Tipagine Duhe ti ni Nimbumbupai fu Boro Ni Hõ Mbupai be Kurani?

ROGO Bamburu nigu garã nangia 2000, gu Rondo nga ga Rũ ANdiko Amerika yo rogo gu pavuruhe i ayambaha nga Karifonia arũndiko i ki kehe nga gu ndiko i ambakadihe tipa si dipai kusayo rii agu aboro nayugo nunga fu gu boro gbegberepai amangi ni be gu béno naye be gu boro nayugo nunga re. Ndu rũ gi ndiko re nangia gine? I abi gupai nga, ho béno aye ni be boro ki õgo kurani watadu ho si agbarasapa ga kurani ahe ni, i nidu adu dindikodindiko ka hõ mbupai tipa i ka ndu ka bi gi gayo hõ mbupai re wa i ima idapa gu irairapai mangi, nga, i du ye gi béno re beyo. Ngba kura gene, rago nagbera ti agu aboro nabihe nga, ka gu boro ingi kuti yo re hõ mbupai beyo zanga keesa. Gi zanga hõ mbupai re kini mo ka sa boro wenesa ni ngaria kurogo kere zinga, na gi tooni béno re ki rengbe ka ye na bakere fudifudiapai.

Rengo ngaha, anga si naida oni hõ mbupai tipa gu béno naayenga beroni ya te. Na kura aregbo kina ti ni si aida boro duna rubangirise tipa gupai ni andu ka gumbaha. Kuru sanza nayaa: “Ho du dungu afugo ni, yo du tindika ni a, ono gu ni naruga ngbani namanga pai ni rugatinapai.” (Asanza 10:19; 27:12) Wa vura duhe wo, daha ada oni mangipai na aboro rogo weneringise gbiati irisa.

Ono tie, anga rengo ngaha nga, dungu aboro aima mbu hõ mbupai be akurayo, zavura rogo agu apai angianga ga ngbanga ya tee? Kporo yo dee rengbe ka kpara ki ya, ‘Kumbaami naahõnga mbupai bere te.’ Basunge yo, makungu rengbe ka kpakanahe ki ya, ‘Gimi aborosunge naaidanga pa gayo irairaapai te, ti kina kura aregbo gbua boro sa nihõ mbupai bere.’ Bayugupai rengbe ka tingida gupai tipa agu agude du sukuru yo ya, ‘I ayugonga pai fu agude i ya, “oni mbupai fere” te.’

Ndupai sa dagba agu akuraha nasa boro ka ni hõnga mbupai ya nga gunde i ka gindigo ni. Fuo du ni nifudifudi ni be gu berã nga aboro udinga ni berewe ka ni idipa gani ingapai te, ni aidanga ka gumba gupai nzunzu ni aberãha fuo gipai mangi ni he re te. Oni ngere, sangbana gupai re rengbe ka du nga gu boro imisi yo ni re rengbe rogo apai dũ ka ne gu boro imisi ni, gene mbakadapai dagbayo berewe ki duni kpakarakpakaraha.

Gu kura ndupai nasa kura aboro ka i hõnga mbupai ya nga zingo berãpa kura aboro. I rengbe ka sakapai berãyo yo ki ya, ‘Anga pa sana mi ni ni mbupai fere nika zeresa gu irairapai mangi mi ni nani re te.’ Kurii gure, kura aboro nadindiko adindiko ka hõ mbupai mbiko gu sangbanaha rengbe ka manga yo. I nabaka kina bangiriyo kini ya, ‘Ka mi idihe, i biranga re ti ni na ki sana re mi mbakadi gupai gbarasi mi he re tee?’ Ono tie, gu babakerepai kisusi nakiso gene be aboro i idipa gayo ainga nga ruko. Gu boro ruko nagbarasi pani arengbanga ka yaa, “mi nahõpai bero, mo mbupai fere” te, gupai nzunzu ni aida ka gumbaha nga, ‘Mi aidanga ka ida gipai re aboro gbarasi rimore mbikoho te. Si rengbe ka payasi pare dagba aboro.’

Ka nduhe vurangia kina gine, dungu aboro nabi agu afugo nga ga hõ mbupai nikpakarakpakarapai ka gumbaha. Ono ya mo daha ada nirengo boro hõ mbupai be kurani? Gine nga gu undo rengbe ka ye be hõ boro mbupai be kurani?

[Gu kpiaahe du ti kpewaraga 3]

“I ayugonga pai fu agude i ya, ‘oni mbupai fere’ te”

“Gimi aborosunge naaidanga pa gayo irairaapai te”

“Kumbaami naahõnga mbupai bere te”