse du rogo Kristo Yesu yo. Gu wene he i afu foro ni bánda ha rogo Ziazia Toro yo nanye rogo rani yo.” (2 Timoteo 1:13, 14) Ii, gu nyanyakipa he i afuhe fu Timoteo akodi “wene apai [afugo, NW ],” nga “gu yugopai du ku sangba sinombori yo.” (1 Timoteo 6:3) Rogo ngbanya na agi afugo re, aKristano ima diaberã areme ka banda gayo idapase nabaha gbiati gu rengo dunduko fu yo ho fuyo.
17 Banda gu nyanyakipa he re nakoda sonosa ngbatunga agu apai du wa wene agene wisigo Baibiri gbiati kpatagara kuti kparakpee, kini mangi “gu pai amanga ngba angba fu aboro dunduko, fu kina agu yo gbe du ku idapase yo [na ani].” (AGaratio 6:10; ARomo 12:11-17) Pauro nazahe berewe niyaa: “[Mo] nipeke fuo rurupai, sinombori, idapase, nyemuse, zadapase, zera. Mo só gu wene vura nga ga idapase, mo zádi nyenye unga, nga gu i ayambu ro sa ni, mo ki kusi wene kusapai ku bangiri dungu adezirehe.” (1 Timoteo 6:11, 12) Pa gumba Pauro ngbatunga apai wa gu nga “Mo só . . . wene vura” na “mo zádi nyenye unga,” nayugoho ziazia nga ani du wa ka ani sovura zaaza na nyanyaki diaberã kuti agu aberã nagbarasa padu ani wenengai rogo toroyo.
Si Naida Rugatinapai
18. Waigu rengbe ani ka duna gu ruru bipai nga ga aKristano rogo gaani bi agu apangbanga nga ga zegino?
18 Rengo ngaha, rogo so gu wene vura nga ga idapase, si naida rugatinapai. (Asanza 2:11; AFiripoio 1:9) Ni kpiapai, si rengbe ka duni iraira berã ka zanga duna kido kuti agu apangbanga dunduko nga ga zegino. (AFiripoio 4:5; Yakoba 3:17) Anga agu aberã dunduko nga ga aboro duna tagbagapai dagbaha na Fugo Mbori te. Yesu aya si naida aboro kaza ndu ka bi gu monganga duna inohe—nga gu sunge nga ga zegino angianga ga pambori ya. (Ruka 5:31) Zavura gupai nga gu sino husa aboro nadu rogo ga Yesu uru aasonanga gbe te, ko aini gupai nga kura undo kinaho rengbe aboro ka gbiaha be gu undo nga ga bafungua. AKristano namaa ngbanda areme ti agu apangbanga nga ga zegino, ono i nane agu apangbanga nga gu rengbe ka imisa yo rogo toroyo.
19, 20. (a) Waigu abaakumba amangapai rogo rugatinapai ho i aundo agu aboro ni nafura zanga tatamana? (b) Waigu dungurati amanga agu aboro kaa kuti sonosa zire yugopai?
19 Si naida rugatinapai a be abaakumba ho i ayamba yo ni i ndu ka undo agu aboro nafura zanga tatamana. (2 Timoteo 2:7) Ti kura aregbo, agu aboro du rogo dungurati rengbe ka bi tiyo rogo kango tipa gu rukutu apai anyakanga paha ya gbiati gu rungbarungba aberã nga gu naye na kango. Tipa ka banda gu kpamiatise nga ga dungurati, si naida abaakumba ipisi tiyo ka fura tipa ngbatunga agu apai re. Ti kina gu bangisa regbo re, i nane gupai nga ka duna gbegbere aberã kuti awirinayo na ka zanga ipisa tiyo ka bi awirinayo wa abasamungu kuti ndikidi pambori.
20 Pauro aringbisipa gu toro si aida i fu undo rogo. Ko ayaa: “Awirina, ka i vura zia boro na ingapai, oni nga ga Toro aboro, oni ki songodi ni asongda ni zera.” (AGaratio 6:1) Nifura ko zukazuka tipa agu aKristano nanasovura kuti gu sino nga duna tikö, Yuda akepai ya: “Oni íni pai fu agu yo nasaka pai [“oni duna inapai fu gu bete yo duna tikö,” NW ]; oni bátasi agu yo, ki nituka yo we yo.” (Yuda 22, 23) Rengo ngaha, kangia boro ka kindi kuti zugasi zire yugopai fuo za yo ni bara dunguhe, si naida abaakumba mangi nyanyaki diaberã tipa ka banda dungurati.—1 Timoteo 1:20; Tito 3:10, 11.
Hiiso Berãrani Na Weneapai
21, 22. Ginihe si aida ani siaha asia, na gini apai si aida ani hiisi berãrani nani?
21 Gu dungurati nga ga aKristano nane gu kere afugo nga gu “[n]arita he wa kere oro.” (2 Timoteo 2:16, 17; Tito 3:9) Gere wo nirengo, singia ngbatunga agu afugo re nayugopa gu iraira “tatamana” nga ga zegino, gu zire apangbanga abasamungu kuti ndikidi pambori agbandakaha, watadu agu afugo rogo dungurati nga gu boro agumbaha zanga berã ni he mbata. Wa vura duhe nga duna wene nyemu wirika vovo apai rengbe arengba ka fu undo, gu nyemupai i azangaha ya rengbe arengba ka kusa boro fu gbegbere aberã. Anga ani zanga ino pa ga Satana abirĩ te. (2 AKorindo 2:11) Ani ini gupai nga ko na’asada tiko nyanyakii ka fuda berãrani tipa wa ka ko zeresi gu gaani sunge nga gu ani amangaha fu Mbori.
22 Ni wene abamangisunge, ani songodi agu ayugopai nga ga Mbori nyanyakii. (1 Timoteo 4:6) Ani manginga sunge tie na gaani regbo na tatamana ni sia ani agu apangbanga ani agiaha. Ni mangaha wo, ka gu ga Satana zire apangbanga nga gu i agbandakaha azigizonga rani taata ya. Ii, ani ndu kumbatayo kaa gbata “agu apai du ni rengo, agu apai rengbe na irisa, agu apai du ni ruru he, agu apai du ni wene sino, agu apai nangba bangirise, agu apai i naya ti ni si ngba; ka ngia ziazia pai du ho, ka ngia he ho rengbe i fu tambuahe ti ni, oni bérẽ pa agi apai re.” Ka ani hiisi berãrani na ngbaduraniyo na ngbatunga agi apai re, gu Mbori nga ga zereda ko adu adu na ani.—AFiripoio 4:8, 9.
Ginipai Wiriki Ani He?
• Waigu rengbe gu tatamana nga ga zegino ka duni kerepai tipa padu ani wenengai rogo toroyo?
• Ginipai rengbe ani ka mangaha tipa ka banda tirani be gu kere apangbanga nga ga asamungu kuti ndikidi pambori?
• Gini ngbatunga afugo si aida i nehe rogo dungurati?
• Waigu ani ayugo gu ruru bipai nga ga aKristano rogo gia gu badungu apangbanga nga gu moipai areme?
[Gu kpiahe du ti kpewaraga 21]
Agu amagazini na abuku nga gu ngbaa ti aboro gbe, dunguhe na tagbagapai dagbaha na gu gaani andika nga ga aKristano
[Gu kpiahe du ti kpewaraga 22]
AKristano rengbe arengba ka sakaapai dagbayo zanga gupai nga boro kongo kina kuti gani berã sa ya si ruu