“Gu Umba Pa Boro” Ima Dani “Kutu Sa”

“Gu umba pa boro adú wa . . . kutu sa, gu toni ni ki ngia nyanyaki rikaaboro.”—YESAYA 60:22.

1, 2. (a) Tipagine bitimo adada kpotosende tini areme? (b) Waigu ga Yekova timarago naahasarago tooni tooni kurii gako aboro?

“BITIMO adáda kpotosende, nduunduu bitimo ki dadi aboro; ono Yekova ayé [ahasarago, NW ] ku ri roni, i abí gako taarimo ku ri roni.” (Yesaya 60:2) Agi afugo re naringbisapa agu apai wenengai nidu auru kpotosende natona rogo 1919. Ngbiiakristano aima ka gupai nayugo padu gu bakindo ho nga Yesu Kristo, “nga gu imarago nga ga zegino.” (Yoane 8:12; Matayo 24:3) Mbiko pa gu “bakere zinga” nga ga Satana, nga gbia “azogo zegino nga ga gi bitimo re,” 20 kama agarã angia bagbegbere regbo rungosi kisusi, nga gu regbo gbarasiyo rago rogo kisusi rogo gu pangbanga nga ga aboro. (Yugoti 12:12; AEfeso 6:12) Dungu aboro kisusi naraka rogo gu bitimo nga ga toro.

² Si ki vura du wo, timarago nahasarago areme. Yekova ‘nahasarago’ kurii gako amoyambu, nga gu yangara mbedimbediyo, nga agu aboro narukuba gako “dee” nga ga ngbangbaturũ auru kpotosende. (Yesaya 60:1, NW ) Agiyo re ayugupa ga Mbori taarimo na i ki ‘mbu gayo timarago si hasirago kurii aboro,’ gbe natona ho i akusi yo ni be gu zio nga ga Babera rogo 1919. (Matayo 5:16) Natona rogo 1919 da ti digido 1931, gu timarago nga ga Kindo ahasarago gbe kina kumbatayo wa agiyo re aabafa gu yangara azogbo tiyo kusayo nga ga agu aberã nga ga Babera. Namba yo azugo kuti abawe akutu wa Yekova adigisi gu gako kidohe nga: “Mi adúngura gu yangara yo nga ga aYisaraere yo; mi amáa yo kina sa wa [avusende] rogo ndugu ra, wa rimbasa [avusende] rogo gaami banambu, baworo[ra] adú mbiko ngenge aboro.” (Mika 2:12) Rogo 1931, ga Yekova taarimo kurii gako aboro aduni yuguyuguhe ziazia kisusi ho i adi gu rimo ni kuriiyo nga aDezire Yekova.—Yesaya 43:10, 12.

3. Waigu si ada ziazia nga ga Yekova timarago ahasarago ahasa kurii kura aboro kparakusayo ti gu mbedimbediyo?

³ Ka Yekova ahasirago sa kina kurii gu yangara yo nga gu “tooni badona avusende”? (Ruka 12:32, NW ) Oó. Gu kusikusi Ngbaõbambu Sinziri nangia ga Mbirinvuo ti rameru 1, rogo 1931 ayugupa kura badona. Rogo wene sakarogo gupai yo du rogo Yezekere 9:1-11, si ayugu gupai nga gu kumba nadu na kambu ime ke waraga nga ga bakeapai beko nga guko gumbayo pako rogo agu averesi re narukuba gu yangara mbedimbediyo. Ada gu “kumba” re anogodihe ti ngbandia kpakpuyo? I nga “gu kura [avusende],” nga aguyo duna gu maabangirise nga ga raka nyeanye kindi rogo paradiso auru kpotosende. (Yoane 10:16; Atambuahe 37:29) Rogo 1935, i ainipa gi badona nga ga “gu kura [avusende]” re, ya si nga gu “bakere rimbasa aboro, . . . dagba rika aboro dunduko” nga aguyo gu mokedi nangia Yoane abiyo rogo yuguyugupai. (Yugoti 7:9-14) Natona rogo 1935 daa ku awere, i amoi berã gbe fuo pa dungura gi bakere rimbasa re.

4. Ada nga agu “abakindo” na gu “rikaaboro” furayo tipayo rogo Yesaya 60:3?

⁴ I afura tipa gi sunge dungura aboro re rogo ga Yesaya sangbanebi ho si aya ni wee: “Arikaaboro ayé sa gaoni imarago, na abakindo sa gaoni imaima imarago.” (Yesaya 60:3) Ada nga agu “abakindo” i afura tipayo herẽ? I nga gu yangara yo nga ga 144,000 yo, kodihe na Yesu Kristo, nga agu aboro nika du ti gu Kindo nga ga ngbangbaturũ na ko, nga aguyo nangbe kumbatayo rogo sunge dezirepai. (ARomo 8:17; Yugoti 12:17; 14:1) Areme, gu bete akutu nga ga yangara mbedimbediyo na bangeyo kusende gbe ti gu “rikaaboro,” nga aguyo duna gu maabangirise nga ga raka auru kpotosende nga aguyo naye koyo du Yekova ni tipa rugute na i kini yambu kura aboro i mangi kina gu bangisapai re.—Yesaya 2:3.

Ga Yekova Ngangara Amoyambu

5. (a) Ginipai nayugoho nga gu du ngangaraa nga ga ga Yekova aboro zeranga te? (b) Gini aringara nadu na bange aboro rogo kisusi akuraha rogo 1999? (Oni bi gu tangaratangara apai dagba gbakigbaki agene du ti kpewaraga 17-20.)

⁵ Nga gu ngara gu ga Yekova aDezire du rogo gaani uru ayuguhe rogo 20 kama agarã nabaha! Fudifudiapai ki vura nimoipai, gayo ngara aazeranga wa gu garã nga 2000 aambeda te. I abi ga Yesu ndika kindi na nyanyakipaha nga gu nayaa: “Oni . . . sa arikaaboro dunduko ni abawiriki.” (Matayo 28:19, 20) Bange abatungusi wene pangbanga nga aguyo namangisunge rogo gu garã nangia ga sunge nasusi nga ga 20 kutu agarã angia 5,912,492. I adi gu iiriwo bange asaa nabaha nga 1,144,566,849 rogo fura fu kura aboro tipa Mbori na gako ringbisaapai. I akaraga tiyo ka bi aboro bara 420,047,796 nga aguyo nadu na nyemu rengo na ki wisigi Baibiri gbua zanga marã na aboro 4,433,884 rogo gayo akporo. Nga gu iiriwo kekepai tipa ngangara sunge!

6. Gini vovo mbakadaapai i amangihe tipa abazakigene, na gini karagapai nadu tipaha?

⁶ Rogo gu Sa Diwi nasusi, Riigbu Bipasunge atingidipa ariapai nibipa gu bange asaa i aidaha be abazakigene. Badungu aboro abi momu be gipai re na i ki rimi kurogo gu sunge nga ga abazakigene ti aregbo-dũ watadu moundo abazakigene. Ni kpiapai, rogo gu bambata adiwi biama nga ga gu garã nga 1999, gu bange asanahe nada kube gu biroo nga ga gu be basunge nga ga Netherlands tipa sunge zakagene ti aregbo-dũ adu bara biama susi gu bangehe nadu vuru gu bangisa regbo re rogo gu garã nadu mbata fu gure. Gu biroo nga ga Ghana natingida gupai nga: “Natona ti gu regbo gu vovo bange asaa i aidaha be abazakigene atona mangasunge, bange gaani abazakigene ima gbiso kuari gbe.” Rogo gu garã nga ga sunge nangia 1999, bange abazakigene rogo zegino dunduko ada nga 738,343—nga gu wenepai nayugopa ‘ngara rogo manga wene asunge.’—Tito 2:14, NW.

7. Waigu Yekova afu maku kurii gu ngangara sunge nga ga gako amoyambu?

⁷ Ya mo Yekova afu maku kurii gi ngangara sunge re? Ii. Rogo Yesaya yo ko nayaa: ‘Oni túka nga bangironi ka ngera nga kirikiri, ka bi nga; i dungura tiyo adungura wa sa dunduko, i naye kono du oni ni; awironi nga akumba ayé gii ngbi yo, i angerafuo awironi nga ade kina pati roni kubani.’ (Yesaya 60:4) Gu mbedimbedi ‘akumbagude’ gbiati ‘adegude’ nga aguyo i nadungura yo nandusunge Mbori kindi ngangaraa. Na awere, i nadungura ga Yesu kura avusende ku pati ga Yekova yangara mbedimbedi ‘akumbagude’ gbiati ‘adegude’ rogo aringara 234 na akisanga nga ga baime.

‘Wene Asunge Dunduko’

8. Gini ‘wene asunge’ du aDezire Yekova rogo zaaza?

⁸ AKristano na gu tindiro kuriyo nga ga tungusa wene pangbanga nga ga Kindo na ka undo agu aboro duna nyemu rengo i dani abawiriki. Ono i ima ‘duna aũmanga wene asunge dunduko beyo.’ (2 Timoteo 3:17) Were, i nangerafuo gayo aborokporo rogo nyemuse, kini di aboro kugume, na kini ndu ka bi aguyo nawoka. (1 Timoteo 5:8; AEbere 13:16) Na agu aboro fu tiyo ka mangasunge niundo namanga asunge wa dudua Abambu Kindo—nga gu sunge a namanga dezirepai. Rogo gu ringara nga Togo, fuo nyasa awirina na sunge dua bambu sa, agu abarumbatayo nga ga gu kanisa naya si na tandu behe ka manga iiriwoapai nga gu du dagba gu rago re aidi ka ino ndu gupai aDezire Yekova arengbe tini ka dua gayo bambu nitiyo baraho gayo kanisa naatumo aboro atumo ni i dua kanisa fuyo! Gu biroo nga ga Togo natingida gupai nga dudua wene nyanyaki Abambu Kindo na wene sangbanaha kurii agu aboro du rogo gu dagbarago re, sidu kura aboro na’asada ka tumo tipa ka raka tii abambu rogo agu arago i ka dua abambu kindo rogo watadu ka dudua kina boro gayo abambu pati ni.

9. Waigu aDezire Yekova naamanga ho agberango ati ni kurii aboro?

⁹ Ti kura aregbo, si naida i mangi gu kura ngbatunga wene sunge a. Gberango ati kurii dungu aringara rogo gu garã nga ga sunge nasusi, na dedede, gu bambata aboro nada rogo gu rago re tipa ka fu undo ningia aDezire Yekova. Ni kpiapai, gu bavugumo du rimoho nga Hurricane Mitch agbarasi bakere papara gu ringara nga Honduras. Ni kina boro ipo, bebasunge ki mbakadi arondo tunguotunguopai tipa i mbakadi apai tipa fu aundo. Agu aDezire du Honduras yo na rogo dungu kura aringara agamu arokoo, riahe, aziga, na gu kura ahe rengbe tipa raka. Arondo nga ga papara Ringara tipa Mekarago amangisunge na gayo abirĩ ka dudua abambu berewe. Ni kina ipo, i aaundo agu awirinarani gberango ati kuriiyo re i karaga tiyo sa gayo asunge wa si adu mbata. ADezire Yekova aye ka undo awirinayo rogo gu ringara nga Ecuador, ho hihi ime akuadi bete akporo ni. Fuo ko bi gu wene gene awirina amangisunge rogo ka nyasa na gupai re, boro biroo nga ga irangbii ayaa: “Ka mi duna gi badona aboro re bere, mi rengbe arengba ka manga iiriwoapai! Si naida agu aboro du wa oni were du rogo apapara zegino dunduko.” Ngbatunga gu wene sunge re nataasa rimo Yekova Mbori na si ki duni gopai tipa gaani ‘sinombori nga gu duni wenehe tipa apai dunduko.’—1 Timoteo 4:8.

I ‘Naye Kini Ya wa Dubo’

10. Wa gu namba nga ga mbedimbediyo avura ni aumba, tipagine takapande rimo Yekova andu tini susi gu nidu mbata?

¹⁰ Yekova nasanahe awere: “Ada nga agi yo naya wa dubo re, wa ambipo sa gaami abangiri abambu? Agu aringara du ti ngba gango baime asúnguda re, na agu abaakurungba nga ga Tarusisa [awa si adu] mbata, ka yega na awironi gii ngbi yo, . . . Kungba aboro adúa gaoni angapa bakporo, gayo abakindo amánga pa roni.” (Yesaya 60:8-10) Agu aboro nakaragapai mbata kuti ga Yekova ‘hasarago’ angia ‘awiriko,’ nga gu mbedimbedi aKristano. “Kungba aboro” ki ngbe fuo gure, nga gu bakere rimbasa, nga aguyo namangasunge niruruhe fu mbedimbedi awirinayo, kini pefuo gu gene i angbe kumbatayo rogo rogo tungusa wene pangbanga. Sidu, wa bange gu mbedimbediyo avura nizogora, i natakapande rimo Yekova pati zegino kirikiri susi gu nidu mbata.

11. (a) Ginipai nandu kindi kumbatayo na sangbanaha angia gine rogo 1999? (b) Gini aringara nadu na bakere bange agu aboro i abapatizi yo rogo susi agu akuraha rogo 1999? (Oni bi gu tangaratangara apai dagba gbakigbaki agene du ti kpewaraga 27-30.)

¹¹ Ni sangbanaha, amirioni aboro natiria wa kina “ambipo sa gaami abangiri abambu,” kini gbia bagbuko rogo gu dungurati nga ga aKristano. I nagbia akama akutu nga ga aboro kuti gi bangeyo re na agarã dunduko, na gene nizazaha kindi tipa gu kura dunguyo a. Yesaya nayaa: “Gaoni angbadimo bakporo adú ni zaza ha a kindi; i akísa nga ha uru na yuru a te; ya aboro niye na kumuko fu roni nga ga arikaaboro.” (Yesaya 60:11) Rogo gu garã nasusi, i abapatizi aboro 323,439 ni kpia gayo kparatise fu Yekova, na ko ata kisanga angbadimo kindi te. “Agu ahe ngba bangiri arikaaboro dunduko,” nga agu aboro nga ga rimbasa yo, nabaka tiyo kindi kurogo agu angbadimo re. (Agai 2:7) Boro ho naida ka mbu bitimo i akaraga ni kusayo te. (Yoane 12:46) Ka ngbatunga agu aboro re ya gbarasinga pa gayo tambuahe tipa gu timarago re ya!

Zanga Gunde Barabangiri Sogote

12. Waigu agu aboro nakpinyemu bitimo a’asadi ka biso timarago?

¹² Aguyo nakpinyemu bitimo nasoga ga Yekova timarago. (Yoane 3:19) Gu kurayo na’asada tiyo a ka biso gu timarago re. Anga tunguotunguopai nga gere te. Zavura kina Yesu, nangia gu “ndikidi imarago . . , nga gu imarago . . . [nahasarago fu] aboro dunduko,” aboro gako ringara asawia ko, ki sogo ko, na niyangaraha i ki imi ko. (Yoane 1:9) Rogo 20 kama agarã dunduko, i asawia aDezire Yekova a, ki kisiyo ku bambukiso yo, ki ka na pa gayo sunge, na ki imi yo a, wa i ayugupa ga Yekova timarago niruru mangapai. Rogo agu agarã susi barambeda, asogo agu aboro nayugopa ga Mbori timarago amere ka gbandaka aziree tipa yo rogo aũgbandaka apangbanga. Gu kura yo naida ka sa aboro i idi gupai nga aDezire Yekova nga kere aboro sidu si naida i dingiso yo kurogo ba sa watadu i ka fuyo ti mangayo gayo sunge. Ngbatunga agu aboro sogote re aduna diabese?

13. Ginipai namangi ni sangbana yugo ani arengo ni birĩ tipa gaani sunge fu aboro rogo aũgbandaka pangbanga?

¹³ Oó. Ho rengbehe ni, aDezire Yekova andu ku ba gbandaka apangbanga yo tipa ka sakarogo rengo yo. Ni sangbanaha, i ima takapande rimo Yekova yasika rogo waraga apangbanga na amagazini na rogo radio na terevizioni. Gere nidu na wene sangbanaha rogo gu sunge nga ga tungusapai. Ni kpiapai, Denmark yo, mbakadapai rogo gu terevizioni nga ga ringara afura tipa gu riipai nga “Ndu gupai gu idapase nga ga aboro Denmark azera tini.” Wa sa na aboro kura apambori, i asana aDezire Yekova. Kusa, gu nagbia nabi gu mbakadapai re ayaa: “Si ayugu agu aboro ziazia gbe duna ga Mbori toro.” I ki tona wisigo Baibiri na ri.

14. Ni pa gberarago, ginipai i ka manga asogo rengo ngbaome i idi paha?

¹⁴ ADezire Yekova ima ino gupai nga dungu aboro rogo gi zegino re nika soga yo. (Yoane 17:14) Si ki vura du wo, ga Yesaya sangbanebi nanyakasa yo: “Awiri agu yo naarungosi roni i ayé ki tumusa fu roni; agu yo dũ napayasi roni i anúgadi pati nduroni; i ayá ti roni, gu Bakporo nga ga Yekova nga Siona nga ga ga Yisaraere Ziazia Ko.” (Yesaya 60:14) Asogoyo nika duna gberarago barambeda, ho i ka ino gupai ni nga, atika kina boro Mbori nirengo i anasovura kuti ko. Da rengbe ka diabe ngbatunga gu vura re?

15. Waigu aDezire Yekova “ambíra gu mamuanya nga ga arikaaboro,” na waigu gere ayugutihe rogo gayo yugopai na sunge tungusa wene pangbanga?

¹⁵ Yekova nakidohe kurii gure niyaa: ‘Mi asá roni ni nyenye he tipa sambuatise. Oni ambíra gu mamuanya nga ga arikaaboro a, ki niha mamu abakindo; oni aina ha ya mi nga Yekova, nga gaoni Batasi.’ (Yesaya 60:15, 16) Ii, Yekova nga Batasi fu gako aboro. Ka i akido kuti ko, i araka ‘nyeanye kindi.’ Na i “ambíra gu mamuanya nga ga arikaaboro,” nimangayo sunge na agu ahe duku ho tipa turuso ndikidi iriso. Ni kpiapai, gu mangasunge na kompiuta nga ga tatamana gbiati mangasunge na birĩ mbakadaahe tipa fura dagbase, na’akpurasi sunge kusa Ngbaõbambu Sinziri rogo afugo 121 na gu magazini nga Oni Zingi Rameyo! rogo afugo 62. I aima mbakada kparakpara mbakadapai nga ga kompiuta tipa si fu undo rogo safugo Sasapai nga ga Vovo Zegino kurogo vovo afugo, na ngbatunga gu sasapai re naye na bakere ngbarago. Ho i akusi sasa Kekeapai nga ga aKristano rogo pa-Giriki ni kurogo pa aboro Croatia rogo 1999, akutu aboro akpari ni aume nga ga ngbarago. Sosono wirina sa ayaa: “Mi aima digo nisungudi gi Baibiri re tipa gbanga regbo gbe. Awere tie, mi rengbe ka kpi rogo pazereda!” Gu bange kparaka Sasapai nga ga Vovo Zegino, nabaha dunduko watadu paparaha, ima susa amirioni 100 rogo afugo 34.

Wene Andika nga ga Sino

16, 17. (a) Wa vura duhe ni kpakarakpakaraha, tipagine duhe tini na nyanyakipaha ka banda ga Yekova wene andika nga ga sino? (b) Ginipai namangi nga gu nayugo gupai nga paranga aboro rengbe arengba ka ne birikosi tiyo na zegino?

¹⁶ Yesu aya: “Gu ni nainga pai ni nasoga imarago.” (Yoane 3:20) Ngba kura gene, aguyo nanye rogo timarago nakpinyemu ga Yekova wene andika nga ga sino. Rogo Yesaya yo, Yekova nayaa: “Gaoni aboro dunduko adú ni ruru yo.” (Yesaya 60:21a) Si rengbe ka duni kpakarakpakarapai ka banda ruru andika rogo gi zegino wasiwasi kodaba, pe ziree, gbangbati, na ruko namoipai rogo re. Ni kpiapai, rogo kura aringara, ahe namaapai, na si taata boro aria tini sa bangisa berã nga ga orafuo kumuko. Ono tie, Pauro azahe ya: “Agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio.” (1 Timoteo 6:9) Nga gu kerepai ngaha, ho boro arimiso tini ni dudunguroo kurogo mangasunge marã sidu ki mbupa agu apai du nirengo na nyanyakipaha, ngbatunga gu du wa gu kodatise nga ga aKristano, ziazia sunge, andika ruru mangaapai, na gu tindiro nga ga aborokporo!

¹⁷ Banda ruru andika rengbe ka du gbe nikpakarakpakaraha fu aparanga, baraho akurayo arimo ni kurogo inga mangasunge na kere angua na kini mangi wasiwasi kodaba. Rogo gu ringara nga Suriname, bawene kumbagude sukuru yo aye koyo du degude ni du garãri 14 na ki sanari tipa ri kodiba na ko. Ri akaha, kini sakirogoyo fuko ya Baibiri aidanga pa ngbatunga agu apai re fu agu aboro ata roganga tiyo ya te. Gu kura adegude sukuru yo asawia ri na kini asadi ka soari ri aria gari berã, kini gumba gupai furi nga adegude dunduko naida ka ra na gu ngisa kumbagude re. Gu paranga degude re ki ru kindi nyanyakii. Fuo bete aposo gbua kusa, i awisigi gu kumbagude re, ki bi agbiro AIDS [SIDA] tiko na ko kini kaza nyanyakii. Gu degude re aduna ngbarago mbiko ri airisi ga Yekova ndika ‘ni ne pa meteka.’ (Amokedi 15:28, 29) ADezire Yekova nasambua tiyo tipa gu paranga aboro du dagba yo nga aguyo naru nyanyakii tipa gupai ruaru. Gayo idapase, na gu nga ga avunguyo, ‘nambakada’ rimo Yekova Mbori—kini irisihe.—Yesaya 60:21b, “oni ringbisingaha na NW.”

Yekova Ima Zugosihe

18. (a) Gini bakerepai Yekova namangihe tipa gako aboro? (b) Gini gopai duho nayugo gupai nga aboro nikaa zugo kina kumbatayo, na gini wene maabangirise nasungudo aguyo nye na timarago?

¹⁸ Ii, Yekova nahasarago kurii gako aboro, kini fu maku fuyo, kini yugu gene fuyo, na kini nyakasi yo. Rogo 20 kama agarã, i abi digisidigisi afugo Yesaya: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” (Yesaya 60:22) Tona ti gu tooni badona aboro nadu rogo 1919, “gu umba pa boro” ima susa “kutu sa.” Na digido gu zugo re ata danga te! Rogo gu garã nasusi aboro 14,088,751 nadu pati gu Tingidapase nga ga kpio Yesu. Dungu aboro dagba agiyo re angianga agu aDezire du ngangaraa te. Ani na ngbarago mbiko i adu pati gu nyanyakipa dunguratise re, na ani nayamba yo i nindu kindi kumbatayo sa gu timarago re. Yekova nahasarago kindi wenengai kurii gako aboro. Ngbadimo gako riigbu kindi nizazaha. Sidu tie, aboro dunduko dinga berã adia ka sungo rogo ga Yekova timarago. Nga gu maku nika du fu rani awere ni sangbana mangaha wo! Na nga gu ngbarago gure nika ye nani kumbatayo ho kusikusiahe dunduko ka sambua rimo Yekova ni na ki gbia ngbarago rogo gu iiriwo ngbanya nga ga gako taarimo!—Yugoti 5:13, 14.

Mo Rengbe ka Sakarogoyo?

• Ada nayugopa ga Yekova taarimo rogo gi yangara arame re?

• Gine nayugo gupai nga gu ngara nga ga ga Yekova aboro azeranga te?

• Bete wene asunge nga gine nga gu aDezire Yekova amangaha?

• Kere sogote ki vura du, gine du ani na kido tipaha?

[gu kekeapai du dagba gbakigbaki agene ti kpewaraga 27-30]

TINGIDAPA SUNGE NGA GA GARÃ NGA GA ADEZIRE YEKOVA ROGO ZEGINO DUNDUKO ROGO 1999

[Gu kpiahe du ti kpewaraga 25]

Aboro natiria kindi kurogo ga Yekova riigbu

[Gu kpiahe du ti kpewaraga 32]

Ani na ngbarago mbiko Yekova mbu ngbadimo nizazaha gbägäzä tipa aguyo nakpinyemu timarago