Ga Yekova Taarimo Nahasarago Kurii Gako Aboro
“[Yekova] Adú ni gaoni nyenye imarago.”—YESAYA 60:20.
1. Wai Yekova afu maku fu gako ruru aboro?
“RAGO nangba ti Yekova tipa gako aboro; ko nangbanyasa bayee aboro na diabese.” (Atambuahe 149:4) Wo gu kuru bake Atambuahe agumbaha, na kuru pangbanga yugu gupai nga, afugo ko nga kina rengo. Ho du ga Yekova aboro ni niruru yo, ko nangera fuo yo, kini zugosi yo, na kini banda yo. Bakuru kusayo, ko anasa gako aboro i dibe avura yo. Areme, ko nasa yo i du nyanyakii rogo toroyo na kini kido yo tipa bata rii mburu ga Yesu motumo. (ARomo 5:9) Ko namanga gipai re mbiko i ni bawene yo bangiriko.
2. Wa i avura ni gbia tiyo na sogote, gine du ga Mbori aboro na kido tipaha?
2 Rengo ngaha, rogo gu zegino ima rindo kurogo bitimo, i narungosi agu aboro arungosi “kpi nyemu ka ka kuti sino Mbori.” (2 Timoteo 3:12) Wa vura duhe wo, Yekova ima ino pai tipa agu aboro narungosi gako amoyambu na kini za yo niyaa: “Gu rikaaboro na gu ngbi nikara nga fu roni ya, i akpí akpi; agu arikaaboro re i agbárasa yo kpakaya.” (Yesaya 60:12) Areme, aboro narungosi ga Mbori aboro rogo dungu angbatungaha. Rogo kura aringara, agu aboro narungosi ga Mbori aboro na’asada tiyo ka kandasi ndikidi aKristano ti iriso yo Yekova watadu ka ka na pa iriso yo ko beyo. Rogo kura aringara, kere sino aboro kura apambori nazubo airisi Yekova na kpata na kini zokodi gayo ahe ni we. Ono tie, oni tingidi gupai nga, Yekova ima diaberã tipa gupai ko ka mangaha fu agu aboro nasogote gupai ko akpinyemuhe. Asogo ko adunga na diabese te. Agu aboro nasovura kuti gu dee nga Siona, nga agu awiiri narukuba ri auru kpotosende, arengbanga ka duna diabese te. Anga gupai ye be gaani bakerepa Mbori nga Yekova re nangarasa rani tee?
I Fuku Amaku Susi gu Ani Aberẽ Paha
3. Wai i ayugo pa ngbaya ga airisi Yekova sunge na zuzuhe?
3 Rengo nga, rogo gi yangara areme nga ga gi zegino re, Yekova ima fu maku fu gako aboro susi gu i amoi bangiriyo tipaha. Gu susi gbe nga ko fongo ba iriso ko gbiakuti agu aboro du rimoko riyo. Kuti gu sangbanebi nga ga Yesaya, ko naya fu Siona wee: “Gu taarimo nga ga Rebanona ayé fu roni, nga ngua kupuresa, na degbe, na gu kura ha wa kupuresa a, ka mbakada ngbanya gu ba nga ga gi kparakpara ba; mi amánga ba ndure ni taasitaasi he.” (Yesaya 60:13) Agu agangara duni dadidadihe be abire nga bawene kpakpu rago ka bihe. Sidu, si daada i ringbisi zuzu ga airisi Yekova sunge kuti bawene bire angua.—Yesaya 41:19; 55:13.
4. Gine nga “kparakpara ba” na ‘ba ndu Yekova,’ na wai i nafongoho?
4 Gine nga “kparakpara ba” na ‘ba ndu Yekova’ nga gu gumba yo paha rogo Yesaya 60:13? Agi afugo re nafura tipa gu vurukporo nga ga ga Yekova bakerepa yekaru nga ga toro, nga gu mbakadimbakadipai du tipa mbeda koyo du ko ni ni irisombori rogo Yesu Kristo yo. (AEbere 8:1-5; 9:2-10, 23) Yekova ima fura tipa gako ringbisapai tipa ka taasapa gu yekaru nga ga toro re ni dungura ko aboro dagba rikaaboro dunduko i ye ka iriso ko yo. (Agai 2:7) Mbata fu gu regbo re, Yesaya nitiko aima bi rimbasa aboro dagba rikaaboro i nitiria kurii ga Yekova tumbatumba gangara yo nga ga irisombori. (Yesaya 2:1-4) Akama agarã kusa, rogo yuguyugupai, gu mokedi nangia Yoane abi “bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko.” Ko abiyo i narundu ‘barangba ga Mbori mbatabakindo, i nimangi pako uru na yuru rogo gako yekaru.’ (Yugoti 7:9, 15) Wa gi sangbaanebi re adigo rogo gaani a’uru, ani nabi ga Yekova bambu i nifongoho kina boro kuti bangirani.
5. Gini bakere wene ariapai namangi fu awiri Siona?
5 Nga gu bakere ariapai niwenehe mangi yo ho fu Siona re! Yekova nayaa: “Wa i ambu roni ki nisogo roni, ya ka boro susi nga yo du oni ni ya, mi asá roni ni nyenye abadukuriapai [“ni he tipa sambuotise,” NW ], ni ũngbarago fu gu rika ngbatunga aboro dati gu rika ngbatunga aboro.” (Yesaya 60:15) Ni mbedi kuti digido bambata vura nga ga zegino, “ga Mbori Yisaraere” agbia tiri nirengo ti regbo gberango. (AGaratio 6:16) Ri abi gupai nga ‘i ima mbu ri dunduko,’ mbiko awiiri aruganga tiyo na pa gupai Mbori akpinyemuhe beyo te. Fuo gure tie, rogo gu garã nangia 1919, Yekova aungasi gako mbedimbedi amoyambu berewe, na natona ti gu regbo re ka ndu kumbatayo, ko ima fu maku fuyo ni gu iiriwo zugo nga ga toro. Kurii gure, anga gu mokido du rogo gu veresi re ni gupai nafu ngbarago fu rani tee? Yekova abi Siona ‘ni gu dee du tipa sambuotise.’ Ii, awiri Siona gbiati Yekova nitiko aduna ngbarago be Siona. Ri adu “ni ũngbarago,” ni gu dee naye na yososo ngbarago fu aboro. Na gu ngbarago re adunga gbua tipa kina guru regbo te. Gu weneringise mangi yo Siona nani, a wa duhe tipa agu awiiri nga ga kpotosende yo narukuba ri, anyeanye kindi tona ti “rika ngbatunga aboro dati gu rika ngbatunga aboro.” Si adiganga wa gu sa te.
6. Wai ndikidi aKristano amangasunge na agu ahe nga ga rikaaboro?
6 Oni degenga turoni awere kuti kura ga Mbori kidohe. Ni fura Yekova fu Siona, ko ayaa: “Oni ambíra gu mamuanya nga ga arikaaboro a, ki niha mamu abakindo; oni aina ha ya mi nga Yekova, nga gaoni Batasi nga gu Ko natumo roni, nga gu Ko nga ga [Yakobo] Iraome.” (Yesaya 60:16) Wai Siona “ambíra gu mamuanya nga ga arikaaboro” na kini ha “mamu abakindo”? I namangaha rogo gu gene nga, mbedimbedi aKristano gbiati agu abadiangbayo nga “kura avusende” namangasunge na gu kikindigi pa ahe nga ga rikaaboro tipa ka zugosi ziazia irisombori. (Yoane 10:16, NW ) Agu agamahe aboro afuhe na ngbaduyo yo nasa gupai nga sunge tungusapai na sunge yugopai fu aboro rengbe ka manga rogo dungu aringara. Mangasunge ni tatamana na vovo birĩ-ino mangaahe naipiso sunge kusa Ziazia Kekeapai na agu abuku du mburuhe rii Ziazia Kekeapai rogo dungu afugo. Areme, gu rengo nga ga Ziazia Kekeapai ho fu dungu aboro susi gu nadu mbata rogo gu kuru pangbanga nga ga aboro. Aboro rogo dungu aringara nawirika gupai nga, Yekova, nga guko nakusi gako mbedimbedi amoyambu kusayo rogo gu zio nga ga toro i adu rogoho, nga Batasi nirengo.
Sona Kumbatayo Rogo gu Mbakadapai nga ga Riigbu
7. Gini bakere sona kumbatayo rogo sunge awiri Siona nabihe?
7 Yekova ima fonga gako aboro ngba kura gene. Ko fu maku fuyo rogo sona kumbatayo rogo gu mbakadapai nga ga riigbu. Ani nageda gupai rogo Yesaya 60:17 nga: “Mi ayé na dahabu ku ba sirigi, mi ki ye na feda ku ba kpano; na ku ba ngua, mi ki ye na sirigi, ku ba ambia mi ki ye na marã. Mi afú zereda fu gaoni abarukuriapai a, na rurupai fu gaoni abarugupasunge.” Pa ye na feda kuba dahabu nga mbakadapai nirengo, na kinawo a duhe tipa gu kura ahe gumba yo paha re. Na ngbanya kuti gipai re, agu aYisaraere nga ga Mbori yo ima bi gi sona rogo mbakadimbakadiapai nga ga riigbu re rogo yangara areme nabaha dunduko. Oni wisiginga bete kpiaapai tipaha.
8-10. Oni ringbisinga pa gu mbakadimbakadiapai nga ga riigbu nga gu mangi natona rogo 1919.
8 Mbata fu 1919, abaakumba na amoyambu undo nanangbembatayo rogo apai rogo gu dungurati nangia ga ga Mbori aboro nga agu akumba kina agu aboro nadu rogo dungurati anasia yo. Natona rogo gu garã re, ‘ruru kangara moyambu’ anasia boro ni duni barugupa sunge tungusapai rogo adungurati nibasasa tipa ni ningere kurii sunge tungusapai. (Matayo 24:45-47) Ono tie, gu mbakadapai re amanganga sunge wenengai rogo dungu adungurati te mbiko gu kura abaakumba aboro anasia yo re anasongodanga sunge tungusa wene pangbanga wenengai te. Sidu, rogo 1932, i afu rugute fu adungurati i mbu sia aboro ni abaakumba na ni amoyambu undo. Kuba gure, gupai i aidaha beyo nga i naasia akumba tipa i mangisunge rogo rondo sunge kodihe na barugupa sunge tungusapai. Gu mbakadapai re adu wa kina maa “feda” kuba “ngua,” nga bakere mbakadapai nirengo!
9 Rogo 1938, adungurati rogo zegino dunduko adiberã tipa dia gu mbakadapai re kugume, nga gu nadu na ngbanya kuti gupai Ziazia Kekeapai agumbaha ni gupai nanamanga mbata. I afu gu sunge nga ga ngera kurii dungurati fu gu wirina i ayamba ko nga, moyambu nga ga dungurati gbiati kura amoyambu, i dunduko kina ruru kangara moyambu anasia yo. Fuo duhe were, awirina anasianga aboro berewe i duni abaakumba te! Rogo gi gene re, i kini tona kaa sia aboro kina ngba gu gene Mbori aidaha. Gure adu wa kina maa “marã” kuba “mbia” watadu maa “dahabu” kuba “sirigi.”
10 Natona ti gu regbo re, apai nandu kindi kumbatayo niwenehe. Ni kpiapai, rogo 1972 i abi gupai nga, ka i sa gu gbuu nga ga abaakumba i naangera kurii dungurati ka bakumba adunga ho sa duna pagbia beni kurii gu yangara yo ya, pa ngera kurii apai rogo dungurati du teketeke wa kina ga agu aKristano nadu rogo bambata kama agarã. Kurii gure, mbata fu agarã ue kusayo, i ambakadi gu kurapai berewe. I amangi ariapai tipa agu aboro nangera kurii agu asunge i akeke paha kuti ndiko, kini sa gupai nga, aboro Riigbu Bipasunge rengbe ka maa berã yo gbe fuo agu apai nga ga toro nga ga ga Mbori aboro kuba gupai nga i naaora na a’uru dunduko fuo agu apai naida i naasigira paha ngbanga yo kuti ndiko.
11. Da nidu kugii gu ariaaria apai ninaamanga rogo gu riigbu nga ga ga Yekova aboro, na sangbana gi aria apai re nga gine?
11 Da du ku gii agi a’ariapai re? Anga kura boro ho fuo kina Yekova Mbori te. Ko nga gu boro nayaa: “Mi ayé na dahabu ku ba sirigi.” Na ko nga gu boro susi na fugo kini yaa: “Mi afú zereda fu gaoni abarukuriapai a, na rurupai fu gaoni abarugupasunge.” (Gu kekeapai duni pigipigihe re, ani du pigihe.) Ii, Yekova du nga gu boro nangera kurii gako aboro. Gu pa mbakadaapai rogo riigbu i agumba paha kumbatayo nga kura gene ko afonga gako aboro ngbaha. Na i ima fu maku fu aDezire Yekova rogo dungu agene ni sangbana gipai re. Ani nageda gupai rogo Yesaya 60:18 nga: “I agía nga pa mangapai ni zuu rogo gaoni ringara berewe te, pa nyasa he gbua na pa kuadirago rogo gaoni bangbandarago berewe a te; oni ayá ti gaoni angapa bakporo, Bata, na gaoni akpuguru bakporo, Tambuahe.” Nangbaa agu afugo re! Ono wai duhe nidigisidigisihe?
12. Wai pazereda aye ka duni banguapai dagba ndikidi aKristano?
12 Ndikidi aKristano nangera kakaka kina kube Yekova tipa arugute na rugapai, na sangbanaha namanga a wa Yesaya aima gumba paha kumbatayo: “Awiro dunduko kina re nikayugo pai fu yo, ga awiro wenepía adú ni bakere he.” (Yesaya 54:13) Kurii gure, ga Yekova toro namangasunge kurii gako aboro, na papara zuzu gu toro re nga zereda. (AGaratio 5:22, 23) Sangbana gu pazereda nga ga ga Yekova aboro nasa yo wa kina ba gbuko rogo gu ngbii nga ga zuũ. Gu gayo pazereda moi yo mburuhe rii gu nyemuse du ndikidi aKristano nani tipa akurayo nga mboimboi gupai nika manga rogo vovo zegino. (Yoane 15:17; AKorosaio 3:14) Nirengo, ani nibasasa duna nyemu gbia ngbarago be gu pazereda re na ka kodabee tipa ka zugosihe, nga gupai nasa aboro i sambuo gaani Mbori na kini fu irisa fuko na kingia gu banguapai namanga rogo gaani paradiso nga ga toro!—Yesaya 11:9.
Ga Yekova Imarago Nikaa Hasarago Kindi
13. Tipagine rengbe ani ka du tini na kido ya, ga Yekova imarago ahenga hasarago kurii gako aboro te?
13 Ya mo ga Yekova imarago nikaa hasarago kindi kurii gako aboro? Ii! Rogo Yesaya 60:19, 20, ani nageda gupai rogoho nga: ‘Uru adúnga berewe fu roni ni gaoni imarago uru te, na imaima ima diwi si ahásanga rago kurii roni yuru a te; ono mi Yekova nika du fu roni ni nyenye imarago, na gaoni Mbori nika duni gaoni taarimo. Gaoni uru atínga berewe te, gaoni diwi akpinga a te; bambiko mi adú ni gaoni nyenye imarago, arame gaoni kparakpee adigo adigo.’ Fuo digo gu ‘kparakpee’ nangia ga agu aKristano nadu rogo gu zio nga ga toro rogo 1919 re, ga Yekova imarago atona kaa hasarago kuriyo. Tingbafuo agarã susi 80 kusa, i nagbia ngbarago kindi be ga Yekova weneringise wa gako imarago ahasarago kindi kuriyo. Na si abisanga te. Nibi gupai du tipa airisi ko, gaani Mbori ‘atínga’ wa gu uru niti te watadu ka kpi wa gu diwi ‘nikpi te.’ Kuba gure, ko nikaa hasarago kuriyo nyeanye kindi. Nga gu wene mokido fu agu rani naraka rogo gi yangara arame nga ga gi zegino du rogo bitimo re!
14, 15. (a) Rogo gini gene du ga Mbori aboro dunduko ‘niruru yo’? (b) Nibipa Yesaya 60:21, gini kura nyanyakipa digisidigisihe kura avusende angera kumbatayo tipaha?
14 Oni ginga kura mokido berewe Yekova agumbaha tipa agu aboro narukuba Siona auru kpotosende, nga agu aYisaraere nga ga Mbori yo. Yesaya 60:21 nayaa: “Gaoni aboro dunduko adú ni ruru yo; i adía kumbo ringara nye anye kindi, wa [toma] ngua nga gu mi arũ he, gu sunge nga ga bere, ya mi du ni taasitaasi re.” Ho i akaraga mbedimbedi aKristano ni ku tingba sunge rogo 1919, i angia gu badona aboro nadu kia ti kura abadona aboro. Rogo gu zegino aboro naima diaberã kaa manga kina aingapai, i aima “di[a] pai ri yo” mbiko gu gayo nyanyaki idapase du yo nani kuti ga Kristo Yesu motumo tumorii. (ARomo 3:24; 5:1) Wa kina agu aYisaraere i akusi yo kusayo rogo zio Babera yo, i adi “ringara” ni gayo, nga gu ringara nga ga toro, watadu gu ngbii nga ga sunge, yo nga gu rago si adu nga i nika gbia ngbarago ni be gu paradiso nga ga toro. (Yesaya 66:8) Gu wene apai nga ga paradiso du rogo gu ringara re paha agberanga te, mbiko i wa agu aYisaraere nadu mbata te, agu aYisaraere nga ga Mbori yo du awere tigayo asanga tiyo ni iraira aboro wa du yo ni rikaaboro te. Gayo idapase, gayo hipai, gbiati gayo ngara rogo sunge nikaa ye na irisa kindi kuti rimo Mbori.
15 I ima dia agu aboro dunduko du dagba gu rikaaboro nga ga toro yo re kurogo vovo mokido. I dunduko duna ga Yekova andiko nikekehe ngbaduyo yo, na rii mburu gu motumo tumorii nga ga Yesu, Yekova ima mbupai fuyo ti gayo aingapai. (Yeremaya 31:31-34) Ko natakapande yo wa agu ‘awiriko’ duni ruruyo na kini mangipai na yo si ki du wa i ni rengberengbe yo. (ARomo 8:15, 16, 29, 30) I aima mbupai a fu agu abadiangbayo nga kura avusende ti gayo aingapai rii mburu ga Yesu motumo, na wa kina Abarayama, i natakapande yo ni ruru aboro ni abakurea Mbori mbiko gayo idapase. “I azundu gayo aremu, ki vurusi he ni kure Wiri [Vusende].” Na agi abadiangbayo nga kura avusende re nangera kumbatayo tipa kura bakere maku. Fuo i bati “rogo bakere gberãngbi,” watadu fuo i zingisi yo bekpio, i nika bi digisidigisi afugo Yesaya 60:21 rogo ndikidi gene ho kpotosende nabaha dunduko nika dani ni paradiso ki hi be agu aũzegino dunduko gumba yo paha rogo gu veresi re. (Yugoti 7:14; ARomo 4:1-3) Ti gu regbo re, “bayee aboro adía kumbo ringara, ki du na ngbarago tipa gu wenepia du kpaima.”—Atambuahe 37:11, 29.
I Nazugo Kindi
16. Gini iiriwo mokido Yekova agumbaha, na wai ko nadigisihe?
16 Ani nageda yangara ga Yekova mokido rogo gu yangara veresi nga ga Yesaya kapita 60. Ko nayaa fu Siona wee: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” (Yesaya 60:22) Yekova ima manga gi fugo re rogo gaani uru. Ho i akaraga mbedimbedi aKristano ni kuti ngba sunge rogo 1919, i angenga te, i angia ‘umba bange aboro’ nirengo. Bange yo akii ho i aye ni na kura agu aYisaraere nga ga toroyo ku dagba yo. Fuo gure, gu kura avusende kini tona kaa tiria fuo yo nga aguyo bangeyo naakio kina kumbatayo kindi. Gu pazereda du dagba ga Mbori aboro, nga gu du rogo gu paradiso nga ga toro du rogo gayo “ringara,” ima ye na agu aboro duna ruru ngbaduyo yo ki kodi yo kuti ‘umba bange aboro’ i ki dani “nyanyaki rikaaboro.” Wa du rago re, gi “rikaaboro” re, nga agu aYisaraere nga ga Mbori yo gbiakuti gu “kungba aboro” du bangeyo susi amirioni sita, ima nge kisusi bange dungu kura aboro ringara areme nga aguyo nazoga tiyo nisayo. (Yesaya 60:10) Aboro gi ringara re dunduko nayugo ga Yekova imarago fu aboro, na gure nasa yo dunduko ni bawene yo bangiriko.
17. Sangbana gi sakapai nga ga Yesaya kapita 60 re nga gine tipa roni?
17 Nirengo, si ni gupai nika nyakasa gaani idapase ka ani wisigi gu meme apai du rogo Yesaya kapita 60. Pa ruga ani tirani na gupai nga, Yekova aima ino gupai nga gako aboro adu adu nizizi yo rogo toroyo na fuo gure i ki zaki yo, ni gupai nafu wasa. Si nairiwo tirani ka ino gupai nga, mbata fu si mangi, Yekova aima ngera kumbatayo ki bi bange airisi ko si nazugo ti gi gaani regbo re. Na kurii gure, si ni gupai nafu wasa ka ino gupai nga, Yekova ambunga rani te! Nangbaa agu afugo nyemuse i akido rani nani ya angbadimo “bakporo” nika nye dedede ni kina zazaha tipa ka dia ‘agu aboro dunduko [ku gume] duna ruru berã sa nyenye unga’! (Amokedi 13:48, NW ) Yekova nikaa hasarago kindi kurii gako aboro. Siona nika du kindi ni gu dee naye na ngbarago fu aboro wa awiiri nika sa gayo imarago si naaki kindi imaima susi gu nidu mbata. (Matayo 5:16) Nirengo, ani ima diaberã susi gu nidu mbata tipa ka mbeda na agu aYisaraere nga ga Mbori yo na ka banda gu gaani mamu nga ga yugo ga Yekova imarago fu kura aboro!
Oni Rengbe ka Sakarogoyo?
• Nibipa sogote ga Mbori aboro, gine du ani na kido tipaha?
• Wai awiri Siona ‘nambiri gu mamuanya nga ga rikaaboro’?
• Rogo gini agene Yekova ‘naye na feda kuba ngua’?
• Gini asino ue nyakasi yo paha rogo Yesaya 60:17, 21?
• Wai ‘umba bange aboro’ nada ni “nyanyaki rikaaboro”?
[Sanduki/kpiahe ti kpewaraga 28]
GA YESAYA SANGBAANEBI
Si Nga Imarago fu Ngbatunga Aboro Dunduko
Gupai du rogo agi apapara kekeapai ue re, i aima kusaha ni gumbapai ti regbo Kikindigi Adunguratise nga ga A’uru Biata nga gu namangi rogo agu agarã nangia 2001 na 2002 nga gu Bakere Dunguratise riihe adu nga, “Abayugu Fugo Mbori.” Ti digido gu gumbapai re, rogo dungu aba, gu wirina namangi gu gumbapai re ayugu vovo buku fu aboro du rimoho nga, Isaiah’s Prophecy—Light for All Mankind, Gu Ue Kpakutoho. Rogo gu garã naye mbata fu gure, i aima kusa gu buku du rimoho nga, Isaiah’s Prophecy—Light for All Mankind Gu Bambata Kpakutoho. Na fuo kusa yo gi vovo buku re, vovo sakarogopai gu duho awere tipa agu averesi mbembedii dunduko du rogo gu buku nga ga Yesaya. Agi akpakuto abuku re nga wene aũsunge rogo giarogo gu buku sangbanebi nga ga Yesaya wenengai na si nasa rani a ani duna tambuahe tipa gi ga Yesaya abuku nasa rani ani duna idapase re.
[Gu kpiahe du ti kpewaraga 25]
Ti regbo gu sogote yo nga ga zuũ, ‘Yekova nafonga gako aboro na bata’
[Gu kpiahe du ti kpewaraga 26]
Ga Mbori aboro namangasunge na gu kikindigi pa ahe nga ga rikaaboro tipa ka zugosi ziazia irisombori
[Gu kpiahe du ti kpewaraga 26]
AGAMAHE
TIPA
TUNGUSAPAI ROGO ZEGINO DŨ
[Gu kpiahe du ti kpewaraga 27]
Yekova ima fu maku fu gako aboro rogo gu wene mbakadimbakadiapai nga ga riigbu
[Gu kpiahe du ti kpewaraga 28]
ISAIAH’S PROPHECY Light for All Mankind VOLUME II