Oni Kakuti Manga Agu Apai Oni Awirikihe

“Agu apai oni ata ina ha nidi he nigi he ki nibi he rogo re yo, oni mángi agi apai re. Mbori zereda ki du na oni.”—AFIRIPOIO 4:9.

1, 2. Rogo apai yo dunduko, ya mo Ziazia Kekeapai na tanduhe kurii agu aboro naberãpa tiyo ni avurumbori? Oni sakinga rogoyo.

“PAMBORI Nata Maapai Kurii Aboro, Ono gu Sino nga ga Manga Rurupai Kini Go Tigaha Kusayo Dagba Aboro.” Gi riifugo re i akehe rogo gu waraga pangbanga nga, Emerging Trends nga gu i agurusi tingidapa sangbana agu asasana aboro rogoho i amangihe Amerika yo tipa ka rugatise na pa gupai namanga rogo ga aboro sino raka. Wa gopai ayugoho, agu aboro du rogo gu ringara re aima bi badungu bange aboro nga gu nakio kina kumbatayo nga aguyo nandu ku kanisa yo kini ya wee pambori nga nyanyakipa pai rogo gayo raka. Wa vura duhe wo, gu tingidapai re naya wee: “Wa vura du gi bange aboro i a’abia paha re nibakerehe, dungu Amerikani nasakapa gupai asaka gu idapase nga ga apambori amangaha fu aboro nibasasa na fu gu riko nga ga aboro wa du yo dunduko.”

² Anga gipai re namanga rogo kina bangisa ringara sa te. Ono rogo zegino dunduko, dungu agu aboro naya wee i ima ida na Ziazia Kekeapai na ki duni avurumbori, i aidanga Ziazia Kekeapai moi gaha arugute kurii gayo sino raka te. (2 Timoteo 3:5) Gu barumbatayo nga ga gu badona nangera kurii wetekapai ayaa: “Ani nabi Ziazia Kekeapai kindi na kikiipaha, . . . ono rogo gu gene yo nga ka dia regbo nzunzu kaa gedaha, kini wisigihe na kini futise tipa manga gupai si ayugoho, gure nangia gupai nadu mbata.”

3. (a) Wai Ziazia Kekeapai amangasunge na gu raka nga ga agu aboro nasatiyo ni ndikidi aKristano? (b) Wai apefuo Yesu amangasunge na gu ga Pauro rugute du nikekehe rogo AFiripoio 4:9?

³ Ono tie, tipa ndikidi aKristano, gipai re si tipa yo kia. Pa manga yo agu arugute du rogo Fugo Mbori ima manga ariapai rogo gayo aberã na rogo gayo mangaapai. Na gu kura aboro ima ino pa gu vovo borose wenengai i ayugoho rogo gayo sino raka. (AKorosaio 3:5-10) Tipa apefuo Yesu, Ziazia Kekeapai ni gu buku kina nvutu azioho gbua ba maa abuku yo zanga i he mangasunge nani te. Kuba gure, gu mokedi nangia Pauro ape pai fu agu aKristano nadu Firipoi yo ki ya: “Agu apai oni ata ina ha nidi he nigi he ki nibi he rogo re yo, oni mángi agi apai re; Mbori zereda ki du na oni.” (AFiripoio 4:9, gu kekepai duni pigipigihe re, ani du pigihe.) AKristano namanga badungu apai kisusi gu nga ka ida na gu rengo nga ga Fugo Mbori. I namanga gupai i awirikaha, kini mangi agu arugute nga ga Ziazia Kekeapai na gayo aborokporo kpuyo yo, ba gayo sunge yo, na rogo dungurati na rogo agu apai dunduko nga ga raka.

4. Tipagine duhe ti ni nikpakarakpakaraha ka maa ga Mbori andiko ku rogo mangaapai yo?

⁴ Pa maa boro ga Mbori andiko na agu arugute adunga ngburungburu ya kurogo mangaapai ni taatapai te. Ani naraka rogo gu zegino nga gu du tii gu ome nga ga Satana Bakitingbanga, nga guko Ziazia Kekeapai ayamba ko nga “mbori gi zegino re.” (2 AKorindo 4:4; 1 Yoane 5:19) Sidu tie, si ni nyanyakipa pai fu rani tipa ani banda tirani ti gupai nga gu rengbe ka kiso gene berani ti kakuti manga gu rurupai nga ga Yekova Mbori. Waigu rengbe ani ka du ni agu aboro nakakuti manga rurupai?

Oni Kakuti ‘Kpia Wene Afugo’

5. Ginipai gu sangba Yesu nga: ‘Oni nipekefuo re apeka kindi’ ayugoho?

⁵ Gene sa dagba agu akuraha tipa manga gupai ani aima wirikaha nga ka songoda ndikidi irisombori niruru mangapai, arungosi ki vura nimangi rani be azangaidapase vurũ. Hipai naida bakere asadatise. Yesu ayaa: ‘Gu ni ka akpi nyemu peka re, ni mbú gani apai, ki di gani wagiwagi ngua, ki nipeke re kindi.’ (Matayo 16:24) Yesu ayanga wee si naida ani pekefuo ko gbua tipa kina poso sa, diwi sa, watadu garã sa a te. Kuba gure, ko ayaa: ‘Oni nipekefuo re apeka kindi.’ Fugoko nayugo gupai fu rani nga, padu ani ni abawiriki arengbanga ka du gbua tipa kina kungbo guru regbo nga ga raka watadu gu gbeberã kuti pai nasusa asusa rengbe ka duho areme ono ka si adunga ho gba ya te. Pa songoda ani ndikidi irisombori niruru sino nayugo gupai nga, ani na hipai niruru mangapai rogo manga ani gupai ani asiaha, ka si vura du nga kina ginipai nika manga vurũ. Wai rengbe ani ka mangaha wo?

6. Gini kpia wene afugo nga gu agu aKristano nadu rogo bambata sa kama agarã awirikihe be Pauro?

⁶ Pauro azungadi gako badiasunge nangia Timoteo ki ya fuko wee: ‘Mo kákuti kpia gu wene afugo mo agihe ngbare, ni idapase na nyemuse du rogo Kristo Yesu yo.’ (2 Timoteo 1:13) Ginipai Pauro aberẽpa pehe fuko? Gu pa-Giriki kusi yo rogo yo herẽ nga ‘kpiapai,’ rogoyo nzunzu nayugopa gu gbakigbaki agene kpiahe nga ga wene bambakadiahe. Wa vura duhe nga, ngbatunga gu kpiahe re na futufutuapai tipaha dunduko te, gu kpiahe re na wene gbakigbaki gene pangbaha kini sa gu boro duna ome kpariapai tini ni ini kpia guhe nga ni. Teketeke a, gu kpiapai nga ga gu rengo Pauro ayuguhe fu Timoteo na fu gu kura aboro, si adunga tipa fu kparakpara karagapai tipa agu asanahe dunduko nika kura te. Wa si avura du wo, ngbatunga gi yugopai re afu rengberengbe arugute fu agu aboro nadu na ruru ngbaduyo yo tipa i rugu tiyo na gupai Yekova akpinyemuhe be yo. Rengo ngaha, tipa i fu ngbarago fu Mbori, si aidi i ka kina kuti gu kpiapai nga ga rengo re nimanga yo gupai i awirikihe.

7. Wai rengbe aKristano ka kakuti kpia wene afugo?

⁷ Rogo bambata sa kama agarã, ngbatunga agu aboro nadu wa Umenaio, Aresanduro, na Fireto asonosa gu berã nga gu naarengbanga na ‘kpia wene afugo ya.’ (1 Timoteo 1:18-20; 2 Timoteo 2:16, 17) Wai ka bambata aKristano arengbe ka ne mera fuo agu aboro nasamungu kuti ndikidi pambori i ingisi yo? Kina mbiko wisigo gu kekeapai naye be ga Mbori toro kini mangihe rogo gayo raka. Agu aboro nanapeka fuo gu kpiapai i abihe be Pauro na be gu kura aidipase arengbe ka ruga tiyo na gupai naadunga kuti gu kpiapai nga ga gu rengo i ayuguhe fuyo ya na fuo gure ki sogoho. (AFiripoio 3:17; AEbere 5:14) Kuba gupai nga i “[du]nakaza mbiko asanahe na sakapai,” i anandu kina kumbatayo na gayo manga ruruapai rogo gayo ziotise kuti sinombori. (1 Timoteo 6:3-6) Ani namanga kina gu bangisapai re ho ani nizi tirani ni kuti manga gupai ani awirikihe rogo rengo yo. Nga gupai nanyakasa gaani idapase ka bi badungu amirioni aboro nga aguyo nairiso Yekova rogo zegino dunduko i nakakuti gu kpiapai ngutete nga ga gu rengo i ayuguhe fuyo rogo Ziazia Kekeapai yo.—1 ATesaroniko 1:2-5.

Oni Sogo ‘gu Kungbo Apai Aboro Agumba’

8. (a) Wai Satana agbata gene ka gbarasapa gaani idapase areme? (b) Gini zahe Pauro afuhe nga gu du nikekehe rogo 2 Timoteo 4:3, 4?

⁸ Satana na’asada ka sa rani ka ani kanga kuti gaani ruru mangapai ya ni sa ko rani ani naakapa kuti agu apai i ayuguhe fu rani. Areme, a wa kina gu si adu rogo bambata sa kama agarã, abasamungu kuti ndikidi pambori gbiakuti gu kura aboro nagbata gene ka gbarasapa gu idapase nga ga aboro wenesa. (AGaratio 2:4; 5:7, 8) Ti kura aregbo i namangasunge na aũgbandaka pangbanga ka gbandaka iraira pangbanga tipa ga Yekova aboro watadu ka gbandaka kina boro bakere aziree tipa gayo sino mangaapai na ndu gupai i amangaha ti ni. Pauro azahe ki ya aboro banda tiyo mbiko kura aboro asatiyo asa kusayo ti rengo. Ko akehe ki ya: “Ragoho nikada ho i ka aida nga pa ziazia yugopai ni ya; ono wa du tuyo ni kperengekperenge he i adungura abayugupai tigayo ku sangba gayo nyemuhe yo. I asá tuyo ti rengo, ki nidege tuyo sa kungba . . . apai.”—2 Timoteo 4:3, 4.

9. Ginipai nawiri du berã Pauro yo ho ko afura ni tipa ‘gu kungbo apai aboro anagumba’?

⁹ Kuba gupai nga i kakuti kpia wene afugo, gu kura aboro aduna kina nyemu ‘gu kungbo apai tiyo aboro anagumba.’ Gine nangia gi kungbo apai watadu zire apangbanga re? Isoke Pauro avura berãpa gu kuru apangbanga nawiri du wa ngbatunga gu du rogo gu buku apangbanga angianga papara Ziazia Kekeapai ya du rimoho nga Tobit.a Gi zire apangbanga re avura koda kodooro na gu zire apangbanga nga sangbariiyo. Fuo gure a, agu aboro naasoga gu bipai nga ga mbugene fu apai si nimangi kuti ga Mbori ringbisapai, watadu naabasapa agu aboro ninaangbembatayo rogo agu apai nga ga dungurati arengbe ka nanga kura aboro ni birĩ “ku sangba gayo nyemuhe yo.” (3 Yoane 9, 10; Yuda 4) Ka si avura du nga kina gine nasa aboro i koto, wa gopai ayugoho, kura aboro akpinyemu ziree kuba gu rengo nga ga Fugo Mbori. Si aimanga te i ki mbu manga agu apai i awirikihe, na gipai re agbarasi kina yo rogo toroyo.—2 Petero 3:15, 16.

10. Gini zire apangbanga duho areme, na wai gu mokedi nangia Yoane anyakasipa bandatise ti ni?

¹⁰ Ani rengbe ka ne zire apangbanga areme ka ani wisigi gupai ani aida ka adegaturani kuti ni na agu apai ani aida ka gedaha ka bihe singia si ngba angba watadu si angbanga te. Ni kpiapai, aũgbandaka apangbanga nakiisopa wasiro. Badungu aboro nangarasa akurayo i naatiko singia Mbori kina ti ni watadu ko ti ni te watadu ka ngarasa akurayo i idi kuti gupai nga Mbori ho ti ni te. Kura aboro nati kina kango ya Ziazia Kekeapai nigu tingidapai naye be ga Mbori toro te. Na agu abasamungu kuti ndikidi pambori duho areme na’asada tiyo kindi ka rũ gu tunga nga ga kapa ku ngbadu aboro yo tipa ka aria gu idapase nga ga aKristano. Nibi gu kerepai du wa gu azire anebi akusihe rogo bambata sa kama agarã, gu mokedi nangia Yoane azahe ki yaa: “Abadiangba, ka oni ídi nga pa agu yo dunduko naya Ziazia Toro ti yo ya, ono oni ásadi yo, si ngia i naye yo du Mbori ni, bambiko dungu zire anebi ndu rogo zegino.” (1 Yoane 4:1) Sidu si naida ani banda tirani.

11. Gini gene sa dagba akuraha duho tipa ka wisigo tirani ka ino singia ani rogo idapase?

¹¹ Rogo gipai re, gu mokedi nangia Pauro akepai ki ya: “Oni wísigi tironi si ngia oni rogo idapase yo.” (2 AKorindo 13:5) Gu mokedi re azungodi rani tipa ani niwisigi tirani dedede ka diaberã singia ani zi tirani kuti gu idapase nga ga aKristano nabaha. Ka singia ani nadegaturani kuti agu aboro nakpakanahe, si naida ani wisigi tirani nyanyakii rogo kpee yo. (Atambuahe 139:23, 24) Ani ni agu aboro duna nyemu gupai tirani nga ka gbata gu iraira apai du ti ga Yekova aboro? Kangia wo du, tipagine ani amangapai ti ni wo? Boro imisi rani rogo fugo yo watadu rogo gani mangapai? Kangia wo duhe, ani nabi apai wa gu si aida ani bihe? Agu agberangbii dunduko namanga rani rogo gi zegino re ni gupai naima gbua tipa bete regbo ngbutuko. (2 AKorindo 4:17) Ka si vura du nga ani nagbia bete fudifudiapai rogo gaani dungurati, tipagine ka ani mbu iriso Mbori ti ni? Ka singia rago gbere tirani tipa kura pai, anga gu ngbaa kisusi nga ani mangi gupai ka ani mangihe ka mbakada gupai re ki mbu gu yangaraha kube Yekova tee?—Atambuahe 4:4; Asanza 3:5, 6; AEfeso 4:26.

12. Wai aboro Beroya amoi wene kpiapai fu rani?

¹² Kuba gupai nga kaa bisirapa apai, ani kakuti wene bipai rogo toroyo tipa gu tingidapai ani abihe pati wisigopai nisase na gu ani agiaha pati agu adunguratise nga ga dungurati. (1 AKorindo 2:14, 15) Na kuba gupai nga kaa sakapa Fugo Mbori, nga gu pa tatamana kangiaha ka ani duna gu sino nadu ti agu aboro nadu Beroya yo nga aguyo naawisigo Ziazia Kekeapai sirisiri! (Amokedi 17:10, 11) Fuo gure, ani mangi agu apai wiriki ani he, kini sogo zire apangbanga ki kakuti rengo.

13. Wai rengbe pai ka manga ki sa rani ani gbandaka zire apangbanga zanga ani rugu tirani nani nga ani nape ziree?

¹³ Gu kura ngbatunga zire apangbanga kinaho si aida ani banda tirani behe. Gu kura bakere dungu zire apangbanga kinaho nagbe dedede dagba aboro rogo akompiuta rogo gu gaha mbakadapai nga internet. Si ni pa tatamana ani banda tirani be ngbatunga agu apangbanga re, gu susi asusa gbe nga ka si du nga ani ainonga ho gi pangbanga ni enge ni re te. Ka si vura du nga gu tingidapai da ku beroni re ye he kina boro be gu Kristano rimo ni naagberanga ya, si rengbe ka du nga ni agianga gu pangbanga re kina boro ngba airaha te. Gure nga ndu gupai duhe ti ni fu rani ni nyanyakipa pai ka banda tirani ti fugö agu apangbanga re fu kura aboro watadu gbaragaha nga agu apangbanga ani aruga nga tirani na paha wenengai ya. Nirengo ani akpinga nyemu ka fugö “agu apangbanga adunga na sino mbori ya” fu aboro te, watadu gu zire apangbanga “nabirikosi gupai duni ziazia ha.” (1 Timoteo 4:7; New International Version) Wa duhe nga si fu rani a nidingisoro ani pe kina rengo fu akuarani, ani namangapai na tatamana ni neka ani gumba agu apai dunduko rengbe ka sa rani ani gbandaka ziree fu kura aboro zanga ani ruga tirani nani nga ani nape ziree.—Efeso 4:25.

Gu Wenepai Naye be Manga Rengo

14. Gini weneapai naye nisangbana manga ani agu apai ani awirikihe rogo Fugo Mbori?

¹⁴ Manga ani agu apai ani awirikaha rogo gaani wisigo Ziazia Kekeapai nisase na gu ani awisigoho pati gu gaani adunguratise nga ga aKristano aye aye na bakere weneapai fu rani. Ni kpiapai, ani rengbe ka bi gupai nga gaani pagume dagbarani na agu aboro duna ani rogo idapase nangba. (AGaratio 6:10) Gaani sino nika aria tihe niwenehe ho ani amanga agu arugute ni nga ga Ziazia Kekeapai adunga ngburungburu ya. (Atambuahe 19:8) Kurii gure, nimanga ani gupai ani awirikaha, ani ‘nafonga gu yugopai nga ga Mbori’ na ki rengbe ka ye na kura aboro kurogo ndikidi irisombori.—Tito 2:6-10.

15. (a) Wai paranga boro sa angarasi tiri ka manga dezirepai sukuru yo? (b) Ginipai wiriki oni he rogo gipai namangi re?

¹⁵ Dungu paranga aboro gu duho dagba aDezire Yekova nga aguyo namanga agu apai i awirikihe rogo gayo wisigopai nisayo rogo Ziazia Kekeapai na rogo agu abuku nga ga aKristano kodihe na du pati agu adunguratise dunduko nga ga dungurati. Gayo wene sino nga nyanyaki dezirepai fu abayugupai na fu agu akurayo nawirikapai na yo sukuru yo. (1 Petero 2:12) Oni binga gupai du tipa gu degude du Amerika yo du rimori nga Leslie du garãri 18. Ri akusi gupai ri anaokaha aoka mbata nga ri anabihe nikpakarakpakarapai tipa ka fura fu akurari sukuru yo tipa gari idapase, ono rogo kura uru sa ri amangi ariapai ti gure. “Agude sukuru afura bambu wirikapai yo tipa wai aboro naa’asada ka baga ahe foro. Degude sa atumba beri ki ya aDezire Yekova nga kpiapai.” Wa du he nga Leslie nga Dezire Yekova, gine nangia gari karagapai kuti gipai re? Ri aya wee: “Mi anyakasipai kubara gimi idapase yo . . . nga gupai ini mi he nga si airiwo airiwo ti aboro dunduko nibasasa, bambiko mi naafuranga dedede sukuru yo te.” Gine nangia sangbana ga Leslie fugo zanga gunde? Ri nayaa: “Mi arengbe ka fu burosua sa na keke kpewaraga sa fu kura gude sukuru sa bambiko ri adu na gu kura asanahe ngbari.” Nga gu ngbarago kangiaha fu Yekova ho rukutu agude angarasa tiyo ni ka manga gupai wiriki yo ho nimanga dezirepai sukuru yo!—Asanza 27:11; AEbere 6:10.

16. Wai paranga Dezire sa ni degude agbia undo rogo Sukuru nga ga Siokrasia?

¹⁶ Gu kura kpiapai nga ga Elizabeth. Tona ho garãri aduni saba na vuru gu regbo dunduko ri adu rogo bambata sukuru, gi tooni degude re anayamba gari abayugupai ku Bambu Kindo yo ti agu regbo dunduko i anafu sunge furi ri mangihe rogo Sukuru nga ga Siokrasia. Kangia gari bayugupai arengbanga ka du pati dunguratise yo te, Elizabeth anisungu mbata fuo nyasa wirikapai tipa ka manga gu gari gumbapai re fu gu bayugupai re. Rogo gu gari yangara garã nangia ga wirikapai rogo bakere sukuru, Elizabeth ake tingidapai ti kpe awaraga bawe tipa gu undo gu Sukuru nga ga Siokrasia afuhe na ri ki gumba sangbaha kubarabangiri badona sa nga ga siakasiaka abayugupai nakodi kumba sa gbiakuti adee biata. I ayambu ri a tipa ri ye ka fu kpia gu gumbapai nga ga Sukuru nga ga Siokrasia, nga gu ri asia gu riifugo tipaha nga, “Tipagine Mbori Ambugene ti ni fu Gbegbereapai?” Elizabeth aima gbia undo rogo gu mbakadapai aDezire Yekova amangaha nga ga wirikapai rogo Sukuru nga ga Siokrasia. Ri gbua nga guni sa dagba gu dungu paranga aKristano nasambuo rimo Yekova nimanga yo agu apai i awirikihe rogo Fugoko yo.

17, 18. (a) Gini rugute Ziazia Kekeapai afuhe tipa ruru sino? (b) Wai kumba sa abi gu ruru sino nga ga boro sa dagba aDezire Yekova nga gu ko amangihe fuko?

¹⁷ Ziazia Kekeapai naruga aKristano i mbakadi asino yo niruruhe rogo apai yo dunduko. (AEbere 13:18) Birika aboro rengbe ka gbarasa gaani pagume dagbarani na kura aboro, gu nyakipaha gbe nga, gu pagume du dagbarani na Yekova. (Asanza 12:22) Gaani ruru sino nga gu rengbe aboro ka kido kuti rani mbiko ho si nayugo gu gopai nga ani namanga agu apai ani awirikihe, na si aima sa badungu aboro i duna bakere irisa koyo du aDezire Yekova ni.

¹⁸ Oni berẽngapa gupai namangi gu banzengere du rimoko nga Phillip. Gako waraga igo marã nga gu nadunga na namba marã kpakpuhe yo ya aingi beko nga gu ko aima maafuo beko ti ni si ki ima du nga ka kura boro ke namba marã kpakpuhe yo ki ndu nani ku bambu igo marã yo, ni rengbe arengba ka kusa gako marã nani. Gipai amangi re zanga ko ini nga gi waraga re ingi beko da ho i akedihe ni fuko. Boro sa dagba aDezire Yekova yo nabi gu waraga igo marã re, na gu waraga i angbihe kuti ni aduna gupai rogoho nga, gu ida nga ga pambori nga ga gu boro nabihe fõngbaduniyo ni karagaha foro. Ngba Phillip azere ko ki ya: “Ka i di marã be re nga 9,000 dorari rogo marã Amerikani!” Ko aduna bakere gberarago tiko ti kura regbo ho i adi gako kpakpari ni kanisa yo. Si adu ziazia nga, gu boro naima ino ko nadi gako kpakpari, baraho kungbo boro akaraga gako waraga igo marã ni nga gu nadu na dungu kutu adorari rogoho! Nirengo, agu aKristano du niruru yo nafu iriso fu Yekova Mbori!

Oni Ndu Kumbatayo Kindi kaa Manga Gupai Oni Awirikihe

19, 20. Wai ani nika gbia undo ti manga ani pai ringbisihe kuti gu nga ga Ziazia Kekeapai ani awirikaha?

¹⁹ Agu aboro namanga agu apai i awirikihe rogo Fugo Mbori nagbia badungu weneapai. Gu bawiriki nangia Yakoba akepai ki ya: “Gu ni nangana gu ziazia rugute nga ga raniri, ki nye rogo ho, ka ni adu nga ni gipai nahe tingida pai ya, ono ni du ni mangipai namanga ha, gi boro re i afu maku afu fu ni rogo gani manga sunge.” (Yakoba 1:25) Ii, ka ani mangipai ringbisihe kuti gu nga ga Ziazia Kekeapai nga gu ani awirikaha, ani duadu na ndikidi ngbarago na ki rengbe ka sovura na diabese kuti gu fudifudiapai nga ga raka. Gu susi asusa gbe nga, ani adu na ga Yekova maku ki duna maabangirise tipa nyenye unga!—Asanza 10:22; 1 Timoteo 6:6.

²⁰ Nirengo tie, oni ndu kumbatayo kindi kaa fu tironi sa wisigo Fugo Mbori dedede. Oni nidungura tironi na airisi Yekova dedede, na kini degeturoni kuti agu apai i agumbaha pati agu adunguratise nga ga aKristano. Oni nimangi gupai oni awirikaha, oni kakuti mangaha kindi, na “Mbori zereda ki du na oni.”—AFiripoio 4:9.

[Gu rukutu kekeapai du bandu kpewaraga yo]

Oni Natingidaha?

• Gine nga ‘kpia wene afugo,’ na wai rengbe ani ka kakuti ni?

• Gini ‘kungbo apai’ watadu zire apangbanga si aida ani sogoho?

• Gini undo naye fu agu aboro namanga agu apai i awirikaha rogo Fugo Mbori?

[Gu kpiahe du ti kpewaraga 15]

Wai ka bambata aKristano arengbe ka banda tiyo ka aboro samungu kuti ndikidi pambori aingisanga yo ya?

[Gu kpiahe du ti kpewaraga 16]

I rengbe ka ru tunga kapa rogo aboro yo na aũgbandaka apangbanga, wa Internet, na rogo agu aboro samungu kuti ndikidi pambori du areme

[Gu kpiahe du ti kpewaraga 17]

Si nga pamungo ka gbandaka gu pangbanga fu aboro ani aruganga tirani nani wenengai ya

[Gu kpiahe du ti kpewaraga 18]

Basunge yo, sukuru yo, na rogo kura arago, aDezire Yekova namanga gupai i awirikaha rogo Fugo Mbori