Oni Pefuo Gu Kpiapai Nga Ga Abakindo

“Ni aké kpia gi ndika re . . . si ki du be ni, ni agéda agu apai du yo dedede wa du ni ni ungani.”—PA FU RUGUTE NI UE HE 17:18, 19.

1. Da rengbehe Kristano idi ka du wa ni?

SI AWIRANGA oni rengbe ka berẽpa tironi ni bakindo watadu ni nakindo te. Rogo ginipai rengbe gu ruru Kristano nga bawisigi Ziazia Kekeapai ka ringbisapa ti ni kuti bakindo, wa gu wene aBakindo nangia Davide, Yosiya, Izikiya, watadu Yosafata? Wa vura duhe wo, oni rengbe arengba ka du wa yo na si naida oni du wa yo rogo kparakpara gene kandara sa. Gini gene du ngaha? Na tipagine si aida tini oni du wa yo rogo gu gene re?

2, 3. Ginipai Yekova aima bihe kumbatayo tipa gu bakindo nga boro, na gine si aidi gu bakindo re naamangaha?

² Rago Mose, bakuru kusayo mbata fu Mbori idi gupai nga bakindo duho ni boro kaa zoga aYisaraere, Ko aima bi gupai kumbatayo nga nyemu gupai nga i sia boro ni duni bakindo kuriyo akura akura dagba Gako aboro. Si du ko asa gako toro tini si rugu Mose ko kodi wene arugute kurogo gu Ndiko nangia ga mokido. Si angia arugute fu abakindo.

³ Mbori ayaa: “Ho oni ka da ni ku rogo gu ringara nga gu Yekova gaoni Mbori afu he fu roni, oni . . . [ayaa,] ‘Ani amáa bakindo ku ri rani, wa agu arikaaboro dunduko du pati rani kirikiri’. Oni amáa ni ni bakindo ku ri roni ni rengo, gu ni Yekova gaoni Mbori ka sia ni. . . . ‘Si adú were, ho ni ka sunga ni auru gani mbatabakindo nga ga gani ngbi, ni aké kpia gi ndika re tipa ni ku rogo kitabu’ . . . si ki du be ni, ni agéda agu apai du yo dedede wa du ni ni ungani, ya ni wiriki pa gunde ti Yekova gani Mbori, ka ka kuti agu apai dunduko nga ga gi ndika re na gi rugaapai re, ka amanga ha.”—Pa Fu Rugute ni Ue he 17:14-19.

4. Ga Mbori arugute fu abakindo angia gine?

⁴ Nirengo, gupai si aidaha nga, gu bakindo Yekova nika sia ni ni zogo airisi ko, si aida gupai beni ka ni ke wirina gu kekeapai rengbe oni ka bihe awere rogo gaoni Ziazia Kekeapai. Fuo gure, si aida gu bakindo re nigedi gu wirina kekeapai re dedede na a’uru dunduko. Anga si adu nga gu gedapai re nikangia gupai boro amangaha dedede tipa si undo ni ni naatingida apai te. Si angia wisigopai, na si adu nga pa mangaha wo afu undo afu. Si adu nga, gu bakindo Yekova nika ida na gani pai nga kina guni nikaa wisigopai wa ngbatunga gure tipa ka mbakada ngbaduniyo si duna wene sangbakpotoyo na ki kakuti ni wo. Si aidi gupai beni a nga ni wisigi gu kekeapai re tipa ka duni gu bakindo duna diabese rogo gani mangaapai na ki duna rugatinapai.—2 Abakindo 22:8-13; Asanza 1:1-4.

Oni Wirikipai Wa Bakindo

5. Gini apapara Ziazia Kekeapai naduho tipa Bakindo Davide keke awirinaha na kini gedihe, na wai ko aberẽ tipaha?

⁵ Ginipai oni aberã ya si nangia gupai si aida Davide mangihe ho ko adani ni bakindo kurii aYisaraere? Si aidi ko keke awirina gu Bambata Abuku Bisue nga ga Ziazia Kekeapai nga (Bambata Pai, Gate, Pa Amotumo, Pa Geda Aboro, na Pa Fu Rugute ni Ue he). Oni berẽnga pa gupai narimi ku berã Davide yo na ku ngbadukoyo wa kina boro ko aguari kaa ngana gi Ndiko re na kini keke awirinaha ni beko. Si nawiraha nga, kina Mose a nake gu buku nga Eyobo kodihe kuti Atambuahe 90 na 91. Ya mo si aidi Davide keke awirina agi abuku re a? Si nawiraha awira wo. Berewe a, si nawiraha nga, agu abuku nga Yosua, Abasapungbanga, na Ruta aduadu a beko. Sidu, oni rengbe ka bi gupai nga, Bakindo Davide aima duna bakere papara Ziazia Kekeapai beko ka gedaha na ka ruga tiko nani. Na oni na ndupai beroni ka ida kuti gupai nga, ko aima mangaha wo. Gumba ani he wo mbiko gupai ko agumbaha tipa ga Mbori Ndiko du awere rogo Atambuahe 19:7-11.

6. Wai rengbe ani ka ruga tirani na gupai nga, Yesu aduna nyemu Ziazia Kekeapai tiko wa kina gu nyemuhe adu ti titako nangia Davide?

⁶ Bakere Davide, nga Yesu Wiri Davide, amangipai wa kina gure. Si angia sino Yesu kaa ndu kurogo gu bambutiria nadu pakpuyo na aposo dunduko. Yo ko anagia Ziazia Kekeapai ni i nigedihe na kini sakirogoyo. Na kurii gure, kina boro Yesu nitiko ti kura aregbo nanageda Fugo Mbori kuari gbaiga na kini sakirogo wai si aida aboro mangihe. (Ruka 4:16-21) Si taata oni ini gupai nga, ko aima inido tiko na Ziazia Kekeapai. Oni gedinga agu aBuku nga ga Wene Pangbanga, na ki kparia wai dedede ko anayaa, “si ni keke he,” watadu ka fura tipa kura kparakpara averesi rogo Ziazia Kekeapai. Ni kpiapai, rogo gu gako Tungusapai nadu rii Bagangara yo nga gu Matayo akehe, Yesu arogodi apai bara 21 rogo gu Ziazia Kekeapai i akehe rogo pa-Ebere.—Matayo 4:4-10; 7:29; 11:10; 21:13; 26:24, 31; Yoane 6:31, 45; 8:17.

7. Wai Yesu adu kia ti agu abarumbatayo rogo pambori nadu ti rago ko?

⁷ Yesu anairisa agu arugute du rogo Atambuahe 1:1-3 nga gu nayaa: ‘Boro maku nga gu boro atanga rogo ga gbegberẽ aboro rondo ya, ono gani ngbarago du rogo gu rugute nga ga Yekova, ni namakia pa gako rugute uru na yuru. Gupai ni amanga, si adu na diabese.’ Nga gupai du kia ti gu agu abarumbatayo rogo pambori nadu ti ragoko anamangaha nga aguyo ‘nasungu auru ga Mose mbata’ ono ki basapa “ga Gbia rugute”!—Matayo 23:2-4.

8. Tipagine gu ngbatunga wisigo Ziazia Kekeapai agu abarumbatayo rogo pambori nangia aYuda amangihe adunga tini na wiri undo ya?

⁸ Ono tie, ngba kura aboro rengbe ka zera be kura averesi nga gu rengbe yo ka sa fugoho kia niyaa Yesu aazeresa kina kpoto aboro yo ti wisigo yo Ziazia Kekeapai. Rogo Yoane 5:39, 40, ani nageda gupai yo Yesu agumbaha fu kura aboro ti rago ko: “Oni nawisiga Ziazia Kekeapai, bambiko oni naberã ha ya nyenye unga rogo yo; agu apai re si nga dezirere. Oni akpi nga nyemu ye kono du mi ni ka du ni ungaroni te.” Anga Yesu aazeresa kpoto aYuda yo ti wisigo yo Ziazia Kekeapai nga aguyo naadegatuyo koyo du ko ni te. Kuba gure, ko aakusa gu gayo mangaapai nga ga biriki ku yangura watadu gu gayo mangaapai naadunga nzunzu ya. Gupai i aima inoho nga, Ziazia Kekeapai rengbe arengba ka ndu na yo sa nyenye unga, ono tie kina boro gu bangisa Ziazia Kekeapai i aawisigoho re arengbe arengba a ka ndu na yo fuo Masiya nangia Yesu. Wa si avura du wo, i aka ki zanga dia ko kugume. Sidu, wiri undo adunga ti ngbatunga gayo wisigopai te mbiko i adunga ni agu aboro nadu na nyemu rengo tiyo te na ka i aidanga i yugupai fuyo a ya.—Pa Fu Rugute ni Ue he 18:15; Ruka 11:52; Yoane 7:47, 48.

9. Gini wene kpiapai amokedi gbiakuti agu anebi nadu mbata fuyo amoihe?

⁹ Nga wai gipai re adu kia ti gu nangia ga ga Yesu abawiriki kodihe kuti ga gako amokedi! I anawisigo ‘Ziazia Kekeapai nga gu rengbe ka sa boro ni iratatamana sa bata.’ (2 Timoteo 3:15) Rogo gi gene re, i adu wa kina agu anebi ‘nanasanahe na kini wisigi apai sirisiri.’ Agu anebi re anabinga gi gayo wisigopai re ni gupai i ka mangaha kakaka tipa kina bete adiwi watadu tipa kina garã sa gbua te. Gu mokedi nangia Petero aya tipa yo wee i ‘akakuti wisigopai kindi,’ gbe, wisigopa Kristo na pa agu apai nga ga taarimo nadu rogo gako sunge ka batasa ngbatunga aboro. Rogo gako bambata waraga ko akehe, Petero arogodi apai bara 34 rogo agu abuku bawe nga ga Ziazia Kekeapai.—1 Petero 1:10, 11.

10. Tipagine si aida tini ani duna nyemu wisigo Ziazia Kekeapai tirani wa du ani nibasasa?

¹⁰ Si ziazia tie nga, sirisiri wisigo Fugo Mbori angia gu sunge i afuhe fu abakindo rogo gu ringara aYisaraere nadu mbata. Yesu apefuo gi kpiapai nga ga wisigo Fugo Mbori re. Pa wisigo Fugo Mbori angia gu tindiro nga ga agu aboro si adu nga i nika zogarago na Kristo ni abakindo ngbangbaturũ yo. (Ruka 22:28-30; ARomo 8:17; 2 Timoteo 2:12; Yugoti 5:10; 20:6) Gi kpiapai nga ga abakindo re ni dingisoro areme fu agu aboro dunduko namaabangiriyo ka gbia amaku auru kpotosende be gu zogarago nga ga Kindo.—Matayo 25:34, 46.

Si Nga gu Tindiro Du fu Abakindo na fu Roni A

11. (a) Nibipa wisigopai, gini kerepai duho rengbe ka manga aKristano? (b) Gini asanahe si aida ani sana tirani nani?

¹¹ Ani rengbe ka nyakasa gupai na du ni parengo nga, si naida ndikidi aKristano dunduko nibasasa naawisigo Ziazia Kekeapai tipa tiyo. Anga si gbua nga gupai si aidi oni mangihe kina ho oni atona ka wisigopai ni na aDezire Yekova ti tonatonaha te. Wa du ani nibasasa, si naida ani diberã ka zanga du wa gu bete aboro nadu ti rago gu mokedi nangia Pauro, nga aguyo natonaha atona wenengai ono kini mo ka mbuhe kusa. I aima wirika “mburu gu tonatona apai nga ga sangba Mbori,” ngbatunga gu nadu wa “bambata tonatona apai nga ga Kristo.” Ono tie, i akanga kuti gayo wisigopai na rogo gi gene re i ki ‘súsi kumbatayo ki nyaki te.’ (AEbere 5:12–6:3) Wa duhe tie were, ruhe aru ani sana tirani ki ya: ‘Ginipai mi aberãha tipa wisigo mi Fugo Mbori nisare, zanga bipa gu regbo di mi he kurogo gu dungurati nga ga aKristano singia mi ata imanga te watadu mi ima dia dungu agarã? Pauro akparikpee tipa agu aKristano nadu ti rago ko i “híki be ina pa sangbako [Mbori].” Mi nayugo gupai nga, mi na kina gu bangisa nyemupai re tire?’—AKorosaio 1:9, 10.

12. Tipagine duhe tini ni nyanyakipa pai boro duna nyemu Fugo Mbori zanga piriga?

¹² Gu banguapai rengbe ka undo roni oni duna wene sino wisigopai nga ka sonosa nyemu Fugo Mbori kpotoroniyo. Atambuahe 119:14-16 nafura tipa wisigo boro Fugo Mbori dedede nga gu ni amangaha na gu nduhe nga ka gbia undo behe na kingia gu kura gene tipa ka gbia ngbarago behe. Berewe a, gure nga kina rengo ka si vura du nga oni ningia Kristano tipa gbanga regbo vurũ. Ni nyakasa ani gipai re, oni kparianga gu kpiapai nangia ga Timoteo. Wa gi Kristano naamangasunge ni bakumba rogo dungurati re avurangia “ga Kristo Yesu wene banzengere,” Pauro angarasi ko ko “niyugu gu fugo nga ga rengo nzunzu.” (2 Timoteo 2:3, 15; 1 Timoteo 4:15, NW ) Si ziazia tie nga, manga boro ‘pai kakaka’ nakoda wene sino wisigopai.

13. (a) Wai rengbe boro ka gbia kura regbo tipa ka wisigo Ziazia Kekeapai? (b) Gini ariapai rengbe oni ka mangaha tipa ka gbia regbo tipa wisigopai?

¹³ Tonatonapai tipa ka duna wene sino wisigopai dedede nga ka kpara regbo tipa wisigo Ziazia Kekeapai. Ginipai oni naamangaha nibi gipai re? Ka oni vura pe kina rengo tipa gupai bi oni he, ya mo oni naberã gupai nga, ka oni di bakere regbo tipa wisigopai nisaroni susi gu oni amangaha awere, oni gbia undo behe? Oni rengbe ka bakabangironi ki ya, ‘Wai rengbe mi ka gbia regbo tipaha?’ Gu kura aboro agbia regbo tipa wene wisigo Ziazia Kekeapai ni zinga yo rame yo kina boro ngbatutu wiso. I rengbe ka geda Ziazia Kekeapai tipa aminiti 15 watadu ka wisigo gupai i asiaha tipa wisigoho. Gu kurapai berewe kinaho rengbe arengba ka manga, ka oni arianga gu gaoni regbo mangaapai du rogo poso tooni tee? Ni kpiapai, kangia oni na gu sino nga kaa geda awaraga pangbanga rogo dungu a’uru watadu kaa degaturoni kuti agu apangbanga i agumbaha rogo terevizioni nyemu, oni rengbe ka mbu gupai re kandara rogo uru sa gbua rogo poso? Oni rengbe ka dia gu regbo kpara oni he rogo gu uru re tipa bakere wisigo Ziazia Kekeapai. Ka oni mbu gu regbo oni naadiaha tipa gia pangbanga du wa aminiti 30 watadu gu regbo du wa ngbatunga gure, ki saha tipa wisigopai nisaroni, oni aduna regbo beroni vuru garã yo wa asaa 25 tipa wisigopai. Oni berẽnga pa asaa 25 ka oni gbiaha kurii akuraha tipa geda Ziazia Kekeapai watadu tipa wisigopai rogoho! Gu kura berã gu fu yo ho herẽ: Vuru gu poso naye fuo gere, oni wisiginga agu apai mangi oni he ti digido agu a’uru re nibasasa. Oni bihe singia gu kurapai ho si aida oni mbuhe watadu ka zoga paha kusende tipa wa ka oni duna regbo ka geda Ziazia Kekeapai watadu ka wisigopai rogoho.—AEfeso 5:15, 16.

14, 15. (a) Tipagine du pa asasa tini ni nyanyakipa pai tipa wisigopai nisase? (b) Gine nga agu asasa rengbe boro ka maaha nibipa geda Ziazia Kekeapai?

¹⁴ Ginipai rengbe ka sa wisigopai si du fu roni taata gbe, watadu na nyemuhe tini? Oni moi asasa tipa agu apai oni aida ka wisigoho. Gini asasa duni ruruhe tipa wisigopai moi oni he kumbatayo? Tipa dungu aboro, gupai i aida ka mangaha nga ka geda Ziazia Kekeapai nabaha dunduko. Isoke ka si vura du nga daa ku awere, oni aima geda apapara Ziazia Kekeapai ti kura aregbo na ki gbia undo behe. Awere tie, oni rengbe ka diaberã ka geda Ziazia Kekeapai nabaha dunduko? Oni rengbe ka tonaha ni geda oni agu aBuku Wene Pangbanga du biama, fuo gure, oni ki gbisi fuo yangara ga aKristano Ziazia Kekeapai i akehe rogo pa-Giriki. Fuo gbia oni gu ngbarago na gu undo naye ni sangbana gi wisigopai re, gu kura sasa ka oni moihe nga ka tona kaa geda ga Mose abuku gu ti fuo kuraha gbiati agu abuku nape kuru pangbanga ki da ti digido Esetere. Fuo manga oni gure, oni abi gupai tie nga, daha ada oni gedi yangara papara Ziazia Kekeapai. Dee sa nasa tiri ni Kristano ho garãri adani ti 65 ake gu ramediwi ti sisi gari Ziazia Kekeapai ku dimo yo nga gu ramediwi ri atona ka gedaha tini na kusa, ri ake gu ramediwi ri anyasihe tini. Ri ima gedaha awere bara bisue! (Pa Fu Rugute ni Ue he 32:45-47) Kuba gupai nga ri naagedaha kpakpu kompiuta yo, watadu ka kusaha ti kura kpewaraga ka gedaha kpakpuhe yo, kina boro Ziazia Kekeapai du beri tipa gedaha.

¹⁵ Agu aboro naima geda Ziazia Kekeapai nabaha namanga kura apai tipa ka sa gayo wisigopai si du kindi na zuzuhe tini na kini fu undo fuyo. Gene sa dagba agu akuraha nga, ka sia gu buku du tipa wisigopai mbata fu geda gu buku nga ga Ziazia kekeapai. Rogo agu abuku nga, “All Scripture Is Inspired of God and Beneficial” na Insight on the Scriptures, boro rengbe arengba ka gbia wene atingidapai tipa gu pangbanga namangi, wai i ake gu buku nga ga Ziazia Kekeapai re, na agu aundo agu abuku re afuhe wa duhe nibasasa.a

16. Gini kpiapai si aida ani nehe nibipa awisigo Ziazia Kekeapai?

¹⁶ Ti regbo gaoni wisigopai, oni ne gu sino wisigopai du dedede ti gu dungu aboro i aya tiyo i nga wene abawiriki Ziazia Kekeapai. I nagbeberã yo gbe kuti weteka averesi si ki du wa aboro naenge pa ke Ziazia Kekeapai. Gu bete yo na’asada tiyo ka ya i akeke gu kura abuku nibasasa nga ga Ziazia Kekeapai tipa kparakpara aboro watadu i nagumba kurapai ya si nangia gu berã nadu rii gu boro nake gu buku re. Sangbana ngbatunga gu aberã nga ga aboro re rengbe ka sa boro ni berẽpa agu abuku nga ga Ziazia Kekeapai re ni kungbo kuru pangbanga gbua watadu ka ya pambori ni gupai kina aboro gbua asangihe. Gu kura wene abawirikipai nafu tiyo tipa wisigo agu afugo du rogo Ziazia Kekeapai. I nadingiso tiyo kuti wisigo wai fugo Ebere na fugo Giriki aenge kuba wisigo gupai fugo Mbori aida ka pehe. Ya mo oni nabihe ya ngbatunga gu sino re rengbe ka sa boro ni duna nyanyaki idapase nga gu rengbe ka fõngbaduniyo sa manga wenepai?—1 ATesaroniko 2:13.

17. Tipagine si aida ani bi Ziazia Kekeapai tini ni gu buku duna pangbanga rogoho tipa aboro dunduko?

¹⁷ Ya mo ru gu digisopai aru da gu wene abawirikipai kuti ni re? Ya mo rengo ngaha ya abuku Ziazia Kekeapai wa duhe nibasasa na banguapai a sa rogoho na i akehe tipa bangisa badona aboro gbua? (1 AKorindo 1:19-21) Rengo tie nga, agu abuku nga ga Fugo Mbori na nyanyakipaha nyeanye kindi tipa aboro dunduko na agarã yo nibakiakia dunduko zanga bipa agu apai du tipa yo. Ka si vura du nga i ake buku fu bangisa boro, wa Timoteo watadu Tito, watadu fu badona aboro, wa aGaratio watadu fu aFiripoio, ani dunduko rengbe arengba ka wisigo agu abuku re na si naida ani mangihe wo. Si ni nyanyakipa pai fu rani wa du ani nibasasa dunduko, mbiko buku sa rengbe ka fura tipa dungu riiapai na ki rengbe ka fu undo fu dungu aboro. Ii, gu pangbanga nga ga Ziazia Kekeapai si tipa aboro rogo arago dunduko, nga gupai naundo rani ani girogo gupai yo i arengbe tini ka sa fugoho kurogo dungu fugo aboro rogo zegino dunduko.—ARomo 15:4.

Undo Tipa Ro na Tipa Kura Aboro

18. Wa oni ageda Fugo Mbori, ginipai si aida oni naaberã kuriihe?

¹⁸ Wa oni kaa wisigo Ziazia Kekeapai, oni nika bi gupai nga, si afu undo ka oni gbata gene ka giarogoyo na ka asada tironi ka bi gu pagume du dagba gu futufutu apaparaha. (Asanza 2:3-5; 4:7) Agu apai Yekova nakusihe rogo Fugo ko si nikodikodihe kuti gako ringbisapai. Sidu tie, wa oni kaa gedapai, oni asadi ka bi gu pagume du dagbaha na gako ringbisapai. Oni rengbe ka berã kuriipa gu pagume du dagba gupai namangi, gu berã kuru oni baraha, watadu gu sangbanebi gedi oni he na ga Yekova ringbisapai. Oni sana tironi ki ya: ‘Gine gipai re agumbaha fere tipa Yekova? Gini pagume du dagbaha na gu ga Mbori ringbisapai i amangaha rogo agu apai du tipa gako Kindo?’ Oni rengbe ka berã berewe ki ya: ‘Wai rengbe mi ka mangasunge na gi pangbanga re? Mi rengbe ka mangasunge nani ho mi ayugopai ni watadu ho mi afu rugute ni fu aboro nga gu du mburuhe rii Ziazia Kekeapai?’—Yosua 1:8.

19. Da nagbia undo wa oni ape gupai oni awirikaha fu kura aboro? Oni sakinga rogoyo.

¹⁹ Berãpa kura aboro naye aye a na undo rogo kura gene. Wa oni kaa geda Ziazia Kekeapai na kini wisigihe, oni nika wirika vovo apai na ki gbia kura rugatinapai. Oni asadi tironi ka koda gi vovo apai re kurogo agu afugo nasonosa boro nga gu oni agumbaha fu gaoni aborokporo na fu kura aboro. Ka oni mangihe wo ti agu aregbo daha ada oni mangihe wo na zanga oni rẽkango roni, zanga kapa, ngbatunga agu asakapai re afu undo afu nirengo. Pa gumba oni gu rengo fu kura aboro wiriki oni he watadu gupai bi oni he niwenehe na pa gumba oni he zaaza nika ngba angba ti kura aboro. Gu susi gure nga, si aundo kina boro oni nitironi. Rogo gini gene? Abangbasia ainihe bi gupai nga, fuo susa gbanga regbo, boro natingida gupai ni awirikihe ka si du nga ni aima fugö gumbagumbaha berewe na berewe ho si aduni kindi nivovoho berã ni yo, wa gu nga ka gumbaha fu kura aboro.b

20. Tipagine du geda Ziazia Kekeapai tini dedede ni gupai nafu undo?

²⁰ Si nirengo nga, agu aregbo dunduko oni kaa gedapai rogo gu buku nga ga Ziazia Kekeapai, oni nika wirika vovopai awirika. Kina ngbaroni nika zera wa oni ka bi agu averesi oni agianga rogoyo mbata wenengai ya. Oni nika giarogoyo susi gu nadu mbata. Si naida gipai tie re nyakasi gupai fu rani nga, anga Ziazia Kekeapai gbua nga gu buku aboro akehe te, ono agu abuku nga ga Ziazia Kekeapai nga kikiipa ahe tipa rani na tipa ani naawisigoho dedede tipa ka gbia undo behe. Oni tingidi gupai nga, si aidi gupai be bakindo wa Davide were ko ‘naagedaha dedede ngba ungako.’

21. Gini mosoro rengbe oni ka maabangironi tipaha ka oni kiisi gaoni wisigo Fugo Mbori?

²¹ Rengo ngaha, agu aboro nadia regbo ka wisigo Ziazia Kekeapai kakaka nagbia undo agbia nibakerehe. I nagbia gu kikiipa inohe na gu dudungurobipai nga ga toro. Gayo pagume na Mbori nada ninyanyakihe na ni dawedawehe. I nada a ni agu aboro rengbe ka fu undo fu gayo aborokporo, fu agu awirinayo du rogo gu dungurati nga ga aKristano, na fu aguyo du ngbagene ka da ni airisi Yekova.—ARomo 10:9-14; 1 Timoteo 4:16.

[Gu rukutu kekeapai du bandu kpewaraga yo]

[Sanduki ti kpewaraga 11]

“Ngbabe Rani”

‘Kangia ani naida gu buku nayugobara apai kurogo Ziazia Kekeapai, anga gu kurahe ho ngbaa kisusi Internet te. Ono ka ani aida ka geda Ziazia Kekeapai, ka wisigoho, ka berã tipaha, na ka saka afugoho berã rani yo, si naida ani du nani ngbabe rani, mbiko gure nga gu yangara gene rengbe ani rogoho ka diaha kurogo gaani berã na ku ngbaduraniyo.”—Gertrude Himmelfarb, nga gu bakere bayugupai du pako kia ti ga akurako rogo gu bawirikapai nga, City University, New York.

Oni Natingidaha?

• Ginipai si aida agu abakindo nadu ringara Yisaraere yo naamangaha?

• Yesu na amokedi amoi gini kpiapai tipa geda Ziazia Kekeapai?

• Gini ariapai rengbe oni ka mangaha tipa ka gbia regbo tipa ka wisigopai nisaroni?

• Gini sino berã si aida oni wisigi Fugo Mbori nani?