Oni Mangi Sunge Ke Ahe Na Ngbarago!
“Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.”—MATAYO 9:37, 38.
1. Ginipai naundo rani ani nindu kina kumbatayo kaa manga gupai Mbori akpinyemuhe?
HO ANI atingidapa gu uru ni ani azi bapatiza ki da ni guni sa dagba ga Yekova amoyambu, si rengbe ka wira wa si amangi rogo gu uru nadu gba, ka si vura du nga fuoho di bete regbo watadu si ima dia dungu agarã vurũ. Taasa rimo Yekova angia banguapai rogo gaani raka fuo kpara ani tirani fuko. Ti agu aregbo ani anangbe regbo ka undo kura aboro i gi gu pangbanga nga ga Kindo na isoke i ki dihe kugume, mangasunge fu Yekova na ngbarago nangia gupai ani aabakabangirani tipaha gbe. (AEfeso 5:15, 16) Daa kurogo gi uru re, ani bi gupai nga regbo nasusa niipo ho ani afu tirani ni sa “ga Gbia sunge zaza dedede.” (1 AKorindo 15:58) Wa ani avura ni gbia tirani na fudifudiapai, gaani ngbarago nasa rani ani nindu kina kumbatayo kaa manga gupai Yekova akpinyemuhe.—Nemaya 8:10.
2. Gini apai nasa rani ani duna ngbarago rogo gaani sunge ke ahe?
2 Ni aKristano, ani namanga sunge ke ahe rogo kura gene, ono anga si ni ndikidi sunge ke ahe atiyo te. Yesu Kristo aringbisipa dungura aboro tipa nyenye unga kuti sunge ke ahe. (Yoane 4:35-38) Wa duhe nga ani ti ngba gi sunge ke ahe re, si adu ni gupai rengbe ka ngarasa rani ka ani wisigipai tipa gu ngbarago nadu ti bambata aKristano ho i anamanga sunge ke ahe ni. Ani ka wisigo apai biata nga gu nasa rani ani duna ngbarago rogo gu sunge ke ahe ani amangaha areme. Agi apai biata re nga (1) gu gaani pangbanga nafu maabangirise fu aboro, (2) gu diabese du ani nani rogo gbata aboro, na (3) gaani zezeredi sino ni abamangisunge ke ahe.
Keda Aboro I Mangi Sunge Ke Ahe
3. Waigu bambata apefuo Yesu agbia ngbarago?
3 Nairiwo wai gu raka nga ga bambata abamangisunge ke ahe a’aria tihe rogo gu garã nangia 33 ti Gaani Regbo, rogo gu uru i andu ku rii bagangara Gariraya yo ka gbia Kristo fuo zinga ko bekpio! Agu aboro gupai re a’aria gayo raka gbe angia gu ruru abawiriki nangia ga Yesu yo, nga aguyo nadu 11. (Matayo 28:16) “Awirina nasusi 500” avura duho ti gu regbo gupai amangi re. (1 AKorindo 15:6) I aatingidapa gu sunge zanga piriga nga gu Yesu afuhe fuyo. Ko agumba gupai fuyo nga: “Oni ndú . . . ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Wa kere rungosi avura du, i agbia bakere ngbarago rogo sunge ke ahe wa i aabi adungurati nga ga apefuo Kristo i nisigiraha rogo dungu arago. Kusa, i aatungusa ‘wene pangbanga rogo agu arago dunduko du tii ngbangbaturũ no.’—AKorosaio 1:23; Amokedi 1:8; 16:5.
4. Waigu apai adu ho Kristo akedi gako abawiriki ni tipa sunge ke ahe?
4 Ti kina tonatona gako sunge tungusapai Gariraya yo, Yesu ayambu gu gako amokedi nanidu 12 na ki kedi yo i ndu kini tungusi gupai gbe nga: “Gu ngbi nga ga ngbangbaturũ si mbedi.” (Matayo 10:1-7) Kina boro ko nitiko aima tona kaa ta “dagba abaakporo na akporo dunduko [nga ga Gariraya], ki niyugu pai rogo gayo abambutiria, ki nitungusi gu wene pangbanga nga ga ga Mbori ngbi, nihusi ngbatunga akaza na ngbatunga awokote dunduko.” Nunga aboro azi Yesu “bambiko i arungo, ki nigbandaka, wa kina agu [avusende] adu nga na babandara ti ra ya.” (Matayo 9:35, 36) Wa nunga aboro aamanga ko gbe, ko agumba gupai fu gako abawiriki nga: “Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” (Matayo 9:37, 38) Gu zingo tipa abamangisunge Yesu agumbapaha Yuda yo adu wa kina gure a ho yangara rame tipa gako sunge auru kpotosende anye ni gbua nga adiwi sita. (Ruka 10:2) Ti agu aregbo ue dunduko re, ko akedi apefuo ko i ndu ka manga sunge ke ahe.—Matayo 10:5; Ruka 10:3.
Gu Gaani Pangbanga Nafu Maabangirise fu Aboro
5. Gini ngbatunga pangbanga ani atungusaha?
5 Ni gu ga Yekova amoyambu du areme, ani nakaragapai na ngbarago sa gu yambahe du tipa abamangisunge ke ahe. Pai sa dagba agu apai nasa rani ani duna bakere ngbarago nga, ani nandu na gu pangbanga nafu maabangirise fu agu aboro narungo kpotoyo yo na fu aguyo duna bakere gberarago tiyo. Wa kina gu ga Yesu abawiriki nadu rogo bambata kama agarã, ani na mamu berani ka tungusa wene pangbanga fu aboro, nga gu ndikidi pangbanga nafu maabangirise fu agu aboro ‘narungo, kini gbandaka wa kina agu avusende adunga na babandara ti ra ya’!
6. Gini sunge amokedi aamangaha kakaka rogo bambata kama agarã?
6 Bara ti bebere bambata kama agarã, gu mokedi nangia Pauro aatungusa wene pangbanga kakaka. Na nirengo, gako sunge ke ahe aima duna fuoho tini, mbiko ho ko aake waraga ni fu agu aKristano nadu Korinda yo rogo gu garã nangia 55 ti Gaani Regbo, ko ayaa: “Mi natingida pa ina gu wene pangbanga fu roni, awirina, mi atungusi pa ha fu roni, nga gu oni adi ku gume a, nga gu ru oni rogo yo.” (1 AKorindo 15:1) Amokedi kodihe na kura bambata aKristano angia ngangara abamangisunge ke ahe. Wa Ziazia Kekeapai avuranga yugo bange agu amokedi fu rani nabati ti regbo gu kere apai namangi ki digi kuti gbarasa Yerusarema rogo gu garã nangia 70 ti Gaani Regbo ya, gu ini ani he nga, gu mokedi nangia Yoane aatungusapai kindi kusa fuo agarã 25 fuo manga agu apai re.—Yugoti 1:9.
7, 8. Gini pangbanga nafu maabangirise ga Yekova amoyambu atungusaha awere susi gu nidu mbata?
7 Fuo gure, regbo ada nga gu abarumbatayo rogo pambori rogo Ngbiiakristano, nga ‘aboro gbegberẽpai,’ amoipai rii aboro tipa badungu agarã. (2 ATesaroniko 2:3) Ono tie, mbembedii kuti digido 19 kama agarã, agu aboro naaida ka raka ringbisihe kuti agu arugute nga ga bambata pambori nga ga aKristano adi gu pangbanga kugume nafu maabangirise, na kini takipande Kindo. Nirengo, natona ti kina bambata kusikusihe, (ga Saba Diwi rogo 1879) rimo Ngbaõbambu Sinziri akodi agu afugo nga, “Natakapande ga Kristo Padu Ho na Ome Kindo Beko,” “Natakapande ga Kristo Kindo” watadu “Natakapande ga Yekova Kindo.”
8 I asigira ga Mbori Kindo nga ga ngbangbaturũ kutiibe Yesu Kristo rogo 1914, na awere, ani natungusa gu pangbanga nafu maabangirise fu aboro niipo susi gu nidu mbata. Tipagine ani amangaha tini wo? Mbiko gu sa dagba gu wene apai gu zogarago nga ga ga Mbori Kindo nika mangaha nga, si adigiso gi gbegbere zegino re. (Daniere 2:44) Gini kura pangbanga duho rengbe ka ngbaa kisusi gure? Na gini kura ngbarago rengbe ani ka gbiaha susi gu nga ani takipande Kindo mbata fu “bakere gberãngbi” tona?—Matayo 24:21; Marako 13:10.
Gu Diabese Du Ani Nani Rogo Gbata Aboro
9. Gini rugute Yesu afuhe fu gako abawiriki, na waigu aboro akaragapai sa gu pangbanga nga ga Kindo?
9 Gu kurapai nga gu nasa rani ani duna ngbarago ni abamangisunge ke ahe nga, gu diabese du ani nani rogo gbata agu aboro nasa tiyo ni abawiriki na kini kodi tiyo kuti rani rogo sunge ke ahe. Bakuru kusayo rogo gu garã nangia 31 kuti 32 ti Gaani Regbo, Yesu arugu gako abawiriki ki ya: “Gu bakporo na gu kporo oni ka rima ku rogo, oni gbáta gu boro du ho rengbe na dia roni ku gume.” (Matayo 10:11) Mbiko gayo karagapai sa gu pangbanga nga ga Kindo, anga aboro dunduko narengbe ka dia gu pangbanga re kugume te. Si ki vura du wo, ga Yesu abawiriki anatungusa wene pangbanga zaaza rogo agu arago dunduko aboro adu rogo.
10. Waigu Pauro anagbata agu aboro narẽ na gia wene pangbanga?
10 Fuo kpio Yesu na fuo zinga ko bekpio, pa gbata agu aboro narẽ na gia wene pangbanga aandu kindi kumbatayo nyanyakii. Pauro anasakapai na aYuda rogo gayo abambutiria na kini sakipai na agu aboro ko anagbia yo ba baga ahe Atenai yo. Ho ko amangi dezirepai ni Areopaga yo rogo ga aGiriki gbata, “akumba ki ka kuti ko, ki idi he. Dionusio nangia Areopago ki du dagba yo a, na de rimori angia Damari, na akura yo a.” Agu arago dunduko Pauro anandu kurogo, ko adu ni wene kpiapai fu awirina rogo tungusapai ‘gbaiga na ni tangara abambu.’—Amokedi 17:17, 34; 20:20.
11. Gini agene tungusapai awirina anamangaha mbata kusayo?
11 Ho 19 kama agarã aambeda ni ka digo, mbedimbedi aKristano aamanga sunge gbata agu aboro narẽ na gia wene pangbanga zanga gunde. Gu papara kekepai riihe adu nga, “I Ambediyo Tipa Tungusapai,” nga gu nakuru rogo gu Ngbaõbambu Sinziri nga ga Siona nga ga Bamburu na ga Buza rogo 1881, ayaa: “Tungusa wene pangbanga . . . nandu kindi kumbatayo ‘fu bayee aboro,’ nga agu aboro nakpinyemu ka giaha, tipa ka sa aboro dagba yo ni kpoto Kristo, ni adikumbo na ko.” Ga Mbori abamangisunge ke ahe anagbia aboro dedede ho i anakura ni kanisa yo na i kini fuku kekekeke akpewaraga fuyo nga gu nanidu na agu apangbanga rogo nga ga Ziazia Kekeapai, i ambakadihe tipa si ba nyemu wene pangbanga ti agu aboro re. Fuo awirina wisigipa wai gi gene tungusapai re angba gbe, gu Ngbaõbambu Sinziri nangia ga Merekoko ti rameru 15, rogo 1903, angarasi abamangisunge ke ahe i kparaka kekeke akpewaraga “ni tanga ti akporo, rogo Rago Poso dunduko tona wiso da ku bebere uru.”
12. Waigu kiisi ani gaani birĩ tungusapai? Oni yugunga kpiapai.
12 Rogo agu agarã susi bambeda kusayo, ani akiisi gaani sunge ni ndu ani fuo aboro kurogo kura aba, angianga kina ku kpuyo yo sa ya. Gere ada ni gu sunge duna zuzuhe tini rogo agu aringara duna zingo mosoro rogo si kini sa aboro i guari kusayo kpuyo ka ndu ka gbata mosoro, na rogo agu aringara aboro aguari kpuyo ka ndu kaa ongoda rogo kura wene aba ti gu regbo ani andu ku kpuyo tipa ka fura na yo. Ho Dezire sa na nakureari England yo abi gupai ni nga ageno naaguari dedede pangba baime kaa karaga tiyo na baasi ku kpuyo yo, i anangarasa tiyo kini dakpa agu abaasi re tipa ka kparaka Ngbaõbambu Sinziri na Oni Zingi Rameyo! fu agu aboro nadu rogo gu baasi re. Rogo diwi sa, i akparaka agu awaraga re 229. I ayaa: “Ani agundenga ti manga dezirepai pangba baime, rogo aba baga ahe, watadu ka gunde be gupai ka kuru sa rani te, mbiko ani ima ino gupai nga Yekova dedede na ani.” I akeke rimo agu aboro i anakparaka agi awaraga re fuyo dedede, ki tona wisigo Ziazia Kekeapai na aguyo, na i tibarayo ue dunduko amangisunge ni moundo anazakigene.
13. Gini ariapai rogo gaani sunge tungusapai si aida ani mangihe awere rogo kura aba?
13 Wa ani andu kindi kumbatayo na sunge gbata agu aboro rẽ na gia wene pangbanga, si rengbe ka ida gupai berani rogo kura aba nga ani wisigi gaani sunge tungusapai wenengai. Wa vura duhe nga dungu aDezire aima digo ni tungusipai ni tanga ti akporo Rago Poso wiso, i bi gupai rogo kura aba nga ndu fuo aboro wiso ku kpuyo yo na zuzuhe tini te, mbiko si rengbe ka du nga agu aboro re naongoda kindi. Ni aria yo regbo gayo nduge, dungu aDezire nagbata aboro awere ku uru, isoke fuo nyasa yo gayo adunguratise nga ga aKristano. Gi ngbatunga sunge gbata aboro re ima du nirengo na zuzuhe tini. Rogo gu garã nasusi, dungu aboro naye kurogo rengo na ki da ni atakipande Kindo. Gipai re nafu irisa fu Baira ati na kini sa rani ani duna ngbarago.
Ani Kakuti Gaani Zezeredi Sino Ni Abamangisunge Ke Ahe
14. Gini berã ani nidu nani ho ani atungusapai ni fu aboro, na tipagine?
14 Gu kura ndupai nasa rani ani duna ngbarago nga, gu zezeredi sino ani ayugoho ho du ani ni ti ngba gaani sunge ke ahe. Yesu aya: “Oni . . . ta rima ku bambu yo, nipoi kuti aboro. Ka gu bambu [re] rengbe tipa roni, gaoni zereda ki ye ku ri he.” (Matayo 10:12, 13) Gu paa kuti aboro nadu rogo pa-Ebere na rogo gu pa-Giriki i ake Ziazia Kekeapai rogo, si na gu berã rogo nga, ‘Oni du wenengai.’ Gi berã re ani andu nani fuo aboro ho ani atungusa wene pangbanga ni fuyo. Gaani maabangirani nga, i akaragapai akaraga wenengai sa gu pangbanga nga ga Kindo. Tipa agu aboro nakaragapai wenengai sa gu pangbanga re, maabangirise gu duho nga i nika mbakadapai dagba yo na Mbori wa i ka saberã ti gayo ingapai, ki mbuhe, na ki mangi gupai ko akpinyemuhe. Zereda dagba yo na Mbori tigaha nika ndu na yo sa nyenye unga.—Yoane 17:3; Amokedi 3:19; 13:38, 48; 2 AKorindo 5:18-20.
15. Waigu rengbe ani ka kakuti gaani zezeredi sino ho aboro akaragapai ni fu rani gbegberee ti ngba gaani sunge tungusapai?
15 Waigu rengbe ani ka kakuti gaani zezeredi sino ho aboro akaragapai ni fu rani gbegberee? Yesu ayaa: “Ka gu bambu [re] rengbe tipa roni, gaoni zereda ki ye ku ri he. Ono ka si arengba nga tipa roni ya, gaoni zereda ki karaga tihe fu roni.” (Matayo 10:13) Gu pangbanga Ruka akehe tipa keda Yesu gako abawiriki 70 nakoda agu afugo nga: “Ka . . . irazereda du yo, gaoni zereda anye yo du ni ni; si ngia ni yo te, si ayéga fu roni berewe.” (Ruka 10:6) Ho ani atungusa wene pangbanga ni fu aboro, si gu daada ani tungusihe fuyo na ngbarago tirani, ki duna pazereda. Gbegbere karagapai, kpakanahe, watadu gu gbegbere fugo irakporo agumbaha fu rani nasa gupai nga gaani pangbanga nga ga zereda ‘karagatihe’ fu kina rani. Ono agi apai dunduko re adianga gaani zereda kusayo te, nga gu zereda nga zuzu ga Yekova ziazia toro.—AGaratio 5:22, 23.
Gu Wene Sogimapai nga ga Abamangisunge Ke Ahe
16, 17. (a) Ginipai ani aida ka mangaha ho ani akaraga tirani ni ka biko aboro? (b) Waigu rengbe ani ka undo agu aboro duna asanahe ngbayo rogo Ziazia Kekeapai?
16 Ni abamangisunge ke ahe, ani na ngbarago ka kodabee rogo sunge dungura aboro tipa nyenye unga. Nga gu ngbarago ani agbiaha ho gu boro ani atungusapai funi akaragapai ni wenengai sa gaani tungusapai, kini idi ka wirika kura apai, na ki da ni “irazereda”! Si rengbe ka du nga ni na dungu asanahe ngbani rogo Ziazia Kekeapai na ani ki bihe nga ani arengbanga ka karagapai sa gani asanahe dunduko ti bangisa regbo te. Wa duhe nga zada sungo ni gbangaha ti bambata regbo adanga te, ginipai si aida ani mangihe? Si naida ani sogima mangapai wa kina gu i agumbaha bakuru yo, agarã nasusi fuoho awere 60.
17 “Si naida adezire Yekova dunduko mbakadi tiyo tipa ka wisigo Ziazia Kekeapai na aboro.” Gu fugo re akuru rogo gu biata papara kekepai i anakusaha tingbafuo kuraha tona rogo 1937 kuti 1941 rogo gu rukutu abuku nadu na arugute rogo tipa wisigopai na aboro, rimoho angia Kpia Wai ka Wisigopai na Aboro (rogo pa-Ngirisi). Si asusi kumbatayo na gu fugo nga: “Si naida abatungusipai dunduko du ngangaraa rogo agu agene dunduko rengbe yo rogo ka fu undo fu agu aboro duna wene ngbaduyo yo nga aguyo nayugo gupai nga i na nyemu gu pangbanga tiyo nga ga Kindo. Si naida awirina ni karaga tiyo ka biko agi aboro re, kini karagapai sa agu asanahe nibakiakia du ngbayo. . . , na fuo gure, ki tona wisigopai na yo . . . kini mangihe wo niipo wa rengbe yo ka mangaha.” Ii, gupai ani aida ka mangaha ho ani akaraga tirani ni ka biko aboro nga ka tona wisigo Ziazia Kekeapai na yo kpuyo yo na kini wisigihe na yo dedede.a Du ani na sino bakure na kini berẽpa gu boro duna nyemu rengo ti ni re asa rani ani mbakadi gupai wenengai ani ka wisigoho na ni, ani kini asadi tirani ka manga gu wisigopai re rogo gu gene ngbaa gbe.
18. Waigu rengbe ani ka undo vovo aboro i da ni ga Yesu Kristo abawiriki?
18 Mbiko gu undo nga ga gu buku nga Gu Inohe Nandu sa Nyenye Unga na gu burosua nga Gine Mbori Akpinyemuhe be Rani?, ani rengbe arengba ka wisigo Ziazia Kekeapai wenengai na aboro na rogo gi gene re, ani ki rengbe ka undo gu vovo aboro duna nyemu rengo tiyo i da ni abawiriki. Wa ani a’asada tirani ka wirika gaani Bakere Bayugupai nga Yesu Kristo, si nawiraha nga, agu abawisigi Ziazia Kekeapai re awirika apai be rani wa i kaa bi gaani zezeredi sino, na gaani ngbarago, na gaani pe rengo, na gaani irisa tipa ga Yekova andiko na arugute. Ho ani aundo vovo aboro ni ni karaga pai sa gayo asanahe, ani asadi tirani a ka yugopai fuyo tipa i karagapai tigayo a sa agu asanahe aboro asana yo nani. (2 Timoteo 2:1, 2; 1 Petero 2:21) Ni abamangi gu sunge du wa sunge ke ahe, ani rengbe arengba nirengo ka duna ngbarago mbiko rogo gu garã nasusi, ani aawisigo Ziazia Kekeapai na aboro 4,766,631 rogo zegino dunduko. Ani na ngbarago gbe ka si du nga ani gu du dagba agu abamangisunge ke ahe nawisigo Ziazia Kekeapai na aboro.
Oni Duna Ngbarago Kindi Rogo Sunge Ke Ahe
19. Tipagine wene nduapai adu tini ho tipa duna ngbarago rogo manga sunge ke ahe ti regbo ga Yesu sunge tungusapai na ngbutuko fuo gure?
19 Wene nduapai adu kinaho tipa gbia ngbarago rogo manga sunge ke ahe ti rago ga Yesu sunge tungusapai na ngbutuko fuo gure. Ti gu regbo re, dungu aboro akaragapai wenengai sa wene pangbanga. Gayo ngbarago akii berewe gbe ti regbo Pendekote rogo gu garã nangia 33 ti Gaani Regbo, mbiko aboro wa 3,000 ti gu regbo re amangi gu rugute Petero afuhe fuyo, ki gbia ga Yekova ziazia toro, na ki da ni papara ga Mbori Yisaraere nga ga toro. Nirengo, bange yo aakio kina kumbatayo na gayo ngbarago kini moipai wa ‘Gbia anarimiso agu aboro nanabata ku dagba yo yo na uru dunduko.’—Amokedi 2:37-41, 46, 47; AGaratio 6:16; 1 Petero 2:9.
20. Ginipai nafu bakere ngbarago fu rani rogo gaani sunge ke ahe?
20 Ti gu regbo re, ga Yesaya sangbanebi aamanga, nga gu nayaa: “Mo [Yekova] azugasi gi rikaaboro re, mo akiisi gayo ngbarago; i du na ngbarago bara bangiro wa gu ngbarago nidu regbo ke ahe, wa aboro nangi ho i nakparaka gbugbu ahe ni.” (Yesaya 9:3) Wa vura duhe nga ani bi bange mbedimbedi ‘rikaaboro’ si narengbe, gaani ngbarago kindi nibakerehe wa ani abi bange abamangisunge ke ahe si nikii kina kumbatayo na agarã dunduko.—Atambuahe 4:7; Zekaraya 8:23; Yoane 10:16.
21. Gini apai ani ka wisigoho rogo gu paparaha naye fuo gere?
21 Nirengo, ani na wene nduapai berani ka kakuti gaani ngbarago rogo manga sunge ke ahe. Gu gaani pangbanga nafu maabangirise fu aboro, pa gbata ani agu aboro rẽ na gia wene pangbanga, na gaani zezeredi sino naye na ngbarago fu rani ni abamangisunge ke ahe. Si ki vura du wo, agi apai re nasa gupai nga gu kura aboro sogo rani nyanyakii. Wogu si amangi gu mokedi nangia Yoane. I amoi ko ku bambukiso yo rogo gu kisanga nangia Patemo “mbiko gu pai nga ga Mbori na gu dezire pai nga ga Yesu.” (Yugoti 1:9) Wai tie rengbe ani ka kakuti gaani ngbarago ho ani agbia tirani ni na rungosi gbiati sogote? Ginipai nika sa rani ani hi gu kere sino du ti dungu agu aboro ani atungusapai fuyo awere? Gu paparaha naye fuo gere nika undo rani ani bi agu akaragapai nga ga Ziazia Kekeapai sa agi asanahe re.
[Gu rukutu kekepai du bandu kpewaraga yo]
a Ti tonatonaha, awirina ambakadipai tipa kaa wisigopai na aboro rogo agu arago agu aboro nadu na nyemu rengo re anirengbe ka dungura tiyo kurogo. Ono tie, fuoho aturanga te i ki tona kaa wisigopai na aboro nibasasa na na aborokporo a.—Oni bi gu buku nga ADezire Yekova—Atakipande ga Mbori Kindo, kpewaraga 574, aDezire Yekova akusihe (rogo pa-Ngirisi).
Gaoni Karagapai Nga Gine?
• Gini sunge du wa sunge ke ahe ani amangaha?
• Gini ngbatunga pangbanga ani atungusaha?
• Tipagine du ani tini na diabese rogo gaani sunge gbata aboro?
• Waigu ani akakuti gaani zezeredi sino rogo sunge ke ahe?
• Tipagine du ani tini kindi na ngbarago rogo gaani sunge ke ahe?
[Gu kpiaahe du ti kpewaraga 10 na 11]
Tungusapai rogo bambata kama agarã na rogo 20 kama agarã
Wa kina Pauro, agu abamangisunge ke ahe du ti gi gaani regbo re na’asada tiyo ka gbia aboro rogo arago dunduko
Oni tungusi wene pangbanga na ngbarago kpakpu roni yo