Gu Ndikidi Pambori Nga Ga Akristano Na Diabese!
“Rogo nyanyaki gene, fugo Yekova kini zugo kindi kumbatayo na kini duna diabese.”—AMOKEDI 19:20, NW.
1. Oni ringbisinga pa wai gu pambori nangia ga aKristano aasona rogo bambata kama agarã.
FUO fu ziazia toro ome fu bambata aKristano, i atona kaa tungusa fugo Mbori na gu ngara boro aarengbanga ka zeresaha ya. Bake kuruapai sa ayaa: “Gu pambori nangia ga aKristano agbandaka niipo gbe rogo gu ngbii nangia ga aRomo. Bara rogo gu garã nangia 100, si nawira agu aringara dunduko nadu ti gu ngbandakporo nga ga Mediterena aduna bete rimbasa aKristano rogo.”
2. Waigu Satana a’asadi ka gbarasapa wene pangbanga, na waigu i aima gumbapa gere kumbatayo?
2 Satana Bakitingbanga aarengbanga ka kiso ngba bambata aKristano te. Kuba gure, ko agbarasipa gu ome nangia ga wene pangbanga rogo kura gene—nga ka sa aboro i samungu kuti ndikidi pambori. Yesu aima gumbapa gipai re rogo gako sanza nga ga wene tunga na rende. (Matayo 13:24-30, 36-43) Gu mokedi nangia Petero aima tingida gupai a nga zire abayugupai akura akura rogo dungurati, kini kusi gu be-apambori nandu na aboro sa gbarasa yo. (2 Petero 2:1-3) Teketeke a, gu mokedi nangia Pauro aima zahe ziazia ya gu sino nga ga samungu kuti ndikidi pambori nika ye mbata fu ga Yekova uru.—2 ATesaroniko 2:1-3.
3. Ginipai namangi fuo kpio amokedi?
3 Fuo kpio amokedi, gu yugopai na nyemu tatamana nangia ga apagano afurii wene pangbanga. A wa i aima gumbaha kumbatayo, zire abayugupai airasi gu ziazia tingidapai nga ga rengo na ki gbarasihe. Tooni tooni, gu pambori biriki nga ga Ngbiiakristano afurii gu ndikidi pambori nga ga aKristano. Gu riko nga ga abarumbatayo rogo pambori kini mo ka kura, nga aguyo na’asadi tiyo tipa ka Baibiri danga be kungbo aboro ya. Wa bange aguyo naayamba tiyo nga aKristano avura maapai, gayo irisombori aadunga niziaziaha te. Ngbiiakristano azugo rogo dungu aringara na ki duna nyanyaki ome kurii sino aboro Putu yo na Amerika yo, ono i adunga na ga Mbori maku watadu gako toro te.
4. Tipagine ga Satana taburo ka gbarasapa ga Mbori ringbisapai adunga tini na diabese ya?
4 Ono tie, ga Satana sogimapai ka rugusa ga Yekova ringbisapai aima du nga si ati ati ku ime yo. Zavura rogo auru gu nduundu bitimo nangia ga samungu kuti ndikidi pambori nga ga aKristano, si adu kindi ni ungaha dagba kura aboro. Agu akumba naakeka awirina Baibiri aduna rubangirise tipa ka kehe niruruhe. Sidu, Baibiri anye ziazia, wa dungu aguyo naananga tiyo ya i aduna asiahe tipa yugoho avura inga sakarogo agu apai du rogo vurũ. Vuru gu dungu kama agarã susi, ngbatunga wene abawirikipai wa Jerome na Tyndale asa Fugo Mbori ni wingbaduse kurogo kura afugo na kini kparakaha. I akusi Baibiri gbayaga fu dungu amirioni aboro na gu ngbatunga pambori nga ga aKristano, wa gu pambori re avura duni irairaha vurũ.
5. Ginipai gu nebi nangia Daniere agumbaha kumbatayo tipa ‘ndikidi inohe’?
5 Ni yangaraha, wa i aima gumbaha kumbatayo rogo gu buku nga Daniere, ‘ndikidi inohe amoipai.’ Gere mangi “ti digido regbo”—nga gu regbo ani araka awere rogo re. (Daniere 12:4, NW ) Ziazia toro ima ngbe kumbatayo fu akpinyemu rengo rogo zegino dunduko i duna ruru inohe tipa ndikidi Mbori na gako ringbisapai. Zavura fuo dungu kama agarã nga ga gu yugopai nga ga asamungu kuti ndikidi pambori, fugo Mbori na diabese kindi! Areme, i natungusa wene pangbanga rogo arago dunduko, kini yugupa gu maabangirise nga ga bawene vovo zegino fu aboro. (Atambuahe 37:11) Awere, ani wisiginga pa gu zugo fugo Mbori du areme.
Pa Zugo gu Fugo Re Areme
6. Gini arengo Abawisigi Baibiri arugutiyo nani bara rogo gu garã nangia 1914?
6 Rogo digido 19 kama agarã, gu rengo nga ga Baibiri afõngbadu wiri umba rimbasa Abawisigi Baibiri yo, nga aguyo i ayamba yo areme nga aDezire Yekova. Bara rogo 1914, sangba Baibiri ada fuyo ziazia. I arugutiyo na gu iiriwo arengo du tipa ga Mbori ringbisapai. Ngbaduyo yo afõyo nyanyakii mbiko pa keda Yekova Wiriko ku auru kpotosende, na ni mangaha wo, ko kini zaki gene tipa nyenye unga. I aini rimo Mbori na asino ko a, ki duna tambuahe tipaha. Kurii gure, i arugutiyo na gupai nga “rago aGendiria” aima digo, si kini yugu gupai nga regbo ima mbeda tipa ga Mbori Kindo zogarago ye na amaku fu ngbatunga aboro. (Ruka 21:24) Nga gu wene pangbanga nga ga taarimo! Si aidi i gumba gi rengo re fu aboro dunduko, rogo arago dunduko. Ga aboro raka adu ngbapai!
7. Waigu gu rengo nga ga Babiri namoipai rogo gi gaani aregbo re?
7 Yekova afu maku fu gu umba rimbasa aKristano ko ambedi yo na gako toro re. Areme, bange agu aboro di gu ndikidi pambori nga ga aKristano kugume ima susa amirioni sita. Fugo Mbori ima gbandaka a rogo dungu aringara, mbiko aDezire Yekova rogo aringara 235. Kurii gure, gu rengo nga ga Baibiri ima duna ome tini, kini dibe ngbatunga aũkota dunduko, gu nga ga pambori na gu angianga ga pambori ya. Gi sunge tungusapai namanga rogo zegino dunduko re nanyakasa gu gopai adunga ba tikango tini ya, nga Yesu ho awere na ome Kindo beko.—Matayo 24:3, 14.
8. Ginipai kura aboro agumbaha tipa pa zugo aDezire Yekova?
8 A wa abake kuruapai afura tipa gu nyanyaki zugo nangia ga gu pambori nga ga aKristano rogo bambata kama agarã, dungu wene abawirikipai ima fura tipa gu zugo a nga ga ga Yekova aboro rogo agi aregbo re. Amerika yo, wene abawirikipai ue akodibeyo ki kepai niyaa: “Rogo agu agarã 75 susi, bange aDezire Yekova asono ni iiriwoho . . . na i amangihe wo rogo zegino dunduko.” Waraga pangbanga sa Afrika ku Uroyo nafura tipa aDezire ni aboro gu “pambori du dagba agu apambori nasona niipo gbe rogo zegino na du aboro na irisa tipa gayo pambori gbe, nga gu pambori ini yo ho rogo dungu aringara tipa gaha kakuti gu yugopai nga ga Baibiri.” Na gu waraga pangbanga nafura tipa kuru sino aKatoriko, nga gu i akusihe Putu yo, nafura tipa “pa iiriwo wai bange aDezire Yekova azugo.” Ginipai fubee sa gi zugo bangeyo re?
Ziazia Toro Namangasunge Areme
9. (a) Bambata ndupai nga gu fugo Mbori namoipai tini areme nga gine? (b) Waigu Yekova ayamba aboro koyo du ko ni?
9 Gu bambata ndupai du fugo Mbori tini na diabese areme nga, ga Yekova toro namangasunge nyanyakii, a wa si amangihe rogo bambata kama agarã. Yesu ayaa: “Anga boro sa ka ye kono du mi ni gbua te, kina Buba nakedi re ka gbe ni.” (Yoane 6:44) Agu afugo re nafu gu berã nga ni weneringise, Mbori nagbe agu aboro duna ruru berã sa nyenye unga, kini sa apai si ngba ngbaduyo yo. Rogo gu gene sunge tungusapai nga ga gako aDezire, Yekova nagbe ‘gu baweneahe nga ga rikaaboro’—nga gu bayee aboro nga ga kpotosende yo du wa avusende tipa i ye ka iriso ko.—Agai 2:6, 7.
10. Gini ngbatunga aboro karagapai niwenehe sa fugo Mbori?
10 Anga ziazia toro fu kina ome sa fu ga Mbori aboro tipa i ndu na fugo Mbori kurogo tuturũ papara kpotosende te; ono si fõngbadu ngbatunga aboro yo dunduko a tipa i karagapai sa wene pangbanga. Nirengo, agu aboro di fugo Mbori kugume ye dagba “angbatungayo, na angbatunga afugoyo, na aboro, na arikaaboro dunduko.” (Yugoti 5:9; 7:9, 10) I dagba gu kumukokumukoyo na gu rungorungoyo, dagba aguyo wirikipai gbe na aguyo awirikanga pai ya. Aguyo adi gi fugo re kugume ti aregbo vura na kere rungosi, baraho kurayo amangihe ni wo ti regbo zereda na regbo zugo ahe. Tii ngbatunga azogarago dunduko, rogo asino aboro dunduko, tona ti bataya zizi aboro ti regbo vura da kurogo agu akporo nga ga bakindo, akumba na adee ima karagapai wenengai sa wene pangbanga.
11. Waigu ziazia toro amangasunge areme rogo gu raka nga ga ga Mbori aboro, na gini kparakparapai nayugotihe gbayaga?
11 Zavura gu iiriwopai nga ga Mbori aboro nibakiakia, i naraka na kpamiatise dagbayo. (Atambuahe 133:1-3) Gere nafu kura gopai tipa gupai nga ziazia toro namangasunge rogo gu raka nga ga agu aboro nandusunge Mbori. Gako ziazia toro nga nyanyaki ome tipa manga wenepai, nga gu nasa gako amoyambu i niyugu ngbatunga asino wa nyemuse, ngbarago, zereda, weneringise, na gu kura wene asino. (AGaratio 5:22, 23) Areme, ani nabi gupai ziazia gu nebi nangia Maraki aima gumbaha bakuru kusayo tipa gupai nika manga kumbatayo, niyaa: ‘Oni akparaka ruru boro ti gbegberẽ boro, na dagba gu boro namanga pa Mbori na gu boro amanga nga pa ko ya.’—Maraki 3:18.
Fugo Mbori Namaapai Rogo Zaza Amangisunge
12. Waigu aDezire Yekova aberã tipa sunge tungusa wene pangbanga, na gini karagapai i amaabangiriyo tipaha sa gayo sunge tungusapai?
12 ADezire Yekova areme ni kungbo andu ku kanisa yo te. I namanga gu paparaha nga gayo zaaza rogo sunge tungusa wene pangbanga. Wa kina bambata aKristano, i nafu tiyo na nyemuhe kaa manga gupai Mbori akpinyemuhe, kini gbata gene kaa undo kura aboro i wirikipai tipa agu amokido nga ga ga Yekova Kindo. I nga ga Mbori abadiasunge, nga aguyo nadungura kura aboro sa ga Yekova sunge, ringbisihe kuti gu rugapai nga ga gako ziazia toro. Rogo mangaha wo, i nayugo ga Yekova inapai gbiati nyemuse fu gu ngbatunga aboro adunga na idapase ya. Na i namangaha wo i ki vura kaa gbia tiyo vurũ na agu aboro adunga na nyemupai ya, nasawia yo, na narungosi yo. Yesu ambakadi apefuo ko tipa agu akaragapai nibakiakia aboro ka du nani tipa wene pangbanga. Ko ayaa: “ ‘Moyambu nakia nga susi bairani te.’ Si ngia i arungosi re . . ., i arúngosi roni arungosi a; si ngia i aka kuti gi pai, i aká kuti gaoni a.”—Yoane 15:20.
13. Gini asino adunga ti agu aboro du rogo Ngbiiakristano ya ono nga gu moipai dagba aDezire Yekova?
13 Si airiwonga tirani ka bi gu wiratise du dagba aDezire Yekova areme na agu aboro nadi gu pambori nangia ga aKristano kugume rogo bambata kama agarã te. Gu kurapai duni iiriwoho areme nga gu bakere kparapai du dagba aDezire Yekova na Ngbiiakristano. Fuo ke ko pai tipa gu ngara tipa tungusa wene pangbanga nangia ga bambata aKristano, wene bawirikipai akpari ni nunga ki ya: “Ka ariapai adunga ho rogo gu raka nga ga kanisa areme tipa ka sa aboro i nibi sunge tungusa wene pangbanga ni gu dingisoro nga ga agu aKristano nibasasa ima zio bapatiza ya, na si ki du niyuguyuguhe rogo gu wene gene raka ngbaa kisusi ga azanga idapase ya, si awiranga ani asonakumbatayo gbe te.” Kina boro agu asino Ngbiiakristano nazangaha moipai dagba aDezire Yekova! Gayo idapase ni ungaha, ni ndikidi idapase, na ni gu idapase du mburuhe rii gu rengo nga ga Baibiri nga gu nasoda yo i idi ka gumbaha fu agu aboro dunduko nika dega tuyo.—1 Timoteo 2:3, 4.
14. Waigu Yesu anabi gako sunge, na gini sino gako abawiriki ayugoho areme?
14 Yesu anabi gako sunge tungusapai na nyanyakipaha gbe, kini saha ni gu bambatapai ko anabakabangiriko tipaha. Ko ayaa fu Pirato: “Gi pai i avungu re sa ni re, gi pai mi aye sa ni re ku zegino, nga ka du ni dezire rengo.” (Yoane 18:37) Ga Mbori aboro naberã wa kina Yesu. Na gu rengo nga ga Baibiri ngbaduyo yo, i na’asada tiyo nyanyakii ka bi agene tipa ka fura na kura aboro tipaha wa rengbe yo ka mangaha. Bete agi agene re nayugopa iiriwo birĩ.
15. Waigu gu kurayo nayugu birĩ rogo tungusa wene pangbanga yo?
15 Rogo kura ringara sa Amerika ku Sudiyo, aDezire anandu nunguro ku padiyo bangiri gu wiridi nafu kurogo gu Di nga Amazon tipa ka gbia aboro na rengo. Ono tie, ho vura arikito ni dagba aboro ringara rogo 1995, i azahe ti gupai nga aboro ringara nita bangiri gu wiridi re. Fuo dia yo berã tipa kaa fu agu abuku kindi du mburuhe rii Baibiri fu agu aboro duna nyemu rengo, agu aDezire re adiberã kaa kekeda gu pangbanga re si ni ya bangiri ime ku padiyo. I anakeka awaraga ki kodihe na awirina agu amagazini nga Ngbaõbambu Sinziri na Oni Zingi Rameyo! ki moihe kurogo agu amorangi nga ga kandi. Fuo gure, i kini mo ka bafa agu amorangi re ku bangiri gu di re. I amangi gipai re tipa agarã biama na beberehe daho i azaki gene ni berewe tipa aboro ringara nindu nunguro bangiri gu di re. Pangba gu di re dunduko, aboro anafu tambuahe fu aDezire tipa agu abuku re. Nagbia sa nga guri i anawisigo Baibiri mbata na ri adungo yo na aume bangiiriyo ki ya: “Mi aaberãha ya mi abinga roni berewe te. Ono tie, ho mi atona kaa gbia abuku ni rogo amorangi, mi aini gupai nga bangironi ata gonga tire te!” Gu kura aboro nanaraka pangba gu di re ayaa i anageda agu amagazini re berewe na berewe. Dungu agu arago aboro araka rogo aduna gaha “ba rogoda awaraga” tini—nga bagangia (nga gu ba ime ake rogo kirikiri), yo agu ahe naya bangiri ime adungura tihe kuho ni tipa guru regbo. Yo ngaha re du agu aboro nadu na nyemu rengo anandu kaa wisigo rago ni dedede ka bihe kangia “kedikedi waraga” ho fuyo nga gu ye ngbiiyo.
16. Ho ani afu tirani ni tipa sunge, waigu si azaka gene ti kura aregbo tipa ani sa aboro ni abawiriki?
16 Yekova Mbori na gako nyanyaki amaraika narugapa sunge tungusa wene pangbanga na ki du kugiihe. (Yugoti 14:6) Ka ani fu kina tirani gbua tipa manga gu sunge re, tunguotunguo amamu tipa sa aboro ni abawiriki rengbe arengba ka kura fu rani ti kura aregbo. Adee ue nga aKristano Nairobi, Kenya yo, nga aguyo naamanga sunge tungusapai anyasi sunge rogo agu akporo i afuhe fuyo tipa tungusapai rogo. Paranga dee atunguo yo kini gumba gupai na ngbarago nga: “Mi aima digo nikpari fu Mbori tipa ka gbia aboro wa oni.” Ri azungadi agu aDezire re i ga na ri ku kpuriyo ni kina ipo tipa sakapai, na kina boro rogo gu bangisa uru re, i ki tona kaa wisigo Baibiri na ri. Tipagine gu dee re aye tini fuo agu aKristano ue re niipiipihe wa gure? Aposo wa ue mbata kusayo, wiiri akpi. Sidu ho ri abi paranga gude ni nadu na keke wiri kpewaraga beko nga “Gini Maabangirise du Tipa Gu Kpikpiyo Ani Akpinyemu Yo?” rii aaidaha gbe sidu ri ki sana gu kumbagude re ko fuhe furi. Ko aka nani, ono ki yugubara agu aDezire furi nafuhe fuko. Fuoho aturanga te, gu dee re ki tona kaa sona rogo toroyo wenengai na ki rengbe tie ka diabe imisiri kpio wiiri.
Ga Mbori Nyemuse Du Wa Ka Si Moipai
17-19. Gini nyemuse Yekova nayuguhe fu ngbatunga aboro rogo gu gene nga ga tumorii?
17 Pa zugo fugo Mbori auru kpotosende dunduko na pai dagbaha mbembedii gbe na gu motumo tumorii nga ga Kristo Yesu. A wa kina tumorii, sunge tungusapai nga gu gene Yekova ayugo nyemuse rogo tipa aboro rogo arago dunduko. Toro adu kugii gu mokedi nangia Yoane ko kepai ki ya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”—Yoane 3:16.
18 Oni berẽnga pa gu nyemuse Yekova ayuguhe ni mbakada ko pai tipa tumorii. Tipa gu bagizo regbo boro ainonga paha ya, Mbori agbia ngbarago be dawedawe pagume dagbako na gu Wiriko kpi ko nyemuko gbe, ‘nga enge enge gu mangimangi ahe nga ga Mbori.’ (Yugoti 3:14) Yesu nakpinyemu Bako gbe, sidu Yekova akpinyemu Wiriko tigako “mbata zegino nikadu.” (Yoane 14:31; 17:24) Yekova aidihe fu gi Wiriko ko akpinyemuko gbe re ko bi kpio tipa wa ka aboro gbia nyenye unga. Nga gu bakere yugo nyemuse tipa ngbatunga aboro!
19 Yoane 3:17 nayaa: “Mbori akeda nga Wiri ku zegino ko sapu ngbanga aboro zegino te. Ko akedi ko aboro zegino bati abata mbiko ko.” Were, Yekova akedi Wiriko na gu sunge nyemuse nga ga bata, angianga gu nga ga sapangbanga aboro watadu ka gbarasa ngbanga fuyo ya. Gere na ngbanya dagbaha na agu afugo Petero nga: “[Yekova] akpi nga nyemu aboro kpi wa sa te, ono ko nakpi nyemu aboro da ti zungadi tiyo [saberã, NW ] dunduko.”—2 Petero 3:9.
20. Rogo gini gene du bata na pai dagbaha na pa tungusa wene pangbanga?
20 Fuo maa ko mburupai rii ndika tipa batasa aboro nga gu nadu na bakere genoho fuko, Yekova naida badungu aboro gbe gbia undo behe a wa rengbe yo ka mangaha. Gu mokedi nangia Pauro akepai ki ya: “ ‘Gu ni ka kpari ni rimo Gbia [Yekova, NW ] ni bati abata.’ I awíra pa kpara tie wãi fu gu ko i aida nga pa ko ya? ki wiri pa ida pa gu ko wãi i agia nga pako ya? ki wiri pa gia ha wãi nizanga batungusipai?”—ARomo 10:13, 14.
21. Waigu si aida ani niberẽ tipa gu mamu nga ga du ti manga sunge tungusapai?
21 Nga gu bawene mamu ngaha ka du ti manga gi sunge tungusapai na yugopai namanga rogo zegino dunduko re! Taata sunge ngaha te, ono nga gu ngbarago du Yekova nani ho ko abi gako aboro ni i niraki niruruhe ringbisihe kuti sangba rengo na ki du ti gumba gu pangbanga re fu aboro! Sidu ka si vurangia kina ginipai du tipa roni, oni mbu ga Mbori toro na gu nyemuse du ngbaduroniyo si fõ roni tipa oni du ti manga gi sunge re. Na oni tingidihe ya, gupai ani abihe areme i nimangihe rogo zegino dunduko re nga gu gopai nanyasa kango tipa gupai nga, Yekova Mbori nika digiso gako kidohe bambeda nga gu kidohe du tipa ye na “vovo angbangbaturũ na vovo kpotosende” nga ga taarimo, “ruru apai nikanye rogo ho.”—2 Petero 3:13.
Oni Natingidaha?
• Tipagine abasamungu kuti ndikidi pambori aarengbanga tini ka kiso ngba abatungusi wene pangbanga ya?
• Waigu fugo Mbori nidu na diabese rogo gi gaani auru re?
• Rogo gini agene ga Mbori toro amangasunge areme?
• Waigu du tumorii na pai dagbaha na tungusa wene pangbanga?
[Graph/Gu kpiahe du ti kpewaraga 26]
(For fully formatted text, see publication)
Zugo bange atakipande Kindo rogo 20 kama agarã
Dedede Bange Abatungusipai
6,000,000
5,500,000
5,000,000
4,500,000
4,000,000
3,500,000
3,000,000
2,500,000
2,000,000
1,500,000
1,000,000
500,000
1900 1910 1920 1930 1940 1950 1960 1970 1980 1990 2000
[Gu kpiahe du ti kpewaraga 25]
Jerome
Tyndale
Gutenberg
hus
[Gu kekepai nayugo bara gu ba i adi kpiahe rogo]
Gutenberg and Hus: From the book The Story of Liberty, 1878
[Gu kpiahe du ti kpewaraga 25]
Agu abawisigi Baibiri nanatungusa wene pangbanga rogo agu agarã nangia ga 1920
Gu kpiahe du ti kpewaraga 27]
Auru kpotosende dunduko, aboro nakaragapai wenengai sa wene pangbanga
[Gu kpiahe du ti kpewaraga 28]
Wa kina gu motumo tumorii nga ga Yesu Kristo, sunge tungusapai nakiiso ga Mbori nyemuse