Ati Ima Vura Tipa Kehe
1. Gini nyanyakipa sunge namanga?
1 Tifuo Yesu tungusipai fu dee Somorona, ko aya fu gako abawiriki wee: “Oni tumba nga bangironi, ka ngera nga ku ati yo, si ima vura avura wa ka i ke he ake.” (Yoane 4:35, 36) Sunge tungusapai fu agu aboro naaida ka gia pambori aima tona ti gu regbo re, na Yesu aima ngera kumbatayo ki bi bakio wai gu sunge re nikadu rogo zegino dunduko. Rogo gu bangiri ba du Yesu nani ngbangbaturũ yo, ko kindi nasongoda gi sunge tungusapai re wenengai. (Mt. 28:19, 20) Gini apai nayugo gupai nga gi sunge re nasona kina kumbatayo gbe wa si ambeda ka digo?
2. Gini apai namanga nayugo gupai nga gu sunge kehe namanga rogo zegino dunduko nasona kina kumbatayo gbe?
2 Gu Kehe Namanga Rogo Zegino Dũ: Rogo gu garã nga ga sunge nangia 2009, bange abatungusipai asono na gu namba nga 188730 rogo zegino dunduko. Bange agu aringara airangbii aka na sunge tungusapai rogoho asono na 14 rii kama. Gu namba aboro i awisigi Ziazia Kekeapai naayó kporo rogo adiwi dunduko aima susa 7,619,000 nga gu namba naima susa gu vovo bange abatungusipai nadu rogo gu garã nga ga sunge nangia 2008 na ki susi bange agu aboro i awisigi Ziazia Kekeapai naayó rogo gu garã re na 5000. Wa gi sunge re asona kumbatayo gbe rogo dungu arago, zingo agu aboro nandu kurogo gu sukuru nga Girada namanga rogo dungu aba. Agu adagbarago du agu aboro rogoho nape gu fugo du kia nakusa wene sangbana apai rogo dungu aringara. Si ziazia nga Yekova naipisa gi sunge re aipiso ti gi yangara regbo kehe re. (Yes. 60:22) Ya mo oni na wene bipai tipa gaoni “ati”?
3. Ginipai rengbe kura aboro ka berãha tipa gayó adagbarago?
3 Gu Sunge Kehe Namanga Rogo Gaoni Dagbarago: “Aboro akaraganga pai wenengai rogo gi dagbarago te,” gure nga gupai kura aboro naagumbaha. Rengo du ngaha nga, kura adagbarago kinaho akusanga wene sangbana apai ya watadu aboro akaraganga pai rogoho wenengai wa gu nadumbata ya. Gipai re rengbe ka sa kura abatungusipai i bere gupai nga, agu aboro du rogo gu dagbarago re nga aguyo du tipa gia rengo, i ima giaha na ki bere gupai nga gu wiri bete sunge nye koyo gbua nga ka dungura gu bete aboro nye koyo. Ya mo ru gi bipai re aru?
4. Gini wene bipai si aida ani du nani tipa gaani dagbarago, na tipagine?
4 Regbo ke ahe ningia regbo nyanyaki sunge tona kina ti tonatonaha ki da ti digidoho. Oni makianga pa wai Yesu afura tipa ipiipi mangapai rogo agi afugo ko re: “Zuzuhe ni bakere he ni rengo, ono abamangisunge ni kina umba yo. Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.” (Mt. 9:37, 38) Yekova, nga baira gu sunge kehe re, na ko ini gu regbo na ba ko azugasihe ti ni. (Yoane 6:44; 1 Kor. 3:6-8) Gaani sunge nga gine? Ziazia Kekeapai nakaragapai niyaa: “Mo rũ ga tunga wiso, ka mo mbú nga rũ he nyemu ya.” (Batu. 11:4-6) Nirengo, anga gi regbo sunge tungusapai andu ka digo re nga gu regbo si aida ani mbu sunge tungusapai te!
5. Tipagine si aida ani nindu ti ni kindi kumbatayo na tungusapai zaaza, si ki vura du nga aboro akaraganga pai wenengai rogo gaani dagbarago te vurũ?
5 Oni Kehe Ake Kindi: Ka si vura du nga ani ima dogoda kurogo gaani dagbarago tipa gbanga regbo na si kidu wa aboro akaraganga pai wenengai te vurũ, wene ndupai kinaho si aida ani tungusapai ti ni zaaza na niipiipihe. (2 Tim. 4:2) Gu iiriwo gene apai asakatihe ngbaha rogo gi zegino re nasa aboro i sa gayó asino na ki bere gbe tipa gayó raka kumbatayo. Wa aparanga asona, i nadu na nyemu ka gbia zereda berã yó yo na bayo ki ngba angba. Gaani karagapai rengbe arengba a ka sa gu kura aboro i sa berã yó. Nirengo, agu aboro naaidanga na rengo mbata ya, i rengbe arengba ka ida nani awere. Zavura agu aboro a naka aka ka gia wene pangbanga, si naida ani za yó aza.—Yeze. 2:4, 5; 3:19.
6. Ka gaani dagbarago du nikpakarakpakaraha, ginihe rengbe ka undo rani ani banda gaani nyemu sunge tungusapai?
6 Ka gaani dagbarago du nikpakarakpakaraha, ginihe rengbe ka undo rani ani banda gaani nyemu sunge tungusapai? Ani rengbe ka gbia manga dezirepai rogo terefuni watadu tungusapai rogo aba sunge-bagaahe kuti tungusapai rogo akporo. Watadu ani rengbe ka aria gaani gene yugopai tipa kaa mangasunge na vovo tona fugo. Ani rengbe a ka sa gaani ringbisapai kaa tungusapai wiso watadu nyemu ti agu aregbo du aboro adu tii kporo. Isoke, ani rengbe a ka wirika kura fugo tipa ka tungusa wene pangbanga fu dungu aboro. Ani rengbe arengba a ka kiiso gaani sunge nimanga ani sunge tungusapai ni abazakigene ti aregbo dunduko. Watadu ani rengbe ka ndu kurogo gu ba du abatungusi wene pangbanga rogoho gbua tooni. Ka ani du na wene bipai tipa sunge tungusapai, ani mangi bakere asadatise amanga tipa ka manga gi nyanyaki sunge re na omerani dunduko.
7. Si naida ani ndu na gi sunge re dakuti gini regbo?
7 Regbo nidu be abake ahe gbua tooni tipa i ke ahe, i naangenga mbaro watadu ka zera ti sunge kehe te daho i ake ahe ni dunduko. Kina gu bangisa pai re si aidaha tipa sunge tungusapai. Si naida ani ndu na gi sunge re dakuti gini regbo? Tona ti gi gaani regbo re, “ki da ti digida zegino.” (Mt. 24:14; 28:20) Wakina Yesu, ani naida ka nyasa gu sunge fuyó ho furani. (Yoane 4:34; 17:14) Sidu tie, ani ndunga andu kindi kumbatayo kaa tungusapai zaaza, na ngbarago gbiati wene bipai dakuti digido zegino. (Mt. 24:13) Sunge kehe ata nyasanga te!
[Gu sura du ti kpewaraga 2]
Regbo ke ahe ningia regbo nyanyaki sunge tona kina ti tonatonaha ki da ti digidoho