Kparakpara Tingidapai
TI DIGIDO gu dunguratise i naamangaha na agarã dunduko nga ga Watch Tower Bible and Tract Society of Pennsylvania, nga gu i amangihe rogo Tanvuo ti rameru 7, rogo 2000, bariigbuu, nangia John E. Barr, nga guni sa dagba agu awirina du rogo Riigbu Bipasunge afu kparakpara tingidapai. Mburu gi tingidapai re adu rii agu agumbapai Theodore Jaracz na Daniel Sydlik aima mangaha mbata rogo kina gu uru re.—Oni bi akpewaraga 12-16 na 28-31 nga ga gi magazini re.
Ni gumba ko banyanyakipa pai, gu Wirina nga Barr ayaa: “I afu gu sunge kiipaha gbe fu ‘ruru kangara moyambu’ na gaha Riigbu Bipasunge nga gu sunge kii gbe kisusi gu i afuhe fu agu abasunge i akepaha kuti ndika. Agu apai i aringbisipaha rogo waraga asiahe fu ngbatunga agu abasunge re adu ni agu apai duna ngbandaha tini. Ono tie, Baira rani, nga Yesu Kristo, a’asia ruru kangara moyambu kurii gako ‘ahe’ dunduko, watadu agu ahe nga ga Kindo auru kpotosende.”—Matayo 24:45-47.
Tipa gu basunge nga ga Pennsylvania, Wirina nga Barr agbia gupai kuti ni nga: “Natona kinaho i akepaha ni kuti ndika rogo 1884, gu basunge nga Watch Tower Bible and Tract Society of Pennsylvania aima digo nimangi nyanyakipa sunge rogo gu vovo pangbanga du tipa rani. Si ki vura du wo, si gbua nga agu aũsunge i akepaha kuti ndika nga gu duho tipa ‘ruru kangara moyambu’ nimangisunge nani ho daha ni.”
Rogo gayo agumbapai, Awirina nga Sydlik na Jaracz asakirogo gupai yo nga, gu rengo nga i afu agu ahe dunduko nga ga Gbia du auru kpotosende fu ‘ruru kangara moyambu,’ si akanga na gu riko nga ga moyambu ti fu sunge fu agu akumba rẽ arẽ dagba “kura avusende” (NW ) i ngerefuo kura asunge nga ga rugapa agu apai ninaamanga dedede te. (Yoane 10:16) Na anga ndupai ho rogo Ziazia Kekeapai naida gupai nga agu abarugupasunge dunduko du rogo agu abasunge i akepaha kuti ndika nga gu aDezire Yekova amangasunge nani, i du dunduko ni kina mbedimbedi aKristano watadu beteyo duni mbedimbediyo te.
Wirina nga Barr agumba gupai fu agipai nga tipa bete regbo kusayo, gu kura aboro dagba aguyo du rogo Riigbu Bipasunge nga ga aDezire Yekova nga aguyo naima digo nimangasunge ni abarugupasunge na ni aboro biroo azoro kusayo ti sunge rogo gu gbuu nga ga abarugupasunge rogo agu abasunge dunduko ‘ruru kangara moyambu’ amangasunge nani Amerika yo. I asia agu awirina rengbe yo ka kido kutiyo dagba kura avusende i mangisunge kuba aguyo nazoro re.
Nirengo, gu diaberã re nafu undo. Si nambu gene fu Riigbu Bipasunge i di regbo gbe tipa mbakada gu riahe nga ga toro watadu tipa ngerefuo agu azingo nga ga awirina rogo toroyo rogo zegino dunduko.
Ni digisopai, gu bariigbuu re ayaa fu gako agipai nga aguyo naadega tuyo na ngbarago wee: “Wa i navura fu agu asunge nibakiakia duna pai tini na agu andika nga ga irangbii fu agu ababiapai rẽ arẽ, . . . i dunduko namangasunge tii gu rugapai nga ga toro nga gu naye be Riigbu Bipasunge. . . . Rogo kparakpee, ani dunduko nangera kube Yekova tipa ko fu maku kurii gaani kodikodi asadatise kaa manga gupai ko akpinyemuhe, si kini ye na irisa na taarimo tipa bakere rimoko.”