Kristo Nangbembatayo Fu Gako Dungurati

“Oni ngere, mi na oni ti arago dũ, ki da ti digida zegino.”—MATAYO 28:20.

1, 2. (a) Ho Yesu aazinahe ni fu apefuo ko tipa i sa aboro ni abawiriki fuo zingisa yo ko bekpio, gine ko akido yo tipaha? (b) Wai Yesu angbembatayo rogo mangaapai yo fu gu bambata dungurati nangia ga aKristano?

MBATA fu ko dakpa ku ngbangbaturũ yo, Yesu Kristo, nga gaani Barumbatayo i azingisi ko bekpio, ayugu tiko fu gako abawiriki ki ya: “I asia pa ahe fere dunduko ku ngbangbaturũ yo na ku sende no. Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni. Oni ngere, mi na oni ti arago dũ, ki da ti digida zegino.”—Matayo 23:10, NW; 28:18-20.

² Anga kina gu sunge nabatasa unga nga ga sa aboro ni abawiriki Yesu agumba paha fu gako abawiriki sa te, ono ko akido yo a ya ko nika du adu na yo. Gu kuru pangbanga du tipa gu pambori nga ga aKristano ti tonatonaha a wa duhe rogo gu buku nga ga Ziazia kekeapai nga Amokedi, nayugo gupai zanga kapa nga, Kristo amangisunge na gu tandu i afuhe fuko tipa ka ngbembatayo fu gu dungurati i asigiraha ni vovoho. Ko akedi gu “mounda” nga ziazia toro nga gu ko akidohe tipaha tipa si nyakasi apefuo ko na ka ruga yo rogo gayo asunge. (Yoane 16:7; Amokedi 2:4, 33; 13:2-4; 16:6-10) Fuo zingisa yo Yesu bekpio, ko afu sunge fu amaraika i songodi gako abawiriki. (Amokedi 5:19; 8:26; 10:3-8, 22; 12:7-11; 27:23, 24; 1 Petero 3:22) Kurii gure, gaani Barumbatayo ambakadipai tipa pa rugaapai rogo adungurati ni maa ko agu akumba rẽ i mangisunge rogo riigbu bipasunge.—Amokedi 1:20, 24-26; 6:1-6; 8:5, 14-17.

3. Gini asanahe i nika sakaha rogo gi paparaha re?

³ Ono tie, ginipai tipa gi gaani regbo re, nga “digido zegino”? Wai Yesu Kristo angbembatayo fu gu dungurati nga ga aKristano areme? Na wai rengbe ani ka yugo gupai nga ani ima ida pako ni gaani barumbatayo?

Gbia na Ruru Kangara Moyambu Beko

4. (a) Ada du rogo gu riko nga ga ‘ruru kangara moyambu’? (b) Gine Gbia afuhe tipa gako moyambu ngere fuoho?

⁴ Ho Yesu aape gu sangbanebi ni du tipa padu ko ho na ome kindo beko, ko aya: “Da nga gu kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho? Boro maku nga gu moyambu gani gbia ka bi ni ni nimangi wo ho ko ka ye ni. Ya mi fu roni ni rengo, ko aásia pa gako ahe dunduko fu ni.” (Matayo 24:45-47) Gu “gbia” re nga gaani Barumbatayo, nga Yesu Kristo, na ko aima maa ‘ruru kangara moyambu’ nga gu gbuu nga ga mbedimbedi aKristano du auru kpotosende si ngere fuo gu gako apai dunduko nga ga kpotosende.

5, 6. (a) Rogo gu yuguyugupai i afuhe fu gu mokedi nangia Yoane, gine “agu abaduawe ni dahabu du saba” gbiakuti “agu akerekuru du saba” arukubaha? (b) Padu “agu akerekuru du saba” kpabe kumbabe Yesu yo nayugo ginipai?

⁵ Gu buku nga ga Ziazia kekeapai nga Yugoti nayugo gupai nga, ruru kangara moyambu nasungo nibasa kutiibe gu rugapai nga ga Yesu Kristo. Rogo gu yuguyugupai i afuhe fu gu mokedi nangia Yoane ti “rago Gbia,” ko “abi abaduawe saba ni dahabu; dagba abaduawe yo gu ko ki du sa wa kina wiri boro” nga guko “[na]du na akerekuru saba rogo kumbabeko.” Wa Yesu asakarogo gi yuguyugupai yo re fu Yoane, ko ayaa: ‘Tipa gu gbugbupai nga ga agu akerekuru du saba mo abira rogo kumbabere, na agu abaduawe ni dahabu du saba; agu akerekuru du saba re, ami nga agu amaraika nga ga agu akanisa du saba; agu abaduawe ni dahabu du saba re nga akanisa saba.’—Yugoti 1:1, 10-20.

⁶ “Agu abaduawe ni dahabu du saba” nayugopa agu adungurati nga ga ndikidi aKristano ti “rago Gbia” nga gu natona rogo 1914. Ono ginipai tipa “agu akerekuru du saba”? Ni bambatapai, si narukuba gu mbedimbedi ababiapai dunduko nga aguyo i avunguyo ni toro, na nanangera fuo agu adungurati nadu rogo bambata kama agarã.a Agu ababiapai re adu kpabe kumbabe Yesu yo, nga gu nayugo gupai nga, i kutii beko na ko kini rugu yo. Ii, Kristo Yesu nanangbembatayo fu gu riko nga ga moyambu re. Ono awere tie, bange gi mbedimbedi ababiapai re ni kina betehe gbua. Wai rengbe Kristo ka ngbembatayo fu adungurati nga ga aDezire Yekova rogo zegino dunduko nga gu bangehe nasusi 93,000?

7. (a) Wai Yesu amangasunge na Riigbu Bipasunge ka ngbembatayo fu adungurati auru kpotosende dunduko? (b) Tipagine rengbe ani ka ya tini agu aKristano nga ababiapai ziazia toro nasia yo?

⁷ A wa si adu rogo bambata sa kama agarã, kina bete bange akumba dagba mbedimbedi ababiapai nga aguyo duna inohe namangasunge rogo Riigbu Bipasunge kuba gu riko nga ga ruru kangara moyambu. Gaani Barumbatayo namangasunge na gi Riigbu Bipasunge re ka sia agu akumba rẽ i duni abaakumba rogo adungurati, singia i nga mbedimbedi aKristano watadu aguyo adunga nimbedimbediyo ya. Tipa gipai re, ziazia toro, nga guhe Yekova nafu tanduhe fu Yesu ko mangisunge nani, namanga nyanyakipa sunge. (Amokedi 2:32, 33) Bambatapai nga, si naida agi ababiapai re mangi agu apai mbata i akpinyemuhe be agu aboro naida ka duni ababiapai a wa duhe rogo Fugo Mbori, nga gu ziazia toro adu kugiipa kehe. (1 Timoteo 3:1-7; Tito 1:5-9; 2 Petero 1:20, 21) Pa fu rimo boro ya ni rẽ arẽ tipa sunge gbiati pa sia boro, i namangaha fuo fu yo kpee na be gu rugapai nga ga ziazia toro. Kurii gure, gu boro sia yo ni nayugo gu gopai nga ni na zuzu toro ti ni. (AGaratio 5:22, 23) Sidu tie, gu ga Pauro rugute naye re tipa abaakumba dunduko mangihe, singia i nga gu mbedimbediyo watadu aguyo adunga nimbedimbediyo ya: “Oni bánda tironi na agu [avusende], Ziazia Toro asa roni ni ababandara.” (Amokedi 20:28) Agi ababanda avusende i asia yo re nagbia arugute be Riigbu Bipasunge na kini banda avusende na nyemuhe. Rogo gi gene re, Kristo kini yugu gupai nga, ko kinaho awere na ani na kini ngbembatayo zaaza fu adungurati.

8. Wai Kristo amangasunge na amaraika i ngbembatayo fu apefuo ko?

⁸ Yesu namangasunge amanga a na kina boro ndikidi amaraika i ngbembatayo fu apefuo ko areme. Kuti gu sanza nga ga wene tunga na rende, si adu nga regbo ke ahe nika ye “ho zegino ka nyasa ni.” Da si adu nga Baira ati nika mangasunge na ni ni ke aũ ati? Kristo ayaa: “Akehe nga amaraika.” Ko agbia gupai kuti ni nga: “Wiri boro akéda gako amaraika, i adúngura agu ahe dunduko rogo gako ngbi aboro nakota ti ni, na agu yo dunduko namanga gbegberẽ pai.” (Matayo 13:37-41) Kurii gure, a wa maraika anungusi Firipo koyo gu banyaki nangia boro Etiopia aduni, kinawo a duhe areme, dungu goapai gu duho areme nayugo gupai nga, Kristo namangasunge amanga na gako amaraika ka ruga gu sunge nga ga ndikidi aKristano rogo yugobara agu aboro duna ruru ngbaduyo yo.—Amokedi 8:26, 27; Yugoti 14:6.

9. (a) Rogo gini gene Kristo angbembatayo areme fu gu dungurati nga ga aKristano? (b) Gini sanahe si aida ani wisigihe ka ani aida ka gbia undo be Kristo ni gaani barumbatayo?

⁹ Nangbaha ka rugatise na gupai nga Yesu Kristo nangbembatayo areme fu gako abawiriki rogo gu gene nga ga Riigbu Bipasunge, na gu nga ga ziazia toro, na rogo amaraika! Na ka si vura du nga gbegbere sino aboro nika rungosi bete airisi Yekova watadu kurapai nika kpara yo kusayo ngbutuko ti Riigbu Bipasunge, Kristo nikaa ngbe kindi fuyo kumbatayo rogo gu gene nga ga ziazia toro na kini sa amaraika i undo yo. Ono tie, ani nagbia undo be gako sunge ko amangaha ni gaani barumbatayo kinaho sa ka ani idi ni nani. Wai ka ani rengbe ka yugo gupai nga, ani ima ida na gu sunge nga ga Kristo duni gaani barumbatayo?

“Oni Gí Sangba Gaoni Abaakumba”

10. Wai rengbe ani ka yugo irisa tipa agu abaakumba sia yo yo rogo dungurati?

¹⁰ Gaani Barumbatayo ima fu “Agamahe rogo aboro yo,” du bete “agu yo ni abatungusipai; na agu yo ni amoyambu na [ni] abayugupai.” (AEfeso 4:8, 11, 12, oni ringbisingaha na NW ) Gaani berã na gaani mangaapai na yo nayugo dungu apai singia ani idipa Kristo ni gaani barumbatayo watadu ani aidanga pako te. Si ni gupai ru aru ani ‘duna tambuahe’ tipa agi akumba ima rẽ rogo toroyo Kristo nafu yo fu rani re. (AKorosaio 3:15) I rẽ arẽ a ani fu irisa fuyo. Gu mokedi nangia Pauro akepai ki ya: “Agu abaakumba nazoga rago wenengaĩ [“nangera kurii sunge wenengai,” NW ], i re na irisa susi.” (1 Timoteo 5:17) Wai rengbe ani ka yugo gaani tambuahe gbiati irisa tipa abaakumba watadu ababiapai rogo dungurati? Fugo Pauro nakaragapai niyaa: ‘Oni gísangba agu aboro nangbembatayo fu roni rogo apai yo na ki ra fuyo.’ (AEbere 13:17) Ii si naida ani gisangba yo na ki ra fuyo.

11. Tipagine pa irisa ani gu mbakadapai nga ga abaakumba ayugo gupai tini nga ani naraka ringbisihe kuti agu arugute nga ga gaani bapatiza?

¹¹ Gaani Barumbatayo nga rengberengbe boro, ono agu akumba ko nafu yo ni agamahe i wo te. Sidu, i rengbe arengba ka manga irairapai ti kura aregbo. Wa vura duhe wo, si ni nyanyakipa pai ani nye niruru rani kuti gu mbakadapai nga ga Kristo. Nirengo, pa raka ani ringbisihe kuti agu arugute nga ga gaani kparatise na bapatiza nayugo gupai nga, ani ima idapa gu pagbia nga ga dungurati ya si be toro na ani kini ra fuhe na ngbaduraniyo dunduko. Gaani bapatiza ‘ti rimo ziazia toro’ nga yuguyugupai gbaiga ya ani ima idapa ziazia toro na ki idipa gu sunge si amangaha rogo ga Yekova aringbisapai. (Matayo 28:19) Ngbatunga gu bapatiza re nayugopa kodabee na ziazia toro ka mangapai kina sa na ki he manga gupai nika kandasi gaha sunge dagba apefuo Kristo. Wa duhe nga ziazia toro namanga bakere sunge rogo fu rimo aboro ya i rẽ arẽ tipa sunge na tipa i sia yo ni abaakumba, ya mo ani rengbe nirengo ka du niruru rani rogo gaani kparatise ka ani kpa ti kodabee na abaakumba rogo gu mbakadapai nga ga dungurati?

12. Gini kpiaapai nga ga zanga irisa tipa pagbia Yuda afura tipaha, na ginipai si ayugoho fu rani?

¹² Ziazia Kekeapai na kpiaapai rogoho nga gu nayugo nyakapa giasangbaa na nyakapa ra fu kura aboro. Ni fura gu bawiriki nangia Yuda tipa agu aboro nanafura gbegbere bara agu akumba i asia yo i ngere fuo apai rogo dungurati, ko afura tipa kpiaapai biata nga ga zahe ki ya: “Na gberẽ he fu yo! mbiko i nandu ngba ga Kaina gene, nioro ni nzanga rogo ga Birama irairapai mbiko mosoro, ki nikpi rogo ga Kora ti kangu.” (Yuda 11) Kaina abasa ga Yekova rugute ko afuhe fuko ni nyemuse na ko ki ndu ngba gu gene nga ga sogote ki imi wirinako. (Bambata Pai 4:4-8) Wa Mbori avura za Birama bara dunguhe, ko a’asadi tiko ka tiwa ga Mbori aboro tipa gu mosoro i akido paha fuko. (Pa Geda Aboro 22:5-28, 32-34; Pa Fu Rugute ni Ue he 23:5) Tipa Kora tigako, ko aima duna gu ba nga ga irisa dagba aYisaraere, ono paha akionga bangiriko te. Ko asamungu na kura aboro kuti Mose nangia ga Mbori moyambu, nangia bayee boro kisusi auru kpotosende. (Pa Geda Aboro 12:3; 16:1-3, 32, 33) Mbiko agi apai aKaina, Birama, na Kora amangihe re, gberango ati kuriyo. Nairiwo wai gi kpiaapai re ayugopai fu rani ani degeturani kuti agu arugute nga ga agu aboro Yekova amangasunge na yo rogo agu aba du tipa ngera kurii apai rogo dungurati na ani kini fu irisa fuyo!

13. Gini amaku gu nebi nangia Yesaya afura tipaha kumbatayo tipa agu aboro nara kutii gu mbakadapai nga ga abaakumba?

¹³ Gini boro tigani aidanga ka gbia undo be gu wene mbakadapai nga ga ngera kurii apai rogo dungurati nga ga aKristano gaani Barumbatayo nasigiraha ya? Gu nebi nangia Yesaya afura kumbatayo tipa agu amaku gi mbakadapai re ka ye nani kini yaa: “Oni ngére, bakindo azóga rago na rurupai, abazogo ki nizogo rago na ruru sarangbanga. Aboro ni ba sa sa adú wa kina bagbuko be yuge, ni okooko ba be gugugu yuge, wa ime rogo gene ime rogo ugurago, wa nzereme bambia rogo gu ringara mbu ambu.” (Yesaya 32:1, 2) Si naida abaakumba nibasasa du nga ngbatunga gu “bagbuko” re fu aboro. Ka si vura du nga si fu rani ni kpakarakpakarapai ani ra fu gu pagbia nga ga irangbii, ani kparikpee tipa ka duna giasangbaa na ka ra fu gu pagbia Mbori namoihe rogo dungurati.

Gu Gene Abaakumba Ara Ngbaha fu Kristo Ni Gayo Barumbatayo

14, 15. Wai agu aboro nangbembatayo rogo apai rogo dungurati ayugo gupai nga i kutiibe Kristo ni gayo barumbatayo?

¹⁴ AKristano dunduko si aida i pefuo Kristo ni gayo barumbatayo, gbe, agu aKristano nga abaakumba. Ababiapai, watadu abaakumba, na bete pagbia beyo rogo dungurati. Ono i agbatanga gene ka ‘duni abazogo gu idapase nga ga akurayo aidipase’ ni asada yo tiyo ka maapai kuriyo rogo gayo raka te. (2 AKorindo 1:24) Abaakumba nairisa agu afugo Yesu nga: “Oni ini he ya agu yo nazoga aGendiria i namanga yo a wa i nakpi nyemu he; gayo abanyaki ki nyakasi yo. Ka si dú nga wo dagba roni yo.” (Matayo 20:25-27) Wa abaakumba amanga gayo asunge, i na’asada tiyo nirengo ka ndusunge kura aboro.

¹⁵ I nangarasa aKristano na agu afugo nga: ‘Oni tíngidipa agu aboro nangbembatayo rogo apai dagba roni, oni mákiapa zuzu gayo sunge, ki wirikipa gayo idapase.’ (AEbere 13:7) Anga ndu gupai i aida aboro wiriki abaakumba tini si nga mbiko i nangbembatayo rogo apai te. Yesu ayaa: “Gaoni barumbatayo kina sa, nga Kristo.” (Matayo 23:10, NW ) Gupai i aidaha nga, aKristano wiriki gu idapase nga ga abaakumba mbiko i nawirika ndikidi Barumbatayo, nga Kristo. (1 AKorindo 11:1) Oni wisigi gu kura agene nga gu abaakumba a’asada tiyo rogoho ka mangaapai wa Kristo rogo gayo pagume na kura aboro rogo dungurati.

16. Wa Yesu avura duna bakere pagbia beko, wai ko amangi fu apefuo ko?

¹⁶ Wa pa Yesu avura kio ti ga kpakpa aboro rogo agene dunduko na ko ki vura duna gu pagbia beko Bako afuhe fuko naadunga be kura boro ya, ko amanganga pai ni ruko na gako abawiriki te. Ko azeresanga ngba agu aboro nanadegatuyo kuti ko na iiriwo inohe te. Yesu anaberã pa gupai aberã naangbanga ti apefuo ko ya, sidu ka ko aidanga ka fu gberarago fuyo ya ono kini mangi yo na nunga, na kini berẽpa agu apai i aduna zingoho. (Matayo 15:32; 26:40, 41; Marako 6:31) Ko anasananga gako abawiriki i mangi gupai i arengbanga ka mangaha ya te, na ko amaanga tindiro kuriyo susi gu i arengbe ka tindaha a te. (Yoane 16:12) Yesu angia “bayee boro . . . [ni] irazerangbaduse.” Sidu tie, si airiwonga tirani ka bi gupai nga, dungu aboro anagbia wasa be ko te.—Matayo 11:28-30.

17. Wai si aida abaakumba duni bayee aboro wa Kristo rogo gayo mangaapai na kura aboro rogo dungurati?

¹⁷ Kangia Kristo nadu ni Barumbatayo angia bayee boro, sidu agu aboro nangbembatayo rogo apai rogo dungurati na bakere ndupai beyo ka duni bayee aboro wa ko! Ii, i na rubangirise ka ne inga mangasunge na gu pagbia fu yo ho fuyo. I “aye nga na gu iriwo du ti fura” ka zeresa ngba kura aboro nani te. (1 AKorindo 2:1, 2) Kuba gure, i na’asada tiyo nyanyakii ka pe gu rengo nga ga Ziazia Kekeapai zukazuka rogo gu fugo du taata na nirengo. Kurii gure, abaakumba na’asada tiyo nyanyakii ka duna ruru berã nibipa agu apai i amaabangiriyo tipaha be kura aboro na kini berẽpa agu azingo du yo nani. (AFiripoio 4:5) Ni ino yo gupai nga, aboro nibasasa duna angbanda ti agu apai rengbe yo ka mangaha, i nambupai ni nyemuse tipa agi apai re fu awirinayo. (1 Petero 4:8) Nirengo, anga agu abaakumba duna umbasitise na duna zerangbaduse nafu wasa fu awirinayo tee? Wo duhe nirengo.

18. Ginipai rengbe abaakumba ka wirikaha be gu gene Yesu anamanga agude rogoho?

¹⁸ Aboro dunduko narengbe arengba ka ndu koyo du Yesu ni, zavura rukutu agude a. Oni kparianga gako karagapai ho gako abawiriki azingi ni kuti agu aboro “[na]ye na rukutu agude koyo du ko ni.” Yesu aya fuyo, “Oni hé rukutu agude i ye fuo re; ka oni káraga nga yo ya.” Fuo gure “ko ki aka yo beko, ki moi beko auru yo, ki fu maku fu yo.” (Marako 10:13-16) Yesu adu dawedawe na aboro na ki duna weneringise koyo du yo ni, si du kura aboro anandu tini fuo ko. Aboro anagundenga be Yesu te. Zavura agude, i anidu na ngbarago ka du na ko. Abaakumba a ni agu aboro rengbe kura aboro arengba ka ndu koyo du yo ni, na wa i ayugo nyemuse gbiati weneringise, gu kura aboro, zavura agude a, na ngbarago ka du na yo.

19. Padu ani na “ga Kristo berã” nakoda gine, na gini asadatise si aidaha?

¹⁹ Bakio wai rengbe abaakumba ka wirika gu kpiapai nga ga Kristo Yesu naru riipa wai gbe ini yo ko. Pauro asanahe ki ya: “Da ini gu berã nga ga Gbia, ni ka yugo pai fu ko?” Fuo gure ko ki gbia gupai kuti ni nga: “Ono ani du na ga Kristo berã ti rani.” (1 AKorindo 2:16) Padu ani na ga Kristo berã nakoda ino ani pa gu gene ko aberã ngbaha na ki ini asino ko nabaha dunduko tipa ka ruho ka ino gupai ka ko amangihe rogo ngbatunga gupai ka ani du rogoho si kini idi ani diberã tipaha. Oni berẽnga pa ino ani gaani Barumbatayo wenengai wa ngbatunga gure! Ii, gere nakpinyemu gupai nga ani moi berã rani wenengai fuo agu apai du rogo aBuku Wene Pangbanga na kini hiisi berã rani dedede na gupai gi ani rogoyo tipa ga Yesu raka na gu kpiapai ko amangihe. Ho abaakumba amanga bakere asadatise ni ka pefuo Kristo wa gure ni gayo barumbatayo, agu aboro du rogo dungurati nadu na nyemu ka wirika gayo idapase susi gu nidu mbata. Na abaakumba tigayo ki duna ngbarago wa i abi aboro i nipefuo ndu gaani Barumbatayo na ngbarago.

Oni Nye Kina Kutiibe Kristo Ni Gaoni Barumbatayo

20, 21. Wa ani angera kumbatayo tipa gu vovo zegino kido yo he tipaha, ginipai si aida ani diberã ka mangaha?

²⁰ Si ni nyanyakipa pai nga ani nye kina kutiibe Kristo ni gaani barumbatayo. Wa ani ambeda kuti digido gi zegino re, agu apai du tipa rani wa kina gu nadu tipa aYisaraere rogo gu Kpasakpasarago nangia ga Moaba rogo gu garã nangia 1473 Mbata fu Gaani Regbo. I adu ngbadimo Ringara Mokido, na Mbori ki takipande gupai rogo Mose yo nga: “Mo [Yosua] nikandu na agi aboro re ku rogo gu ringara Yekova azunga he fu abayo ka fu he fu yo.” (Pa Fu Rugute ni Ue he 31:7, 8) Yosua nangia gu barumbatayo i asia ko. Tipa aYisaraere rimi Ringara Mokido, si aidi i ra fu Yosua ni gayo barumbatayo.

²¹ Ziazia Kekeapai naya fu rani: “Gaoni barumbatayo kina sa, nga Kristo.” Kina Kristo sa nika ngbe fu rani kumbatayo kurogo vovo zegino, yo ruruapai nika duni. (2 Petero 3:13) Sidu tie, ani diberã ka ra fuko ni gaani barumbatayo rogo apai dunduko rogo gaani raka.

[Gu rukutu kekeapai du bandu kpewaraga yo]

Oni Natingidaha?

• Wai Kristo angbembatayo fu bambata dungurati?

• Wai Kristo angbembatayo areme fu gako dungurati?

• Tipagine si aida ani ra tini fu agu aboro nangbembatayo rogo apai rogo dungurati?

• Rogo gini agene rengbe abaakumba ka yugo gupai nga, Kristo nga gayo Barumbatayo?

[Gu kpiahe du ti kpewaraga 15]

Kristo nangbembatayo fu gako dungurati na ki moi ababiapai kpabe kumbabeko yo

[Gu kpiahe du ti kpewaraga 16]

‘Oni gísangba agu aboro nangbembatayo fu roni rogo apai yo na ki ra fuyo’

[Gu kpiahe du ti kpewaraga 19]

Yesu adu zaaza na aboro na i arengbe arengba ka ye koyo du ko ni. Agu aKristano nga abaakumba na’asada tiyo nyanyakii ka du wa ko