Oni Fu Tironi Ka Manga Gu Bakere Sunge Keahe Nga Ga Toro

‘Oni nimángi ga Gbia sunge zaza dedede.’​—1 KOR. 15:58.

1. Ginipai Yesu ayambu gako abawiriki tipaha?

HO YESU aasusa ni Somorona yo nimbedi kuti digido gu garã nga 30 F.B.K., ko aongodi pati gu di nadu mbembedii na gu gbata nangia Sukara. Ko ape gupai fu gako abawiriki nga: “Oni tumba nga bangironi, ka ngera nga ku ati yo, si ima vura avura wa ka i ke he ake.” (Yo. 4:35) Anga ndikidi keahe nga ga ati du Yesu agumbapaha te, ono dungura agu aboro duna wene ngbaduyó yo i du nigako abawiriki. Yesu aidi gako abawiriki mangipai. Sunge adu nibakerehe, ono regbo adu gbua tooni tipa ka mangaha vuruhe yo!

2, 3. (a) Ginipai nayugo gupai nga, ani naraka ti gu regbo nga ga keahe? (b) Ginipai ani ka wisigoho rogo gi kekeapai re?

² Agu afugo Yesu du tipa keahe re, si na kura rogoyo berewe tipa gi gaani regbo re. Ani naraka ti gu regbo gu ati nga aboro ‘naima vura avura wa ka i ke he ake.’ Rogo agarã dũ, amirioni aboro nagbia yambahe ka wirika gu rengo rengbe ka fu unga fuyó, na dungu akutu vovo abawiriki nazio bapatiza. Ani na gu momu berani nga ga kodabee sa gu bakere sunge nga ga keahe re ti aregbo dũ, nga gu sunge du Bairaha nga Yekova Mbori. Ya mo oni ‘namanga ga Gbia sunge zaza’ ti gi regbo nga ga keahe re?​—1 Kor. 15:58.

³ Ti regbo ga Yesu sunge auru kpotosende ane nga gu nadi agarã biata na beberehe, ko ayugupa gu sunge fu gako abawiriki si aida i mangihe wangia yó abakeahe. Rogo gi kekeapai re, ani nika wisigo nyanyakipa apai biata dagba agu apai Yesu ayuguhe fu gako abawiriki. Si nibasasa nanyakasapa agu asino si aida ani du nani wa ani amanga aʹasadatise ka manga gu sunge nga ga sa aboro ni abawiriki re. Ani bingo agi asino re nibasasa.

Umbasitise na Nyanyakipaha

4. Wai Yesu ayugupa nyakapa umbasitise?

⁴ Oni berẽnga gupai nga: Abawiriki tikango dagbayó awere nga da nga gu bakere ní kisusi. I kindi na kapa watadu sogote kpotoyo yo. Yesu yambu tooni gude ki rugusi ru dagbayó. Ko ya fuyó: “Gu ni ka umbasi tini wa gi toni gude re, kina ni nikasusa rogo gu ngbi nga ga ngbangbaturũ.” (Oni gedi Matayo 18:​1-4.) Kuba gupai nga i duna gu berãpai nga ga gi zegino re, nga ka bi boro kina kuti gu ome du ní nani, gani aũkumuko, na agu ahe du beni, si aidi i rugutiyo na gupai nga padu yó nikikiipa aboro naruriipa gupai nga i ‘umbasipa tiyo’ fu akurayó. Yekova arengbe ka fu maku fuyó na ki mangisunge naayó kinagu ka i aduna ndikidi umbasitise.

5, 6. Tipagine si aida ti ni ani duna umbasitise tipa ka manga sunge keahe wenengai gbe? Oni funga kpiapai tipa gipai re.

⁵ Areme, badungu aboro nafutiyo tipa ka gbia ome, aũkumuko, gbiakuti kikiipa bangiriba. Nisangbana gipai re, i na regbo beyo gbua tooni watadu regbo ho beyo tipa agu apai nga ga toro te. (Mt. 13:22) Ono tie, ga Yekova aboro na ngbarago ka ‘umbasipa tiyo’ bangiri aboro tipa ka gbia maku, na Baira ati idi naayó a.​—Mt. 6:24; 2 Kor. 11:7; Frp. 3:8.

⁶ Ani makianga ga Francisco kpiapai, nga guko namangasunge nibakumba Amerika yo. Ho ko aduni niparanga, ko ambu yunivasiti tipa ka mangasunge nibazakigene. Sangbako nga: “Ho mi apazua dee ni tipa ka dia ri, mi arengbe arengba ka gbia gu sunge kadu na bakere mosoro. Kuba gure, ani adiberã tipa ka sa gaani raka si du taata tipa ka mangasunge Kindo ti aregbo dũ. Kusa, ani avunguagude, na akpakara apai ki tona ka kio kina kumbatayo. Ono Yekova aundo rani tipa ani nye kindi kuti gaani diaberã.” Francisco aya berewe wee: “Mi ima mangasunge nibakumba awere tipa agarã susi 30, na dungu kura kparakpara asunge a kupati ni. Ani abiranga tirani wa gu tooni tipa raka taata raka te.”

7. Wai oni amangi aʹasaditise tipa ka mangasunge na gu rugute du rogo ARomo 12:16?

⁷ Ka oni mbu gu ‘enda’ nga ga gi zegino re na kidu na ‘umbasitise,’ oni rengbe arengba ka gbia dungu amaku na amomu rogo gu sunge nga ga keahe.​—Rom. 12:16; Mt. 4:19, 20; Ruka 18:28-30.

Mangapai Zanga Nyomoro Naye na Mosoro

8, 9. (a) Oni gumbanga gupai ga Yesu sanza ayugoho nga gu du tipa ataranda. (b) Ada gbe rengbe gi sanza re ka ngarasa yó?

⁸ Gu kura sino si aidaha tipa ani du zaaza tingba gu sunge nga ga keahe, si nga ngara. Yesu ayugu gipai re na gu sanza du tipa ataranda.a Gi sanza re nafura tipa gu kumba naandu kurogo kura ringara, ko ki kparaka gako ahe fu gako aborosunge. Ko afu ataranda bisue fu gu bambata gako borosunge, ko ki fu agura ue fu gu kurani, ko ki fu gu ru sa fu gu biata ní. Fuo bairayo ndu gako nunguro, gu bambata borosunge na gu ue ní amangipai zanga nyomoro ki “gbata kura ataranda.” Ono gu biata borosunge angia “iranyomoro” tigako. Ko aigi gako taranda ku sendeyo. Ho gu kumba re ayego ni, ko afu mosoro fu gu gako aborosunge nadu ue re ni ‘asiako pa bakere apai fuyó.’ Ko adi gu taranda nadu be gu biata borosunge re na ki do ko kusayo kpuko.​—Mt. 25:14-30.

⁹ Zanga kapa, si naida oni wiriki agu aborosunge naadunga na nyomoro, na kini mangi gu sunge nga ga sa aboro ni abawiriki a wa rengbe ome roni nani. Ono na ka si du nga agu apai du tipa roni nasaha nimbumbuhe tipa oni mangi gupai oni aida ka mangaha? Pagbia mosoro rengbe kadu nimbumbuhe, si kini idi oni mangisunge ti aregbo dũ tipa ka ye na riahe fu aborokporo. Watadu oni ima gbinza kpotoroni wenengai te. Kangia wo duhe tie, gu sanza du tipa taranda re na wene ngarasaro rogo yo furoni.

10. Wai gu bairasunge i nagumba pako rogo gu sanza du tipa ataranda aduna rugatinapai, na tipagine duhe ti ni nipa ngarasaro?

¹⁰ Oni tingidi gupai nga, gu bairasunge re aima inopa ome gako aborosunge nibasasa wenengai. Ani naino gipai re ti gupai nga, ko afuku ataranda “fu yo wa rengbe na omeyo.” (Mt. 25:15) Gupai aima du rii gu bairasunge yo re nga gu bambata ko nika ye na ami susi gu ue ko. Bairasunge aima rugatiko naapa gu asadatise gako aborosunge amangihe, si du ko ayambuyo ti ni nga “wene kangara boro sunge” na ki fu mosoro fuyó kina sa. (Mt. 25:21, 23) Teketeke a, gu Baira ati nga Yekova Mbori ima rugatiko na agu apai nadingiso roni ti manga gako sunge. Bangiriko agonga ti gu asadatise oni amangaha na ngbaduroni yo dunduko tipa ka irisoko te, na ko ahenga fu mosoro furoni te.​—Mk. 14:3-9; oni gedi Ruka 21:​1-4.

11. Oni funga kpiapai tipa wai asadatise zanga nyomoro rogo kpakarapai yo narengbe ka ye na bakere amaku.

¹¹ Gu kpiapai du tipa Kristano nga Selmira naraka Brazil yo nayugo gupai nga manga ga Mbori pai zanga nyomoro arunga riipa kina gupai sa nga apai du tipa boro rogo raka yo dunduko wenengai te. Agarã wa ue-bawe kusayo, airadĩi ano kumbaku Selmira ki he ri na agude biata. Ri anaandu tipa dungu asaa tipa kada ba gari sunge yo, na ri anaata dungu ata rogo gu baasi aboro adu rogoho nibadungu yó gbe. Wa apai avura du tipa ri nikpakarakpakaraha, ri ambakadi regbo gari apai tipa wa ka ri rengbe ka mangasunge ninazakigene. Kusa, kura awiiri ue akoditiyo na ri tipa ka mangasunge ni abazakigene. Ri nayaa: “Tona ti gu regbo re kada ku awere, mi ima wisigo Ziazia Kekeapai na aboro susi 20, na agu aboro re ima da nga gimi aborokporo. Da ku awere, mi nagbia ngbarago mbiko gayó nyemuse na gayó bakure. Si nga gu kikiipahe ka marã angbenga ha ya.” Baira ati aima fu mosoro fu Selmira tipa gari bakere asadatise zanga nyomoro!

12. Wai rengbe ani kadu ngangaraa tingba sunge tungusapai?

¹² Ka si du nga agu apai du tipa roni nasa gupai nga ka oni dinga bakere regbo kutingba sunge tungusapai ya, si naida oni mangi asadatise ka sa gaoni sunge nga ga keahe si duna zuzuhe ti ni. Ka oni mangisunge na agu aberãpai i naafuhe rogo Gu Dunguratise Nga ga Sunge, oni duadu na dungu abirĩ tipa ka tungusapai na ka tona fugo na aboro. (2 Tim. 2:15) Ka gene du a, oni mbakadi gaoni regbo watadu ka mbu agu apai anyakanga paha gbe ya, watadu ka gbisoho kuti kura regbo, tipa kaa kura gene tungusapai yo dedede na dungurati.​—Koro. 4:5.

13. Gini apai rengbe ka undo rani ani du ngangaraa tingba ga Yekova sunge?

¹³ Oni tingidi gupai nga, padu ani ngangaraa nayugopa gaani nyemuse na gaani tambuahe fu Mbori. (Tam. 40:8) Gu biata borosunge i nipe pani rogo ga Yesu sanza agunde agunde be bairako, na ki biko wa boro ngbaduse na gu boro aberãnga wenengai ya. Nisangbana gipai re, ko aoko gako taranda kuba gupai nga ko mangisunge na u tipa ka kiiso ru. Tipa ka mbu ngbatunga gu sino re, si naida ani sonosi gaani pagume dagbarani na Baira ati nga Yekova, na kini bandaha. Si naida oni di regbo tipa ka wisigopai tipa gu bawene asino Yekova nga gako nyemuse, zerangbaduse, na inapai, na kini berẽkuriihe. Ka oni amangaha wo, si nika fõngbaduroniyo oni mangi gako sunge wenengai.​—Ruka 6:45; Frp. 1:9-11.

“Oni Dú Ziazia”

14. Gini nyanyakipa pai duho si aida agu aboro naida kadu ni abakeahe mangihe?

¹⁴ Gu mokedi nangia Petero adi pai rogo Kuru Ndika ki gumbapa gupai Yekova akpinyemuhe be gako amoyambu nga aguyo du auru kpotosende. Ko ayaa: “Wa du gu ko nayambu roni du ni ziazia ko oni dú a wo ni ziazia roni rogo gaoni apai dũ, mbiko Ziazia Kekeapai naya, ‘Oni dú ziazia bambiko mi du ziazia.’ ” (1 Pet. 1:15, 16; Pa Mot. 19:2; Pa Rug. 18:13) Gi sakarogopaiyo re nayugopa wai si aida abakeahe du gigirii rogo mangapai yo na rogo toro yo. Ani rengbe ka manga gi nyanyakipa pai re ka ani mangi agu apai nika sa rani ani duwa agu aboro zundu tiyo. Wai rengbe ani ka manga gipai re? Fugo Mbori nga rengo rengbe ka undo rani.

15. Gu rengo du rogo fugo Mbori yo na ome ka manga ginipai tipa rani?

¹⁵ Fugo Mbori wakina ime tipa giriso boro. Nikpiapai, gu mokedi nangia Pauro akepai tipa gu dungurati nga ga mbedimbedi aKristano ki ya i agirisihe barabangiri Mbori wakina gu dee i nambakadi ri tipa Kristo, na girisihe “ni gu zundahe nga ga ime na pai, . . . [si du] adu ziazia ki zanga sirõ.” (Ef. 5:25-27) Mbata kusayo, Yesu aima fura tipa gu ome du fugo Mbori nani tipa ka giriso boro, nga gu ko atungusihe. Yesu aya fu gako abawiriki wee: “Oni ima du gigiri mbiko gu pai gumba mi fu roni.” (Yo. 15:3) Sidu, gu rengo du rogo Fugo Mbori yo na ome tipa ka giriso boro rogo mangaapai yo na rogo toro yo. Kinagu kaani mbu gu rengo nga ga Mbori si girisi rani rogo gi gene re, si ka ko idi ti ni na gaani iriso.

16. Wai rengbe ani ka bandatirani gigirii rogo toro yo na rogo mangaapai yo?

¹⁶ Tipa kadu ni ga Mbori abakeahe, si naida ani mbu bibiriko mangaapai naabaha na gu mangaapai rengbe ka gberesa parani rogo toro yo. Nirengo, tipa ani rẽ kindi tipa gu sunge nga ga keahe, si naida ani nye gigirii rogo gaani mangaapai yo na rogo toro yo. (Oni gedi 1 Petero 1:​14-​16.) Kina wai ani naabanda kpotorani si du gigirii, kinawo si aida ani bandatirani dedede gigirii mbiko fugo Mbori. Gipai re nakoda geda Ziazia Kekeapai na ndu kupati agu adungurati nga ga aKristano. Si naida gupai a nga ani mangi asadatise kaa manga agu apai Mbori atingida rani nani rogo gaani raka. Pa manga ani he wo nika undo rani ani sovura kuti agu arungbura naye mbiko gaani ingapai na ki mbu gu bibiriko mangaapai nga ga zegino. (Tam. 119:9; Yak. 1:21-25) Nangba wai duhe nipa wasa tipa ka ino gupai nga, mbiko gu undo nga ga fugo Mbori nga rengo, i rengbe arengba ka ‘zunda rani’ zavura ti kere ingapai!​—1 Kor. 6:9-11.

17. Tipa ka nye gigirii, gini arugute duho rogo Ziazia Kekeapai si aida ani irisihe?

¹⁷ Ya mo oni nambu fugo Mbori si girisi gaoni raka? Wai oni naamangapai, nikpiapai ho i nigumbapa gu kerepai ni furoni rengbe ka gbia roni ti kura ngbatunga aũngbarago du rogo gi bibiriko zegino re? (Tam. 101:3) Ya mo oni nakoda tironi na agu akuaroni du sukuru yo na gaoni abadiasunge nga aguyo adunga na oni rogo idapase yo ya? (1 Kor. 15:33) Ya mo oni namanga asadatise tipa ka diabe gaoni arungbura nga gu rengbe ka sa gupai nga oni du nibibiriko roni bangiri Yekova? (Koro. 3:5) Ya mo oni narimiso tironi kurogo agu atagbagapai nga ga gi zegino re na agu abaangira aringara amangaha rogo ambaro yo?​—Yak. 4:4.

18. Wai padu ani gigirii rogo mangaapai yo na rogo toro yo aundo rani gaani sunge nga ga keahe duna bakere sangbanaha ti ni?

¹⁸ Pa gaoni giasangbaa rogo apai yo dũ nika ye na wene sangbanaha. Yesu aringbisi gako mbedimbedi abawiriki kuti abe bakakue ki yaa: ‘Gu be du ti re dunduko azu nga ya, Buba di he adia ku sa yo. Gu be dunduko nazu, ko girisi he agirisa, si zu susi gu nadu mbata.’ (Yo. 15:2) Ka oni mbu tironi gu rengo nga ga Ziazia Kekeapai girisi roni, oni nika zu nibakerehe.

Agu Amaku Du Awere na Kumbatayo

19. Wai ga Yesu abawiriki agbia amaku mbiko gayó asadatise wa i angia abakeahe?

¹⁹ Gu ruru abawiriki nadi agu apai kugume Yesu ayuguhe, ziazia toro aye kuriyo rago Pendekote rogo gu garã nangia 33 F.B.K., i ki mangi dezirepai ki da nani “digida sende yo.” (Amo. 1:8) Aguyo amangisunge rogo riigbu bipasunge, aguyo ni amokedi, aguyo ni agu abaakumba naata ata, na i amangi papara gu sunge nga ga tungusa wene pangbanga “rogo arago tii ngbangbaturũ yo dũ.” (Koro. 1:23) Nangba agu amaku i agbiaha, na gu ngbarago i afuhe fu aboro!

20. (a) Gini amaku oni agbiaha mbikopa manga oni gu sunge keahe nga ga toro? (b) Ginipai oni nadiberã ka mangaha?

²⁰ Nirengo, kaani duna umbasitise, kidu ngangaraa, na ki kakuti agu arugute du rogo Fugo Mbori yo, ani nyeanye kuti manga gu bakere sunge keahe nga ga toro du awere re. Wa vura duhe nga badungu aboro nafuda tiyo na akpakarapai nga ga aũzegino kini gbata ngbarago rogo raka yo, ani nagbia ndikidi ngbarago agbia tigaani rogo raka yo. (Tam. 126:6) Gupai nyakipaha kisusi nga, ‘gaani sunge adu nga gbua rogo Gbia yo te.’ (1 Kor. 15:58) Baira ati, nga Yekova Mbori, nika fu nyenye amosoro afu tipa ‘gu nyemuse ani ayugoho tipa rimoko.’​—Eb. 6:10-12.

[Gu rukutu kekeapai du bandu kpewaraga yo]

[Gu kpiahe du ti kpewaraga 25]

Umbasitise rengbe ka undo rani ani raki taata raka tipa ka maa berãrani tipa agu apai nga ga Kindo

[Gu kpiahe du ti kpewaraga 27]

Oni Natingidaha?

Wa oni kaa aʹasada tironi ka manga gu sunge nga ga keahe wenengai . . .

• tipagine duhe ti ni ninyanyakipa pai kadu na umbasitise?

• wai rengbe oni kadu ngangaraa?

• tipagine duhe ti ni ninyanyakipa pai ka nye gigirii rogo toro yo na rogo mangaapai yo?