Oni Naata A Wa Yesu Kristo Anaata
“Gu ni ka ya ni nye rogo [Mbori] yo ni ka ata ni tini, a wa [Yesu] anata tigako.”—1 YOANE 2:6.
1, 2. Gine pa ngera ani yososo koyo du Yesu ni akodaha?
GU MOKEDI nangia Pauro akepai ki yaa: “Ani . . . oro gu oto du fu rani ku mbata yo kindi, ningere koyo du Yesu ni, nga guko du ni baenge gaani idapase, du ni badigisi he a.” (AEbere 12: 1, 2) Pa peka ani fuo gu gene nga ga ruru mangaapai nakpinyemu ani moiberã rani dunduko koyo du Yesu Kristo ni.
2 Gu bambata fugo i asaha nga “ningere koyo,” a wa i amangisunge nani rogo gu Papara Ziazia Kekeapai Nga ga AKristano I Ake Bambata Fugoho Rogo Pa-Giriki, rogoyo nga “ka maa berãse fuo pai zanga pai duho nga gu nika gbehe kusayo,” “ka dia bangirise ti kurapai tipa ka bi gu kurahe,” “kaa dua bangirise yososo kuti he.” Gu kura buku sa nayugobaraapai nayaa: “Ka singia baoro oto-abaangira rogo gu bangimbaro naningia ga aGiriki anidi berãni kusayo tooni ti gani oto-abaangira na ti gu sásá ni anaaora tipaha na ki moiberã ni kuti agu aboro nanidu pati mbaro, gani oto anitona kaa zera. Kina gu bangisapai re namanga tipa Kristano a.” Agu apai naʹaria berã rani kusayo ti gupai ani akpinyemu ka mangaha, si rengbe arengba ka rugusa gaani sona kumbatayo rogo toroyo. Si naida ani naangera yososo kina koyo du Yesu Kristo ni. Gine ani angera tipaha be gu baenge idapase re? Gu pa-Giriki i asaha nga “baenge . . . idapase,” rogoyo nga “bangbasia bangbembatayo, gu boro nangbembatayo rogo apai dũ na ni kini moi kpiapai.” Tipa ani rengbe kaa ngera yososo kube Yesu, si nakpinyemu gupai nga ani naapekafuo gako kpiapai.
3, 4. (a) Ginipai si akpinyemuhe berani tipa kaa ta a wa Yesu Kristo anaata? (b) Gini asanahe duho si aida ani moiberã rani kuti ni?
3 Ziazia kekeapai nayaa: “Gu ni ka ya ni nye rogo [Mbori] yo ni ka ata ni tini, a wa [Yesu] anata tigako.” (1 Yoane 2:6) Si naida ani nye rogo Mbori yo nika ani kuti agu arugute nga ga Yesu a wa ko akakuti ga Bako arugute.—Yoane 15:10.
4 Sidu, tipa kaa ta a wa Yesu anaata, si nakpinyemu gupai nga, ani nibi ko rogo apai yo dũ nigaani Bangbasia Bangbembatayo na ani kini pekefuo gako kpiapai teketeke wa ko anaamangaha. Tipa gipai re, gu nyanyakipa asanahe duho tipa makiaha nga: Waigu Kristo angbembatayo fu rani areme? Wai si aida pa wirika ani kaa ta wa Kristo anaata mangi ariapai rogo gaani raka? Gini amamu duho tipa ka ani kuti gu kpiapai Yesu Kristo amoihe?
Gu Gene Kristo Angbembatayo fu Apefuoko Rogoho
5. Gini kidohe Yesu afuhe fu gako abawiriki mbata fu dakpa ko ku ngbangbaturũ yo?
5 Mbata fu dakpa Yesu Kristo ku ngbangbaturũ yo, nga guko i azingisi ko bekpio, ko ayugu tiko fu gako abawiriki, na ko ki fu gu sunge fuyo nadu naapaha ninyanyakihe. Ko ayaa: “Oni ndu tie, ki sa arikaaboro dunduko ni abawiriki.” Rogo gu uru re, gu Bangbasia Bangbembatayo re akido gako abawiriki ya, ko aduadu naayo a wa i nikaa digiso gu sunge ko afuhe fuyo ho ko ayani wee: “Oni ngere, mi na oni ti arago dũ, ki da ti digido zegino.” (Matayo 28:19, 20) Waigu du Yesu Kristo na apefuoko rogo gi regbo nga ga digido zegino re?
6, 7. Waigu Yesu angbembatayo fu rani rogo gu gene nga ga ziazia toro?
6 Yesu ayaa: ‘Gu moundo nga ziazia toro nga gu Buba ka keda ko nirimore, ko ayugo apai dunduko fu roni, ki ye na agu apai ku bangironi dunduko mi agumba fu roni.’ (Yoane 14:26) Gu ziazia toro i akedaha nirimo Yesu re, si nangbe fu rani kumbatayo areme na si kini nyakasi rani a. Si nazaka bangirani rogo toroyo na si kini undo rani ani girogo “gu dudungura apai nga ga Mbori.” (1 AKorindo 2: 10) Kurii gure, agu asino Mbori nga “nyemuse, na ngbarago, na zereda, na hipai, na mangapase, na weneringise, na du ngangarã, na zera, rugatise,” si nga “zuzu toro.” (AGaratio 5:22, 23) Ani rengbe arengba ka sonosa agi asino re na gu undo nga ga ziazia toro.
7 Wa ani kaa wirika Ziazia Kekeapai na kini asadi tirani nyanyakii kaa manga agu apai ani awirikaha, ga Yekova toro nika undo rani tipa ani sono rogo tatamana, kpariapai, giarogopaiyo, inohe, na sapangbangaa gbiati tandu berãpai. (Asanza 2: 1-11) Ziazia toro naundo rani a tipa ani hi asada. (1 AKorindo 10:13; 2 AKorindo 4:7; AFiripoio 4: 13) I nangarasa rani nga aKristano tipa ‘ani girisi tirani be gu meteka dunduko nga ga borose na ga toro, nimbakadi ziaziapai nzunzu rogo gunde ti Mbori.’ (2 AKorindo 7:1) Ya mo ani rengbe ka raka nirengo ringbisihe kuti gupai Mbori akpinyemuhe nga kadu ziazia watadu gigirii zanga gu undo nga ga ziazia toro? Gene sa dagba agu akuraha Yesu amangasunge nani tipa ka ngbembatayo fu rani areme, si nga ziazia toro nga gu Yekova Mbori narugu Wiriko tipa ko nimangisunge nani.—Matayo 28:18.
8, 9. Waigu Kristo amangasunge na ‘ruru kangara moyambu’ tipa kaa ngbembatayo fu rani?
8 Oni makianga pa gu kura gene Kristo angbembatayo rogoho fu gako dungurati areme. Ho Yesu aafura ni tipa padu ko ho na ome Kindo beko naapa digido gi zegino re, ko ayaa: “Da nga gu kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho? Boro maku nga gu moyambu gani gbia ka bi ni ni nimangi wo ho ko ka ye ni. Ya mi fu roni ni rengo, ko aásia pa gako ahe dunduko fu ni.”—Matayo 24:3, 45-47.
9 Gu “gbia” re nga Yesu Kristo. Gu “moyambu” re nga gu riko nga ga mbedimbedi aKristano du auru kpotosende. Gi riko nga ga moyambu re, i fu gu sunge fuhe nga ga ngerafuo ga Yesu sunge auru kpotosende na kini fu gu riahe nga ga toro ti regboho fu gako aborokporo. Wiri umba badona ababiapai nga aguyo duna wene inohe dagba gu ‘ruru kangara moyambu’ re, i du rogo gu rondo nga Riigbu Bipasunge, na i namangasunge kuba gu riko nga ga gu moyambu re. I nangbembatayo rogo sunge tungusapa Kindo rogo zegino dunduko na i kini fu gu riahe nga ga toro ti regboho fu ga Yesu aborokporo. Rogo gi gene re du Kristo angbembatayo fu gako dungurati, rogo gu gene nga ga gu riko nga ga ‘ruru kangara moyambu’ nga agu abaakumba du nimbedimbediyo niziazia toro na rogo gaha Riigbu Bipasunge.
10. Gine si aida si du nga gaani sino berã koyo du abaakumba ni, na tipagine?
10 Berewe a, gu kurapai nayugopa ga Kristo sunge nibangbembatayo, si nga “Agamahe rogo aboro yo,” nga agu aKristano namangasunge ni abaakumba watadu ababiapai rogo dungurati. Ko afu yo “sa du ga Mbori aboro nzunzu, [“tipa ruga gu ziazia yo,” NW ] sa gu sunge nga mangaapai, sa sonosa boro Kristo.” (AEfeso 4:8, 11, 12; oni ringbisinga ha na NW.) AEbere 13:7 naya tipa yo wee: “Oni tíngidi pa agu . . . [aboro du] ni abazogoroni, nagumba pa Mbori fu roni; oni mákia pa zuzu gayo sunge, ki wiriki pa gayo idapase.” Abaakumba du ninaangbembatayo rogo adungurati. Wa duhe tie nga i naawirika mangapai wa Kristo Yesu, rengbehe arengba a tipa ani wiriki gayo idapase. (1 AKorindo 11:1) Ani rengbe ka yugo gaani tambuahe tipa gi mbakadapai nga ga abaakumba re rogo giasangbaa na ani kini ra nigose fu agi “agamahe rogo aboro yo” re.—AEbere 13:17.
11. Rogo gini gene Kristo angbe areme mbatayo fu apefuoko, na ginipai pa ta ani a wa ko anaata akodaha?
11 Ii, Yesu Kristo nangbe areme mbatayo fu apefuoko rogo gu gene nga ga ziazia toro, ga ‘ruru kangara moyambu,’ na gu nga ga agu abaakumba du rogo dungurati. Tipa ani naata a wa Kristo anaata, si naida ani rugutirani naapa gako sunge nibangbembatayo na ani ki ra ni gorani fuhe. Si nakpinyemu gupai a nga, ani wiriki ta rogo sino gu gene ko anaata rogoho. Gu mokedi nangia Petero akepai ki yaa: “Gi nga gu pai i ayambu roni kuti ni re: mbiko Kristo ahi pai a tigako tipa roni, ki he kpia pai fu roni, oni peke fuo ko.” (1 Petero 2:21) Rogo gini gene si aida pa pekafuo gu rengberengbe kpiapai nga ga Yesu mangi ariapai tipa rani?
Oni Du na Ruru Berã Ho Oni Angera Ni Kuriisunge
12. Gini papara ga Kristo kpiapai du nikparakparaha rengbe ka gbeberã abaakumba rogo dungurati?
12 Wa si avura du nga Yesu aduna gu pagbia be bako nga gu nasusi ga aboro dũ, ko aduna tatamana rogo gu gene ko anaamangasunge nani. Agu aboro du rogo dungurati dunduko, bakere gbe ababiapai, si naida ‘aboro ini yo dunduko nibayee aboro.’ (AFiripoio 4:5; 1 Timoteo 3:2, 3) Wa duhe nga abaakumba na bete pagbia beyo rogo dungurati, si ninyanyakipa pai fuyo nga, i peke fuo gu kpiapai nga ga Kristo ho i amangasunge ni na gu pagbia re.
13, 14. Rogo gini gene rengbe abaakumba ka wirika mangapai wa Kristo wa i angarasa akurayo tipa i naamangasunge fu Mbori?
13 Yesu anaamaaberãko amaa tipa agu angbanda nangia ga gako abawiriki. Ko anaasananga yo tipa i mangi gupai susi gu i anirengbe ka mangaha te. (Yoane 16:12) Yesu angarasi gako abawiriki tipa i ‘naamanga asadatise nyanyaki gbe’ tipa ka manga gupai Mbori akpinyemuhe zanga ko sosodi yo asosoda sani ngbaome. (Ruka 13:24) Ko amangi gere wa ko aangbembatayo fuyo na kini fu ngbarago ku kpotoyo yo. Teketeke wa kina gure a, agu aKristano nga abaakumba du rogo dungurati areme, i agundesinga aboro tipa i irisi Mbori mbiko zee te. Kuba gure, i nangarasa aboro i naairiso Yekova mbiko gayo nyemuse koyo du ko ni na koyo du Yesu ni, na koyo du akurayo aboro ni a.—Matayo 22:37-39.
14 Yesu amanganga sunge na gu pagbia Mbori afuhe fuko rogo gu gene nadu nigbegberehe tipa ka ye naa ga aboro raka kutii beko te. Ko asigiranga agu apai watadu agu asásá nadu nikpakarakpakaraha fuyo te, singia ka rũ dungu andiko fuyo a te. Gako sino fugo anidu tipa ka fõngbadu aboro yo na tipa ka rimiso agu apai ku ngbaduyo yo nadu kugii agu andiko yo Mbori afuhe fu Mose. (Matayo 5:27, 28) Niwirika yo kaa mangapai wa Yesu Kristo, abaakumba nabanda tiyo ti rũ kina agu andiko ngbaa tiyo watadu ka konga kina kuti gu bipai ngbatiyo. Rogo agu apai nabipa vo rokoo na mbakadarii, watadu zambuasitise na ambaro, abaakumba naaʹasada ka zada ngbadu aboro yo niwisigo yo agu andiko naayo duwa ngbatunga gudu rogo Mika 6:8; 1 AKorindo 10:31-33; na 1 Timoteo 2:9, 10.
Oni Du na Nunga na Kini Mbupai fu Aboro
15. Wai Yesu amangipai kuti gu rungbura nangia ga gako abawiriki?
15 Kristo ambu kpiapai fu rani ani peke fuoho rogo gene gako mangapai nibipa gu irairaapai nangia ga gako abawiriki. Ani makianga apai ue nga gu namangi rogo gu yangara yuru ko adu auru kpotosende no niboro. Fuo Yesu gbiati gako abawiriki da Getesemane yo, ko ‘arogo aPetero na Yakoba na Yoane fuo ko’ na ki ya fuyo wee i ‘nye kaa ngera angera.’ Fuo gure, “ko ki ndu ku mbata yo ngbutuko, ki ti sande, ki nikpari fu Mbori.” Ho ko akaraga tiko ni, ko ‘abi yo i nira ara.’ Ginipai Yesu amangihe? Ko ayaa: “Toro nakpi nyemu he ni rengo, borose anyaka nga ya.” (Marako 14:32-38) Kuba gupai nga Yesu bira aPetero na Yakoba na Yoane nizinga, ko ayugu gupai nga, ko aduadu na nunga! Kina rogo gu bangisa yuru re, Petero aoro rimo Yesu bara biata. (Marako 14:66-72) Waigu Yesu amangi fu Petero tifuo gipai re? Ziazia Kekeapai nayawee: “Gbia [a]zingi be kpio ni rengo ki yugu tiko fu Simona [Petero].” (Ruka 24:34) Ziazia Kekeapai nayaa: “Ko ayugu tiko fu Kefa; fuo ho fu aguyo nanidu bawe na ue.” (1 AKorindo 15:5) Kuba gupai nga Yesu du na berãpai nga ga kanda kuti Petero, ko avu gu gako mokedi naima sa gako berã re na ki nyakasi ko a. Kusa, Yesu afu asunge fu Petero nga gu nadu nibakerehe gbe.—Amokedi 2:14; 8:14-17; 10:44, 45.
16. Wai rengbe ani ka ta a wa Yesu anaata baraho gu kura akuarani aidipase amanganga ni fu rani wenengai ya watadu ho i amanga ni fu rani gbegberee?
16 Ho akuarani aidipase niba gberarago ni tirani watadu ka manga fu rani gbegberee mbiko gu zangarengba du ani nani, ya mo si aidanga ani du na inaapai na kini vu yo a wa Yesu anaamangaha tee? Petero angarasi akurako aidipase niyaa: “Oni du kina ku bani sa, nunga akuaroni ki nimangi roni, oni ki kpi nyemu akuaroni wa awirinaroni, ki du na weneringise, ki niumbasi tironi. Ka oni káraga nga gbegberẽpai fu gbegberẽpai ya, na gberãngba yo fu gberãngba yo a ya; ono ku ba gure oni káraga kina maku.” (1 Petero 3:8, 9) Ginipai rengbe ani ka mangaha ka si du nga gu kura boro ho aidanga ka manga fu rani wa Yesu anaamangaha ya kini sogo pa yugo inaapai na vu aboro? Ka si vura du wo, si fu rani nidingisoro ani asadi ka wirika manga wa Yesu na kini mangi a wa ka ko amangihe.—1 Yoane 3:16.
Oni Moi Agu Apai Nga ga Kindo Nibambatapai
17. Gine nayugo gupai nga, gupai Mbori akpinyemuhe, si Yesu amoihe nibambatapai rogo gako raka?
17 Gu kurapai berewe nga, si naida ani naata a wa Yesu Kristo anaata. Takapande pa gu wene pangbangaa du tipa ga Mbori Kindo adu nigu sunge paha anyaki gbe rogo gu raka nangia ga Yesu. Tifuo tungusa ko pai fu dee niboro Somorona naaraka rogo gu gbata nangia Sukara nadu Somorona yo, Yesu agumbapai fu gako abawiriki ki yaa: “Gi riahe nga manga kina gu pai gu ko akpi nyemu he nakedi re, mi nyasi gako sunge.” (Yoane 4:34) Pa manga Yesu gupai Bako akpinyemuhe, adu ni gupai naabanda ko; si adu fuko wa riahe, nga gu naambiisa ko na si kini fu wasa fuko wa riahe. Ya mo ka ani aawirika mangapai wa Yesu ninye ani kaa manga kina gupai Mbori akpinyemuhe, si rengbe ka ngbembatayo fu rani sa gu raka du kia angianga ga ngbarago ya?
18. Gini amaku naye nisangbana ngarasa agude i di sunge abazakigene kubeyo?
18 Ho avunguagude angarasa awiriyo ni tipa i naamangasunge tungusapai ti aregbo dũ, i, gbiati awiriyo nagbia dungu amaku. Baagude sa awiriko ue angia akumbagude ni abi, anaanyakasapa sunge abazakigene fuyo tona kinaho i aduni nirukutu agude. Fuo nyasa yo gayo wirikapai nga ga sukuru, agi abi re ada nirengo ni abazakigene. Wa gi baagude re aaberã riipa gu ngbarago ko agbiaha, ko akepai ki yaa: “A wirani abanga gberarago tirani te. Nitambuahe tie, ani rengbe arengba ka yaa, ‘Awiri boro nga gu ũkumbo naye be Yekova.’ ” (Atambuahe 127:3) Waigu agude agbia amaku be mangasunge tungusapai ti aregbo dũ? Naagude duna awiiri bisue nga akumbagude na adegude nayaa: “Sunge tungusapai ni abazakigene aundo awire dunduko i sonosi dawedawe pagume na Yekova, si ima mbakada gayo sino wirikapai nisase, na si ima undo yo a i wiriki wai ka mangasunge na gayo aregbo nitatamana, na si ima undo yo a i wirikipa maa agu apai nga ga toro nibambatapai rogo gayo raka. Wa si avura du nga, i dunduko si aidi i mangi dungu aʹariapai rogo gayo raka, guni ho sa nabira tini tipa gu gene i asiaha kaa ta ngbaha re te.”
19. Gini asásá du tipa agu aʹuru naye kumbatayo si aida aparanga makia paha nitatamana?
19 Aparangaa, gaoni asásá nga gine tipa agu aʹuru naye kumbatayo? Oni naagbata gene tipa kadu nibangbasia rogo kura sunge? Watadu oni nagbata gene tungusapai ti aregbo dũ ka saha si du nigaoni nyenye sunge? Fugo Pauro nafu rugute niyaa: “Oni [na]angéra angera wenengaĩ . . . wa oni nata, wa zanga tatamana te, wa kina iratatamana. Oni ki banda gaoni saa tipa manga apai, bambiko rago gbegberẽ.” Ko agbia gu kurapai kuti ni ki yaa: “Si du ka oni adú nga ti ni mumungo ya, kina ruga tironi . . . [naapa] gu he Gbia akpi nyemu he.”—AEfeso 5:15-17.
Oni Kakuti Manga Rurupai
20, 21. Rogo gini gene Yesu ayugupa kakuti manga rurupai, na waigu rengbe ani ka wirika manga rurupai wa ko?
20 Tipa ani naata a wa Yesu anaata, si naida gupai nga, ani wiriki manga rurupai wa ko. Ziazia Kekeapai nayaa tipa pa ka Yesu kuti manga rurupai wee: “Ko, wa ko adu ni kina Mbori; rengba ko na Mbori adu nga bangiriko ni mosoro te, ono ko auka pa tiko ki du wa kina kanga, ki du wa boro; pa bi ko adu wa pa boro, Ko ki umbasi tiko, nigi sangba dati kpio, ii, nga kina gu kpio nga ga wagiwagi ngua.” Pa ka Yesu kuti manga rurupai asongodi gu bakere pagbia nga ga Yekova wa ko ara nigose fuko tipa ka manga gupai Yekova akpinyemuhe beko. Ko agisangbaa na ki rungo dati kpio ti ngbunduru ngua rungosi. Ani duwa ka ani ‘dú na gi berã rogo rani yo re’ na ani ki ra nigorani fu Mbori tipa manga gupai ko akpinyemuhe berani.—AFiripoio 2:5-8.
21 Yesu ayugupa kakuti manga rurupai fu gako ruru abawiriki a. Yesu akpinyemu yo akpi kindi dati “yangara rago” wa i avura du nirurungbura aboro na nikpakpa aboro vurũ. (Yoane 13:1) Teketeke wa kina gure a, si aidanga ani mbu gene fu gu zangarengba nga ga awirinarani si sa rani ani duna gu sino nga ga bisira payo te.
Oni Kakuti gu Kpiapai Yesu Amoihe
22, 23. Gini amaku duho nga gu naye be kakuti gu kpiapai Yesu amoihe?
22 Rengo ngaha nga, wadu ani nikpakpa aboro, ani arengbanga kaa ta zukazuka rogo gu kpiapai nga ga gaani rengberengbe Bafu-kpiapai te. Wa vura duhe wo, ani rengbe arengba ka manga nyanyaki asadatise ka pekafuo gako kpiapai wenengai. Tipa ani rengbe ka mangaha, si naida gupai nga ani du na giarogopaiyo na ki ra nigorani kuti gu gene Kristo angbembatayo rogoho, na ki zi tirani a kuti gu kpiapai ko ambuhe.
23 Pa wiriki ani manga gu kpiapai nga ga Kristo nandu na ani sa dungu amaku. Gaani raka nikadu naapaha ninyanyakihe gbe, na ani ki gbia wenepai behe bambiko ani namaaberã rani kuti manga gupai Mbori akpinyemuhe, kuba gupai nga kaa manga kina agu apai ngbaa tirani. (Yoane 5:30; 6:38) Ani na wene sangbakpotoyo. Wa ani kaa ta, si nikadu nikpiapai. Yesu ayambu agu aboro dunduko naambu kidu na rorõi atindiro i ye fuo ko, ka gbia ongoda tipa mbisimoyo. (Matayo 11:28-30) Ho ani apekafuo gu kpiapai ni nga ga Yesu, ani rengbe arengba ka fu wasa fu gu kura aboro nigaani kodatise a. Fuo gure tie, ani naandunga andu kumbatayo kindi kaa ta a wa Yesu anaata.
Oni Natingidaha?
• Waigu Kristo angbembatayo fu apekefuoko areme?
• Wai rengbe abaakumba ka pekafuo gu ngbembatayo nga ga Kristo nimanga yo sunge na gu pagbia Mbori afuhe fuyo?
• Wai rengbe ani ka pekafuo gu kpiapai nga ga Yesu ho ani amangapai ni na gu zangarengba nga ga kura aboro?
• Wai rengbe aparanga ka peresa agu apai nga ga Kindo mbata?
[Gu kpiahe du ti kpewaraga 15]
Agu aKristano nga abaakumba du rogo dungurati, i naundo rani ani pekefuo Kristo nigaani bangbembatayo
[Gu kpiahe du ti kpewaraga 16]
Aparangaa, gini asásá oni amaaha tipa ka gbia gu wene raka nga ga aKristano?