Oni Kakuti Manga Sunge Ke Ahe Kindi!
“Agu yo nami tunga ni aume i [a]ké he na wawa ngbarago!”—ATAMBUAHE 126:5.
1. Tipagine si aida tini areme ani “kpári . . . fu gu Gbia du zuzuhe ni gako, ko kedi abamangisunge”?
FUO ga Yesu Kristo biata tua nga ga tungusapai Gariraya yo, ko agumba gupai fu gako abawiriki nga: “Zuzuhe ni bakere he ni rengo, ono abamangisunge ni kina umba yo.” (Matayo 9:37) Kina gu bangisapai re nadu Yuda yo. (Ruka 10:2) Wa duhe nga wo si adu bakuru kusayo agarã nasusi awere fuoho wa 2,000, waigu duhe ti gi gaani regbo re? Rogo gu garã nga ga sunge susi, aDezire nga ga Yekova yo susi 6,000,000 akakuti manga gu sunge du wa sunge ke ahe dagba agu aboro du rogo zegino dunduko du bange yo nga 6,000,000,000, dungu aboro dagba yo “arungo, ki nigbandaka, wa kina agu [avusende] adu nga na babandara ti ra ya.” Sidu ga Yesu zungodihe tipa ani “kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe” na nyanyakipaha awere a wa si adu bakuru kusayo.—Matayo 9:36, 38.
2. Gine nasa rani aboro gbeberã yo kuti rani rogo zegino dunduko?
2 Yekova Mbori, nga Baira ati, ima karagapai sa gu sanahe du tipa keda kura abamangisunge ku ati yo. Na nga gu ngbarago du ani nani ka du ti manga gi sunge ke ahe Mbori arugapa mangaha re! Wa vura du bange rani gbua tooni ringbisihe kuti bange rikaaboro rogo zegino, gaani ngara rogo sunge tungusa gu wene pangbanga nga ga Kindo na sunge sa aboro ni abawiriki nagbeberã aboro rogo zegino kuti rani. Rogo kura aringara, i nafura tipa rani dedede rogo aũgbandaka pangbanga. Ho woro gu nzoro du ti ngbadimo kporo apaa ni rogo gu mbaro nga ga terevizioni, si rengbe ka sa aboro i gumba gupai nga aDezire Yekova gu du ngbadimo yo. Ii, aboro ima ino pai tipa gaani sunge nga ga aKristano nga gu du wa sunge ke ahe rogo gi 21 kama agarã re.
3. (a) Waigu ani aino gupai nga aboro aima gbeberã yo fuo sunge tungusa wene pangbanga nga ga Kindo rogo bambata kama agarã? (b) Tipagine rengbe ani tini ka ya amaraika naundo rani rogo gaani sunge tungusapai?
3 Zegino aima ino pai a tipa sunge tungusa wene pangbanga nga ga Kindo nadu rogo bambata kama agarã na pa rungosi abatungusi wene pangbanga. Si du gu mokedi nangia Pauro ake gupai tini nga: “[Si nawira] Mbori amoi rani nga amokedi ku mburu sa yo, wa agu aboro i aringbisi yo sa kpio. Bambiko i sa rani ni aũ ngana he fu zegino, fu amaraika na fu aboro.” (1 AKorindo 4:9) Teketeke a, pa ka ani kuti gaani sunge ni abatungusi wene pangbanga nga ga Kindo rungosi ki vura du, nasa aboro i gbeberã yo fuo rani rogo zegino, na gupai re ni nyanyakipa pai bangiri amaraika. Yugoti 14:6 nayaa: “Mi [nga Yoane] ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro.” Ii, amaraika nasongoda rani rogo gaani sunge, nga gaani sunge ke ahe!—AEbere 1:13, 14.
‘I Asoga Roni Asoga’
4, 5. (a) Gini zahe Yesu afuhe fu gako abawiriki? (b) Tipagine aboro ‘asoga’ gu ga Mbori amoyambu tini du areme?
4 Ho Yesu akedi gako amokedi ni ni abamangisunge ke ahe, i airisi gu gako arugute nga, ‘oni dú na tatamana wa kina awo, ono ki zere wa kina ambipo.’ Yesu agbia gupai kuti ni nga: “Ono oni bánda tironi ti aboro, bambiko i afu roni ku be abororondo, i atáka roni abambutiria yo; ii, i andú na oni ku barangba agbia na abakindo mbiko re, si yugu pai fu yo na aGendiria a. . . . I asóga roni [asóga] dunduko tipa rimore. Ono gu ni ka hi pai dati yangara rago kindi, i abátasa gu ni abatasa re.”—Matayo 10:16-22.
5 Aboro ‘nasoga rani’ areme mbiko “zegino dunduko du ni zogozogo ho be gbegberẽ ko” nga Satana Bakitingbanga, nga bakere vura Mbori na Gako aboro. (1 Yoane 5:19) Avura rani nabi gaani kumuko rogo toroyo, ono ka i aidanga ka gumba gupai nga si naye be Yekova ya. Asogo rani nabi rani na mongo tingba rani wa ani amanga gaani sunge ke ahe na ngbarago. Ngbayo nazera be gu kpamiatise du dagba rani! Nirengo, i rengbe arengba ka ida kuti gipai re kokorokokoro ho i andu ni kurogo kura ringara na ki bi gupai yo nga aDezire Yekova kina yo kini mangi kina gu bangisa sunge i naabi yo i nimangihe ringara kpuyo yo. Rengo ngaha, ani ima ino gupai nga ti wene regboho, guko nasongoda rani na nga mburu gaani kpamiatise, nga Yekova, ko nika yugo tiko fu avura rani.—Yezekere 38:10-12, 23.
6. Gini kido du ani nani wa ani amanga gaani sunge ke ahe, ono gini sanahe nakura?
6 Baira ati ima “asia pa ahe . . . dunduko ku ngbangbaturũ yo na ku sende no” fu Wiriko, nga Yesu Kristo. (Matayo 28:18) Ngba gi gene re, Yekova namangasunge na Yesu ko nirugupa sunge ke ahe rogo gu gene nga ga amaraika na rogo ‘ruru kangara moyambu’ herẽ auru kpotosende. (Matayo 24:45-47; Yugoti 14:6, 7) Ono waigu rengbe ani ka diabe gu sogote nga ga avura rani na kini banda gaani ngbarago kindi wa ani akakuti gaani sunge ke ahe?
7. Gini berã si aida ani asadi tirani ka kakuti ni ho aboro asoga rani ni watadu ho i arungosi rani ni?
7 Ho ani agbia tirani ni na sogote watadu rungosi, si naida ani gbata undo be Mbori tipa ka duna berã kindi wa kina ga Pauro. Ko akepai ki ya: “I nasenga rani, ani ki fu maku; i narungosi rani, ani ki hi he. I nagberẽsa rimorani, ani ki zungadi yo.” (1 AKorindo 4:12, 13) Ngbatunga gi berã re, kodihe na gaani tungusapai gbaiga ni birĩ nasa asogo rani ti kura aregbo i aria berã yo.
8. Agu afugo Yesu duni kekehe rogo Matayo 10:28 nasa roni oni duna gini kido?
8 Zavura serekpo rani ka imo rani azeresanga kpoto rani yo ti manga gaani sunge ke ahe te. Ani natungusa gu pangbanga nga ga Kindo zanga gunde na kini mangihe wo gbaiga a wa rengbe ani ka mangaha. Kurii gure, ani nagbia ngara be agu afugo Yesu nga: “Ka oni gúnde nga be agu yo naimo kpotoboro ya, ka i rengbe nga ka imo mbisimo te. Ono oni gúnde ti gu ko rengbe ka gbarasa mbisimo na kpotoboro a ku Geyena yo.” (Matayo 10:28) Ani ima ino gupai nga, gu Barani nga ga ngbangbaturũ ko nga Bafu unga. Ko nafu mosoro fu agu aboro nakakuti ruru mangapai fuko na ki kakuti sunge ke ahe.
Gu Pangbanga Nabatasa Unga
9. Waigu kura aboro akaragapai sa fugo Yezekere, na waigu duhe kinawo areme a?
9 Ho gu nebi nangia Yezekere aatungusa ga Yekova pangbanga ni zanga gunde fu gu ‘rikaaboro nangia abasamungu,’ nangia araki ringara Yuda yo na ringara Yisaraere yo, gu kura aboro aduna ngbarago ka gia gupai ko aaida ka gumbaha. (Yezekere 2:3) Yekova ayaa: “Mo ngére, mo bangiriyo wa gu boro nabi abia nyemuse na bawene fugoni ki nitaki ũworo he wenengaĩ.” (Yezekere 33:32) Wa fugo Yezekere avura ngba tiyo, i airisanga ha te. Ginipai namanga areme? Ho yangara mbedimbedi aKristano na abakureayo atungusa ga Yekova pangbanga ni zanga gunde, gu kura aboro na nyemu giapa agu amaku nga gu ga Mbori Kindo nika ye nani, ono i akaraganga pai sani wenengai ki sa tiyo ni abawiriki, na ki kodi tiyo kuti rani rogo sunge ke ahe te.
10, 11. Ginipai awirina amangi tipa ka tungusa gu pangbanga nabatasa unga natona ti tonatona 20 kama agarã ki da ku beberehe, na sangbanaha angia gine?
10 Ngba kura gene, dungu aboro akaragapai wenengai sa gaani sunge ke ahe na ki kodi tiyo na ani rogo tungusa ga Mbori pangbanga. Ni kpiapai, ti regbo gu kikindigi adunguratise awirina amangihe tingbafuo kuraha natona rogo 1922 da kurogo 1928, i atakipande sapangbanga kuti ga Satana gbegbere zegino ni agu afugo nadu ziazia. I agbandaka agi apangbanga nga ga sapangbanga re rogo dungu agu aba i agbandaka apangbanga rogo na radio. Fuo gure, ga Mbori aboro ki kparaka keke gi pangbanga re ni badunguhe gbe.
11 Ho agu agarã nga ga 1930 ambeda ni ka digo, awirina atona kura birĩ tungusapai, nangia tua nga ga tungusapai bangiri agene. Ti tonatonaha, ga Yekova aboro anata bangiri agene na asiasi awaraga ti ngbaduyo na gu kekepai ti ni natingidapa agu agumbapai gbaiga i ka mangaha. Kusa, i anata na agu awaraga kekepai anidu ti ni nga, “Pambori nga gbina na gene tipa manga marã” na gu nga “Oni Mangisunge fu Mbori na fu Kristo Nga Bakindo.” Ho i anandu ni bangiri agene, i anagbeberã agu aboro nanaandu bangiri agene. Wirina sa nga guko nanamanga gi sunge re dedede bangiri agene London yo du England yo, ayaa: ‘Gipai re angarasi aDezire Yekova na ki sa aboro i gbeberã yo wenengai fuo gaani sunge.’
12. Ku pati ga Mbori sapangbanga, gini kurapai ani naatakapandehe, na ada duni kpamiakpamiayo awere rogo tungusa wene pangbanga?
12 Wa ani atakapande ga Mbori sapangbanga, ani naatakapande agu amaku a gako Kindo nika ye nani. Gu gaani sunge ani amangaha rogo zegino dunduko zanga gunde naundo rani ani gbata agu aboro rẽ na gia wene pangbanga. (Matayo 10:11) Badungu yangara mbedimbedi aKristano aima karagapai wenengai sa gu nyanyaki ngarasa awirina nadu rogo agu agarã nangia ga 1920 na ga 1930, nga gu nadu tipa manga sunge ke ahe. Fuo gure, ti regbo bakere dunguratise rogo 1935, wene pangbanga akuru tipa “bakere rimbasa aboro” nga gu “kura avusende” i ka fu maku fuyo kumbatayo rogo paradiso nga ga kpotosende. (Yugoti 7:9; Yoane 10:16, NW ) I ima irisa fugo ga Mbori sapangbanga na ki kodi tiyo kuti gu mbedimbediyo rogo tungusa gu wene pangbanga nabatasa unga.
13, 14. (a) Gini wasa rengbe ani ka gbiaha be Atambuahe 126:5, 6? (b) Ginipai ka mangi ka ani aandu kumbatayo kindi na sunge mi tunga ahe na kini tudihe?
13 Agu afugo du rogo Atambuahe 126:5, 6 nangarasa ga Mbori abamangisunge ke ahe areme, gbe nga aguyo i arungosi yo: “Agu yo nami tunga ni aume i ké he na wawa ngbarago! Ka ni vura ndu ngba gani gene na aume, ni tindi tunga tipa rũhe, ni ayéga ku kporo no na wawa ngbarago, ki nitindi gani vodivodi ũati.” Afugo bake Atambuahe tipa mi tunga na ke ahe nayugopa wai Yekova angerefuo gu gako yangara aboro nakuru Babera yo ka ga ku ringara kpuyo yo na wai ko afu maku fuyo. I aduna bakere ngbarago be pa kusa yo be zio Babera yo, ono i avura kaa kpara wa i aami tunga auru gu sende nanye ni gbarasigbarasihe tipa agu agarã 70 i adihe kurogo kungbo ringara. Ono tie, aguyo nasusi kumbatayo na gayo sunge mi tunga ahe na meka arago agbia ngbarago be zuzu gayo sunge.
14 Ani rengbe ka kpara ni aume ho du ani ni rogo asada watadu ho i arungosi rani ni watadu akuarani nga aidipase mbikopa manga ani rurupai. (1 Petero 3:14) Pa manga gaani sunge ke ahe rengbe ka du ti tonatonaha ni kpakarakpakaraha fu rani mbiko si nawira zuzu gaani sunge tungusapai tini te. Ono ka ani aandu kumbatayo kindi na sunge mi tunga ahe na kini tudihe, Mbori asa gu tunga re si sono, basonaha ki susi gu du ani na maabangirise tipaha. (1 AKorindo 3:6) Sangbana gipai re niyuguyuguhe ziazia be gupai namanga ni sangbana gaani sunge kparaka Ziazia Kekeapai fu aboro na kparaka agu abuku nasakarogoyo.
15. Oni funga kpiapai sa nayugopa wai agu abuku nga ga aKristano afu undo rogo sunge ke ahe.
15 Ani bingo kpiapai sa tipa gu kumba du rimoko nga Jim. Fuo kpio nako, ko abi gu buku dagba gari ahe nga Unga—Wai Si Akuru ku Herẽ? I Akusihe Akusa Watadu Si Akuru Nisaha? a Ko agedihe na nyemuhe. Rogo gayo sakapai na gu Dezire nagbia ko bangiri gene, Jim aidi gupai nga gu wirina re ndu ka bi ko kpuko yo, sidu gipai re ki ndu na ko sa wisigo Ziazia Kekeapai. Jim asono rogo toroyo niipo, ki kpara gako raka fu Yekova, na ki zi bapatiza. Ko afura fu gako aborokporo tipa gupai ko awirikihe. Ni sangbanaha, dawiriko na unvurako ada ni aDezire Yekova, kusa, Jim aduna ngbarago be gu mamu nga ga mangasunge ti aregbo dunduko rogo gu Beteere nga ga London.
I ki Vura Nirungosi Yo, I Kindi Na Ngbarago
16. (a) Tipagine du ani tini na diabese rogo gaani sunge ke ahe? (b) Gini zahe Yesu afuhe tipa sangbana wene pangbanga kurii aborokporo, ono gini gene ani afura na aboro rogo?
16 Tipagine du ani tini na diabese wa gure rogo gaani sunge ke ahe? Ani na diabese mbiko mbedimbedi aKristano na abakureayo airisi ga Yesu arugute nga gu nayaa: “Gu pai gumba mi fu roni bitimo, oni gúmba ha ku imarago yo. Gu pai oni agia tue yo, oni túngusi he ri bambu yo.” (Matayo 10:27) Wa vura duhe wo, ani rengbe ka maabangirani tipa gbia rungosi, mbiko Yesu azahe ki ya: “Boro afú wirinani fu kpio, ba gude ki fu wirini [sa kpio]; agude nikazinga kuti avunguyo, ki fu yo fu kpio.” Yesu agumba gupai a berewe nga: “Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso!” (Matayo 10:21, 34) Anga Yesu ataino aino kini sogima gupai nga ka kusa kparaka dagba aborokporo te. Ono wene pangbanga nasa gupai nga kparaka du dagba aborokporo ti kura aregbo. Kinawo duhe areme tipa ga Mbori amoyambu. Ho ani andu ni fuo aboro ku kpuyo yo, anga ani naida ka sa aborokporo i duna kparaka dagba yo te. Ani na nyemu gupai nga, aboro dunduko di wene pangbanga kugume. Sidu, ani na’asada tirani ka fura fu aborokporo dunduko rogo wene gene nga ga nunga, nga gu nasa gaani pangbanga si ngba ti ‘aguyo dunduko duna ruru berã sa nyenye unga.’—Amokedi 13:48, NW.
17. Waigu du agu aboro nasongoda ga Mbori zogarago kia ti kura aboro, na kpiapai sa tipa gipai re nga gine?
17 Gu pangbanga nga ga Kindo nasa gupai nga agu aboro nasongoda ga Mbori zogarago du kia. Ni kpiapai, ani berẽnga pa wai akuarani adu kia ti kura aboro ti regbo gu kere zogarago nadu Germani yo, mbiko i afu ‘agu ahe nga ga Kaisara fu Kaisara, na agu ahe nga ga Mbori fu Mbori.’ (Ruka 20:25) Ni manga yo pai kia ti agu abarumbatayo nga ga pambori yo na ti agu aboro du kina rimo aKristano gbua kuriyo, nga aguyo du rogo agu akanisa nga ga Ngbiiakristano, ga Yekova amoyambu aru tigayo nyanyakii, ki zanga kuo agu andiko nga ga Ziazia Kekeapai. (Yesaya 2:4; Matayo 4:10; Yoane 17:16) Gu bakere nayugupai nga Christine King, nga gu dee nake gu buku nga The Nazi State and the New Religions, agumba gupai nga: “Kina aDezire Yekova sa gu zogarago nangia ga Nazi [Germani yo] aadianga beyo ya, mbiko wa i avura imo badungu yo, gayo sunge aandu kindi kumbatayo, na rogo Merekoko rogo 1945, ga aDezire sunge aandu kindi kumbatayo, baraho gu zogarago nga ga Nazi adunga ni tigaha ya.”
18. Gini sino du ti ga Yekova aboro, wa vura aboro nirungosi yo vurũ?
18 Sino ga Yekova aboro ho i agbia tiyo ni na rungosi ni gupai nirengo daada tipa berã paha. Wa vura duhe nga ngba kikiipa aboro nazera mbiko gaani idapase, si nairiwo tiyo ho ani akpinga pai ni kuti yo ya. Ni kpiapai, agu aDezire nabati ti regbo gu kere imo aboro nadu ti regbo ga aboro Nazi zogarago Germani yo nidu dedede na ngbarago ho i aberãpa gupai ni namangi yo ti gu regbo re. I ini gupai nga Yekova ‘nafu gu ome fuyo susi.’ (2 AKorindo 4:7) Gu mbedimbedi aKristano du dagba rani nakido nga, ‘rimo yo nikekehe ngbangbaturũ yo.’ (Ruka 10:20) Gayo hipai nakusa gu maabangirise andunga na yo sa gberarago ya, na gu ruru abamangisunge ke ahe duna gu maabangirise tipa raka auru kpotosende nakido a wa kina gure.—ARomo 5:4, 5.
Oni Kakuti Sunge Ke Ahe Kindi
19. Gini wene abirĩ aKristano naamanga sunge tungusapai nani?
19 Ani ainonga bagizo gu regbo Yekova nika mbu rani ani mangi gu sunge kindi du wa sunge ke ahe te. Vuru gi regbo re tie, si naida ani moi gupai ku berã rani yo nga, abamangisunge ke ahe nidu dedede na gayo abirĩ mangasunge tini. Teketeke a, ani rengbe ka duna gu kido nga, tungusa ani pai na gu birĩ i aima asadaha mbata na ki bihe nga si ngba gbe nika sa gupai nga ani mangisunge na fuoho tini. Pauro agumba gupai fu akurako aKristano nga: ‘Mi nazungodi roni, oni wiriki re.’ (1 AKorindo 4:16) Ho Pauro adungura agu abaakumba ni nadu Efesa yo ku Mireto yo tipa ka sakapai na yo, ko atingidi yo na gupai nga ko akanga ti yugopai fuyo ‘gbaiga na kini tanga ti akporo te.’ (Amokedi 20:20, 21) Gu bakurea Pauro nangia Timoteo aima wirika agu abirĩ sunge nangia ga gu mokedi re na ki ima rengba ka yugoho a fu aKorindo. (1 AKorindo 4:17) Mbori afu maku kurii ga Pauro birĩ yugopai. Ka ani kakuti tungusa wene pangbanga gbaiga na kini tanga ti akporo, kini karaga tirani ka biko aboro, ki kakuti wisigo Ziazia Kekeapai na aboro kpuyo, na kini asadi tirani ka gbia aboro rogo agu arago dunduko du yo rogo, Mbori afu maku afu kurii gaani sunge a wa ko afuhe kurii ga Pauro.—Amokedi 17:17.
20. Waigu Yesu ayugu gupai nga regbo bakere sunge ke ahe nga ga toro aima da ti rago ko, na waigu si nidu kinawo rogo agi agarã susi re?
20 Fuo fura ko na de boro Somorona mbembedii na Sukara rogo gu garã nangia 30 ti Gaani Regbo, Yesu afura tipa gu sunge ke ahe nga ga toro. Ko agumba gupai fu gako abawiriki nga: “Oni tumba nga bangironi, ka ngera nga ku ati yo, si ima vura avura wa ka i ke he ake. Gu ni nake he ni zi mosoro azia, ki nikafu rindi ngua sa nyenye unga; gu ni ka mi he na gu ni ka ke he rago amongo ngba ti yo.” (Yoane 4:34-36) Isoke Yesu avura gumba agi apai re mbiko ko aima bi sangbana gu fugo nadu dagba ko na de boro Somorona, mbiko dungu aboro aduna idapase kuti ko mbiko gupai gu dee re agumbaha fuyo. (Yoane 4:39) Rogo agu agarã susi bambeda kusayo, dungu aringara aima fu gene fu aDezire Yekova i mangi gayo sunge watadu i aima idaha fuyo i ke pa gayo sunge kuti ndiko, gere kini zaki vovo aati fuyo tipa manga sunge ke ahe rogo. Sangbanaha nga, bakere sunge ke ahe nga ga toro namanga awere kina kumbatayo. Nirengo, rogo zegino dunduko, ani nagbia bakere maku wa ani afu tirani wenengai sa gu sunge ke ahe nga ga toro.
21. Tipagine du ani tini na ndupai berani ka kakuti gaani sunge ke ahe ni agu abamangisunge ke ahe duna ngbarago?
21 Ho aũ ati azama ni ki rengbe tipa i kehe, si naaida abamangisunge tona kehe niipo. I du wa ka i mangisunge zanga keesa. Areme, si naida ani mangisunge nyanyakii na niipo, mbiko ani naraka ‘rogo yangara arame.’ (Daniere 12:4) Ii, ani nagbia tirani na a’asada, ono ani nadungura airisi Yekova awere susi gu nadu mbata. Si du du gi regbo re ti ni nga regbo ngbarago. (Yesaya 9:3) Wa du ani tie nga agu abamangisunge duna ngbarago, ani kakuti gaani sunge ke ahe kindi!
[Gu rukutu kekepai du bandu kpewaraga yo]
a Nga gu buku aDezire Yekova akusihe (rogo pa-Ngirisi) na ki kparakaha.
Gaoni Karagapai Nga Gine?
•Waigu Baira ati nakaragapai sa gu zungodihe du tipa keda kura abamangisunge?
•Wa aboro avura kaa ‘soga rani,’ gini sino ka ani kuti ni?
•Tipagine du ani tini na ngbarago zavura ho i arungosi rani ni vurũ?
•Tipagine si aida tini ani kakuti sunge ke ahe na kini mangihe niipo?
[Gu kpiaahe du ti kpewaraga 15 na 17]
Tua nga ga tungusapai bangiri agene agbeberã dungu aboro kuti gu pangbanga nga ga Kindo
Ani nami tunga ahe na kini tudihe, ono Mbori nasaha si sono
Amaraika nasongoda agu aboro namanga sunge ke ahe nga ga toro