“Nidezirepai Fu Arikaaboro Dunduko”
“Oni adu ni adezirere . . . [da ku] digida sende yo.”—AMOKEDI 1:8.
1. Ti gini regbo na wari nibambataha abawiriki agi gu sangbanebi ni du nikekehe rogo Matayo 24:14?
AGU afugo Yesu du nikekehe rogo Matayo 24:14 (NW), si ni agu afugo aboro naima inoho wenengai si ki da ti gupai nga, dungu rani ima inoho ngbarirani. Si nirengo nga iiriwo sangbanebi! Oni moinga kpia gupai ku berã roni yo abawiriki avura berãha ho i agi gu fugo ni re ti bambata regbo! Rogo gu garã nangia 33 F.B.K., abawiriki aima du na Yesu tipa agarã wa biata, na ti gi regbo re, i ki ye naako ku Yerusarema yo. I aima bi gu iiriwoapai ko amangihe na ki degetuyo kuti gako yugoapai. Wa i avura duna ngbarago rogo gu nyanyakipa arengo Yesu ayuguhe fuyo, i aima ino gupai nga, anga aboro dunduko nadu na gu bangisa ngbarago i adu nani te. Yesu aduna kere avurako nadu na bakere ome tiyo.
2. Gini kereapai na aʹasada si adu nga abawiriki nika gbiatiyo nani?
2 Rii Bagangara Aeraya yo nadu, ho abawiriki biama asungu ni na Yesu rogo ba sa, kini degetuyo wenengai wa ko aafura tipa gu kereapai gbiati aʹasada naaye mbatayo si adu nga i nika gbiatiyo nani. Mbata fu gu regbo re, Yesu aima ya fuyo wee aboro nika imoko aimo. (Matayo 16:21) Awere tie, ko agumbaha fuyo ziazia ya i agbiatiyo agbia a ti kere arungosi be aboro. Ko ayaa: “[I afuka] roni sa gberãngbi; ki iimi roni. Rika aboro asóga roni asoga dunduko tipa rimore.” Anga gure nangia gu yangara apai naapido yo te. Si adu nga aziree anebi nika ingisa dungu aboro. Na gu kurayo ki koto na ki taburõ akurayo na akare na kini sogo tiyo dagbayo. Na si adu a nirengo nga, gu kura aboro, nga ‘dungu aboro,’ nika mbu gayo nyemuse tipa Mbori na tipa Fugoko si zere.—Matayo 24:9-12.
3. Tipagine du gu ga Yesu afugo du rogo Matayo 24:14 ti ni ni iiriwoho nirengo?
3 Fuo fura Yesu tipa ngbatunga agi apai naazeresa kina kpoto abawiriki yo re du Yesu agumba gupai navura iriwo ti gako abawiriki. Ko ayaa: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika [nidezirepai] fu arikaaboro dũ; ragoho ki digi adiga.” (Matayo 24:14) Nirengo, gu sunge Yesu atonaha ringara Yisaraere yo, nangia “[ka]du ni dezire rengo,” si adu nga si nikaa ndu kina kumbatayo ki gbandaka rogo zegino dunduko. (Yoane 18:37) Si aima du nga iiriwo sangbanebi nirengo! Tipa aboro rengbe ka manga gu sunge tungusapai re fu “arikaaboro dũ,” si aima du nitihe nga kpakarapai; na kingia iiriwopai wa i kaa mangaha ho ‘arikaaboro dunduko’ nikaa sogote yo asogote ni. Si adu a nga, pa manga yo gi banaru sunge re akiisonga kina padu Yekova nibahe gbiati pa gako ome sa te, ono si nika yugopa gako nyemuse, inapai, na zerangbaduse ayugo a. Kurii gure, si adu nga si nika fu mamu fu gako amoyambu i yugu gayo idapase naapa ra yo nigoyo fuko.
4. Ada i afu gu sunge fuyo nga ga manga dezirepai, na gini afugo wasa Yesu agumbaha fuyo?
4 Yesu aima fura fu gako abawiriki zukazuka ya i aduna bakere sunge barabangiri yo tipa ka mangaha. Mbata fu Yesu dakpa ku ngbangbaturũ yo, ko akuru fuoyo ki yaa: “Oni adía tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na [ku] digida sende yo.” (Amokedi 1:8) Rengo ngaha nga, si aima du nga kura aboro agbiatiyo agbia kutiyo ngbutuko fuo gure. Wa si avura du wo, namba abawiriki angenga te. Nairiwo wai si afu wasa fuyo nirengo ka ino gupai nga, ga Mbori ziazia toro duna bakere ome ti ni nika fu ome fuyo tipa i mangi gi sunge Mbori nafuhe fuyo re!
5. Ginipai abawiriki ainonga ha ya tipa sunge dezirepai?
5 Abawiriki aima ino gupai nga si aida i tungusi wene pangbangaa na ka “sa arikaaboro dunduko ni abawiriki.” (Matayo 28:19, 20) Ono i ainonga wai sirisiri si aida i mangi dezirepai te, na i ainonga gu regbo a zegino nika digo ti ni te. Ani a wo, ani ainonga ha te. Agi apai re kina ku vurube Yekova nisako ka diaberã tipaha. (Matayo 24:36) Ho i ka manga dezirepai ni kuho Yekova aidaha kuhoni, ko ayeaye na digido gi gbegbere zegino re. Kina ti gu regbo re tie aKristano ka ino gupai nga, sunge tungusapai ima manga kuho Yekova aidaha kuhoni. Agu abawiriki nadumbata re arengbanga ka maakpia bakio gu sunge tungusapai ku berãyo yo si adu nga i nika mangaha rogo gi yangara arame re te.
Sunge Dezirepai Rogo Bambata Sa Kama Agarã
6. Ginipai namangi rago Pendekote rogo gu garã nangia 33 F.B.K. na ngbutuko fuo gu regbo re?
6 Rogo bambata sa kama agarã, sunge tungusapa Kindo na sunge sa aboro ni abawiriki akusi iiriwo sangbanaha. Ti rago Pendekote rogo gu garã nangia 33 F.B.K., abawiriki bangeyo aduwa 120 adu rogo vurubambu ariyo Yerusarema yo. Mbori auka gako ziazia toro kuriyo, na gu mokedi nangia Petero ki mangi gu gumbapai nafõngbadu aboro yo ka sakarogo gi iiriwopai namangi re, na kura aboro bangeyo aduwa 3,000 ki sa tiyo ni aidipase na ki zi bapatiza. Gure nangia kina tonatonapai gbua. Wa agu aʹasadatise nangia ga aboro pambori avura du tipa ka kandasi sunge tungusa wene pangbangaa, ono ‘[Yekova] anaaye aye na agu aboro nanaabata ku dagba abawiriki yo na aʹuru dunduko.’ Nikina ipo, bange “akumba ki du tie wa ka i du 5000.” Fuo gure, “i ki dungura aidipase fu Gbia susi gu nadu mbata, [nangia] rimbasa akumba na ade.”—Amokedi 2:1-4, 8, 14, 41, 47; 4:4; 5:14.
7. Tipagine pa sa Korunerio tiko kurogo gu pambori nangia ga aKristano adu ti ni ninyanyakipa pai?
7 Gu kura nyanyakipa pai amangi rogo gu garã nangia 36 F.B.K., nangia pa sa gu Gendiria tiko nangia Korunerio, kurogo gu pambori nga ga aKristano na ki zi bapatiza. Ho Yekova akedi gu mokedi ni nangia Petero fuo gi kumba nangia bagunde ti Mbori re, Yekova ayugu gupai nani nga, ga Yesu zinahe tipa ka “sa arikaaboro dunduko ni abawiriki” adunga tipa kina agu aYuda nadu rogo aringara nibakiakia te. (Amokedi 10:44, 45) Gine nangia gu mangapai nangia ga agu abawiriki nanaangbembatayo rogo apai? Ho agu amokedi gbiati abaakumba nadu Yuda yo akparia gupai ni nga si aaida i tungusi wene pangbangaa a fu arikaaboro, naangianga aYuda ya, i ataasirimo Mbori. (Amokedi 11:1, 18) Ti kina gu bangisa regbo re a, sunge tungusapai aduna zuzuhe ti ni dagba aYuda. Fuo susa agarã kusa, gbe, rogo gu garã nangia 58 F.B.K., “aYudo aidi pai ni dungu kutu yo” i ki gbia yo kuti agu aidipase nangia aGendiria.—Amokedi 21:20.
8. Ginipai wene pangbangaa amangaha na aboro?
8 Wa vura iriwo pa nge agu aKristano nadu rogo bambata sa kama agarã re, si aidanga bangirani go ti gupai nga kina boro ndikidi aboro du i agidi bangeyo re te. Gu pangbangaa nga ga Ziazia Kekeapai i agihe, si aima duna ome ti ni. (AEbere 4:12) Si angia guhe naʹaria gu raka nangia ga agu aboro nadihe kugume ngba iiriwo gene. Agu aboro nibasasa nadihe kugume agirisi gayo raka, ki ukadi vovo borose, na ki mbakadi gayo pagume na Mbori. (AEfeso 4:22, 23) Kina gu bangisapai re namanga areme. Na agu aboro nadia wene pangbangaa kugume, i dunduko duna gu iiriwo maabangirise nga ga raka nyeanye kindi.—Yoane 3:16.
Abadiasunge na Mbori
9. Gini mamu gbiati sunge agu aKristano nadumbata akpariaha ya i adu nani beyo?
9 Agu aKristano nadumbata anaatambuanga tiyo tipa agu apai i anaamangaha te. I akparia gupai nga, “tandu Ziazia Toro” nanaasongoda gayo sunge tungusapai. (ARomo 15:13, 19) Yekova nangia gu boro nanaasa agu apai nga ga toro re si naasona. Ti kina gu bangisa regbo re, agu aKristano re aima rugatiyo na gupai nga, i aduna gu mamu gbiati sunge beyo nga ga du “[ni]ga Mbori abadiasunge.” (1 AKorindo 3:6-9) Si ki ta du were, i anaamanga asadatise nyanyakii na ngbanyaa na ga Yesu arugute rogo manga gu sunge i afuhe fuyo.—Ruka 13:24.
10. Gini bakere asadatise bete aKristano amangihe tipa ka manga dezirepai fu arikaaboro dũ?
10 Nidu Pauro “ni ga aGendiria mokedi,” ko andu anunguro nangia dungu akutu amairo rii sende na rii baime, kini sigira dungu adungurati rogo gu papara ga aRomo ngbii nangia Asia na ringara aGiriki yo. (ARomo 11:13) Ko andu nunguro a ku Roma yo, na si nawira ko aima ndu a ku Sepania yo. Ti kina gu bangisa regbo re a, i aʹasiapa ‘wene pangbangaa fu [gu mokedi nangia Petero] tipa aYuda,’ na ko ki ndu ka tungusapai fuyo Babera yo. Babera angia nyanyakipa ga aYuda gbata nga ga pambori ti gu regbo re. (AGaratio 2:7-9; 1 Petero 5:13) Dagba gu dungu aboro naamanga ga Gbia sunge, angia ngbatunga agu adee nangia Turufaina na Turufosa. Gu kura dee rimori angia Perusi, i aya tipa ri wee “ri namangi sunge gbe rogo Gbia [yo].”—ARomo 16:12.
11. Wai Yekova afu maku kurii gu bakere aʹasadatise nangia ga abawiriki?
11 Yekova afu maku kpaima kurii gu bakere asadatise nangia ga agu abamangisunge fura ani tipa yo re gbiati ga gu kura zaaza yo a. Mbata fu da agarã 30 fuo fura Yesu tipa pai kumbatayo ya i amanga dezirepai amanga fu arikaaboro dunduko, Pauro akepai ya i aima “[tungusa wene pangbangaa] rogo arago tii ngbangbaturũ yo dũ.” (AKorosaio 1:23) Ya mo digido zegino aye tie ti gu regbo re? Ii, rogo gene sa, kura papara zegino aima digo nirengo. Si aye kurii gu sino mangaapai watadu sino raka nangia ga aYuda rogo gu garã nangia 70 F.B.K. ho agu ariivura nangia ga aRomo agburuwa Yerusarema ni gbiati yekaru. Ono wa si avura du wo, Yekova aima diaberã ya i duwa ka i mangi dezirepai nibakerehe gbe susi gure mbata fu ko nika gbarasa ga Satana zegino naabaha dunduko.
Gu Sunge Dezirepai Namanga Areme
12. Wai agu aBawiriki Ziazia Kekeapai nadumbata agirogo gu zinahe nadu tipa tungusapai?
12 Rogo yangara papara gu 19 kama agarã, fuo gu gbanga regbo samungu kuti ndikidi pambori amoipai, i asigira ziazia irisombori berewe kubaha. ABawiriki Ziazia Kekeapai, nga gu rimo i aini aDezire Yekova ti ni ti gu regbo re, aima rugatiyo wenengai naapa gu zinahe Yesu afuhe tipa sa aboro ni abawiriki rogo zegino dunduko. (Matayo 28:19, 20) Bara rogo gu garã nangia 1914, bange aboro aduwa 5,100 nadu zaaza rogo sunge tungusapai, na wene pangbangaa ki da rogo aringara wa 68. Ono tie, gu bambata aBawiriki Ziazia Kekeapai re aruganga tiyo wenengai na nyakapa gupai du rogo Matayo 24:14 te. Bara ti digido agu agarã nangia ga 1800, Ziazia Kekeapai, nga gu buku duna wene pangbangaa rogoho, agu asosaiti nga ga Ziazia Kekeapai yo aima sa fugoho kurogo dungu fugo-aboro, ki gbingbidaha na ki kparakaha rogo zegino dunduko. Si ki ta du were, aBawiriki Ziazia Kekeapai kini mo kaa berã gupai tipa dungu agarã nga, i aima manga dezirepai fu rikaaboro.
13, 14. Gini ziazia giarogopai i akusihe tipa gupai Mbori akpinyemuhe gbiati gako ringbisapai i akusihe rogo gu Ngbaõbambu Sinziri nangia ga 1928?
13 Tooni tooni, Yekova atona ka sa gako aboro i girogo gupai yo ziazia gbe ko akpinyemuhe gbiati gako ringbisapai. (Asanza 4:18) Gu Ngbaõbambu Sinziri nangia ga Banduru ti rameru 1, rogo 1928, ayaa: “Ya mo ani rengbe ka yawee pa kparaka yo Ziazia Kekeapai rogo zegino nayugo gupai nga, gu sangbanebi nadu tipa tungusa wene pangbangaa nga ga kindo ima manga? Zanga kapa, oó! Wa vura duhe nga i aima kparaka Ziazia Kekeapai fu aboro, si naida gupai aida kindi nga gu tooni badona adezire duho rogo zegino, i kusi abuku nga agu nasakarogo ga Mbori ringbisapai yo na kini ndu fuo agu aboro ku kpuyo yo narogodi awirina Ziazia Kekeapai ka yugoho fuyo. Ka si adunga wo ya, aboro ininga gupai nga i aima sigira ga Masiya zogarago ti gi gaani regbo re te.”
14 Gu kusikusi Ngbaõbambu Sinziri re afura berewe ki yaa: “Rogo gu garã nangia 1920, . . . aBawiriki Ziazia Kekeapai aye ka rugatiyo na nzunzu rogo gu sangbanebi gaani Gbia agumbaha du rogo Matayo 24:14. Fuo gure, i akparia gupai ngawee, ‘gi wene pangbangaa’ si aida i tungusihe rogo zegino dunduko nidezirepai fu aGendiria watadu fu arikaaboro dunduko re, si angianga gu wene pangbangaa nga ga gu kindo du kindi kumbatayo nika ye te, ono si angia gu wene pangbangaa nga, gu Bakindo nga Masiya, ko aima tona gako zogarago auru kpotosende.”
15. Wai sunge dezirepai akii watadu amoipai natona rogo agu agarã nangia ga 1920?
15 Gu “tooni badona adezire” nadu rogo agu agarã nangia 1920 re, si anyenga nikina toonihe kindi te. Vuru agu agarã naye kusa, i akparia “bakere rimbasa aboro” nga gu “kura akandoro” na i ki tona ka dungura ra. (Yugoti 7:9; Yoane 10:16) Areme, bange abatungusi wene pangbangaa ho nga 6,613,829 rogo aringara 235 auru kpotosende. Nangbaa gu digisidigisi sangbanebi re! Anga regbo aduho mbata i atungusinga “gi wene pangbanga nga ga ngbi [kindo] re” nibakerehe wa gure te. Anga regbo adunga wo mbata ga Yekova ruru amoyambu angenga wa gure auru kpotosende te.
16. Gini asunge awirina amangihe rogo gu garã sunge nadu gugorö? (Oni bi agu anamba du dagba gbakigbaki agene ti kpewaraga 23-26.)
16 Gi bakere rimbasa nga ga aDezire re aima digo nimangisunge kakaka kina sa rogo gi garã sunge nga ga 2005 re. Awirina adi asaa susi birioni sa kutingba sunge takapande wene pangbangaa rogo aringara 235. I amangi dungu amirioni karagatise ka biko aboro berewe, na i ki nungusi wisigo Ziazia Kekeapai na amirioni aboro. ADezire Yekova nga agu aboro namangi gi sunge re, nga agu aboro nadi gayo regbo gbiati gayo ahe tipa ka wisigo Fugo Mbori na kura aboro. (Matayo 10:8) Mbiko gu bakere ome nga ga ga Yekova ziazia toro, ko nandu kumbatayo kindi kaa fu ome fu gako amoyambu i naamanga gupai ko akpinyemuhe.—Zekaraya 4:6.
Mangasunge Dezirepai Zanga Nyomoro
17. Wai ga Yekova aboro akaragapai kuti gu ga Yesu afugo du tipa tungusa wene pangbangaa?
17 Wa vura duhe nga agarã ima susa awere wa 2,000 tona ti gu regbo Yesu afu zinahe tipa tungusa wene pangbangaa, gu ngara ga Mbori aboro nidu nani tipa gu sunge re azeranga te. Ani ima ino gupai nga, nigaani hipai rogo manga weneapai, gure nga ani nayugokpiapai tipa ga Yekova asino nga ga nyemuse, ga inapai, na ga zerangbaduse. Wa kina Yekova, ani akpinga nyemu aboro kpiki te ono ani naida aboro dunduko sa gayo berã na ki mbakadi pagume naako. (2 AKorindo 5:18-20; 2 Petero 3:9) Fuo ga Mbori toro fu ome fu aDezire Yekova, i natungusa wene pangbangaa zaaza da ku digido kpotosende yo. (ARomo 12:11) Nisangbana gipai re, aboro rogo arago dunduko nadia rengo kugume na kini mangiapai na ngbanyaa kuti ga Yekova arugute. Ani makianga bete kpiaapai tipaha.
18, 19. Gini pangbangaa rengbe oni ka gumbaha tipa bete agu aboro nadi wene pangbangaa kugume?
18 Kumba nga Charles angia basopobino Kenya yo pavuruhe ku dioyo. Rogo gu garã nangia 1998, ko abagi gbäkärä barõaha adu nga akiro 8,000 na i ki fu waraga fuko nga diproma tipa gu gako sunge re na ki takipande ko Nibawene Barũ Gbäkärä. Ti gu regbo re, ko atona ka wisigo Ziazia Kekeapai. Nikina ipo, ko akparia gupai nga, gu boro narũ gbäkärä na kini bagihe, ni nakuo gu ga Yesu zinahe du tipa kpi boro nyemu kurani. (Matayo 22:39) Fuo Charles rugutiko na gupai nga, ‘bawene barũ gbäkärä’ nga ‘kere baimi-aboro,’ ko amigidi gu gako gbäkärä ko aruhe na kere kikpa ahe tipa si kpi. Ko asono kumbatayo rogo gako wirikapai ki kpara tiko fu Mbori na ki zi bapatiza, na ko awere nga bazakigene ti aregbo dunduko na kini mangisunge rogo dungurati nimoyambu-undo.
19 Anga kapa ho nga Yekova nazigizo arikaaboro nigu dezirepai namanga rogo zegino, na agu ahe ngba angba tiko, nga aboro, i kini ye kurogo rengo yo te. (Agai 2:7) Pedro, nga kumba naraka Portugal yo, arimi siminario ho garãko aduni nga 13. Gako sásá angia ko aida ka kura nimokedi i kedi ko kurogo kura ringara tipa ka yugo Ziazia Kekeapai yo fu aboro. Ono tie, fuo bete regbo, ko ambu siminario bambiko i ayugonga pai yo bakere rogo Ziazia Kekeapai te. Agarã sita kusa, ko aawisigo gu sino berã gbiati gu sino mangaapai nga aboro (psychology) rogo bakere bawirikapai rogo gbata nga Lisbon. Ko aaraka fuo tame nako, nga boro sa dagba aDezire Yekova, na ri ki ngarasiko ko wisigi Ziazia Kekeapai. Ti gu regbo re, Pedro aruganga tiko nirengo singia Mbori ho ti ni watadu ko ti ni te te, na ka ko arengbanga a ka diaberã tipa ka wisigo Ziazia Kekeapai watadu ka zanga wisigoho ya. Ko afura fu gako bayugupai nga ga sino berã tipa gu sino nga ga manga ndundu rogo diaberã. Gako bayugupai aya fuko wee gu inohe du tipa gu sino berã nga ga aboro gbiati gayo sino mangaapai nayawee agu aboro arengbanga ka manga diaberã ya, i ka apai angbanga kubarayo ya. Fuo gia Pedro gupai re, ko adiberã ka tona wisigo Ziazia Kekeapai. I abapatizi ko bambeda na ko nanungusa wisigo Ziazia Kekeapai awere na aboro.
20. Tipagine rengbe ani kadu ti ni na ngbarago nga i namanga dezirepai fu arikaaboro nibakerehe wa ngbatunga gure?
20 Ani ataruganga tirani na bakio gu dezirepai ani ka mangaha fu arikaaboro te, na ani ainongo gu uru gbiati gu saa digido zegino nika ye ti ni te. Gu ini ani he gbua nga si aimanga te. Ani na ngbarago ya, pa tungusa wene pangbangaa nibakerehe wa gure nga pai sa dagba agu akuraha nayugo gupai nga, regbo ima mbeda ga Mbori Kindo ye ka dia ba agu azogarago nga ga aboro. (Daniere 2:44) Na agarã nibasasa, Mbori nafu mamu fu amirioni aboro i di wene pangbangaa kugume, na gi sunge re nafu taarimo fu gaani Mbori nga Yekova. Panye ani niruru rani fu Mbori dunga nigaani diaberã kodihe na awirinarani rogo zegino dunduko na ki dingiso tirani kurogo gu sunge nga ga manga dezirepai fu arikaaboro dunduko. Nimanga ani he wo, ani kini mo ka batasa tirani na agu aboro nadegatuyo kuti rani.—1 Timoteo 4:16.
Oni Natingidaha?
• Tipagine du Matayo 24:14 ti ni ninyanyakipa sangbanebi?
• Gini aʹasadatise agu aKristano nadumbata amangihe rogo tungusapai, na gine nangia sangbanaha?
• Wai aBawiriki Ziazia Kekeapai aye ka giarogo pa gu zingo nadu tipa manga dezirepai fu arikaaboro dunduko?
• Wa oni nawisigi gu mangaapai nangia ga ga Yekova aboro rogo gu garã nga ga sunge nadu gugorö, gini paparaha iriwo tironi?
[Chart on page 27-30]
2005 SERVICE YEAR REPORT OF JEHOVAH’S WITNESSES WORLDWIDE
[Gu kpiahe du ti kpewaraga 20]
Yekova arugu Petero ko mangi dezirepai fu Korunerio gbiati gako aborokporo
[Gu kpiahe du ti kpewaraga 21]
Pauro andu anunguro nangia dungu akutu amairo rii sende na rii baime ka tungusa wene pangbangaa