Yekova Nasoga Gu Sino Nga Ga Gbarasapa Mokido
‘Ka ani gbarasinga pa gu kido du aboro nani kuti rani ya.’—MARAKI 2:10.
1. Gine Mbori akpinyemuhe berani ka ani aida nyenye unga?
ONI nakpinyemu nyenye unga? Kangia oni idi kuti gu maabangirise re a wa duhe rogo Ziazia Kekeapai, si nawira oni karagapai ki ya, ‘Nawai tie, mi naidaha aida.’ Ono ka oni aida Mbori fu nyenye unga fu roni rogo gako vovo zegino ni gu mangaapai nga ga weneringise, si aida gupai beroni nga oni mangi agu apai ko akpinyemuhe. (Batungusipai 12:13; Yoane 17:3) Ya mo pa sana Mbori kpakpa aboro i mangi gipai re ni gupai arunga ya? Oó, mbiko Yekova nagumba agi afugo nangarasa rani re: “Mi nakpi nyemu weneringise, motumo te, pa ina Mbori, si susi ti pa zozo amotumo.” (Osea 6:6) Sidu, zavura agu aboro duna nyemu manga irairapai tiyo rengbe arengba ka manga gupai Mbori akpinyemuhe.
2. Wai dungu aYisaraere agbarasipa gu mokido nadu dagba yo na Yekova?
2 Ono tie, anga aboro dunduko naida ka manga gupai Yekova akpinyemuhe te. Osea ayugu gupai nga, zavura kina aYisaraere nga gu rikaaboro namangi mokido na Mbori tipa ka irisa gako andiko, i aidanga ka mangaha te. (Gate 24:1-8) Wa si avura du wo, fuo ho aturanga te i ki tona ‘ka gbarasapa gako amokido’ ni kuo yo gako andiko. Si du Yekova aya tini i ‘agbarasipa gako mokido.’ (Osea 6:7) Na kinawo a dungu kura aboro namangihe natona ti gu regbo re. Ono Yekova nasoga gu sino nga ga gbarasapa mokido, singia i nagbarasaha kubara ko yo watadu kubara agu aboro yo nakpinyemu ko na kini mangisunge fuko.
3. Ginipai ani ka wetekaha rogo gi wisigopai re?
3 Anga kina gu nebi nangia Osea sa nanyakasipa ga Mbori bipai tipa gbarasapa mokido te, nga gu bipai si aida ani saha ni gaani ka ani aida ka raka gu raka nga ga ngbarago. Rogo gu papara kekepai ye mbata fu gere, ani atona sakapai riipa gu pangbanga nga ga Maraki sangbanebi, kini tonaha na bambata kapita rogo gako buku. Awere tie, ani sanga tirani fuo kapita ue nga ga gu buku re na ki binga gu kura ga Mbori bipai tipa gbarasapa mokido. Wa vura duhe nga Maraki aafura tipa gupai naima manga bakuru kusayo tipa ga Mbori aboro fuo karaga yo tiyo Babera yo nga gu ringara i azi yo kurogoho, gu ue kapita re na wene apai rogoho tipa rani areme.
Agu Aboromotumo Mbori Aka Gayo Pai
4. Gini zahe Yekova afuhe fu aboromotumo?
4 Kapita 2 natona na ga Yekova gbarasa ngbanga fu agu aboromotumo nangia aYuda tipa mbu yo Gako ruru agene. Si adu nga, ka i airisanga gako arugute na ki mbakadi gayo agene ya, kerepai agbia yo agbia nirengo. Oni kparianga veresi sa na ue: “Ako aboromotumo, awere, gi rugute re du tipa roni. Ka oni adéga nga turoni sa ni ya, ka oni amáa nga ha ku kpotoroni yo sa fu taarimo fu rimore a ya, wo pai Yekova nga ga arimbasa ko, mi akéda motiwa ku ri roni mi ki rogo gaoni amaku.” Wa ka aboromotumo ayugu ga Mbori andiko fu aboro na ki bandaha nga yo, ka i afu maku afu fuyo. Ono mbiko i abasapa gupai Mbori akpinyemuhe, si adu nga, motiwa nika ye kuriyo kuba maku. Na si adu a nga, zavura agu amaku ka aboromotumo fuhe kurii aboro, si asa tihe ni kina motiwa.
5, 6. (a) Tipagine Mbori aka ga aboromotumo pai tini gbe? (b) Rogo gini afugo Yekova ayugu gupai nga, ko aidanga na ga aboromotumo pai te?
5 Tipagine i abira aboromotumo tini kisusi kura aboro? Veresi 7 nafu nduhe ziazia: “Ngba boromotumo ka abanda inahe, aboro ki nigbata rugapai ngbako, bambiko ko nga ga Yekova mokedi.” Mbata fu agarã kutu sa kusayo, gu ga Mbori andiko ko afuhe kube Mose ayaa ga aboromotumo sunge angia ka “yugo pa agu arugapai dunduko fu awiri aYisaraere nga gu gumba Yekova” paha. (Pa Amotumo 10:11) Si ni pa gberarago nga, ti kura regbo kusa, gu boro nake gupai du rogo 2 Pekapai 15:3 atingidi gupai nga: “Tipa gbanga rago aYisaraere anara nga fu ndikidi Mbori te, gu boromotumo nayugo pai adu nga na yo a te, na rugute a te.”
6 Ti rago Maraki, rogo gu bisue kama agarã Mbata fu Gaani Regbo, agu apai nadu tipa aboromotumo akparanga ti gu gumba yo paha re te. I ayugonga ga Mbori aNdiko fu aboro te. Sidu, si aidi i sana agu aboromotumo re i karagapai tipa gi gayo mangaapai re. Oni kparianga gu nyanyaki afugo Yekova agumbaha kuti yo. Maraki 2:3 nayaa: “[Mi abe] regbo nya kpakpuroni yo, nga kina regbo gaoni amotumo.” Nairiwo gi birahe re! Si ani idi gupai nga, i naatinda regbo agu anyaa i anatumo na ami ku gii bataya yo na ki zoho yo. (Pa Amotumo 16:27) Ono tie, ho Yekova aya ni fuyo kuba gupai nga i zoho gii bataya yo ko nika be kpakpuyo nani, si aayugo gupai ziazia nga, ko aidanga na gayo amotumo te kodihe kuti yo a.
7. Tipagine Yekova azingi tini kuti abayugu gako Ndiko?
7 Dungu kama agarã mbata fu ga Maraki regbo, Yekova asia aRevi ki fu gu sunge fuyo nga ga ngera fuo gu bambu rokoo nadu tipa irisombori na kusa ka ngera fuo yekaru gbiati ziazia asunge. I nangia abayugupai rogo ringara Yisaraere. Pa manga yo gayo asunge ka ye na unga gbiakuti zereda fuyo na fu gu rikaaboro re a. (Pa Geda Aboro 3:5-8) Wa si avura du wo, aRevi adunga na gu gunde ti Mbori i adu nani mbata te. Si du Yekova aya tini fuyo: “Oni sa tironi ku bani ti gu pai re; oni kotosi dungu yo ni gaoni rugapai; oni wasi gu mokido nga ga Revi. . . . Oni aka nga kuti gimi apai [te].” (Maraki 2:8, 9) Ni kpa yo ti yugu rengo fu aboro, na ni yugo yo gbegbere kpiapai fu aboro, aboromotumo aingisi dungu aYisaraere, sidu, si aru aru fu Yekova ko zingi kuti yo.
Banda ga Mbori ANdiko
8. Si ni gasigasipai fu aboro i irisi ga Mbori andiko? Oni sakinga rogoyo.
8 Ka ani ya berẽnga gupai nga, si aidi i yugu nunga fu agu aboromotumo re ya, na ki mbupai fuyo mbiko i angia kina kungbo kpakpa aboro si du i arengbanga tini ka irisa ga Mbori andiko ya. Rengo nga, aboro rengbe arengba ka irisa ga Mbori andiko, mbiko Yekova asananga aboro i mangi gupai ka i arengbanga ka mangaha ya te. Si nawiraha nga, bete kura aboromotumo anairisa ga Mbori andiko airisa ti gu regbo re, na kapa ho tipa Yesu nga guko namangihe kusa te, nangia bakere “Gbiamotumo.” (AEbere 3:1) Si aru aru i ya tipa ko: “Ndikidi rugahe adu ngbako yo, irairapai adu nga ngbako yo te. Ko ata na mi rogo zereda na rurupai, ko ki sa dungu aboro ti irairapai.”—Maraki 2:6.
9. Gini aboro gbaragi rengo ni ruru mangaapai ti gi gaani regbo re?
9 Ni ringbisapai na kuraha, mbedimbedi awirina Kristo aima digo nimangisunge ni “ziazia aboro motumo tipa tumo ni agu amotumo nga ga toro, du ni wene he gbe ku bangiri Mbori” tipa agarã susi kama sa daa ku awere. (1 Petero 2:5) I nangbembatayo rogo sunge gbaraga agu arengo nga ga Ziazia Kekeapai fu kura aboro. Wa oni awirika gu rengo i ayugoho, kuti gupai bi kina boro oni he ni bangironi, anga gu rengo nga ga ndiko du ngbayo i ayugoho fu aboro tee? I ima undo dungu aboro i mbu agu aziree nga ga pambori, sangbanaha nga, amirioni aboro gu duho awere rogo zegino dunduko ima wirika gu rengo nga ga Ziazia Kekeapai na ki duna gu maabangirise nga ga gbia nyeanye unga. Agi aboro re tigayo a na mamu beyo ka yugo gu ndiko nga ga rengo fu kura dungu aboro.—Yoane 10:16; Yugoti 7:9.
Ndupai Tipa Duna Rubangirise
10. Tipagine si aida ani du tini na rubangirise?
10 Ono tie, ndupai kinaho tipa ani duna rubangirise. Pai rengbe arengba ka manga ani ki zanga giarogo gupai i aida ka gumbaha rogo Maraki 2:1-9. Ani na rubangirise tipa ka i ginga irairapai ngba rani ya? Ni kpiapai, ya mo gaani aborokporo rengbe nirengo ka kido kuti agu apai ani agumbaha? Ya mo agu awirinarani nga ga toro yo du rogo dungurati rengbe ka manga kina gu bangisapai re? Si taata boro sonosi gu sino nga ga mbakada fugo nga agu afugo nawira si ru aru ono du nzunzu nga afugo biriki. Watadu boro rengbe ka durugo agu apai du tipa agu ahe ni abagaha watadu ka oka gu rukutu apai si aida ni gumbaha agumba nga gu nabipa agu ahe ni abagaha. Ya mo Yekova abingaha te? Na ka ani pefuo ngbatunga gu mangaapai re, ya mo ko rengbe ka ida na gu gaani motumo nga ga ngbaa?
11. Ada gbe si aida i duna rubangirise?
11 Tipa agu aboro duna mamu beyo areme ka yugo Fugo Mbori rogo adungurati, si naida Maraki 2:7 du fuyo ni rugute. Si nayaa si naida ngbayo ‘banda inohe, aboro kini gbata rugute’ ngbayo. Rorõi tindiro gu du rii ngbatunga agu abayugupai re, mbiko Yakoba 3:1 nayugo gupai nga i “asapa ngbanga abayugupai [asapa] nyanyaki.” Wa vura duhe nga, si naida i du zaaza rogo gayo yugupai, si naida i moi mburu gupai i ayugoho rii gu Fugo Mbori duni kekehe na rii agu arugute naye be ga Yekova riigbu. Ni manga yo ho were i ‘kini rẽ tipa yugopai nzunzu fu kura aboro.’ Si du i aruga yo tini niyaa: “Mo ké na mbakada pa tiro bangiri Mbori, ko idi pa ro wa gu mangisunge [nga ga pambori] adu nga na zee ya, niyugu ga rengo pai [“niyugu gu fugo nga ga rengo,” NW ] nzunzu.”—2 Timoteo 2:2, 15.
12. Gini rubangirise si aida agu aboro nayugopai du nani?
12 Ka ani adunga na rubangirise ya, ani rengbe ka duni asadiasadi rani ka rimiso agu apai ngbaa tirani watadu gaani aberã kurogo agu apai ani ayugoho. Gure rengbe ka duni kerepai, gbe fu gu boro nakido kina kuti gani aberã si ki vura nitagbagatihe na gupai ga Yekova riigbu ayugoho vurũ. Ono Maraki kapita 2 nayugo gupai nga, si naida agu abayugupai du rogo dungurati zi tiyo kuti gu inohe nga ga Mbori angianga kuti gayo aberã ya, nga agu aberã rengbe ka sa avusende ami koto. Yesu ayaa: “Gu ni ka mangi gu toni gude sa idi pa re ni koto, si ka ngba tipa ni ka i vo kikii mbia kuti goni, ki ba ni ku bebere baime yo.”—Matayo 18:6.
Manga Rogatise Na gu Boro Nga Zanga Idapase
13, 14. Gini gbarasapa mokido sa Maraki agbeberã aboro sani?
13 Tona ti veresi 10 ka ndu kumbatayo, Maraki kapita 2 nanyakasapai ngburungburu riipa kuo mokido. Maraki nagbeberã rani kuti asino mangaapai ue nga gu ko afura tipaha bara dunguhe na gu fugo nga ‘gbarasapa mokido.’ Ni bambatapai, oni kparia gupai nga, Maraki atona gako arugute na agu asanahe nga: “A nga barani sa dunduko te? A nga Mbori sa fu rani te? Tipagine tie zanga ani manga pa akuarani ti ni [“tipagine ani agbarasapa gu kido tini du aboro nani kuti rani‚” NW ], ki nigbarasi ga abarani mokido?” Fuo gure, veresi 11 nagbia gupai kuti ni nga, ga aYisaraere mangaapai nga ga gbarasapa mokido angia gbarasa kina boro “gu ziazia ba nga ga Yekova.” Ginipai i anamangaha nagbere wa gure? Gu veresi re nayugo irairapai sa dagba agu i anamangaha: I arogodi ‘adee dagba aguyo naairisa kungbo mbori.’
14 Ka pehe rogo kura afugo, bete aYisaraere nga agu aboro naima kpara tiyo fu Yekova, aima manga rogatise na agu aboro naairisanga ko ya. Gu pangbanga du tipa gipai re nika undo rani ani ini wai si adu nikerehe. Veresi 10 nayaa bayo adu sa. Anga Yakobo (nga guko i a’aria rimoko kusa nga Yisaraere) watadu Abarayama zavura Adamu i aaberã payo te. Maraki 1:6 nayugo Yekova ni gu ‘bayo’ nadu sa i aaberã pako. Gu rikaaboro nangia aYisaraere adu rogo pagume na ko, kingia agu aboro nadu rogo gu mokido nadu dagba atitayo na ko. Ndiko sa dagba agu nadu rogo gu mokido re angia: “Ka oni amánga nga pa rogatise na yo ya, ka oni afú nga awironi nga ade fu awiriyo a ya, ka oni adía nga awiriyo ni ade fu awironi . . . a ya.”—Pa Fu Rugute ni Ue he 7:3.
15. (a) Wai rengbe kura aboro ka rugusapa manga rogatise na zanga idipase ya ruhe aru? (b) Wai Yekova afura tipa agu apai nabipa rogatise?
15 Gu kura aboro rengbe ka sakapai berãyo yo areme ki ya: ‘Gu boro mi akpinyemu ni re nga wene sino boro nirengo. Kusa, ni adia rengo adia kugume nirengo.’ Ngbatunga gu berã re nanyakasapa gu rugute naye be ga Mbori toro nga gu nayaa: “Kpotoboro yo nangi ahe ki susi ahe dunduko.” (Yeremaya 17:9) I gumbapa ga Mbori bipai tipa manga rogatise na gu boro nga zanga idipase rogo Maraki 2:12: ‘Yekova arógoda agu aboro kusayo namangaha.’ Sidu, i nazungodi rani ani mangi rogatise “kina rogo Gbia yo.” (1 AKorindo 7:39) Rogo gu sino mangaapai nga ga aKristano, i ‘arogodanga aidipase kusayo’ mbiko i mangi rogatise na zanga idipase te. Wa vura duhe wo, ka gu zanga idipase re nye kindi rogo gani zanga idapase, ginipai nika manga ngbatunga gu boro re ho Mbori ka digiso gi zegino ni re?—Atambuahe 37:37, 38.
Rungosi Badia Rogatise
16, 17. Gini gene nga ga gbarasapa amokido gu kura aboro andu ngbaha?
16 Fuo gure, Maraki afura tipa gu ue gbarasapa mokido: nga rungosi boro gani badia rogatise, gbe, ni gu mbutise arunga ya. Rogo kapita 2, veresi 14 nayaa: “Yekova adu ni dezire tipa gu mokido naadu dagba roni na de parangaroni, nga agu yo oni ambu yo ka i vura du ni gaoni badiata vurũ ni diaroni rogo pa ndika a vurũ.” Ni gbarasa yo pa gu mokido i amangihe na adia yo, agu aYuda nangia akumbakuadee asa gupai nga adee ‘buza ga Yekova bamotumo na aume’ bangiriyo. (Maraki 2:13) Agu akumba re aambu adiayo riipa agu apai si aidanga i mbu yo tipaha ya, nga ka mbu agu adiayo i amangi rogatise na yo ngba paranga yo tipa ka roga paranga adee watadu ka roga apagano. Agu aboromotumo nangia iraira aboro anasoganga gipai re te! Wa si avura du wo, Maraki 2:16 nayaa: “Bambiko mi nasoga pa mbu de, wo poi Yekova nga ga aYisaraere Mbori.” Kusa, Yesu ayugu gupai nga, kina pa bäri sa rengbe ka mbugene fu boro wenesa ni mbu gani badia rogatise na kini fu gene funi ni rengbe ka manga gu kura rogatise.—Matayo 19:9.
17 Oni berẽnga kurii afugo Maraki, na ki binga wai ngbaha ti aboro na kingia gu bangua mangaapai nga ga weneringise. Ko afura tipa ‘gaoni badiata nga diaroni oni amangi mokido na ri.’ Agu akumba dunduko nibasasa gipai adu tipa yo re angia agu aboro naima roga agu adee nangia aidipase ni aYisaraere, nga agu adee i asiaka yo asiaka na payo aima kio bangiriyo tipa ka sa yo ni gayo abadia sungo rogo gayo raka. Wa si avura wira gupai nga i amangi gayo rogatise ngba paranga yo, pa susa regbo na gu gbinza ye sayo agbarasanga pa gu mokido i amangihe te, nga gu ngbaanga nga ga rogatise.
18. Rogo gini agene gu ga Maraki rugute nasoga gbarasapa mokido amanga areme?
18 Gu rugute du tipa agu apai re na ome tini areme a wa si adu ti gu regbo re. Si ni pa zee nga, kura aboro nabasapa ga Mbori arugute nga gu du tipa manga rogatise kina rogo Gbia yo. Na si a ni gupai naye na kina birahe mbiko gu kura aboro amanganga asadatise ka banda gayo rogatise si nye nyanyakii te. Kuba gure, i nadiapai kusayo riyo na kini mangi gupai Mbori asogaha ni mbu yo gayo badia rogatise riipa gu ndupai Ziazia Kekeapai aidanga ha ya tipa ka manga rogatise na kura boro kia. Ni manga yo ngbatunga agi apai re, i ‘nambusa Yekova.’ Bakuru kusayo ti regbo Maraki, agu aboro nanabasapa ga Mbori arugute re aima duna wingbaduse ka berã gupai nga, ga Yekova bipai arunga te. Gupai nzunzu i agumbaha nga: “Wari du [gu] Mbori ni nasara ngbanga ni ruruhe?” Nga gu iraira berã! Ka ani ya tinga kurogo gu gbina re ya.—Maraki 2:17.
19. Wai rengbe akumba na adiayo ka gbia ga Mbori toro?
19 Maraki afura a tipa gu kura aboro rengbe ani ka fu tambuahe fuyo, ko aya kura akumba adu kinaho naagbarasanga pa gayo amokido na adiayo ya. I ‘aduna yangara ga Mbori toro ti yo.’ (2:15) Si ni pa ngbarago nga, ga Mbori riigbu areme hi be ngbatunga agu akumba ‘nafu irisa fu adiayo.’ (1 Petero 3:7) I atakanga adiayo watadu ka senga yo te, i asosodanga yo kuti gbegbere sino kodaba na yo te, na i ahenga fu irisa fu adiayo ni nge yo gbegbere mbaro na kura adee watadu ka ngana kura adee na sanza bangirise watadu kaa biko kpia kundiri adee te. Ga Yekova riigbu a na dungu ruru adee ni aKristano rogoho nga aguyo duni ruruyo fu Mbori na kini irisi gako andiko. Ngbatunga agu akumba na adee re ima ino gupai Mbori asogaha, na i naberã na kini mangiapai a wa si aida si du. Oni nindu kumbatayo kindi wa kina yo, ‘kini gisangba Mbori susi sangba aboro,’ fuo manga oni he were, oni agbia maku mbiko gako ziazia toro.—Amokedi 5:29.
20. Gini regbo nambeda tipa ngbatunga aboro dunduko?
20 Mbembedii kumbatayo, Yekova nika ye na sapangbanga kurii gi zegino re nabaha. Aboro dunduko nibasasa nika karagapai fuko tipa gayo aida na tipa agu apai i amangihe. ‘Ani nibasasa aríngbisapa tirani aringbisa fu Mbori.’ (ARomo 14:12) Sidu gu wene sanahe rengbe ani ka sanaha awere nga: Ada nika bata rogo ga Yekova uru? Gu biata papara kekepai na nga yangaraha rogo gi tangaratangara kekepai ti genehe re nika fura tipa gu riipai re.
Oni Rengbe ka Sakarogoyo?
• Tipa gini bambata ndupai Yekova abisirapa agu aboromotumo tini nadu ringara Yisaraere yo?
• Tipagine adunga ga Mbori andiko tini ni gasigasipai fu aboro ka mangaha ya?
• Tipagine si aida ani du tini na rubangirise rogo agu apai ani ayugoho areme?
• Gini mangimangi apai ue Yekova asogoho gbe?
[Gu kpiahe du ti kpewaraga 25]
Ti regbo Maraki, Yekova abisirapa aboromotumo mbiko i airisanga gako andiko te
[Gu kpiahe du ti kpewaraga 26]
Yekova agbarasi ngbanga fu agu aYisaraere nambu adiayo riipa gu rukutu apai ka i ambunga dee tini ya tipa ka rogoda agu adee nangia apagano
[Gu kpiahe du ti kpewaraga 26]
AKristano areme nairisa gu gayo mokido nga ga rogatise