“Kina Kristo Sa Nga Bairaroni”

“Ka i ya nga ti roni baira ya; bambiko kina Kristo sa nga bairaroni.”—MT. 23:9, 10.

1. Kina da nga ga aDezire Yekova bangbembatayo, na tipagine?

AGU akanisa i aya tipaha wee si nga ga aKristano, gaha abangbembatayo nga wiri aboro, wa papa du Roma yo. Ono tipa aDezire Yekova, wiri boro ho i aya tiní ní nga gayó bangbembatayo te. I nga apefuo boro auru kpotosende te. I namangapai ringbisihe kuti gupai Yekova apehe kumbatayo tipa wiriko nga: “Oni ngére mi fu ko ni dezire fu aboro, ni bangbembatayo fu aboro ni gbia a.” (Yes. 55:4) Gu riigbu nga ga mbedimbedi aKristano gbiati “gu kura akandoro” du rogo zegino dũ, gu kura boro ho i aida ní nibangbembatayo watadu bairayo kpara ti guni Yekova asiani te. (Yo. 10:16) I namangapai kuti gu fugo Yesu nga: “Kina Kristo sa nga bairaroni.” —Mt. 23:10.

Maraika Nangia Bangbembatayo fu Ayisaraere

2, 3. Gini bakere apai Wiri Mbori amangihe Yisaraere yo?

² Mbata fu gu riigbu nga ga aKristano, Yekova aduna bangbembatayo nga maraika kurii gako aboro. Tingbafuo Yekova kusi aYisaraere Ezipeta yo, ko aya fuyó wee: “Oni ngére, mi nakeda maraika ku mbata yo fu roni, ko abánda roni ngba gaoni gene, ki nigasi roni ku rogo gu ba mi naima mbakada ha. Oni nigi gako pai ki nidege turoni ka gia sangbako, ka oni zingi nga kuti ko ya, bambiko ko avú nga roni tipa gaoni samungu te, bambiko rimore du rogo ko yo.” (Gate 23:20, 21) Si ruaru ani yawee gu maraika nadu na ‘rimo Yekova rogokoyo’ re angia bambata wiri Yekova, nga Yesu Kristo.

³ Mbata fu vungayo ko niboro, si ziazia nga ko aduna gu rimo riko nga Mikaere. Rogo gu kitabu nga Daniere, i aya fu Daniere wee Mikaere nga ‘gako bazogo.’ (Dan. 10:21) Gu bawiriki nangia Yuda ayawee Mikaere aima rimo kurogo agu apai nangia ga aYisaraere bakuru kusayo mbata fu batika yó Daniere. Fuo kpi Moize, Satana aidi ka dia kangbako tipa ka manga gako pai nani, isoke tipa ka sa kpoto aYisaraere yo nani i naairiso kpiahe. Fuo bi Mikaere gipai re, ko aye nibasa. Yuda afura tipa gipai re ki yaa: “Mikaere bakumba maraika, ho ko aso vura ni na bakitingbanga, wa ko ati kangu tipa kangba Mose, ko aerã nga ka paa na ko ni kita ngbanga ko te, ono ko aya, ‘Gbia za ro.’ ” (Yuda 9) Fuo gure ngbutuko, mbata fu aYisaraere runguru pati Yereo, Mikaere nga “barutirivura ku ri ga Yekova rimbasa aborosovura” akuru fu Yosua ka nyakasako na gupai nga, ga Mbori undahe adu na kina ko. (Oni gedi Yosua 5:​13-​15.) Ho bazogo nga daimona aʹasadi ni ka ká na maraika ti gumbako nyanyakipa pangbanga fu Daniere, bakumba maraika nga Mikaere aye ki undo gu maraika re.—Dan. 10:5-7, 12-14.

Gu Bazogo I Agumba Pani Aye

4. Ginipai i agumbaha kumbatayo tipa Masiya?

⁴ Mbata fu manga gupai fura ani tipaha kuari re, Yekova akedi gako maraika nga Gaburere fuo Daniere ko gumba apai fuko tipa “gu mbedimbedi ko, nga bazogo” nikaye. (Dan. 9:21-25)a Ho gu regbo i aringbisihe fu Daniere adani rogo gu garã nangia 29 F.B.K., Yesu azi bapatiza be Yoane. Mbori auka ziazia toro kurii Yesu, ko kini da nigu mbedimbedi boro watadu Masiya i agumba pako. (Mt. 3:13-17; Yo. 1:29-34; Gara. 4:4) Si adu nga ko nikadu nigu Bangbembatayo adunga guni wa ní ya.

5. Wai Kristo amangisunge nibangbembatayo ti regbo gako sunge auru kpotosende?

⁵ Ho Yesu atona gako sunge ni auru kpotosende, si ayugutihe ziazia nga ko nga “gu mbedimbedi ko, nga bazogo.” Nibasa fuo tona ko gako sunge, ko atona ka dungura abawiriki, na ko amangi gako bambata iiriwopai. (Yo. 1:35–2:11) Gako abawiriki aapefuoko ho ko aata ni rogo ringara, nitungusi gu wene pangbanga nga ga Kindo. (Ruka 8:1) Ko araba yó kuti sunge tungusapai na ko naangbe mbatayo rogo sunge tungusapai na yugopai. Ko amoi wene kpiapai rogo gipai re. (Ruka 9:1-6) Agu aKristano nga abaakumba rogo dungurati, si ngbaangba i wiriki Yesu rogo gi bangiriba re.

6. Rogo gini gene Kristo ayugu tiko nibabanda akandoro na nibangbembatayo?

⁶ Yesu afura berewe tipa kura papara gako sunge nibangbembatayo niringbisa ko tiko kuti gu babanda akandoro duna nyemuse. Agu ababanda akandoro du bara ku Yisaraere yo, i nangbembatayo gayó akandoro kini ye tifuo yó. Kumba nga William M. Thomson akepai ki yaa: “Babanda akandoro nangbembatayo fu gani akandoro angianga tipa ka yugo gene gbua ya, ono tipa ka ino a nga akandoro rengbe arengba ka ndu ngba gu gene re ka pai amanganga ra ya. . . . Ní namangasunge na gani ngbondo tipa kaa ndu na ami koyo du fogo nvuo ni, na ka banda ra be kere anyaa.” Yesu ayawee ko nga ndikidi Babanda Akandoro na Bangbembatayo. Ko ayaa: “Mi nga wene babanda akandoro. Wene babanda akandoro nabaga kpioni tipa akandoro. Gimi akandoro nagia fugore, mi ini ra, ami ki nipeke re.” (Yo. 10:11, 27) A wa Yesu agumbaha, ko akpi nimotumo tipa gako akandoro, ono Yekova ki zingisi ko ‘ko du nibakindo na ni Batasi.’—Amo. 5:31; Eb. 13:20.

Bangerekurii gu Dungurati Nga ga AKristano

7. Yesu nanungusa gu dungurati nga ga aKristano rogo gine yo?

⁷ Ngbutuko mbata fu ga Yesu ku ngbangbaturũ yo, ko aya fu gako abawiriki wee: “I asia pa ahe fere dunduko ku ngbangbaturũ yo na ku sende no.” (Mt. 28:18) Fuo gako ku ngbangbaturũ yo, Yekova aʹasiapa uka ziazia toro fuko kurii gako abawiriki nangia aKristano tipa si nyakasiyo. (Yo. 15:26) Yesu auka gi toro re kurii bambata aKristano rago Pendekote rogo gu garã nangia 33 F.B.K. (Amo. 2:33) Gu regbo re gu i asigira gu dungurati nga ga aKristano. Yekova amoi wiriko ngbangbaturũ yo ko du nibangbembatayo rogo gu dungurati nga ga aKristano. (Oni gedi AEfeso 1:​22; AKorosaio 1:​13, 18.) Yesu nanungusa gu dungurati nga ga aKristano rogo ga Yekova ziazia toro yo, na amaraika duho ko namoi yó ti sunge nga aguyo “du ni zogozogo yo fu ko.”—1 Pet. 3:22.

8. Ada Kristo amangisunge naayó rogo bambata sa kama agarã ka ngbembatayo fu gako abawiriki, na ada ko amangasunge naayó areme?

⁸ Kristo afu agu ‘agamunihe’ nga ga ziazia toro a fu aboro, tipa aguyo du “ni amoyambu na abayugupai” rogo dungurati. (Ef. 4:8, 11) Gu mokedi nangia Pauro arugu agu aKristano nga ababiapai ki yaa: “Oni bánda tironi na agu akandoro, Ziazia Toro asa roni ni ababandara, oni rígi ga Mbori kanisa.” (Amo. 20:28) Ho gu dungurati nga ga aKristano atona ni, ababiapai dunduko nadu nimbedimbediyo nitoro. Amokedi gbiati agu abaakumba nadu Yerusarema yo naadu rogo riigbu bipasunge. Kristo amangisunge na agi akumba re i ningbembatayo fu agu ‘awirinako’ nadu nimbedimbediyo auru kpotosende. (Eb. 2:11; Amo. 16:4, 5) Ti gi digida rago ani araka ti ni re, Kristo asiapa gu “gako ahe dunduko” du auru kpotosende fu ‘ruru kangara moyambu’ na Riigbu Bipasunge, nga gu riigbu duna agu akumba rogoho du nimbedimbediyo nitoro. (Mt. 24:45-47) Mbedimbedi aKristano gbiati abadiangbayo nga gu kura akandoro ini gupai nga, ka i apefuo gu rugapai nga ga gu Riigbu Bipasunge du awere, gure nga i napekafuo Bairayo nga Kristo.

Kristo Natona Sunge Tungusapai

9, 10. Wai Kristo arugu apai tipa gu wene pangbanga nga ga Kindo gbandaka rogo arago?

⁹ Kina boro Yesu nitiko natona sunge tungusapai na ki yugu wai si aida i naamangaha. Ko aringbisipa wai si aida i tungusi gu wene pangbanga nga ga Kindo auru kpotosende dũ. Ti regbo gako sunge tungusapai, ko aya fu gako amokedi wee: “Ka oni ndú nga ngba ga aGendiria gene ya, ka oni rími nga ku rogo bakporo nga ga aSomorono wa sa ya; ono oni ndú sa gu ingiingi akandoro nga ga ngbatunga aYisaraere. Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’ ” (Mt. 10:5-7) I atungusi gipai re zaaza gbe fu aYuda na fu agu aboro nasatiyo kurogo gu pambori nga ga aYuda. I amangi gi sunge re nibakerehe gbe tona ti rago Pendekote rogo gu garã nangia 33 F.B.K. ka ndu kumbatayo.—Amo. 2:4, 5, 10, 11; 5:42; 6:7.

¹⁰ Kusa, Yesu amangisunge na ziazia toro ki kiisi sunge tungusapai si gbia aboro Somorona, fuo gure, si ki gbia gu kura aboro naangianga aYuda ya. (Amo. 8:5, 6, 14-17; 10:19-22, 44, 45) Yesu asa kpoto Saura boro Taruseu yo ko dani Kristano tipa ka ndu na wene pangbanga fu aGendiria. Yesu arugu gu gako bawiriki nangia Anania ki yaa: “Mo gúari ki ndu ku rogo gu gene yo du rimoho nga Ruruhe, ki sana he ti ga Yuda bambu tipa gu boro du rimoni nga Saura, boro Taruseu; bambiko ko nakpara. . . . Mo ndu andu; bambiko mi kpara ko, ko ndu na rimore ku barangba aGendiria na abakindo, na awiri aYisaraere.” (Amo. 9:3-6, 10, 11, 15) Gi kumba re ada nigu mokedi nangia Pauro.—1 Tim. 2:7.

11. Wai Kristo amangisunge na ziazia toro ka kiiso sunge tungusapai?

¹¹ Ho regbo adani wene pangbanga ndu ka gbia agu arikaaboro naangianga aYuda ya, ziazia toro arugu Pauro ko ndu ka tungusapai nimokedi rogo kura apapara Asia na ki da nani Putu yo a. Gu pangbanga Ruka akehe rogo Amokedi nayaa: “Wa . . . [agu aKristano nangia anebi gbiati abayugupai rogo gu dungurati nadu Andiokia yo] amanga pa Gbia nigina riahe, Ziazia Toro ki ya, ‘Oni kpára aBarunaba fere na Saura sa gu sunge yambu mi yo sa ni.’ Ho i agina riahe ni tie ki kpari, ki moi beyo ri yo, i ki kedi yo.” (Amo. 13:2, 3) Kristo nitiko ‘nakpara’ Saura boro Taruseu ko ndu na rimoko fu aGendiria; sidu, pa ndu wene pangbanga fu aGendiria aye kina be Kristo, nga Bangbembatayo nga ga gu dungurati nga ga aKristano. Yesu amangisunge na ziazia toro berewe ziazia ti regbo ga Pauro ue nunguro na sunge amokedi. Ziazia Kekeapai nayawee “ga Yesu Toro” arugu Pauro na gako abadianunguro nibipa agu aba si aidi i ndu kurogoho mbata, na i aya fu Pauro rogo yuguyugupai yo wee i ndu ku Putu yo.​—Oni gedi Amokedi 16:​6-​10.

Yesu Nangerakurii Gako Dungurati

12, 13. Wai gu kitabu nga Yugoti ayugo gupai nga Kristo namaa berãko amaa wenengai gbe tipa agu apai namanga rogo adungurati dunduko nibasasa?

¹² Yesu aamaa berãko wenengai tipa agu apai naamanga rogo adungurati rogo bambata sa kama agarã. Ko aima rugatiko wenengai na agu apai nadu tipa adungurati dunduko nibasasa. Ani naino gipai re gbe ho ani ageda Yugoti kapita 2 na 3 ni. Ko ayambu rimo adungurati saba nga gu naduku kina Asia yo. (Yugo. 1:11) Ani rengbe ka dakuti gupai tie nga ko aima rugatiko a na agu apai nadu tipa kura adungurati dunduko auru kpotosende.​—Oni gedi Yugoti 2:​23.

¹³ Yesu atambua kura adungurati tipa gayó hipai, tipa nye yó niruruyo ti regbo asada, tipa ka yó kuti gako pai, na tipa soga yó agu aboro nasamungu kuti ndikidi pambori. (Yugo. 2:2, 9, 13, 19; 3:8) Ono ko afu nyanyaki arugute fu kura adungurati mbiko gayó nyemuse tipa ko aima zera, mbiko i ambu irisokpiahe na meteka ambu si naamanga rogo dungurati, na mbiko i ambu agu aboro ambu nakusi kparakaapai. (Yugo. 2:4, 14, 15, 20; 3:15, 16) Wangia Yesu gu babiapai duna nyemuse, zavura fu agu aboro ko afu nyanyaki arugute fuyó, ko ayaa: “Agu yo dunduko mi nakpi nyemu yo mi naza yo ti pai ki nirugu yo; si mo ka du ngangarã ti ni, ki sa ga berã.” (Yugo. 3:19) Wa Yesu avura du ngbangbaturũ yo, ko aangbembatayo kindi fu gako adungurati nimanga ko sunge na ziazia toro. Ti digido agu apangbanga nadu ngbako fu agu adungurati re, ko ayaa: “Gu ni du na tu gia ha ti ni, ni gí gu pai Toro nagumba fu akanisa.”—Yugo. 3:22.

14-16. (a) Wai Yesu nayugu tiko nigu Bambembatayo duna wingbaduse? (b) Ginipai mangi nisangbana du Yesu “na” gako abawiriki “ti arago dũ, ki da ti digida zegino”? (d) Ginipai ani ka inopai tipaha rogo gu kekeapai ngbefuo gere?

¹⁴ Ani bi gupai nga bakumba maraika nga Mikaere (Yesu) adu niwene Bangbembatayo Yisaraere yo. Fuo gure, ko adu nigu Bangbembatayo duna wingbaduse na nigu Babanda Akandoro duna nyemuse. Ti regbo gako sunge auru kpotosende, ko angbembatayo rogo sunge tungusapai. Na fuo zinga ko bekpio ki ga ku ngbangbaturũ yo, ko aangera wenengai kurii pa gbandaka gu wene pangbanga nga ga Kindo rogo arago.

¹⁵ Si adu nga Yesu nika mangasunge na ziazia toro ki kiisi sunge tungusa wene pangbanga si da digida sende yo. Mbata fu gako ku ngbangbaturũ yo, ko aya fu gako abawiriki wee: “Oni adía tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na digida sende yo.” (Amo. 1:8; oni gedi 1 Petero 1:12.) Mbiko gu rugapai nga ga Yesu, aKristano amangi sunge tungusapai nibakerehe gbe rogo bambata sa kama agarã.—Koro. 1:23.

¹⁶ Ono Yesu nitiko ayawee gi sunge re nika nduandu ki da ti digida rago. Fuo ya Yesu fu apefuoko i tungusipai na ki sa aboro ni abawiriki dagba arikaaboro dũ, ko akido yó ki yaa: “Mi na oni ti arago dũ, ki da ti digida zegino.” (Mt. 28:19, 20) Tona ti gu regbo i amoi Kristo nibakindo rogo 1914 kada ku awere, ko “na” gako abawiriki susi gu nadumbata na ko namangasunge kakaka nigayo Bangbembatayo. Gu nyanyaki sunge ko atona ka mangaha rogo 1914 ani ka fura tipaha rogo gu kekeapai ngbefuo gere.

[Gu rukutu kekeapai du bandu kpewaraga yo]

[Gu kpiahe du ti kpewaraga 24]

“Mi nakeda maraika ku mbata yo fu roni”

[Gu kpiahe du ti kpewaraga 26]

A wa si adumbata, Kristo namangasunge na abaakumba ka ngbembatayo fu gako akandoro

[Gu kpiahe du ti kpewaraga 27]

Fugöpai

• Wai Wiri Mbori adu nizaaza Bangbembatayo Yisaraere yo?

• Kristo nangbembatayo fu gako dungurati du auru kpotosende rogo gini agene?

• Wai Kristo narugu pa gbandaka wene pangbanga rogo arago?

• Gine nayugo gupai nga Kristo namaa berãko amaa wenengai gbe tipa agu apai namanga rogo adungurati dunduko nibasasa?